“Leksyon 17 Materyal sa Pagpangandam sa Klase: Pagpabiling Matinud-anon taliwala sa Pagsupak ug Kalisdanan,” Materyal sa Magtutudlo alang sa Mga Pundasyon sa Pagpahiuli (2019)
“Leksyon 17 Materyal sa Pagpangandam sa Klase,” Materyal sa Magtutudlo alang sa Mga Pundasyon sa Pagpahiuli
Leksyon 17 Materyal sa Pagpangandam sa Klase
Pagpabiling Matinud-anon taliwala sa Pagsupak ug Kalisdanan
Kitang tanan adunay mga kasinatian nga mosulay sa atong hugot nga pagtuo. Usa sa atong mga hagit niini nga kinabuhi mao ang pagpabilin nga maisugon ug makanunayon ngadto sa Dios kon kita mag-atubang niadtong lisud nga mga panahon. Samtang ikaw magtuon sa mosunod nga materyal, pangitaa ang mga baruganan nga makatabang sa paggiya nimo panahon sa mga pasulay sa hugot nga pagtuo.
Seksyon 1
Unsa nga mga kasamok ang nasinati sa mga Santos didto sa Kirtland, Ohio, sa ulahing bahin sa 1830?
“Ang hugot nga pagtuo sa daghang pinakalig-on nga mga tawo sa Simbahan nagduha-duha na,” miingon si Brigham Young sa krisis nga adunay dakong impluwesnya sa Simbahan niadtong 1837 (Mga Pagtulun-an sa mga Presidente sa Simbahan: Joseph Smith [2007], 384). Sa miaging tuig lang ang mga Santos nakatagamtam og kalinaw ug pagbu-bu sa pagpadayag atol sa pagpahinungod sa Templo sa Kirtland. Apan sa misunod nga mga bulan sa pagpahinungod, ang “karisgo sa pagpamuhunan” nga nahimong komon sa nasud nagsugod usab sa pagpatigbabaw diha sa mga Santos. Ang Kirtland “ingon og kusog kaayo nga miuswag,” si Heber C. Kimball misulat, “ug ang tanan ingon og determinado nga mahimong adunahan; sa akong mga pagbati kini usa ka artipisyal o hinanduraw nga kaadunahan. Kining talan-awon sa kauswagan misangpot nga mituo ang daghang mga Santos nga ang panahon miabut na nga ang Ginoo mohatag kanila sa mga bahandi sa yuta, ug sa maong pagtuo, nakaaghat kini kanila nga maningkamot pag-ayo, mao nga ang duha sa Napulog Duha, sila si Lyman E. Johnson ug John F. Boynton, miadto sa New York ug mipalit balig $20,000 nga mga butang, ug misulod sa negosyo, nanghulam og dako-dako nga kwarta gikan ni Polly Voce ug sa ubang mga Santos sa Boston ug sa palibut nga mga rehiyon, ug wala gayud nila mabayri” (sa Orson F. Whitney, The Life of Heber C. Kimball [1888], 111–12).
Ang kinaiya sa garbo, pagpangita og sayop, ug apostasiya nagsugod sa pagkatap diha sa daghang mga Santos. Si Eliza R. Snow nahinumdom:
[Ang] daghan kaniadto [nga] nagmapailubon ug matinud-anon sa pagpahigayon sa matag katungdanan … nagmapagarbuhon [na] sa ilang mga espiritu, ug nagpataas sa garbo sa ilang mga kasingkasing. Samtang ang mga Santos midawat sa gugma ug espiritu sa kalibutan, ang Espiritu sa Ginoo mipalayo sa ilang mga kasingkasing. (Sa Mga Pagtulun-an sa mga Presidente sa Simbahan: Joseph Smith [2007], 383)
Bisan pa sa makita nga kauswagan, ang pinansyal nga obligasyon sa Simbahan dako human sa galastuhan sa pagtukod og templo ug pagpalit og yuta nga maoy nakaingon nga ang Simbahan nakautang og liboan ka dolyares. Karon, sa Kirtland ug sa Missouri, ang mga Santos nakigbisog sa pagsunod sa sugo sa Ginoo sa pag-angkon og daghan pa nga yuta ug pagtukod og bag-ong mga pamuy-anan didto sa Far West ug sa Lalawigan sa Jackson. Sa pagsulay aron magaan ang pinansyal nga mga problema, si Joseph Smith ug ang ubang mga lider sa Simbahan miestablisar og gamay nga bangko nga gitawag og Kirtland Safety Society. Daghang mga Santos mipalit og stock sa bag-ong bangko, lakip ni Joseph. Daghang mga Santos nagtuo nga ang umaabut makahatag og kausbawan ug bahandi kon sila magmatinud-anon.
