Leksiyon 8 Materyal sa Magtutudlo

Pagdawat kang Jesukristo isip ang Gisaad nga Mesiyas

Si Jesukristo mao ang Mesiyas (o “Usa nga Dinihogan”) sa Bag-ong Tugon. Gipili Siya sa Iyang Langitnong Amahan nga mahimo natong Manluluwas. Niini nga leksiyon, ang mga estudyante adunay oportunidad nga makahisgot kon sa unsang paagi nga ang pagdawat sa mesiyanikanhong misyon ni Jesukristo makausab sa ilang kinabuhi. Ang mga estudyante maawhag sa paghunahuna kon sa unsang paagi nga ang Mesiyas makatabang kanila sa mga kapait o mga kasakit nga ilang gisinati.

Mga Sugyot alang sa Pagtudlo

Si Jesukristo namahayag nga Siya ang Mesiyas.

Mahimong sugdan nimo ang klase pinaagi sa pagpakita sa mosunod nga pamahayag ni Elder Neil L. Andersen sa Korum sa Napulog Duha ka Apostoles:

Walay makalikay sa mga sakit ug kasubo. … Ang mga samad sa kalag dili kay para lang sa mga adunahan o sa kabos, sa usa ka kultura, usa ka nasod, o usa ka henerasyon. Moabot kini sa tanan ug mga kabahin kini sa pagkat-on nga atong madawat niining mortal nga kasinatian. (Neil L. Andersen, “Nasamdan,” Liahona,, Nob. 2018, 84)

Ikonsiderar ang pagsulat sa mosunod nga hugpong sa mga pulong diha sa pisara: Mga samad sa kalag.

Dapita ang mga estudyante sa pagpaambit og mga paagi nga kita makasinati og mga samad sa kalag, ug irekord sa pisara ang mga tubag sa mga estudyante. Aron kini nga kalihokan mahimo nga mas makahuloganon alang sa mga estudyante, mahimo nimo silang dapiton sa hilom nga pag-ila sa mga samad sa ilang mga kalag o niadtong tawo nga ilang gihigugma. Awhaga ang mga estudyante sa pribadong pagkonsiderar sa tibuok klase kon sa unsang paagi nga ang Ginoo makatabang niini nga mga samad.

Dapita ang mga estudyante sa paghatag og kahulogan o pagpasabot sa titulo nga Mesiyas ug kon ngano nga ang gihulat nga Mesiyas mahinungdanon sa mga tawo sa pakigsaad sa Dios sa Daang Tugon ug sa kapanahonan sa Bag-ong Tugon.

Ipasabot nga ang Isaias 61:1–3 usa ka panagna kon sa unsang paagi nga ang Mesiyas makatabang sa pag-ayo sa mga kalag nga samaran. Dapita ang mga estudyante sa pagrebyo niini nga mga bersikulo ug sa pagpangita sa mga pulong o hugpong sa mga pulong nga makatanyag og paglaom ngadto sa mga nanag-antos.

Samtang magtuon ang mga estudyante, mahimo nimong isulat sa pisara ang mosunod nga mga pulong: Unsaon sa Mesiyas sa pagtabang ang samaran nga kalag. Dayon himoa nga mopaambit ang mga estudyante sa mga pulong o hugpong sa pulong nga ilang nakita nga labing mahinungdanon ug isulat kini sa pisara. Aron matabangan ang mga estudyante sa paghunahuna og maayo, ikonsiderar ang pagpangutana sa pipila ka mosunod nga mga pangutana:

• Sa unsang paagi nga kini nga pulong o hugpong sa mga pulong makahupay sa mga samad sa kalag?

• Nganong kini nga pulong o hugpong sa mga pulong mahinungdanon kaninyo?

• Unsa ang gitdulo niini nga pulong o hugpong sa pulong kanato mahitungod sa Mesiyas ug sa Iyang misyon?

Human sa paghatag og panahon alang sa makahuloganon nga diskusyon, mahimo nimong ipakita ang gipauban nga hulagway ni Jesus nga didto sa sinagoga sa Nazaret. Sa daklit rebyoha ang konteksto, ug dayon dapita ang usa ka estudyante sa pagpaambit kon giunsa ni Jesus sa paggamit ang Isaias 61:1–2 sa pagpamahayag nga Siya ang gisaad nga Mesiyas. (Kon gikinahanglan, iparebyo sa mga estudyante ang Lucas 4:18–22.)

Mahimo nimong ipakita ang mosunod nga kamatuoran nga: Si Jesus mao ang Mesiyas nga gipadala aron sa pag-ayo sa mga nasakitan, paghatag og kagawasan sa mga nasamaran, ug paghupay sa mga nagbangotan.

• Sa unsang paagi nga ang Manluluwas makatabang niadtong mga nasakitan o mga nasamaran sa emosyonal nga paagi? (Ikonsiderar ang pagbasa sa pamahayag ni Elder Gerrit W. Gong nga naa sa seksiyon 1 sa materyal sa pagpangandam.)

• Sa unsang paagi nga ang Manluluwas mitabang o mihupay kaninyo o sa tawo nga inyong nailhan?

Si Isaias ug Alma mipamatuod sa gahom sa Mesiyas sa pagluwas kanato.

