“Pasiuna ngadto sa Materyal sa Magtutudlo alang sa Si Jesukristo ug ang Iyang Walay Kataposang Ebanghelyo (Relihiyon 250),” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo (2023)
“Pasiuna,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo
Pasiuna sa Materyal sa Magtutudlo alang sa Si Jesukristo ug ang Iyang Walay Kataposang Ebanghelyo (Relihiyon 250)
Welcome dinhi sa Si Jesukristo ug ang Iyang Walay Kataposang Ebanghelyo! Si Presidente Russell M. Nelson mipahayag,“ Wala pa gayoy panahon sa kasaysayan sa kalibotan nga ang kaalam bahin sa atong Manluluwas adunay mas personal nga kaimportante ug may kalabotan ngadto sa matag kalag sa tawo” (“Putli nga Kamatuoran, Putli nga Doktrina, ug Putli nga Pagpadayag,” Liahona, Nob. 2021, 6). Kini nga kurso mohatag sa inyong mga estudyante og usa ka talagsaong oportunidad sa pagpatubo sa ilang hugot nga pagtuo diha ni Jesukristo, pagdugang sa ilang pagsabot sa Iyang walay kataposang ebanghelyo, ug sa pagdugang sa ilang pagsalig sa paggamit sa Iyang gahom ug Pag-ula diha sa ilang indibidwal nga mga kinabuhi.
Unsa ang mga katuyoan niini nga kurso?
Ang Katuyoan sa mga Seminary ug mga Institute sa Relihiyon “mao ang pagtabang sa mga batan-on ug mga young adult nga masabtan ug mosalig sa mga pagtulon-an ug Pag-ula ni Jesukristo, mahimong takos alang sa mga panalangin sa templo, ug moandam sa ilang mga kaugalingon, sa ilang mga pamilya, ug sa uban alang sa kinabuhing dayon uban sa ilang Amahan sa Langit” (Gospel Teaching and Learning: A Handbook for Teachers and Leaders in Seminaries and Institutes of Religion [2012], x).
Kini nga kurso gidesinyo sa pagtabang kaninyo ug sa inyong mga estudyante nga matuman kini nga katuyoan pinaagi sa
-
pag-apil og mga kasinatian sa pagkat-on nga magdugang og hugot nga pagtuo diha ni Jesukristo ug sa Iyang gahom sa paglig-on, paglimpyo, ug sa paghingpit kaninyo pinaagi sa Iyang Pag-ula;
-
pagdugang sa inyong katakos sa pagdawat og pagpadayag;
-
pag-ila, pagpasabot, ug pagpamatuod sa balaanong tahas nga pagatumanon ni Jesukristo diha sa plano sa Langitnong Amahan sa katubsanan;
-
paglig-on sa pasalig nga magmatinud-anon nga mga disipulo ni Jesukristo pinaagi sa pagsunod sa Iyang mga sugo ug sa pagtuman sa inyong pakigsaad nga relasyon uban Kaniya; ug
-
pagdugang sa inyong gugma alang sa Manluluwas ug sa pagpangita og mga paagi sa pagpakita og pasalamat alang Kaniya ug sa inyong Langitnong Amahan.
Sa unsa nga paagi kini nga kurso gihan-ay?
Kini nga kurso gibahin ngadto sa unom ka yunit, nga may 28 ka leksiyon. Ang matag yunit naglakip og importanting bahin sa misyon sa Ginoo diha sa kinabuhi nga wala pa dinhi sa yuta, sa mortal, o sa kinabuhi human dinhi sa yuta.
Ang matag leksiyon gidesinyo sulod sa 50 ka minuto nga gidugayon sa klase. Alang sa mga klase nga magkita kausa matag semana sulod sa 90 ka minuto, ang mga magtutudlo makahimo sa pagtipon sa duha ka leksiyon, gumikan nga ang mga leksiyon sulod sa matag yunit konektado pinaagi sa hilisgotanan.
Ang matag leksiyon naglangkob og materyal sa pagpangandam sa klase ug materyal sa magtutudlo. Kini nga mga leksiyon gidesinyo aron sa pagdapit og mahunahunaon nga pagpangandam, pag-awhag sa mga estudyante sa pag-apil diha sa mas lawom nga pagkat-on, ug paghimo og mga aksyon nga magtabang sa mga estudyante nga mahimong mas mahisama sa Langitnong Amahan ug ni Jesukristo.
