“Leksyon 15 Materyal sa Pagpangandam sa Klase: Ang Plano sa Langitnong Amahan ug ang Atong Balaang Potensyal,” Materyal sa Magtutudlo alang sa Mga Pundasyon sa Pagpahiuli (2019)
“Leksyon 15 Materyal sa Pagpangandam sa Klase,” Materyal sa Magtutudlo alang sa Mga Pundasyon sa Pagpahiuli
Leksyon 15 Materyal sa Pagpangandam sa Klase
Ang Plano sa Langitnong Amahan ug ang Atong Balaang Potensyal
Mipahayag si Propeta Joseph Smith, “Ang mahinungdanon nga plano sa kaluwasan maoy usa ka tema nga kinahanglan gayud nga moukopar sa atong tuman nga pagtagad, ug pagaisipon sa hunahuna nga pinakamaayo nga mga gasa sa langit ngadto sa tawo” (Mga Pagtulun-an sa mga Presidente sa Simbahan: Joseph Smith [2007], 249). Pinaagi sa pagpadayag ug mga panan-awon, nasabtan ni Joseph Smith ang plano sa Dios alang sa Iyang mga anak sa mga paagi nga mousab sa mga kinabuhi sa minilyon ka mga tawo sa tibuok kalibutan. Kini nga leksyon makatabang kanimo og dugang nga pagsabut kinsa ikaw ug unsa ang imong balaan nga potensyal.
Seksyon 1
Sa unsa nga paagi nga ang gipahiuli nga mga kamatuoran mahitungod sa plano sa kaluwasan sa Dios nakaapekto sa akong kinabuhi?
Hunahunaa ang pagkabag-ong kinabig ngadto sa gipahiuli nga Simbahan sa Ginoo sa panahon ni Joseph Smith. Ang imong pagsabut sa plano sa Langitnong Amahan dili unta hingpit. Kon ikaw nagtubo isip usa ka Kristiyano, tingali ikaw adunay mga tinuohan nga susama ngadto niining mosunod: (1) Ang Dios, si Jesus, ug ang Balaang Espiritu usa ka Dios, walay pisikal nga lawas, o mga pagbati; (2) ang mga tawo walay kinabuhi sa wala pa niini nga kinabuhi, ug sila gilalang sa Dios gikan sa wala; ug ang (3) Dios dili masabtan ug misteryoso––ang ideya nga ang mga tawo ingon nga Iyang mga anak usa lamang ka pasumbingay.
Pinaagi sa pagpadayag, si Joseph Smith ug ang unang mga Santos nakasabut sa kinaiyahan sa atong Langitnong Amahan ug sa Iyang balaang plano sa kaluwasan. Hunahunaa sama sa unsa kaha ang gibati sa dihang sila nakahibalo sa pipila ka gipahiuli nga mga kamatuoran nga atong gimahal karon mahitungod sa plano sa Langitnong Amahan.
Kadaghanan sa panabut ni Joseph sa plano sa kaluwasan midangat pinaagi sa iyang buhat diha sa Basahon ni Mormon ug diha sa iyang dinasig nga hubad sa Daan ug Bag-ong mga Tugon. Samtang naghubad sa basahon sa Genesis kaniadtong 1830, nakat-unan ni Propeta Joseph nga si Moises gidala ngadto sa usa ka taas nga bukid ug gipakita sa malukpanong mga nilalang sa Dios. Kini nga pagpadayag mao ang unsay atong nahibaloan isip ang unang kapitulo sa basahon ni Moises diha sa Perlas nga Labing Bililhon. Gisultihan sa Ginoo si Moises nga siya usa ka anak nga lalaki sa Dios. Gitudlo usab sa Dios ang usa ka importanting kamatuoran nga makaplagan diha sa Moises 1 mahitungod sa mga katuyoan sa Iyang mga buhat.
Pagtuon agi og Pagpangandam alang sa Klase
Basaha ang Moises 1:37–39.
