“Leksyon 25 Materyal sa Pagpangandam sa Klase: Pagsunod-sunod diha sa Kapangulohan ug ang Panaw sa Kasadpan,” Materyal sa Magtutudlo alang sa Mga Pundasyon sa Pagpahiuli (2019)
“Leksyon 25 Materyal sa Pagpangandam sa Klase,” Materyal sa Magtutudlo alang sa Mga Pundasyon sa Pagpahiuli
Nagbantay si Brigham Young samtang mibiya ang mga Santos sa Nauvoo.
Leksyon 25 Materyal sa Pagpangandam sa Klase
Pagsunodsunod diha sa Kapangulohan ug ang Panaw sa Kasadpan
Human nagpahibalo sa kamatayon nila ni Joseph ug Hyrum Smith, usa ka pamantalaan mitapos, “Sa ingon natapos ang Mormonismo” (Weekly Herald, Hulyo 13, 1844, 220). Sa kamatayon ni Propeta Joseph, daghang taga gawas nga mga tigpaniid mituo nga ang Simbahan magkatibulaag. Ug ang mga miyembro sa Simbahan nangutana kon kinsa ang mangulo kanila. Samtang inyong tun-an kini nga materyal sa leksyon, pangitaa kon giunsa sa pagpadayon sa Ginoo ang paggiya sa Iyang Simbahan human sa kamatayon sa propeta.
Seksyon 1
Kinsa ang naggiya sa Simbahan sa Ginoo kon mamatay ang propeta?
Kompletoha ang usa sa mosunod nga kapilian alang niini nga seksyon:
-
NaN:NaN
-
Tun-i ang mosunod nga materyal, ug dayon kompletoha ang kalihokan sa pagpamalandong.
Usa ka pagbati sa kaguol ang miabut sa tanang mga santos diha sa tibuok Nauvoo tungod sa mga kamatayon ni Joseph ug Hyrum Smith. Sa panahon niini nga kasamok, daghang mga tawo ang miangkon nga sila adunay katungod sa pagpangulo sa Simbahan. Usa niini nga mga tawo mao si Sidney Rigdon.
Sa panahon sa kamatayon ni Joseph, si Brigham Young ug ang uban nga mga Apostoles nagserbisyo og mga misyon didto sa silangang Estados Unidos. Kini wala mahibaloi hangtud sa Hulyo 16, 1844, nga nakadawat si Brigham og usa ka sulat naghulagway sa mga pagpatay ni Joseph ug Hyrum Smith.
Sa dihang nabasa niya ang sulat, gibati ni Brigham ingon og mabuak ang iyang ulo. Wala siya sukad mibati og ingon nga kaguol.
Dihadiha dayon nahunahunaan niya ang pagkapari. Si Joseph naggunit sa tanang mga yawe nga gikinahanglan sa pagtuga sa mga Santos ug sa paghiusa og bugkos kanila alang sa kahangturan. Wala niadto nga mga yawe, ang buhat sa Ginoo dili mapadayon. Sa makadiyut, nahadlok si Brigham nga gidala kini ni Joseph ngadto sa lubnganan.
Dayon, sa usa ka kalit nga pagpadayag, nakahinumdom si Brigham kon giunsa ni Joseph paghatag ang mga yawe diha sa Napulog Duha ka mga Apostoles. Nagpangdagpi sa iyang kamot diha sa iyang tuhod, siya miingon, “Ang mga yawe sa gingharian ania ra gyud dinhi sa simbahan.” (Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 [2018], 635)
Sa Agosto 7, 1844, ang Napulog Duha ug ang ubang mga lider sa Simbahan nagpundok isip konseho. Atol niini nga miting si Sidney Rigdon, kinsa nahimong wala makagusto sa mga nangulo sa Simbahan, nangusog sa pag-angkon nga tungod kay siya kaniadto gitawag ug gi-orden isip tigpama-ba ni Joseph Smith (tan-awa sa Doktrina ug mga Pakigsaad 100:9), iyang responsibilidad ang “pagsiguro nga ang simbahan gidumala sa tukma nga paagi” (sa History, 1838–1856 [Manuscript History of the Church], volume F-1, 295, josephsmithpapers.org).
Pagkahuman ni Sidney sa iyang pakigpulong, si Brigham Young mipahayag:
Gitugyan ni Joseph diha [sa] mga ulo [sa Napulog Duha ka mga Apostoles] ang tanang mga yawe ug mga gahum nga gipanag-iya sa pagka-apostol nga gihuptan niya mismo sa wala pa siya patya. (Brigham Young, in History, 1838–1856, volume F-1, 296, josephsmithpapers.org)
Sa sunod adlaw, ang mga Santos sa Nauvoo nagpundok aron sa pagpaminaw ni Sidney Rigdon nga mihimo sa iyang pangangkon sa pagkapangulo. Human sa iyang pagpamulong, misulti sa makadiyut si Brigham Young, nagdapig nga ang Korum sa Napulog Duha, kinsa sa tiningub naghupot sa tanang mga yawe sa pagkapari nga gipahiuli ngadto ni Propeta Joseph Smith, mangulo sa Simbahan sa pagkakaron.
Samtang si Emily [Hoyt] naminaw ngadto ni Brigham nga nagsulti, siya nakaamgo sa iyang kaugalingon nga nagpasiplat kaniya aron sa pagsiguro nga dili kini si Joseph ang nagsulti. Anaa kaniya ang sinultihan ni Joseph, ang iyang pamaagi sa pagpangatarungan ug gani ang tunog sa iyang tingog. …
Pito ka tuig ang milabay, girekord ni Emily ang iyang kasinatian sa pagtan-aw ni Brigham nga namulong ngadto sa mga Santos, nagpamatuod kon unsa kaparehas ang iyang hitsura ug tingog ni Joseph diha sa entablado. Sa mga tuig nga miabut, dinosena nga mga Santos ang midugang sa ilang pagsaksi ngadto sa iyaha, naghulagway giunsa nila pagkakita sa propetikanhong kupo nga nahulog diha ni Brigham nianang adlawa. (Mga Santos, 1:565–66)
Si Wilford Woodruff misulat, “Kon wala ako makakita kaniya [Brigham] sa akong kaugalingong mga mata, walay tawo nga makakombinser kanako nga dili kadto si Joseph Smith” (sa History of the Church, 7:236).
Uban sa pamahayag ni Brigham Young kalabut sa pagtugyan ni Joseph Smith sa mga yawe ug mga gahum sa pagka-apostol diha sa Napulog Duha ug sa panghimatuod nga pagsaksi sa Espiritu Santo, nasabtan sa mga Santos ang kabubut-on sa Ginoo ug gipaluyohan ang Korum sa Napulog Duha ka mga Apostoles isip ang mga pangulo sa gipahiuli nga Simbahan ni Jesukristo.
Pamalandong agi og Pagpangandam alang sa Klase
Hunahunaa giunsa sa Langitnong Amahan paghimo nga mahibaloan ang Iyang kabubut-on ug ang Iyang gugma alang sa mga Santos pinaagi sa pagpakita ngadto kanila nga si Brigham Young ug ang Napulog Duha mao ang mangulo sa Simbahan. Giunsa nimo pagkahibalo nga kadtong nangulo sa Simbahan karon mga pinili ug tinawag sa Dios?
Seksyon 2
Unsaon kaha sa Ginoo paggiya kanato kon ang umaabut ingon og walay kasiguroan?
Kaniadtong Enero 1846, taliwala sa nagtubo nga pagpanggukod batok sa mga Santos, gitapos sa Napulog Duha ka mga Apostoles ang mga plano sa pagbiya sa Nauvoo ug mangadto sa kasadpan. Sa 1842 nanagna si Joseph Smith “nga ang mga Santos padayon nga mag-antus sa hilabihan nga kasakit ug palayason ngadto sa Rocky Mountains … [ug mohimo ] og mga puluy-anan ug motukod og mga siyudad ug … mahimong gamhanan nga mga katawhan sa taliwala sa Rocky Mountains” (Mga Pagtulun-an sa mga Presidente sa Simbahan: Joseph Smith [2007], 628).
Naggiya si Brigham Young sa mga Santos paggawas sa Nauvoo.
Samtang ang mga Santos nangandam sa pagbiya sa Nauvoo, mitrabaho usab sila sa paghuman sa Templo sa Nauvoo. Sa nagkaduol ang pagkahuman niini, liboan ka mga Santos miadto sa templo adlaw ug gabii aron sa pagdawat sa mga ordinansa sa pagtuga ug pagbugkos. Naobserbahan ni Sister Sarah Rich:
Kon dili pa tungod sa hugot nga pagtuo ug kahibalo nga gitugyan ngari kanamo didto niana nga templo pinaagi sa impluwensya ug tabang sa Espiritu sa Ginoo, ang among panaw susama ra unta sa pag-ambak ngadto sa kangitngit. … Apan kami adunay hugot nga pagtuo sa atong Langitnong Amahan, ug among gibutang ang among pagsalig diha Kaniya nagtuo nga kami Iyang pinili nga mga katawhan. (Sarah Rich, sa Mga Anak nga Babaye sa Akong Gingharian: Ang Kasaysayan ug Buhat sa Relief Society [2011], 36)
Si Elder Robert D. Hales sa Korum sa Napulog Duha ka mga Apostoles namulong kabahin sa mga Santos kinsa diha sa Nauvoo niana nga panahon:
Ang ilang mga pakigsaad sa Ginoo didto sa Templo sa Nauvoo proteksyon alang kanila sa panahon sa ilang panaw sa kasadpan, ingon man alang sa matag usa nato karon ug sa tibuok natong mga kinabuhi. (Robert D. Hales, “Temple Blessings,” New Era, Peb. 2014, 4)
Samtang ang pagpanggukod nagkagrabe, gihuman sa mga Santos ang ilang plano ug ang unang dako nga grupo sa mga Santos misugod sa ilang panaw tabok sa Iowa kaniadtong Pebrero 1846. Nasinati nila ang grabe nga panahon sa tingtugnaw, kulang sa mga panginahanglanon, ug nagkayamukat. Ang tingpamulak nagdala kanunay og ulan, nanobra kataas nga tubig sa mga sapa, ug lapok, nagpugong sa mga Santos sa pagbiyahe lamang og 300 ka milya (483 ka kilometro) sulod sa 131 ka adlaw. Agi og resulta niining mga kalangan ug nagkadiyutay nga mga kapanguhaan, gihunong ni Brigham Young ang panaw ug mitukod og usa ka pahulayanan nga dapit nga gitawag og Winter Quarters. Sa pagkatinglarag, ang populasyon sa Winter Quarters mitubo ngadto og labaw sa 7,000 ka mga tawo.
Daghan ang nagkasakit gumikan sa walay hustong pagkaon ug pagkabantang sa katugnaw, ug ang hugot nga pagtuo sa pipila gihagit. Kining malisud nga mga kahimtang mihimo sa tingtugnaw sa 1846–47 usa sa labing malisud nga yugto sa mga panahon sa kinabuhi ni Brigham Young. Gibati niya nga “sama sa usa ka amahan nga adunay dako nga pamilya sa mga anak nga naglibut [kaniya]” ug sa wala madugay ang kabug-aton sa palas-anon iyang gibati tungod sa iyang mga responsibilidad” (“This Shall Be Our Covenant,” Revelations in Context [2016], 307–8; tan-awa usab sa Mga Santos: Ang Istorya sa ang Simbahan ni Jesukristo sa Ulahing mga Adlaw, vol. 2, Walay Dili Balaan nga Kamot, 1846–1893 [2020], 40–44, 46–51).
Gibati ang gibug-aton, nangamuyo si Brigham Young ngadto sa Ginoo alang sa paggiya ug nadawat ang usa ka pagpadayag nga naglangkub sa “Pulong ug Kabubut-on sa Ginoo kabahin sa Kampo sa Israel diha sa ilang mga pagpanaw ngadto sa Kasadpan” (Doktrina ug mga Pakigsaad 136:1). Samtang imong tun-an ang mosunod nga mga bahin niini nga pagpadayag, hunahunaa ang pagmarka sa mga panudlo sa Ginoo ug sa mga saad ngadto sa mga Santos.
Pagtuon agi og Pagpangandam alang sa Klase
Basaha ang Doktrina ug mga Pakigsaad 136:2, 8, 10–11, 21–22.
Si Presidente Dallin H. Oaks sa Unang Kapangulohan mihatag og importanting panabut ngadto sa pagkaatol sa pagpadayag sa Doktrina ug mga Pakigsaad 136. Miingon siya:
Ang sukaranan sa bisan unsa nga paningkamot aron makadawat og pagpadayag mao ang pasalig sa pagbuhat kutob sa atong mahimo ug paghukom. Kini nagpasabut nga kita kinahanglan nga moserbisyo ug motrabaho.
