“Leksyon 14 Materyal sa Pagpangandam sa Klase: Ang Ginoo Mipadayag og Dugang nga Kasulatan,” Materyal sa Magtutudlo alang sa Mga Pundasyon sa Pagpahiuli (2019)
“Leksyon 14 Materyal sa Pagpangandam sa Klase,” Materyal sa Magtutudlo alang sa Mga Pundasyon sa Pagpahiuli
Leksyon 14 Materyal sa Pagpangandam sa Klase
Ang Ginoo Mipadayag og Dugang nga Kasulatan
Si Presidente Russell M. Nelson nakabantay, “Pinaagi [ni Propeta Joseph Smith] nakadawat kita og mas daghan pang kasulatan kay sa nadawat nato gikan sa ubang propeta” (“Pahimusli ang Panahon,” Liahona, Mayo 2013, 47). Ang mga kasulatan nga gipadala pinaagi ni Joseph Smith naghatag og gamhanang saksi sa iyang balaang tawag isip usa ka propeta. Samtang ikaw magtuon, hunahunaa kon giunsa sa dugang nga kasulatan paglig-on ang imong pagsabut ug pagpamatuod kabahin sa Langitnong Amahan, ni Jesukristo, ug sa Ilang ebanghelyo.
Seksyon 1
Unsa ang atong gituohan mahitungod sa nagpadayon nga pagpadayag ug sa dugang nga kasulatan?
Ngadto sa usa ka editor sa pamantalaan sa Chicago kinsa nangutana mahitungod sa mga tinuohan sa ang Simbahan ni Jesukristo, mipahayag si Joseph Smith: “Kami nagtuo sa tanan nga gipadayag sa Dios, sa tanan nga gipadayag Niya karon, ug kami nagtuo nga Siya mopadayag pa og daghan nga dagko ug mahinungdanon nga mga butang kalabut sa Gingharian sa Dios” (Mga Artikulo sa Hugot nga Pagtuo 1:9).
Kining pagtuo sa nagpadayon nga pagpadayag pinaagi sa buhing mga propeta maoy usa ka talagsaong doktrina sa Ang Simbahan ni Jesukristo sa mga Santos sa Ulahing mga Adlaw. Agi og dugang ngadto sa Balaang Biblia, nagkat-on kita og mahinungdanong mga kamatuoran gikan sa Basahon ni Mormon, Doktrina ug mga Pakigsaad, ug Perlas nga Labing Bililhon, tanan diin atong gihunahuna isip kasulatan.
Ang Hubad ni Joseph Smith sa Biblia, agi og dugang sa pagpatin-aw sa daghang mga tudling sa Biblia, nagpahiuli usab sa daghang yano ug bililhong mga kamatuoran nga nawala sulod sa dugay na kaayong mga panahon.
Seksyon 2
Sa unsang paagi nga ang pagtuon sa Doktrina ug mga Pakigsaad nagpanalangin sa akong kinabuhi?
Misulat si Propeta Joseph Smith, “Niining unang mga adlaw sa Simbahan, may dako kaayo nga tinguha sa pagbaton sa pulong sa Ginoo diha sa matag hilisgutan nga kalabut sa atong kaluwasan” (History, 1838–1856 [Manuscript History of the Church], volume A-1, 146, josephsmithpapers.org). Mabination ug gibalik-balik sa Ginoo pagtubag kini nga mga tinguha pinaagi sa pagpadayag.
Natukod ang Simbahan kapin sa 18 ka bulan pa lamang sa dihang ang Propeta misugyot ngadto sa usa ka grupo sa mga elder diha sa usa ka komperensya sa Hiram, Ohio, nga ilang tigumon ug imantala ang mga pagpadayag nga gihatag sa Ginoo. Ang pagbuhat sa mao maghimo sa mga pagpadayag nga mapuslan sa tanang mga miyembro sa Simbahan ug makatabang sa misyonaryong buhat. Ang mga miyembro sa Simbahan nga diha niini nga komperensya mipahayag nga ang mga pagpadayag may “bili … sa mga katigayunan sa tibuok Yuta” (Minute Book 2, 18, josephsmithpapers.org). Sa mubo nga panahon, ang mga pagpadayag namantala sa usa ka volume nga gitawag og ang Basahon sa mga Sugo. Human niana, kini ug ang gidugang nga mga pagpadayag gimantala isip ang Doktrina ug mga Pakigsaad.
