Leksiyon 27 Materyal sa Magtutudlo

Pagkaplag og Paglaom diha sa Kahayag ug Kinabuhi sa Kalibotan

Ang mga estudyante mahimong mobati og kangitngit, pagkawala sa kadasig, ug pagkawalay paglaom sa daghang mga rason. Sa kalahi, sila mahimong pun-on sa gahom sa paglaom kon sila motutok diha sa Kahayag sa Kalibotan, si Jesukristo. