Leksyon 24 Materyal sa Magtutudlo

Si Propeta Joseph Smith—Usa ka Pinili nga Manalagna

Gihulagway sa Ginoo si Propeta Joseph Smith isip “usa ka pinili nga manalagna” kinsa “pagatahuron pag-ayo” sa iyang mga katawhan.(2 Nephi 3:7). Apan bisan pa sa tanang maayong gibuhat sa Ginoo pinaagi ni Joseph Smith, ang Propeta dihay daghan nga mga mananaway. Kini nga leksyon moandam sa mga estudyante sa pagtubag uban sa hugot nga pagtuo ngadto sa mga pagpanaway batok ni Joseph Smith ug sa paglig-on sa ilang gituohan nga ang Ginoo nagtabang niadtong Iyang mga gitawag.

Mga Sugyot alang sa Pagtudlo

Gitawag sa Ginoo si Joseph Smith diha sa iyang kahuyang ug gitabangan siya nga mahimong usa ka pinili nga manalagna.

Ipakita ang mosunod nga painting sa batan-ong Joseph Smith.

Dapita ang mga estudyante sa pagpakigbahin og mga pulong ug hugpong sa mga pulong gikan sa seksyon 1 sa materyal sa pagpangandam nga naghulagway kon unsay gibati ni Joseph mahitungod sa iyang mga abilidad diha sa panahon nga siya gitawag sa pagtabang sa pagpahiuli sa ebanghelyo ni Jesukristo.

Dapita ang mga estudyante sa paghunahuna mahitungod sa mga panahon nga sila mibati nga nasanapan o may kakulangan sa pagbuhat unsay gipabuhat sa Ginoo o gihangyo sa Iyang mga sulugoon nga ilang buhaton.

Ipasabut nga ang tawag sa Ginoo ni Joseph Smith nagtudlo og usa ka gamhanang baruganan nga makatabang kanato kon mobati kita og kahuyang o kakulangan sa paghimo sa buhat sa Ginoo. Diha sa Basahon ni Mormon, giasoy ni propeta Lehi ang usa ka propesiya ni Jose sa Ehipto. Basaha ang 2 Nephi 3:6–11, 15 isip usa ka klase, mangita alang sa mga pulong o mga hugpong sa mga pulong nga gigamit sa Ginoo sa paghulagway sa usa ka umaabut nga propeta kinsa paganganlan usab og Jose (Joseph).

• Unsa ang pipila ka mga pulong o mga hugpong sa mga pulong nga gigamit sa Ginoo sa paghulagway ni Joseph Smith ug sa buhat nga Siya motabang nga matuman?

• Unsa nga tahas nga ang Manluluwas nagsaad nga himoon diha sa buhat nga si Joseph gitawag sa pagbuhat?

Basaha ang 2 Nephi 3:13 ug ang Doktrina ug mga Pakigsaad 124:1 isip usa ka klase, mangita alang sa giunsa paghulagway sa Ginoo si Joseph Smith. Ipa-report sa mga estudyante kon unsay ilang nakaplagan.

• Giunsa kaha sa imong hunahuna ang kaalam sa Ginoo napakita pinaagi sa pagtawag sa “huyang nga mga butang sa yuta” sa paghimo sa Iyang buhat? (Doktrina ug mga Pakigsaad 124:1).

• Unsa nga mga leksyon ang atong makat-unan gikan sa pagtawag sa Ginoo ni Joseph Smith diha sa iyang kahuyang?

I-display ang mosunod nga baruganan nga gitudlo ni Elder Neal A. Maxwell sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog:

Usa sa labing gamhanang mensahe nga miabut gikan sa paggamit sa Ginoo ni Joseph Smith isip ‘usa ka pinili nga manalagna’ sa ulahing mga adlaw mao nga sa pagkatinuod adunay paglaum alang sa matag usa kanato! Ang Ginoo makatawag kanato diha sa atong mga kahuyang ug gani makapalambo kanato alang sa Iyang mga katuyoan. (Neal A. Maxwell, “A Choice Seer,” Ensign, Ago. 1986, 14; mga italic gidugang)

• Unsaon niini nga baruganan pagtabang sa mga katawhan kinsa nakigbisog uban sa tawhanong kahuyang nga ilang nakita diha sa ilang mga kaugalingon, sa ilang mga lider sa Simbahan, ug sa ubang mga miyembro?

• Kanus-a ka mibati nga ang Ginoo mipalambo sa imong mga abilidad sa paghimo sa Iyang buhat, bisan pa man sa imong mga kahuyang? Kanus-a nimo nakita ang Ginoo nga naghimo niini ngadto sa uban?

• Unsa ang gibuhat ni Joseph Smith aron sa pagdawat sa gahum sa Ginoo sa paglig-on? (Mahimo nimong dapiton ang mga estudyante sa pagribyu sa pamahayag ni Elder Marcus B. Nash nga makaplagan diha sa seksyon 1 sa ang materyal sa pagpangandam.)

Hatagi ang mga estudyante og higayon nga maghunahuna sa mainampuong paagi kon unsa ang ilang mabuhat aron sa pagdapit nganha sa ilang mga kinabuhi ang gahum sa Ginoo sa pagpalambo kanila alang sa Iyang mga katuyoan.