Ang pasiuna sa Doktrina ug mga Pakigsaad nagtabang kanato sa pagsabut kon nganong ang usa ka tinipon nga mga pagpadayag bililhon kaayo: “Ang mga mensahe, mga pasidaan, ug mga awhag alang sa kaayohan sa tanan nga mga katawhan ug naglakip og pagdapit sa tanan nga mga katawhan sa tanang dapit sa pagpaminaw sa tingog ni Ginoong Jesukristo, namulong ngadto kanila alang sa ilang temporal nga kaayohan ug sa ilang walay katapusan nga kaluwasan” (pasiuna sa Doktrina ug mga Pakigsaad; tan-awa usab sa Doktrina ug mga Pakigsaad 18: 34–36).
Sa panahon sa komperensya sa mga elder, nadawat ni Joseph ang usa ka pagpadayag nga karon gi-rekord diha sa Doktrina ug mga Pakigsaad 1. Kini mao ang kaugalingon nga pasiuna sa Ginoo ngadto sa mga pagpadayag.
Pagtuon agi og Pagpangandam alang sa Klase
Basaha ang Doktrina ug mga Pakigsaad 1:17, 21–23, 37.
Pamalandong agi og Pagpangandam alang sa Klase
Paghunahuna mahitungod kon sa unsa nga paagi ang Ginoo namulong nganha kanimo pinaagi sa imong pagtuon sa Doktrina ug mga Pakigsaad. Pangita og tudling sa kasulatan gikan sa Doktrina ug mga Pakigsaad nga nakapalig-on sa imong pagtuo diha ni Jesukristo. Tambong sa klase nga andam nga mopakigbahin niini nga tudling.
Seksyon 3
Unsa ang gidugang sa Hubad ni Joseph Smith ug sa Perlas nga Labing Bililhon ngadto sa akong pagsabut sa Manluluwas ug sa Iyang ebanghelyo?
Mipakita si Joseph Smith og usa ka dakong gugma alang sa Biblia sa tibuok niyang kinabuhi. Bisan pa niana, nahibalo siya nga adunay mga problema sa basahon. Miingon siya:
Mituo ako sa Biblia nga tinuod kon nagagikan kini sa pluma [pen] sa orihinal nga mga tigsulat. Ignorante nga mga maghuhubad, dili mabinantayon nga mga magsusulat, o malinglahon ug limbungan nga mga pari ang nakahimo og daghang mga kasaypanan. (Mga Pagtulun-an sa mga Presidente sa Simbahan: Joseph Smith [2007], 248)
Sinugdanan sa ting-init sa 1830 gisugdan ni Joseph Smith ang dinasig nga hubad sa Biblia. Wala niya hubara ang Biblia gikan sa usa ka pinulongan ngadto sa lain, ni siya adunay orihinal nga biblikanhong manuskrito nga kabasihan sa pagtrabaho. Hinoon, gibasa ug gitun-an ni Joseph ang mga tudling gikan sa King James Version sa Biblia ug unya mihimo og mga koreksyon ug mga pagdugang sumala sa pagdasig sa Espiritu Santo.
Mga bahin sa dinasig nga mga pag-usab makaplagan diha sa mga footnote ug appendix sa pipila ka mga edisyon sa Biblia ug diha sa Giya ngadto sa mga Kasulatan (scriptures.ChurchofJesusChrist.org).