Usa ka importante nga paagi nga makasarang alang sa pagpadayag mao ang pagpadayon sa atong pagserbisyo ug pagbuhat. Sa akong pagtuon sa mga kasulatan akong namatikdan nga kadaghanan sa mga pagpadayag ngadto sa mga anak sa Dios moabut kon sila naglihok, dili kay naglingkod lang diha sa ilang nahimutangan nga nagpaabut sa Ginoo sa pagsulti kanila sa unsay unang buhaton.
Sama pananglit, mahinungdanon nga timan-an nga ang pagpadayag nga nailhan nga “ang Pulong ug Kabubut-on sa Ginoo mahitungod sa Kampo sa Israel” (D&P 136:1) wala gihatag didto sa Nauvoo samtang ang Korum sa Napulog Duha nagplano sa paglalin gikan sa Nauvoo; … ni kini gihatag diha sa kasadpang kilid sa Suba sa Missouri. … Ang pagpadayag aron sa paggiya sa paglatas sa mga Santos sa kapatagan gihatag kaniadtong Enero 14, 1847, sa dihang ang mga Santos nakalatas og hapit na katunga sa agianan padulong sa mga walog sa mga kabukiran. (Dallin H. Oaks, “Sa Iyang Kaugalingong Panahon, sa Iyang Kaugalingong Paagi,” Liahona, Ago. 2013, 24, 26)
Hunahunaa sa makadiyut kon giunsa niini nga panabut gikan ni Presidente Oaks nga mahimong magamit sa imong kaugalingon nga mga pangutana ug mga desisyon nga makaapekto sa imong kaugmaon.
Sayo sa Abril 1847, si Brigham Young mibiya sa Winter Quarters kauban sa unang grupo sa mga Santos. Mibiyahe sila og 1,031 ka milya (1,660 ka kilometro) sulod sa upat ka mga bulan ug miabut sa Walog sa Salt Lake sa Hulyo 24, 1847. Girekord ni Wilford Woodruff nga sa dihang si Brigham Young nakakita sa walog, “giliminan siya sa panan-awon sa pipila ka minuto. … Sa dihang ang panan-awon milabay na, miingon siya, ‘Husto na kini. Kini mao ang hustong dapit. Padayon’” (sa Mga Pagtulun-an sa mga Presidente sa Simbahan: Wilford Woodruff [2004], 161–62). Sa pagka-Oktubre, mga 1,700 nga mga Santos mipuyo sa Utah. Bisan pa niana, mga 10,000 sa gihapon mipuyo sa daplin sa Suba sa Missouri sa Iowa ug Nebraska ug mobiyahe sa kasadpan sulod sa sunod lima ka mga tuig (tan-awa sa “Sustaining a New First Presidency in 1847,” ChurchofJesusChrist.org).
Sobra sa tulo ka mga tuig, ang Napulog Duha ka mga Apostoles migiya sa Simbahan sa wala pa ang Unang Kapangulohan. Sa Disyembre 1847, ang mga Apostoles nagtigum didto sa Council Bluffs, Iowa, diin daghan sa mga Santos nagpuyo gihapon. Nagpundok sila sa usa ka gamay nga trosong balay aron sa paghisgot sa pag-organisar og usab sa Unang Kapangulohan. “Usa ka mahinungdanong pagpakita sa Balaang Espiritu gibu-bu diha niadtong dinha,” ug ang Napulog Duha nagkauyon sa pagpaluyo ni Brigham Young, ang kinaunahang gitawag nga Apostol, isip ang Presidente sa Simbahan (Autobiography of Bathsheba W. Smith, 12, Church History Library, Salt Lake City; spelling gi-standardize; tan-awa usab sa Mga Santos, 2:87–89, 92–95).
Pamalandong agi og Pagpangandam alang sa Klase
Paghunahuna mahitungod kon giunsa sa Ginoo paggiya ang mga Santos samtang sila mipanaw ngadto sa Walog sa Salt Lake. Giunsa nimo pagbati nga ang Ginoo naggiya sa imong kinabuhi? Unsa ang imong mahatagan og importansya aron makadawat og mas dako nga paggiya gikan sa Ginoo?