Leksiyon 18 Materyal sa Magtutudlo

Pagdawat sa Balaanon nga Gasa sa Grasya sa Manluluwas

Ang mga kasulatan nagtudlo nga pinaagi lamang sa “mga maayo nga buhat, ug kaluoy, ug grasya sa Balaang Mesiyas” nga kita makadawat og kinabuhing dayon (2 Nephi 2:8). Atol niini nga leksiyon, ang mga estudyante mopasabot sa ilang panginahanglan sa grasya sa Manluluwas, mopaambit og mga paagi nga nasinati nila ang Iyang grasya, ug motino kon unsay ilang buhaton aron mas mosalig Kaniya.

Mga Sugyot alang sa Pagtudlo

Ang Ginoo ug ang Iyang mga sulugoon nagtudlo bahin sa kamahinungdanon sa grasya.

Dapita ang mga estudyante nga pribadong ilista ang pipila sa ilang labing dakong mga panginahanglan ug mga tinguha alang sa tabang sa Dios. Pananglitan, mahimo nilang ilista ang mga tintasyon o mga sala nga gusto nilang mabuntog, mga kahuyang nga naglisod sila, hagit o desisyon nga ilang giatubang, dakong buluhaton diin nagkinahanglan sila og tabang aron makompleto, o Kristohanon nga mga kinaiya nga gitinguha nila nga mapalambo. Awhaga ang mga estudyante sa paghunahuna niini nga mga tinguha samtang maghisgot sila sa grasya ni Jesukristo atol sa leksiyon.

Aron masusi ang pagsabot sa mga estudyante bahin sa grasya, mahimo nimong dapiton sila sa pagpasabot kon unsay ilang nasabtan sa grasya ni Jesukristo ug sa pagsuta kon sila aduna bay mga pangutana. Kon gikinahanglan, ipakita ang mosunod nga kahulogan:

Ang grasya mao ang tabang og kusog nga gihatag pinaagi sa Pag-ula ni Ginoong Jesukristo. … Ang pulong nga grasya, sumala sa gigamit diha sa mga kasulatan, nagpasabot sa makaabag nga gahom ug espirituhanon nga pagpaayo nga gitanyag sa kaluoy ug gugma ni Jesukristo. (Gospel Topics, “Grace,” topics.ChurchofJesusChrist.org)

Ikonsiderar ang pagpakita sa mosunod nga imahe sa usa ka paras. Ipasabot nga si Jesukristo mitudlo sa sambingay sa tinuod nga paras sa hapit na siya moadto sa Tanaman sa Getsemani aron buhaton ang Iyang Pag-ula.

Dapita ang mga estudyante sa pagrebyo sa Juan 15:1–8, mangita kon unsay ikatudlo ngari kanato sa mga simbolo sa paras, mga sanga, ug bunga mahitungod sa gasa sa Manluluwas sa balaanon nga grasya.

Ikonsiderar ang pagpangutana sa mosunod nga mga pangutana aron matabangan ang mga estudyante nga makita ang mga koneksyon tali sa sambingay bahin sa tinuod nga paras ug sa grasya:

• Unsa ang girepresentar sa mga simbolo sa paras, mga sanga, ug bunga? Unsa kaha ang gitudlo niini ngari kanato mahitungod sa atong panginahanglan sa grasya sa Manluluwas? (Mahimo nimong tabangan ang mga estudyante sa pag-ila og usa ka baroganan sama sa mosunod: Kon kita magpabilin diha ni Jesukristo, kita makadawat sa Iyang grasya aron sa pagtabang kanato nga makahimo og maayong mga buhat.)

• Unsa man kaha ang pagbati kon magpabilin o magpadayon diha ni Kristo? (Mahimo nimong rebyohon ang pamahayag ni Elder Jeffrey R. Holland diha sa seksiyon 1 sa materyal sa pagpangandam.) Unsa ang nakatabang kanimo nga magpabiling konektado sa Manluluwas? Unsa ang mahimong buhaton sa usa ka tawo nga mibati nga nahimulag ni Jesukristo ug sa Iyang gasa sa grasya?

Mahimo nimong dapiton ang usa o duha ka estudyante sa pagpaambit sa ilang mga pagbati mahitungod sa gasa sa grasya sa Manluluwas. Ikonsiderar ang pagpaambit sa imong pagpamatuod.

Kita makadawat sa grasya sa Ginoo sa atong kinabuhi.

Ikonsiderar ang pagpakita sa mga hulagway sa usa ka gasa ug pagbayad nga makita diha sa seksiyon 2 sa materyal sa pagpangandam. Dapita ang mga estudyante sa pagpasabot kon unsay ilang nasayran mahitungod sa grasya ni Kristo isip usa ka gasa o usa ka butang nga kinahanglang hagoan. (Ang mga estudyante mahimong mogahin og pipila ka minuto sa pagrebyo sa seksiyon 2 o pipila sa “Gusto pa og Dugang?” nga materyal kon gikinahanglan. Kon napasabot na nila kini nga mga ideya sa sinugdanan sa leksiyon, mahimong mopadayon lang ka sa mosunod nga mga sitwasyon.)