Ang Perlas nga Labing Bililhon maoy usa ka koleksyon sa dinasig nga mga teksto nga nagpatin-aw ug nagdugang sa atong pagsabut sa ebanghelyo. Ang basahon ni Moises naglangkub sa mga kinutlo gikan sa hubad ni Joseph Smith sa unang unom ka mga kapitulo sa Genesis diha sa Biblia. Ang Joseph Smith—Mateo usa ka bahin sa Hubad ni Joseph Smith sa Mateo 23 ug 24 nga makaplagan diha sa Bag-ong Tugon. Ang Joseph Smith––Kasaysayan ug ang Mga Artikulo sa Hugot nga Pagtuo mga bahin sa pagpamatuod ug pamahayag sa mga pagtuo ni Joseph.
Ang Perlas nga labing Bililhon usab naglangkub og pipila sa mga panulat ni patriyarka Abraham. Sa ting-init sa 1835, usa ka tawo nga ginganlan og Michael Chandler miabut sa Kirtland, Ohio, nga may upat ka mga mummy [patay nga lawas sa tawo nga gi-preserbar] ug nagkalainlaing karaan nga mga papyrus nga nadiskubrehan didto sa Thebes, Ehipto. Gi-eksamen ni Propeta Joseph Smith ang mga linukot nga papyrus ug human gihubad ang “pipila sa mga simbolo o mga hiroglipiya,” mipahayag siya nga “usa sa mga linukot naglangkub sa mga sinulat ni Abraham, laing mga panulat ni Jose sa Ehipto” (History, 1838–1856, volume B-1 [1 Septyembre 1834–2 Nobyembre 1838], 596). Uban sa tabang sa mga miyembro sa Simbahan, gipalit sa Propeta ang mga mummy, duha ka mga linukot nga papyrus, ug ubay-ubay nga gidaghanon sa mga tipik sa papyrus. Gihubad niya ang usa ka bahin sa mga panulat ni Abraham pinaagi sa gasa ug gahum sa Dios ug sa wala madugay gimantala kini og una diha sa pamantalaan sa Simbahan, ang Times and Seasons, isip ang basahon ni Abraham.
Pamalandong agi og Pagpangandam alang sa Klase
Pangita og usa ka tudling sa kasulatan gikan sa Hubad ni Joseph Smith o sa Perlas nga Labing Bililhon nga nakapaayo sa imong pagsabut sa ebanghelyo sa Manluluwas. Kon ikaw dili makahunahuna og usa, mahimo kang mopili og usa gikan sa mosunod nga lista. Sulod sa klase nga andam sa pagpakigbahin sa imong tudling ug nganong gipili mo kini.
-
Hubad ni Joseph Smith, Juan 1:19 (diha sa appendix sa Biblia; itandi sa Juan 1:18); Hubad ni Joseph Smith, Juan 4:26 (sa Juan 4:24, footnote a)
-
Hubad ni Joseph Smith, Mateo 7:1–2; Hubad ni Joseph Smith, Lucas 6:29–30 (diha sa appendix sa Biblia; itandi sa susamang mga tudling sa Mateo ug Lucas sa tinagsa)
Seksyon 4
Unsa ang basahon ni Abraham?
Ang basahon ni Abraham mao ang usa ka basahon sa kasulatan nga nag-asoy sa mga bahin niining sayo nga kinabuhi sa propeta sa iyang kaugalingong mga pulong. Nag-asoy kini sa iyang tinguha nga “mahimong usa ka sumusunod sa pagkamatarung” (Abraham 1:2) ug sa pagsalig nga iyang gibutang diha sa Ginoo, kinsa milagrosong miluwas kaniya human ang iyang “mga amahan” midala kaniya aron isakripisyo sa pari ni Paraon (tan-awa sa Abraham 1:5–7, 30). Gitudlo usab niini nga basahon ang lawom nga mga kamatuoran kalabut ngadto sa Abrahamic nga pakigsaad, ang kinabuhi nga wala pa dinhi sa yuta, ang mahangturong kinaiyahan sa mga espiritu, ang gi-orden nang daan, ang Konseho sa Langit ug ang katuyoan sa kinabuhi, ug ang pagplano ug paglalang sa yuta. Labing mahinungdanon, kini nagpamatuod ni Jesukristo––sa Iyang wala pa dinhi sa yuta nga pagkagamhanan, sa Iyang kalooy ug Iyang gahum sa pagluwas sa mga anak sa Dios, ug sa Iyang mahinungdanong tahas sa plano sa Langitnong Amahan.