Kon magsulti kabahin sa imortalidad ug kinabuhing dayon, si Elder Robert D. Hales sa Kurom sa Napulog Duha ka mga Apostoles mitudlo:
Ang gasa sa kinabuhing dayon maoy angay sa bisan unsang paningkamot sa pagtuon, pagkat-on, ug paggamit sa plano sa kaluwasan. Tanang katawhan mabanhaw ug makadawat sa mga panalangin sa pagka-imortal. Apan sa pagkab-ot sa kinabuhing dayon—ang kinabuhi nga gidumala sa Dios—maoy angay sa pagsunod sa plano sa kaluwasan sa tibuok natong kasingkasing, hunahuna, gahum, ug kalig-on. (Robert D. Hales, “Ang Plano sa Kaluwasan: Usa ka Sagradong Bahandi sa Kahibalo sa Paggiya Kanato,” Liahona, Okt. 2015, 33)
Hinumdumi nga gipatin-aw ni Elder Hales ang kinabuhing dayon isip “ang kinabuhi nga gidumala sa Dios.” Hunahunaa unsay kahulugan niini alang kanimo nga ang buhat sa Langitnong Amahan mao ang pagdala kanimo balik ngadto sa Iyang presensya aron ikaw makapahimulos sa imortalidad ug kinabuhing dayon.
Sa usa ka pagpadayag nga nadawat sa Mayo 6, 1833, gi-rekord ni Joseph Smith, “Ang tawo mao usab diha sa sinugdanan uban sa Dios” (Doktrina ug mga Pakigsaad 93:29). Ang hubad ni Joseph sa basahon ni Abraham, nga gimantala kaniadtong 1842, mihatag og mas importanting panabut ngadto sa atong kinabuhi sa wala pa sa yuta ug sa atong mga kahimoan human sa mortal nga kinabuhi.
Pagtuon agi og Pagpangandam alang sa Klase
Basaha ang Abraham 3:22–26.
Pamalandong agi og Pagpangandam alang sa Klase
Unsa sa imong hunahuna ang kahibalo sa atong kinabuhi nga wala pa dinhi sa yuta ug sa atong katuyoan sa mortalidad miapekto sa unang mga Santos? Giunsa niini nga kahibalo pag-apekto sa imong panghunahuna, mga desisyon, ug mga lihok karon?
Seksyon 2
Unsa nga mga pagtulun-an mahitungod sa kinaiyahan sa Dios ang gipahiuli ngadto ni Propeta Joseph Smith?
Sa 1844, mga bulan pa lamang sa wala pa ang iyang kamatayon, namulong si Joseph Smith sa katapusan niyang komperensya. Ang iyang higala, si King Follet, bag-ohay lamang namatay sa usa ka aksidente, ug ang pamilya mihangyo ni Joseph sa pagpamulong diha sa lubong. Gitudlo ni Joseph sa walay kahadlok ang mga kinaiya sa Dios ug ang atong potensyal nga mahimong sama Kaniya. Sa unsay nahimong nabantog isip ang pakigpulong ni King Follet, si Joseph mipahayag:
Adunay pipila lamang ka mga tawo sa kalibutan nga nakasabut og husto sa kinaiya sa Dios. … Kon ang mga tawo dili makasabut sa kinaiya sa Dios, sila wala makasabut sa ilang mga kaugalingon. …
Ang Dios Mismo usa ka tawo kaniadto sama kanato karon, ug nahimaya nga tawo, ug naglingkod sa trono sa kalangitan! … Kon kamo makakita Kaniya karon, makakita kamo Kaniya sama sa porma sa usa ka tawo––sama sa inyong mga kaugalingon. …
Kon kita makasabut sa kinaiya sa Dios, ug nasayud unsaon sa pagduol ngadto Kaniya, Iyang ablihan ang mga kalangitan ngari kanato, ug mosulti kanato mahitungod niining tanan. …
… Ang Dios mismo, nakakita nga siya anaa sa taliwala sa mga espiritu ug kahimayaan, tungod kay siya mas labaw pa kamaalamon, nakakita nga angayan sa pagmugna og mga balaod diin ang uban makabaton og kahigayunan sa pag-uswag sama sa iyang kaugalingon. Ang pakigsuod nga atong naangkon uban sa Dios nagbutang kanato sa sitwasyon nga mouswag diha sa kahibalo. …
Mao kini, ang kinabuhing dayon––nga makaila sa bugtong maalamon ug tinuod nga Dios; ug nga kamo kinahanglan makakat-on unsaon nga makahimo sa inyong kaugalingon nga dios, ug aron mahimo nga hari ug mga pari [ug mga reyna ug pari nga mga babaye] ngadto sa Dios, … nga makahimo sa usa ka gamay nga pagtubo, ngadto-ngadto ug magsugod sa gamay ngadto sa pagdako; gikan sa grasya ngadto sa grasya, gikan sa kahimayaan ngadto sa kahimayaan. (Mga Pagtulun-an: Joseph Smith, 46–48, 251, 264)
Mubo nga sulat: Ang tibuok pakigpulong ni King Follet makaplagan sa “Classics in Mormon Thought: The King Follett Sermon,” Ensign, Abr. 1971, 12–17.