Apan ang resulta sa lapad nga ekonomikanhong depresyon sa sayong bahin niadtong 1837, daghang mga bangko nabangkaruta sa tibuok Estados Unidos. Ang tibuok nasud nga ekonomikanhong kaguliyang uban sa grabing pagsupak [oposisyon] gikan sa dili mga miyembro nga mga lumulupyo nakatampo sa pagkabangkaruta sa Kirtland Safety Society mga pito ka bulan human kini giablihan. Duha ka gatus ka mga namuhunan [investor] sa bangko nawad-an sa hapit tanan sa ilang kwarta, lakip ni Joseph Smith nga nakaangkon sa labing dako nga pagkaalkanse.
Bisan og ang kadaghanan sa mga Santos misanong uban sa hugot nga pagtuo, nagpabilin nga matinud-anon sa ilang mga pagpamatuod atol niining panahon sa pagsulay, daghan pa, lakip sa pipila ka lider sa Simbahan, mibasol ni Joseph Smith tungod sa ilang pinansyal nga mga problema. Ang uban miingon nga siya usa ka napukan nga propeta ug gusto nga motudlo og bag-ong Presidente sa Simbahan puli sa iyang dapit.
Seksyon 2
Unsay akong mahimo aron magpabilin nga lig-on ug makanunayon sa higayon nga sulayan ang akong hugot nga pagtuo?
Sayo niadtong 1837, si Thomas B. Marsh, kinsa mao ang Presidente sa korum sa Napulog Duha ka mga Apostoles, nagtabang sa paggiya sa Simbahan didto sa Missouri. Human makahibalo nga ang pipila ka mga sakop sa korum nahimong kritikal ni Joseph Smith ug nagsugod sa pagpakig-away sa usag usa, si Thomas mibiyahe paingon sa Kirtland, Ohio, naglaum nga mapahiusa ang Napulog Duha.
Sa iyang pagpaingon ngadto sa Kirtland, nahibaloan ni Thomas nga ang Propeta mitawag sa duha ka sakop sa korum nga moserbisyo og misyon ngadto sa England. Nagtuo si Thomas nga isip presidente sa korum iyang katungdanan ang pagtawag kanila nga magmisyon. Pag-abut ni Thomas sa Kirtland, iyang gisulti ang iyang mga kahimangud ngadto ni Joseph Smith, ug ang Propeta nakadawat og pagpadayag uban sa tambag alang ni Thomas (tan-awa sa Revelations in Context [2016], 55–57).
Samtang magbasa ka sa mga pulong sa Ginoo ngadto ni Thomas, ikonsiderar unsa nga tambag ug mga kamatuoran gikan niini nga tudling ang makatabang sa usa ka tawo kinsa nagkalisud sa iyang pagtuo. Ikonsiderar ang pagmarka sa unsay imong nakit-an.
Pagtuon agi og Pagpangandam alang sa Klase
Basaha ang Doktrina ug mga Pakigsaad 112:10, 12–15.
Pamalandong agi og Pagpangandam alang sa Klase
Unsa nga mga baruganan ang narekord niini nga pagpadayag ang makatabang nimo nga magpabilin nga lig-on ug makanunayon panahon sa mga pagsulay sa imong hugot nga pagtuo?
Seksyon 3
Sa unsa nga paagi nga ang kalisdanan makapaandam nato sa pipila sa atong labing importante nga pagkat-on?
Pipila niadtong tua sa Kirtland nga mibiya sa Simbahan nagtinugha sa pagpatay ni Joseph Smith. Gipasidan-an sa Ginoo pinaagi sa pagpadayag, siya ug si Sidney Rigdon mibiya sa pagkagabii ug mibiyahe padulong sa Far West, Missouri, miabut niadtong Marso 1838. Atol sa ting-init ug tinglarag nianang tuiga, ang walay pagsinabtanay ug mga tensyon tali sa mga taga-Missouri ug sa mga miyembro sa Simbahan misangpot ngadto sa panaggubat sa amihanang Missouri. Mituo sa gipasobrahan nga mga report niini nga panagbangi, ang gobernador sa Missouri miisyu og mando sa pagpuo [extermination order] aron palayason ang mga Santos gikan sa estado pinaagi sa pagpugos. Sa wala madugay human niini, niadtong Nobyembre 1838, si Propeta Joseph Smith ug ang ubang mga lider sa Simbahan gipangdakop, ug bakak nga gipasanginlan nga nagbudhi batok sa estado, ug sa katapusan gibilanggo sa Bilanggoan sa Liberty sa Lalawigan sa Clay, Missouri.
