“Leksyon 6 Materyal sa Pagpangandam sa Klase: Ang Basahon ni Mormon—ang Sukaranang Bato sa Atong Relihiyon,” Materyal sa Magtutudlo alang sa Mga Pundasyon sa Pagpahiuli (2019)
“Leksyon 6 Materyal sa Pagpangandam sa Klase,” Materyal sa Magtutudlo alang sa Mga Pundasyon sa Pagpahiuli
Leksyon 6 Materyal sa Pagpangandam sa Klase
Ang Basahon ni Mormon—ang Sukaranang Bato sa Atong Relihiyon
Unsa ang inyong pagpamatuod sa Basahon ni Mormon? Unsay inyong mabuhat sa pagpadayon sa pagpalig-on niini? Samtang magtuon kamo sa mosunod nga materyal, kinahanglan nga mas makahimo kamo sa pagpasabut ngano nga ang Basahon ni Mormon mao ang sukaranang bato sa atong relihiyon ug sa atong mga pagpamatuod.
Seksyon 1
Unsa ang pipila ka ebidensya sa katinuod ug kaimportante sa Basahon ni Mormon?
Sa wala madugay human mamantala ang Basahon ni Mormon niadtong Marso 1830, ang Ginoo misugo ni Joseph sa pag-organisar sa gipahiuli nga Simbahan ni Jesukristo. Ang mga misyonaryo nagsugod sa pagpamaligya sa mga kopya sa Basahon ni Mormon samtang sila nagbiyahe. Ang basahon nagsugod nga dunay dakong epekto sa pagpundok sa mga tawo ngadto sa Simbahan.
Sa samang tuig nga ang Basahon ni Mormon gimantala, usa ka batan-ong lalaki nga ginganlan og Parley P. Pratt mibati og kadasig sa pagbaligya sa iyang uma sa Ohio aron siya makasangyaw sa Biblia. Sa wala madugay human mabaligya ang uma, si Parley ug ang iyang asawa, si Thankful, mibiyahe sa silangan. Samtang nagkaduol na sila sa Palmyra, New York, si Parley mibati og pag-aghat nga mokanaog sa barko. Siya mikanaog, ug si Thankful mipadayon sa iyang biyahe. Si Parley dayon milakaw og 16 ka kilometro ngadto sa balay sa usa ka deacon nga Baptist. Ang deacon misulti kaniya mahitungod sa usa ka basahon nga iyang nakuha nga gihubad gikan sa bulawan nga mga palid. Unya si Parley mirekord sa mosunod:
Giablihan nako [ang Basahon ni Mormon] uban sa kahinam, ug gibasa ang ulohang pahina niini. Gibasa dayon nako ang pagpamatuod sa pipila ka mga saksi nga may kalabutan kon sa unsang paagi kini nakit-an ug nahubad. Human niini gisugdan nako kini pagbasa sa han-ay nga paagi. Nagbasa ko sa tibuok adlaw; langay na gani ang mokaon, wala na koy tinguha alang sa pagkaon; langay na gani ang pagkatulog dihang miabut na ang gabii, kay mas ganahan ko nga magbasa kay sa matulog.
Samtang ako nagbasa, ang espiritu sa Ginoo diha kanako, ug ako nasayud ug nakasabut nga ang basahon tinuod, ingon ka yano ug ka tataw ingon sa usa ka tawo nga nakasabut ug nasayud nga siya buhi. (Autobiography of Parley P. Pratt, ed. Parley P. Pratt Jr. [1938], 37)
Sukad sa unang mga adlaw sa Simbahan, minilyon ka tawo ang nakadiskobre unsay gitudlo sa Espiritu Santo kang Parley nianang gabhiona—nga ang Basahon ni Mormon tinuod. Ang mga sulod niini pulong sa Dios.
Samtang gikompleto ni Joseph Smith ang hubad sa Basahon ni Mormon niadtong Hunyo 1829, ang Ginoo Mismo mipamatuod sa katinuod niini.
Pagtuon agi og Pagpangandam alang sa Klase
Basaha ang Doktrina ug mga Pakigsaad 17:6.
Ang Ginoo dayon mipamatuod sa katinuod sa Basahon ni Mormon ug mihatag og mga rason sa Iyang pagpatungha niini.
Pagtuon agi og Pagpangandam alang sa Klase
Basaha ang Doktrina ug mga Pakigsaad 20:8–12, 14.