Mahimo nimong ipakita ang gipauban nga mga litrato sa Manluluwas ug dapita ang mga estudyante sa daklit nga pagpaambit sa lain-laing mga paagi sa Iyang mga giantos dinhi sa mortalidad.

Ikonsiderar ang pagpatrabaho sa mga estudyante nga may kapares. Ang usa ka tawo mahimong magtuon sa Isaias 53:3–6, 8, 11–12 ug ang lain magtuon sa Alma 7:11–12. Dapita ang mga estudyante sa pagpangita sa duha ka butang: (1) kon sa unsang paagi nga ang Mesiyas mag-antos, ug (2) sa unsang paagi nga Siya makapanalangin kanato tungod sa Iyang pag-antos. Human sa paghisgot sa mga estudyante kauban sa ilang kapares sa unsay ilang nadiskobrehan, pagdapit og pipila ka estudyante sa pagpaambit sa unsay ilang nakat-onan diha sa klase.

Samtang magpaambit ang mga estudyante, tingali makatabang ang pagsusi sa ilang nakat-onan sa pamahayag nga susama sa mosunod: Tungod kay ang Mesiyas mipas-an sa atong mga kasub-anan, ug sa mga kalapasan, Siya mahimong moayo kanato, magdala kanato og kalinaw, mopas-an sa atong mga kadaotan, mopasaylo kanato, mohupay kanakato, ug motabang kanato. Ikonsiderar ang pag-follow up og pangutana:

• Unsa nga mga matang sa mortal nga mga kapait ug mga kasakit ang matabangan sa Ginoo ngari kanato? (Tingali importante ang pagrebyo sa kahulogan sa pulong nga tabang ug dayon ipabasa og kusog ang mga pamahayag ni Presidente Jean B. Bingham ug Presidente Dallin H. Oaks sa seksiyon 2 sa materyal sa pagpangandam.)

Mahimong mogahin ka og pipila ka gutlo aron tabangan ang mga estudyante sa pagtino og tinuod nga kinabuhi nga mga sanglitanan kon sa unsang paagi nga ang Manluluwas mitabang kanato. Kini nga mga sanglitanan posibling maggikan sa mga kasulatan, mga lider sa Simbahan, o sa kinabuhi sa imong mga estudyante. Mahimo usab nga mopaambit ka og imong kaugalingon nga kasinatian.

Pagpalambo sa Atong Pagtudlo ug Pagkat-on

Hatagi ang mga tigkat-on og panahon alang sa hilom nga pagpamalandong. Adunay mga higayon nga ang mga pulong tingali mahimong usa ka babag sa espirituwal nga pagkat-on. Ang kahilom mahimo nga usa ka sagradong gasa nga magtugot sa mga estudyante nga makapamalandong og maayo sa unsay ilang nakat-onan ug mas klarong makapaminaw sa malumo nga mga paghonghong sa Espiritu Santo.

Ang mga estudyante puwedeng maghunahuna og usab sa mga “samad” nga gisinati nila, o sa tawo nga ilang gihigugma. Ipakita ang mosunod nga mga pangutana, ug dapita ang mga estudyante sa pagpamalandong sa matag usa niini. Hatagi og panahon nga ang mga estudyante nga makarekord sa ilang mga hunahuna ug mga impresyon.

• Sa unsang paagi nga ang pagkasayod nga ang Manluluwas nakasabot sa tanan nga imong mga gisagobang makaapekto sa unsay imong pagtan-aw sa mga kapait ug mga kasakit?

• Unsay imong mga hunahuna o mga pagbati alang ni Jesukristo samtang imong ikonsiderar unsay Iyang giantos aron Siya makatabang nimo? Unsay gidasig niini diha nimo nga imong buhaton?

• Sa unsang paagi nga kini nga kahibalo mopanalangin sa tawo nga imong nailhan kinsa anaa sa panlimbasog? Sa unsang paagi nga kini imong mapaambit ngadto nila?

Kon itugot sa oras, mahimo nga hatagan nimo ang matag estudyante og sticky note o gamayng papel nga kasulatan. Dapita sila nga isulat ang tubag sa mosunod nga pangutana:

• Paghunahuna og usa ka tawo nga imong nailhan kinsa nagsagobang og usa ka mahagiton nga sitwasyon. Unsa nga mensahe ang imong ikapaambit ngadto nila mahitungod sa katakos ni Jesukristo sa paglig-on ug pag-ayo kanato?

Dayon sultihi ang mga estudyante sa pagbutang sa ilang mga papel libot sa kwarto. Hatagi ang mga estudyante og pipila ka minuto sa paglakaw libot sa kwarto ug mobasa sa nagkalainlaing mga pamahayag.

Alang sa Sunod nga Higayon

Aron maawhag ang mga estudyante sa pagbasa sa materyal sa pagpangandam alang sa leksiyon 9, puwede nimo silang padalahan sa mosunod nga litrato ug mensahe sa dili pa moabot ang sunod nga klase: Gahini og panahon ang pagtuon sa materyal sa pagpangandam alang sa leksiyon 9 ug mamalandong kon nganong ang pagkatawo ni Jesukristo kinahanglan nga saulogon dili lang sa Pasko apan sa tibuok tuig.