Samtang magtuon kamo sa kurikulom, pag-ampo alang sa tabang sa Ginoo aron kamo mahibalo kon unsaon sa labing maayo pagtubag sa mga panginahanglan sa inyong mga estudyante. Si Elder Jeffrey R. Holland sa Korum sa Napulog Duha ka Apostoles mitudlo:
Magpabilin nga bukas—magpabilin nga bukas, ilabi na, ngadto sa Espiritu. Paggahin og igong kapailin-ilinan sa inyong plano sa leksiyon. Kon gikinahanglan ninyo nga pamub-an ang usa ka leksiyon og gamay aron sa paghatag sa inyong pagpamatuod ug pag-awhag og diskusyon kabahin sa kasamtangang isyu, palihog buhata kon ang Espiritu nag-aghat ug nagdiktar nga kini angay. …
… Hinumdomi nga ang usa ka estudyante dili usa ka sudlanan nga pun-on; ang usa ka estudyante usa ka kalayo nga pagasigahon. (“Angels and Astonishment” [pamulong nga gihatag diha sa Seminaries and Institutes of Religion nga sibya sa pagbansay, Hunyo 12, 2019], https://www.churchofjesuschrist.org/study/broadcasts/miscellaneous-events/2019/06/14holland?lang=ceb)
Materyal sa Pagpangandam sa Klase
Ang materyal sa pagpangandam sa klase gituyo aron tun-an ninyo ug sa inyong mga estudyante agi og pagpangandam alang sa klase. Naglakip kini sa mga pagtulon-an gikan sa mga kasulatan ug sa mga lider sa Simbahan, mga video, ug usa ka seksiyon sa “Gusto pa og Dugang?” nga naghatag og dugang nga mga kapangohaan nga kalabot ngadto sa hilisgotan sa leksiyon.
Ang materyal sa pagpangandam sa klase naglakip usab og mga pangutana ug mga kalihokan nga nag-awhag sa mga estudyante sa pagdugang sa ilang mga pagkat-on ug sa pagpangandam sa pagtampo ngadto sa mga diskusyon sa klase. Sama pananglitan, diha sa materyal sa pagpangandam sa klase alang sa leksiyon 4, “Pagkaplag og Katuyoan ug Hingpit nga Kalipay diha sa mga Nilalang sa Ginoo,” gidapit ang mga estudyante sa pagbuhat sa mosunod nga kalihokan:
Ang paggamit sa materyal sa pagpangandam motabang sa mga esudyante nga “pangita[a]on ang pagtulon-an, gani pinaagi sa pagtuon ug usab pinaagi sa hugot nga pagtuo” (Doktrina ug mga Pakigsaad 88:118). Si Elder David A. Bednar sa Korum sa Napulog Duha ka Apostoles mitudlo:
Ang pagkat-on pinaagi sa pagtuo nagkinahanglan sa espirituhanon, mental, ug pisikal nga pagpaningkamot ug dili lamang lumalabay nga pagbati. …
… Ang usa ka estudyante kinahanglang mopakita og hugot nga pagtuo ug molihok aron makaangkon og kahibalo alang sa iyang kaugalingon. (“Paningkamot sa Pagkat-on pinaagi sa Hugot nga Pagtuo,” Liahona, Sept. 2007, 20)
Kamo tingali mangita og mga oportunidad sa pagdugang ngadto sa mga estudyante sa saad sa Ginoo nga kadto kinsa sa dakong tinguha naningkamot og espirituhanong pagkat-on makadawat niini (tan-awa sa Mateo 7:7; Doktrina ug mga Pakigsaad 42:61; 88:63).
Materyal sa Magtutudlo
Diha sa pasiuna sa materyal sa magtutudlo alang sa matag leksiyon, inyong makaplagan ang usa ka paghulagway sa gitinguha nga mga resulta sa tigkat-on. Kini nga pasiuna gisundan og gisugyot nga mga ideya sa pagtudlo nga naghatag og han-ay sa leksiyon, mga pagtulon-an gikan sa mga kasulatan ug sa mga lider sa Simbahan, mga kamatuoran nga hatagan og gibug-aton, mga tabang sa diskusyon, ug mga ideya sa paggamit.
Samtang inyong tun-an ang materyal sa magtutudlo, bantayi kon sa unsang paagi kini nag-awhag sa pagpangandam sa mga estudyante. Ang makanunayong pagsalig diha sa pagpangandam sa mga estudyante motabang kanila sa pagbati sa kaimportante sa pagpangandam alang sa matag klase. (Pahinumdom: Ibutang sa hunahuna nga kon kamo mohatag og dugang nga hilisgotan atol sa klase, ang panahon nga gigamit sa pagbuhat sa mao makapugong sa mga estudyante sa pagpakigbahin kon unsay ilang nakat-onan ug gibati samtang ilang gitun-an ang materyal sa pagpangandam.)
Ang unang pangutana sa ubos, gikan sa leksiyon 4, maoy usa ka ehemplo kon unsaon sa materyal sa magtutudlo pag-awhag sa pagpangandam sa mga estudyante:
Palandonga agig Pagpangandam sa Pagtudlo Niini nga Kurso
Susama sa unsay buhaton sa inyong mga estudyante sa dili pa magklase, paggahin og higayon sa pagpalandong samtang kamo mangandam sa pagtudlo niini nga kurso. Una, tan-awa ang usa o duha ka leksiyon aron mapamilyar sa pagpangandam sa klase ug sa mga materyal sa magtutudlo. Paniira kon giunsa pagdesinyo kini nga mga materyal aron magamit og dungan samtang kamo mangandam sa pagtudlo. Dayon hunahunaa ang mosunod nga mga pangutana:
-
Unsa nga mga panghunahuna o mga paagi mahimo ninyong sundon sa paggamit niini nga mga materyal sa epektibo nga paagi ngadto sa inyong mga estudyante?