Makasaysayanong litrato sa Bilanggoan sa Liberty sa Liberty, Missouri.
Ang kinabuhi sa bilanggoan nakaapekto kaayo ni Joseph. Ang mga manghahagit [heckler] moli-li sa gialihan og puthaw nga mga bintana aron magbinuang og tutok o mosinggit og binastos ngadto niya. Siya ug ang ubang mga binilanggo kasagaran adunay gamay ra gayud kaayong pan nga hinimo sa mais nga kaunon. Ang uhot nga ilang gigamit aron kahigdaan sukad sa Disyembre pa nahanig [napislat] na ug dili na makahatag og kakomportable. Kon magdagkot sila og kalayo aron mainitan ang ilang kaugalingon, mapuno ang bartolina og aso ug makapalisud nila sa pagginhawa. …
Sukad nadawat ang iyang balaanong tawag, mipadayon si Joseph bisan nakasinati og pagsupak, naningkamot sa pagtuman sa Ginoo ug sa pagpundok sa mga Santos. Apan, bisan kon milambo pa ang simbahan sulod sa katuigan, morag nag-ung-ong na kini karon sa pagkahugno.
Gipalayas sa manggugubot nga panon ang mga Santos pagawas sa Zion sa Jackson County. Ang panagsumpaki tali sa mga miyembro sa simbahan sa Kirtland mibahin niini ug mibutang sa templo diha sa mga kamot sa mga giutangan. Ug karon, human sa makalilisang nga gubat batok sa ilang mga silingan, ang mga Santos nagkatibulaag diha sa silangang bahin sa daplin sa Suba sa Mississippi, nawad-an og kadasig ug walay panimalay. …
Si [Joseph mibati nga] ang mga Santos maayong mga tawo nga nahigugma sa Dios. Dili sila angayang guyuron gikan sa ilang mga panimalay, bun-ugon, ug pasagdan nga mamatay. (Mga Santos: Ang Istorya sa Simbahan ni Jesukristo sa mga Santos sa Ulahing mga Adlaw, vol. 1, Ang Sumbanan sa Kamatuoran, 1815–1846 [2018], 438–39)
Sa usa ka sulat ngadto sa mga lider sa Simbahan ug sa mga Santos, si Joseph mituaw, “O Dios, hain ba ikaw? … Hangtud kanus-a ikaw mogamit sa imong kamot, ug sa imong mata, oo sa imong matin-aw nga mata, tan-awa gikan sa mahangturon nga mga langit ang mga sayop sa imong mga katawhan ug sa imong mga sulugoon, ug ang imong dunggan napuno sa ilang mga pagtuaw?” (Doktrina ug mga Pakigsaad 121:1–2).
Hunahunaa ang panahon sa dihang ikaw nakigbisog sa kalisdanan ug nag-ampo sa Dios alang sa panabang. Samtang imong tun-an ang mosunod nga mga pulong nga gisulti sa Ginoo ngadto ni Joseph didto sa Bilanggoan sa Liberty, hunahunaa nga ang Ginoo nagsulti niini nganha kanimo. Ikonsiderar ang pagmarka sa mga pulong nga importante para nimo.
Pagtuon agi og Pagpangandam alang sa Klase
Basaha ang Doktrina ug mga Pakigsaad 121:7–10 ug Doktrina ug mga Pakigsaad 122:7–9.
Irekord ang Inyong mga Hunahuna
Sa imong journal o sa luna nga gihatag irekord ang mga pulong ug mga baruganan nga nakapadani nimo gikan sa mga tudling sa kasulatan sa ibabaw. Pangandam sa pagpakigbahin diha sa klase unsay imong nakat-unan. Nakasinati ba ikaw alang sa imong kaugalingon sa kamatuoran sa mga baruganan nga gitudlo sa Ginoo ngadto ni Joseph Smith didto sa Bilanggoan sa Liberty?