Si Elder D. Todd Christofferson sa Korum sa Napulog Duha ka mga Apostoles nagtudlo:
Ang tuyo sa Dios mao nga kita, Iyang mga anak, makasinati og hingpit nga kalipay, nga makauban Kaniya sa kahangturan, ug mahisama Kaniya. (D. Todd Christofferson, “Ako Nagabadlong ug Nagapanton sa Akong Gihigugma,” Liahona, Mayo 2011, 97)
Rekord agi og Pagpangandam alang sa Klase
Tubaga ang mosunod nga mga pangutana diha sa imong journal o diha sa luna nga gibutang: Unsa nga mga kamatuoran ang inyong naila diha sa pakigpulong ni Joseph Smith ni King Follet? Giunsa niining mga kamatuoran pag-impluwensya sa paagi sa pagtan-aw nimo sa imong kaugalingon, niadtong nagpalibut kanimo, ug sa imong relasyon sa Dios?
Seksyon 3
Sa unsa nga paagi ako makabaton og kinabuhing dayon didto sa celestial nga gingharian?
Hunahunaa pag-usab ang pagpuyo isip unang nakabig ngadto sa gipahiuli nga Simbahan. Dako kaayo ang kalagmitan nga ikaw motuo uban sa daghang mga Kristiyanos niana nga panahon nga kon ang tawo mamatay, siya adto sa langit o impyerno. Daghang mga tawo sa panahon ni Joseph Smith nailhan isip mga Congregationalist o mga Universalist. Kon ikaw naghupot og “congregationalist” nga pagtan-aw, ikaw motuo nga gamay lamang ang gidaghanon sa mga tawo ang malangit. Kon ikaw naghupot og “universalist” nga pagtan-aw, ikaw malagmit motuo nga ang Dios nanginahanglan og pipila ka silot alang sa mga makasasala apan sa katapusan ang tanang mga tawo malangit.
Kaniadtong Pebrero 1832, si Joseph Smith ug Sidney Rigdon dihay usa ka panan-awon nga mitabang kanato nga makasabut og mas maayo sa kinabuhi human sa kamatayon. Ang duha ka mga lalaki nagbuhat sa Hubad ni Joseph Smith sa Bag-ong Tugon didto sa ibabaw nga andana sa panimalay ni John Johnson ug nahunong aron sa pagpamalandong sa Juan 5:29, nga mahitungod sa pagkabanhaw sa matarung ug ang pagkabanhaw sa dili matarung. Daghang mga lalaki diha sa lawak uban ni Joseph ug Sidney samtang gisinati sa duha ka mga lalaki ang panan-awon ug gihulagway unsay ilang nakita. Kini nga panan-awon, girekord diha sa Doktrina ug mga Pakigsaad 76, nagtabang kanato nga mas makasabut og maayo sa plano sa Langitnong Amahan. Hunahunaa ang pagmarka og mga kamatuoran gikan niini nga seksyon nga naglugway sa atong pagsabut sa kinabuhi human mamatay ug nagpadayag sa tinguha sa Langitnong Amahan sa pagpanalangin sa Iyang tanan nga mga anak::
Pagtuon agi og Pagpangandam alang sa Klase
Basaha ang mga kinutlo kabahin sa panan-awon ingon nga girekord diha sa Doktrina ug mga Pakigsaad 76:12, 20, 40–42, 50–54, 58, 62, 65, 69–71, 74–76, 79, 81–82, 86, 89–92, 111.
Pamalandong agi og Pagpangandam alang sa Klase
Unsaon nimo paghunahuna ang gipadayag nga kahibalo diha sa seksyon 76 moapekto kanimo kon ikaw usa ka kinabig ngadto sa unang Simbahan? Unsa ang atong makat-unan mahitungod sa Langitnong Amahan ug ni Jesukristo gikan niini nga panan-awon?