-
Unsa ang pipila ka paagi nga kamo mahimong makaawhag sa mga estudyante sa pag-andam aron makabaton sila og mas buhong nga kasinatian diha sa klase?
-
Unsa ang inyong mabuhat aron makaapil ang mga estudyante kinsa wala magtuon sa materyal sa pagpangandam?
Unsaon nako aron epektibong makaandam sa pagtudlo?
Ang Langitnong Amahan motabang kaninyo samtang kamo mangandam ug magtudlo sa Iyang mga anak. Ang inyong mga paningkamot sa pagtuon sa makugihong paagi sa mga kasulatan ug pagpuyo sa ebanghelyo motabang kaninyo nga takos alang sa giya sa Espiritu (tan-awa sa Doktrina ug mga Pakigsaad 11:21).
Makita ninyo nga kini makatabang sa pagpangutana og usa o dugang pa sa mosunod nga mga pangutana samtang kamo mangandam sa pagkat-on ug pagtudlo sa inyong mga estudyante:
-
Nag-ampo ba ako nga makadawat sa giya sa Espiritu Santo ug makasabot sa mga panginahanglan sa akong mga estudyante? Sa unsang paagi ako makaila kon unsa ang labing may koneksyon ngadto kanila?
-
Mibati ba ako nga adunay lig-on nga kahibalo diha sa mga kasulatan, pagpangandam sa materyal sa klase, ug sa materyal sa magtutudlo? Aduna bay bisan unsang butang nga ako kinahanglan mopahiangay aron matubag ang mga panginahanglan sa akong mga estudyante?
-
Unsaon nako pagtabang ang mga estudyante sa pagtutok diha sa Manluluwas ug pagkat-on gikan sa Espiritu Santo niini nga leksiyon?
-
Unsaon nako pagtabang ang matag usa sa akong mga estudyante nga maapil sa hingpit nga paagi? Unsaon nako sa pagsiguro nga sila adunay panahon nga ilang gikinahanglan atol sa klase sa paghimo og personal nga mga plano sa paggamit sa unsay ilang nakat-onan?
-
Unsaon nako sa pagmugna og usa ka kahimtang sa pagkat-on diin ang mga estudyante mobati nga gihatagan og bili, gidawat, ug luwas sa pagpakigbahin ug sa pagkat-on gikan sa usag usa? (Tan-awa sa Doktrina ug mga Pakigsaad 88:78, 122.)
Unsaon nako sa pagpahiangay sa mga leksiyon alang niadtong may mga kakulangan?
Samtang mangandam kamo sa pagtudlo, pagmahunahunaon sa mga estudyante nga adunay piho nga mga panginahanglan. Ipahiangay ang mga kalihokan ug mga gipaabot aron sa pagpaapil niini nga mga estudyante ug sa pagtabang kanila nga magmalampuson. Alang sa dugang nga impormasyon, konsulta sa mga kapangohaan diha sa pahina sa Mga Kakulangan sa Panglawas nga anaa sa https://www.churchofjesuschrist.org/life/disability?lang=ceb.
Unsa ang gipaabot sa mga estudyante aron makadawat og kredito?
Aron makadawat og kredito ngadto sa paggradwar sa institute, ang mga estudyante gikinahanglan nga
-
magtuon sa materyal sa pagpangandam sa dili mominos sa 75 porsyento sa mga leksyon,
-
motambong og 75 porsyento sa mga klase, ug
-
mokompleto og usa sa mosunod nga mga kasinatian sa pagkat-on: pagtipig og study journal; pagsulat og mga tubag sa tulo ka essay nga mga pangutana; modesinyo ug mokompleto og usa ka proyekto sa pagkat-on (nga adunay pagtugot sa magtutudlo) nga ilang kaugalingon nga may kalabotan sa sulod [content] sa kurso; o pagrekord sa mga tubag ngadto sa tanang mga pangutana ug mga kalihokan diha sa materyal sa pagpangandam. (Mubo nga sulat: Ang mga estudyante wala magkinahanglan sa pagsumiter sa ilang mga tubag nganha kaninyo; sa kataposan sa semestre; sila nagkinahanglan lamang sa pagpakita kaninyo kon unsay ilang nakompleto.) Pangita og dugang pa nga mga detalye sa Institute Nag-ugmad sa mga Kasinatian sa Pagkat-on nga pahina.
Irekord ang Inyong mga Hunahuna
Hunahunaa ang matang sa kasinatian sa pagkat-on nga inyong gilaoman nga mabatonan sa inyong mga estudyante niini nga kurso. Paglista og pipila sa inyong mga hunahuna mahitungod kon unsaon ninyo pagplano sa pagtabang sa mga estudyante sa pagbaton og makahuluganong kasinatian sa pagkat-on.