Ipakita ug basaha og kusog ang mosunod nga mga sitwasyon.

Si Sakura mibati nga kanunay siyang makasala ug dili angayan sa tabang sa Ginoo.

Si Tobias nagtuo nga sa dili pa siya makadawat og tabang sa Ginoo aron mabuntog ang iyang pagkaadik sa pornograpiya, buhaton una niya ang tanan nga iyang mahimo aron mabuntog kini.

Si Elena nagtuo nga ang iyang mga paningkamot dili mahinungdanon ug walay silbi kon itandi sa matubsanong grasya ni Jesukristo.

Dapita ang mga estudyante sa pagpaambit kon unsaon kaha nila sa pagtubag sila si Sakura, Tobias, ug Elena. Ikonsiderar kon hain sa mosunod nga mga pangutana ang imong ipangutana aron matabangan ang mga estudyante nga mapalawman ang ilang pagkat-on:

• Unsa kaha ang sayop nga pagsabot niini nga tawo mahitungod sa gasa sa grasya sa Manluluwas?

• Sa unsang paagi kaha nga kanang sayop nga pagsabot makapugong sa iyang abilidad sa paggamit o pagsalig sa grasya sa Manluluwas?

• Unsa nga pagtulun-an o baroganan nga may kalabotan sa grasya sa Manluluwas ang mapaambit nimo niini nga tawo?

Ikonsiderar ang paglista diha sa pisara sa mga kamatuoran nga itino sa mga estudyante. Ang mga estudyante mahimong moila sa mga kamatuoran nga susama sa mosunod: Ang grasya usa ka gasa nga dili hagoan apan atong madawat kon kita mogamit sa atong hugot nga pagtuo diha ni Jesukristo ug maningkamot sa pagsunod sa ebanghelyo. Kita mahimong makadawat sa grasya sa Ginoo sa dili pa, atol sa, ug human nato mahatag ang atong labing maayo nga paningkamot.

Pahinumdomi ang mga estudyante nga sila gidapit diha sa seksiyon 3 sa materyal sa pagpangandam sa pagtuon sa usa ka asoy sa kasulatan nga naghulagway kon sa unsang paagi nga ang grasya sa Ginoo magamit sa atong kinabuhi. (Mahimo nimong hatagan ang mga estudyante og panahon sa pagrebyo sa asoy sa kasulatan nga ilang gipili.) Han-aya ang mga estudyante ngadto sa ginagmay nga mga grupo. Dapita ang mga estudyante sa pagpasabot sa ilang tudling ug sa pagpaambit sa ilang mga tubag sa tulo ka pangutana diha sa seksiyon 3 sa materyal sa pagpangandam.

Pagpalambo sa Atong Pagtudlo ug Pagkat-on

Hatagi ang mga estudyante og panahon sa pagpamalandong. Usa ka paagi nga kita makatabang sa mga estudyante nga mas gamiton ang ilang kasingkasing ngadto sa pagsabot mao ang paghatag nila og panahon diha sa klase aron makapamalandong o makasulat mahitungod sa unsay ilang nasabtan ug gibati. Mahimo dayon nato silang dapiton sa paghunahuna kon unsa ang piho nga mga aksiyon nga ilang buhaton aron magamit unsay ilang nakat-onan sa ilang kinabuhi.

Mahimo nimong taposon ang klase pinaagi sa pagdapit sa mga estudyante sa pagrebyo sa personal nga mga panginahanglan ug mga tinguha nga ilang gilista sa sinugdanan sa klase. Hatagi sila og panahon sa paghunahuna ug pagrekord sa mainampoong paagi sa unsay ilang mabuhat aron sa pagdapit sa mas abunda nga grasya sa Ginoo nganha sa ilang kinabuhi, pagpadayon uban sa hugot nga pagtuo, ug mas hingpit nga pagsalig sa Iyang balaanon nga gahom.

Alang sa Sunod nga Higayon

Ikonsiderar ang pagpadala sa mosunod nga mensahe, o usa nga imong kaugalingon, ngadto sa imong mga estudyante sa dili pa ang sunod nga klase: Samtang magtuon ka sa materyal sa pagpangandam alang sa leksiyon 19, paghunahuna og usa ka tawo nga imong kaila kansang kinabuhi mahimong mapanalanginan pinaagi sa pagbaton og mas maayo nga pagsabot bahin sa pangalagad ni Jesukristo ngadto niadtong anaa sa kalibotan sa mga espiritu.