Ang ngalan ni Joseph Smith “pagagamiton alang sa maayo ug sa dautan diha sa tanan nga mga kanasuran.”

Ipasabut nga bisan pa sa tanang maayo nga gibuhat ni Propeta Joseph Smith, daghan siya og mga kaaway ug mga tigsaway. Apan kini dili usa ka sorpresa ngadto ni Joseph. Sa dihang unang mipakita si Moroni ngadto sa usa ka 17 anyos ang panuigon nga Joseph, gihatagan niya si Joseph og panabut ngadto sa iyang umaabut. Dapita ang mga estudyante sa pagbasa sa Joseph Smith––Kasaysayan 1:33, mangita alang sa unsa ang gibati sa mga katawhan mahitungod ni Joseph.

• Unsay atong makat-unan gikan niini nga tudling? (Tabangi ang mga estudyante sa pag-ila sa mosunod nga kamatuoran: Ang ngalan ni Joseph Smith pagagamiton alang sa maayo ug sa dautan taliwala sa tanan nga mga katawhan.)

• Sa unsa nga mga paagi atong nakita kini nga panagna nga natuman karon?

Ipasabut nga ang Ginoo mihupay ni Joseph atol sa usa sa labing magul-anong mga panahon sa iyang kinabuhi sa dihang siya gibilango didto sa Liberty, Missouri. Dapita ang mga estudyante sa pagbasa sa Doktrina ug mga Pakigsaad 122:1–3, mangita alang kon giunsa sa Ginoo pagpasalig pag-usab si Joseph.

• Unsa ang atong makat-unan gikan niini nga tudling mahitungod kon unsaon pagsanong sa matinud-anon ngadto ni Joseph Smith ug sa iyang propetikanhong misyon? (Samtang ang pipila mobiaybiay ni Joseph Smith, ang putli og kasingkasing dili mobatok kaniya apan magtinguha sa mga panalangin nga gihimong maanaa pinaagi sa iyang pangalagad.)

Hangyoa ang mga estudyante sa pagribyu sa mga pamahayag diha sa seksyon 2 sa materyal sa pagpangandam gikan niadtong kinsa nakaila ni Propeta Joseph Smith ug sa pagpakigbahin sa unsay milabaw kalig-on ngadto kanila.

• Unsa nga mga pagbati ug pagpamatuod ikaw aduna mahitungod ni Propeta Joseph Smith?

I-display ang mosunod nga pamahayag ni Elder Neil L. Andersen sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog:

Ang negatibong komentaryo mahitungod ni Propeta Joseph Smith modaghan samtang nagpadulong kita sa Ikaduhang Pag-anhi sa Manluluwas. Ang murag mga tinuod ug inanay nga panglingla dili mokunhod. Adunay mga sakop sa pamilya ug mga higala nga magkinahanglan sa imong tabang. (Neil L. Andersen, “Joseph Smith,” Liahona, Nob. 2014, 30)

Paghisgot isip usa ka klase o sa gagmay nga mga grupo kon unsaon nga ang mga estudyante mahimong makatabang og usa ka miyembro sa pamilya o higala kinsa nabalaka mahitungod sa negatibong mga komentaryo nga ilang nadunggan o nabasa mahitungod ni Propeta Joseph Smith. Isip bahin sa panaghisgutan, ang grupo mahimong gusto nga moribyu sa pamahayag ni Elder Andersen diha sa seksyon 3 sa materyal sa pagpangandam. Ang mosunod nga mga pangutana mahimo usab nga makatabang nga maapil diha sa panaghisgutan:

• Ngano kaha nga kini importante sa pag-awhag og usa ka tawo sa pagtuon sa kasaligang mga tinubdan uban ang pagdapit sa tawo sa pagpamalandong ug sa pag-ampo kon magtinguha sa mga tubag sa mga pangutana mahitungod ni Joseph Smith ug sa iyang propetikanhong misyon?

• Unsa ang imong i–awhag nga buhaton sa usa ka tawo aron sa pagbaton og usa ka espiritwal nga saksi o sa paglig-on sa iyang pagsaksi sa balaang misyon ni Joseph Smith?

Tapusa pinaagi sa pagpamatuod sa kaimportante sa pagdawat og usa ka espiritwal nga saksi gikan sa Dios nga si Joseph Smith mao ang Iyang propeta, gitawag diha sa iyang mga kahuyang ug gitabangan sa Ginoo nga mahimong pinili nga manalagna sa Pagpahiuli.

Alang sa Sunod nga Higayon

Hangyoa ang mga estudyante kon sila maguol ba gayud ug mag-ampo mahitungod sa mga desisyon nga makaapekto sa ilang kaugmaon. Dapita sila nga tun-an ang materyal sa pagpangandam sa klase alang sa sunod nga panahon. Diha niini ilang mahibaloan ang mahitungod sa kawalay kasiguroan nga nasinati sa mga Santos human sa kamatayon ni Joseph Smith ug sa ilang talagsaong pagtuo sa pagsunod og usa ka bag-ong lider ngadto sa kamingawan. Dapita ang mga estudyante sa pag-anha sa klase nga andam sa paghisgot kon unsay ilang nakat-unan gikan sa mga Santos atol niining mahagiton nga panahon.