Paglabay sa katuigan, usa ka Dominggo niadtong 1841, si Propeta Joseph Smith migahin sa adlaw sa pagpakigtambag sa Napulog Duha ka mga Apostoles didto sa balay ni Presidente Brigham Young, kinsa nagserbisyo nianang higayuna isip presidente niana nga korum. Samtang nakigsulti kanila sa lain-laing mga hilisgutan, si Joseph mitudlo sa kaimportante sa Basahon ni Mormon:
Ako misulti sa mga kaigsoonan nga ang Basahon ni Mormon mao ang labing tukma sa bisan hain nga basahon dinhi sa yuta, ug ang sukaranan sa atong tinuohan, ug ang tawo labi pa nga maduol sa Dios pinaagi sa pagsunod sa iyang mga lagda, kay sa bisan hain nga basahon. (Mga Pagtulun-an sa mga Presidente sa Simbahan: Joseph Smith [2007], 75)
Tun-i ang mosunod nga mga seksyon aron makat-on pa og dugang mahitungod niini nga mga kamatuoran nga gitudlo ni Propeta Joseph.
Seksyon 2
Unsa ang gipasabut nga ang Basahon ni Mormon mao ang labing tukma sa bisan hain nga basahon dinhi sa yuta?
Si Elder David A. Bednar sa Korum sa Napulog Duha ka mga Apostoles mitudlo:
Ang Basahon ni Mormon mao ang labing tukma sa bisan hain nga basahon dinhi sa yuta tungod kay kini nagsentro sa Kamatuoran (tan-awa sa Juan 14:6; 1 Nephi 13:40), gani kang Jesukristo, ug mipahiuli sa yano ug bililhon nga mga butang nga giwagtang gikan sa tinuod nga ebanghelyo (tan-awa sa 1 Nephi 13:26, 28–29, 32, 34–35, 40). Ang talagsaon nga pagtipon niining duha ka kapasikaran—ang pagtunong diha sa Manluluwas ug sa ka yano sa mga panudlo—gamhanan nga nagdapit sa panghimatuod nga pagsaksi kalabut sa ikatulo nga miyembro sa Dios nga Kapangulohan, gani ang Espiritu Santo. Sa ingon, ang Basahon ni Mormon mosulti ngadto sa espiritu ug ngadto sa kasingkasing sa tigbasa sama nga wala nay laing volume sa kasulatan. (David A. Bednar, “Magtukaw uban sa Bug-os nga Pagkamapadayunon,” Liahona, Mayo 2010, 41)
Pamalandong agi og Pagpangandam alang sa Klase
Unsa nga mga kamatuoran gikan sa Basahon ni Mormon ang nakapalig-on sa inyong pagtuo ni Jesukristo ug sa Iyang gipahiuli nga ebanghelyo?
Seksyon 3
Sa unsa nga paagi nga ang Basahon ni Mormon mao ang sukaranang bato sa atong relihiyon?
Kon tukuron ang usa ka arko, ang duha ka daplin tukuron uban ang mga sangga aron hawiran kini. Ang haw-ang diha sa kinatas-an sa arko mainampingong sukdon, ug ang sukaranang bato silsilon aron hingpit kining mohaum. Kon mapahaum na ang sukaranang bato, ug ang kabug-aton gikan sa laing mga bato anaa niini, makabarug ang arko nga walay mga sangga.
Si Presidente Ezra Taft Benson mipasabut kon sa unsa nga paagi nga ang Basahon ni Mormon mao ang sukaranang bato sa atong tinuohan:
Adunay tulo ka mga pamaagi diin ang Basahon ni Mormon mao ang sukaranang bato sa atong tinuohan. Kini mao ang sukarang bato sa atong pagsaksi kang Kristo. Kini mao ang sukaranang bato sa atong doktrina. Kini mao ang sukaranang bato sa atong pagpamatuod.
Ang Basahon ni Mormon mao ang sukaranan sa atong pagsaksi ni Jesukristo. … Kadaghanan sa Kristiyanismong kalibutan karon nagsalikway sa kabalaan sa Manluluwas. Ilang gikwestyon ang Iyang milagroso nga pagkatawo, Iyang hingpit nga kinabuhi, ug ang katinuod sa Iyang mahimayaong pagkabanhaw. Ang Basahon ni Mormon nagtudlo sa yano ug tataw nga mga termino kabahin sa kamatuoran sa tanan niadtong mga butanga. Kini naghatag usab sa labing kompleto nga pagpasabut sa doktrina sa Pag-ula. …
Ang Basahon ni Mormon mao usab ang sukaranang bato sa doktrina sa Pagkabanhaw. … Ang Basahon ni Mormon nagtanyag og daghan kaayo nga makapalapad sa atong pagsabut sa mga doktrina sa kaluwasan. Kon wala kini, kadaghanan sa gipangtudlo sa ubang mga kasulatan dili hapit mahimong yano ug bililhon. …
… Ang Basahon ni Mormon mao ang sukaranang bato sa pagpamatuod. Sama nga ang arko malumpag kon tangtangon ang sukaranang bato, mao usab ang tanan diha sa Simbahan mobarug o mapukan uban sa kamatuoran sa Basahon ni Mormon. … Kon tinuod ang Basahon ni Mormon … dayon ang tawo kinahanglan gayud nga modawat sa mga pag-angkon sa Pagpahiuli ug sa tanan nga nag-uban niini. (Ezra Taft Benson, “Ang Basahon ni Mormon—Sukaranang Bato sa Atong Tinuohan,” Liahona, Okt. 2011, 54–55)
Pamalandong agi og Pagpangandam alang sa Klase
Sa unsa nga mga paagi nga ang Simbahan mobarug o mapukan uban sa kamatuoran sa Basahon ni Mormon? Sa unsa nga paagi nga ang Basahon ni Mormon usa ka sukaranang bato sa inyong personal nga pagpamatuod?