Ang mosunod nga mga hilisgutan nagtubag sa unsay atong nahibaloan ug wala mahibaloi mahitungod sa pagtungha sa basahon ni Abraham.
Ang Basahon ni Abraham ug ang Karaang Kalibutan
Ang basahon ni Abraham talagsaong nahiuyon kanunay sa unsay nakat-unan sa mga iskolar mahitungod sa karaang kalibutan. Ang pipila niini nga kahibalo wala pa madiskubre o wala pa kaayo mabantog sa panahon ni Joseph Smith. Sama pananglit, kini kanhiay gihunahuna nga ang mga Ehiptohanon wala magsakripisyo og tawo ingon nga gihulagway diha sa basahon ni Abraham (tan-awa sa Abraham 1:8–15; “Usa ka Kinopya gikan sa Basahon ni Abraham,” Nu. 1). Bag-ohay nga makasaysayanong mga nakaplagan, karon nagmatuod nga sila mihimo ug nga kana gitumong batok niadtong kinsa mihagit sa mga relihiyosong gipangbuhat sa mga Ehiptohanon, sama sa mga anak nga babaye ni Onitah nga gipasabut diha sa Abraham 1:11 nga gihalad.
Ang mga iskolar nakakaplag usab nga ang mga sakripisyo nahitabo dili lamang sa Ehipto apan sa mga dapit usab nga ubos sa Ehiptohanong impluwensya (tan-awa sa Abraham 1:1, 5–11). Ang basahon ni Abraham nagpasabut ngadto “sa kapatagan sa Olishem” duol sa yuta sa Ur ug Haran (tan-awa sa Abraham 1:10). Kining dapit-ngalan wala mailhi sa tanan sa panahon ni Joseph Smith. Hinoon, ang karaang mga teksto nga nadiskubre sukad niana nagpasabut ngadto sa usa ka dapit nga ginganlan og Ulishem duol sa Haran nga mahimong moduyog sa siyudad nga gihisgutan diha sa basahon ni Abraham. May gidaghanon usab sa karaang mga teksto nga nagpasabut ngadto ni Abraham nga nagtudlo sa mga Ehiptohanon nga naggamit og astronomiya (tan-awa sa Abraham 3:1–15; “Kinopya,” Nu. 3). Ubang karaan nga mga dokumento nag-asoy sa panan-awon ni Abraham sa Paglalang ug naghulagway sa usa ka langitnong konseho diin ang paglalang sa katawhan gihisgutan ug giplano (tan-awa sa Abraham 3:23–25; 4:26–27). Kining mga kanunay nga nahiuyon mga timailhan sa pagkatinuod sa basahon ni Abraham.
Alang sa dugang nga impormasyon, tan-awa usab sa “Translation and Historicity of the Book of Abraham,” Mga Hilisgutan sa Ebanghelyo, topics.ChurchofJesusChrist.org; Daniel C. Peterson, “News from Antiquity,” Ensign, Ene. 1994, 16–21; ug Kerry Muhlestein, “Egyptian Papyri and the Book of Abraham: A Faithful, Egyptological Point of View,” sa Robert L. Millet, ed., No Weapon Shall Prosper: New Light on Sensitive Issues (2011), rsc.byu.edu.
Ang Ehiptohanong Papyri
Human sa kamatayon ni Joseph Smith, gibaligya sa iyang pamilya sa kadugayan ang mga mummy ug mga papyri. Kadaghanan sa mga papyri gituohan nga nasunog sa Dakong Sunog sa Chicago kaniadtong 1871. Bisan pa niana, sa 1967 ang Metropolitan Museum of Art sa New York mihatag sa Simbahan og mga tipik sa mga papyri nga kaniadto iya ni Propeta Joseph Smith. Kining nakuha og balik nga mga tipik gikan sa pila ka siglo nga wala pa si Kristo, dugay na human namatay si Abraham.