Seksyon 4
Sa unsa nga paagi nga ang Basahon ni Mormon nagtabang kanato nga mas maduol sa Dios?
Ikonsiderar ang pagmarka sa mga pulong sa mosunod nga mga pamahayag nga nagtudlo kon sa unsa nga paagi nga ang Basahon ni Mormon nagtabang nato nga mas mahiduol ngadto sa Dios ug nagpanalangin sa atong kinabuhi.
Si Presidente Benson mitudlo:
Adunay gahum diha sa [Basahon ni Mormon] nga magsugod sa pagdagayday sa inyong kinabuhi sa higayon nga sugdan ninyo ang tinuoray nga pagtuon sa basahon. Makaplagan ninyo ang mas dako nga gahum sa pagpakigbatok sa pagsulay. Makaplagan ninyo ang gahum sa paglikay sa panglingla. Makaplagan ninyo ang gahum nga magpabilin sa higpit og pig-ot nga dalan. Ang mga kasulatan mao ang gitawag og ‘ang mga pulong sa kinabuhi’ (Doktrina ug mga Pakigsaad 84:85), ug walay laing mas tinuod pa kay sa Basahon ni Mormon. Kon kamo magsugod sa pagkagutom ug pag-uhaw niadto nga mga pulong, kamo makakaplag sa kinabuhi nga mas mabungahon. (Ezra Taft Benson, “Ang Basahon ni Mormon—Sukaranang Bato sa Atong Tinuohan,” 57)
Si Presidente Henry B. Eyring sa Unang Kapangulohan mipamatuod usab:
Ang epekto sa Basahon ni Mormon diha sa inyong kinaiya, gahum, ug kaisug sa pagsaksi sa Dios tinuod. Ang doktrina ug ang walay kahadlok nga mga ehemplo niana nga basahon mobayaw, mogiya, ug modasig kaninyo. … Ang mainampuong pagtuon sa Basahon ni Mormon molig-on sa pagtuo diha sa Dios nga Amahan, sa Iyang Pinalanggang Anak, ug sa Iyang ebanghelyo. Kini molig-on sa inyong pagtuo sa mga propeta sa Dios, karaan ug sa karon. Kini mas makapaduol ninyo sa Dios kay sa bisan unsa nga basahon. Kini makapausab og kinabuhi ngadto sa mas maayo. … Nangamuyo ako kaninyo sa pagtuon og maayo ug sa kanunay gikan sa mga pahina niini. (Henry B. Eyring, “Usa ka Saksi,” Liahona, Nob. 2011, 68–71)
Ug si Presidente Russell M. Nelson misaad:
“Mosaad ako kaninyo nga kon mainampuon kamo nga magtuon sa Basahon ni Mormon kada adlaw, makahimo kamo og mas maayong mga desisyon—kada adlaw. Mosaad ako nga kon mamalandong kamo sa unsay inyong gitun-an, ang mga bintana sa langit mobukas, ug makadawat kamo sa mga tubag sa inyong mga pangutana ug direksyon sa inyong kinabuhi. Mosaad ako nga kon inyong isub-sob ang inyong kaugalingon sa Basahon ni Mormon, mapanalipdan kamo batok sa mga dautan niining panahona, bisan ang grabing pagtakboy sa pornograpiya ug sa ubang matang sa adiksyon. (Russell M. Nelson, “Ang Basahon ni Mormon: Unsa kaha ang Imong Kinabuhi Kon wala Kini?” Liahona, Nob. 2017, 62–63)
Irekord ang Inyong mga Hunahuna
Sa unsa nga paagi nga ang pagsunod sa mga pagtulun-an nga anaa sa Basahon ni Mormon makatabang kaninyo nga mas maduol sa Dios? Unsa ang pipila ka mga tudling sa kasulatan gikan sa Basahon ni Mormon nga nakatabang ninyo aron mas mahisama Kaniya? Irekord ang inyong mga tubag niini nga mga pangutana diha sa luna nga giandam. Tambong sa klase nga andam nga mopakigbahin sa inyong hunahuna.