Ang mga tigtuki misulay sa paggamit og petsa sa mga tipik sa papyrus aron sa pagpaduda sa katinuod sa basahon ni Abraham. Hinoon, ang mga tipik sa papyrus dili kinahanglan nga magkasama og petsa sa panahon ni Abraham aron mahimong tinuod ang basahon ni Abraham. Ang karaang mga teksto kasagarang ihatag isip mga kopya o mga kopya sa mga kopya. Sama pananglit, ang labing karaang makita nga mga manuskrito sa mga basahon sa Biblia gikan sa mga siglo human kini orihinal nga gisulat (tan-awa sa John Gee, A Guide to the Joseph Smith Papyri [2000], 23–25, scholarsarchive.byu.edu; Kerry Muhlestein, “Egyptian Papyri and the Book of Abraham: Some Questions and Answers,” Religious Educator, vol. 11, nu. 1 [2010], 91–108).
Pipila ka mga indibidwal nagtuki usab sa basahon ni Abraham tungod kay ang modernong mga hubad sa mga tipik sa papyrus, nga naglangkub og karaang Ehiptohanong mga teksto sa patay, wala motukma sa teksto sa basahon ni Abraham. Mahimong adunay pipila ka posibleng mga rason alang niini.
Usa sa mga tipik sa papyrus naglakip og usa ka bahin sa imahe nga sa karon Kinopya 1 diha sa basahon ni Abraham. Pipila ang nagtuo nga ang teksto duol niini nga imahe tingali mao ang tinubdan gikan diin gihubad ni Joseph Smith ang basahon ni Abraham. Hinoon, kini sagad nga makakita og mga imahe sa Ehiptohanong papyri nga pipila ang gilay-on gikan sa teksto nga naghulagway niini. Mga saksi mihulagway “og gidaghanon sa mga rekord, gisulat diha sa papyrus,” lakip ang “usa ka taas nga linukot” o daghang “mga linukot” sa papyrus (tan-awa sa John Gee, An Introduction to the Book of Abraham [2017], 5). Samtang naghubad, si Propeta Joseph Smith tingali nagtrabaho sa mga seksyon sa papyri nga sa wala madugay nangadaut. Busa, wala kita mahibalo hain sa mga seksyon sa papyri gigamit ni Joseph diha sa proseso sa paghubad.
Ang uban nagsugyot nga tingali ang basahon ni Abraham, o mga bahin niini, wala magagikan sa usa ka takdo nga hubad sa papyri. Sumala niini nga hunahuna, ang pagtuon ni Joseph sa mga Ehiptohanong hieroglyph tingali migiya ngadto sa usa ka pinadayag mahitungod sa importanting mga hitabo ug mga pagtulun-an diha sa kinabuhi ni Abraham, susama sa paagi nga nadawat sa Propeta ang basahon ni Moises samtang nagtuon sa Biblia. Ni ang Ginoo ni si Joseph Smith mipasabut sa proseso kon giunsa paghubad ang basahon ni Abraham.
Usa ka Saksi gikan sa Dios
Ang basahon ni Abraham usa ka gasa gikan sa Dios. Sama sa tanang mga kasulatan, ang pagtuo sa katinuod sa mga sulod sa basahon ni Abraham una sa tanan usa ka butang nga nagkinahanglan og hugot nga pagtuo. Usa ka balaang saksi sa mga pagtulun-an niini pinaagi sa mainampuong pagtuon ug pagpadayag gikan sa Espiritu Santo mao ang labing dako nga ebidensya nga kini tinuod. Si Presidente Dieter F. Uchtdorf, samtang nagserbisyo diha sa Unang Kapangulohan, mipamatuod: “Adunay usa ka tinubdan sa kamatuoran nga hingpit, husto, ug dili madaot. Kana nga tinubdan mao ang atong walay kinutuban sa kaalam ug kahibalo sa tanan ang Langitnong Amahan” (“What Is Truth?” [debosyonal sa Brigham Young University, Ene. 13, 2013], 5, speeches.byu.edu).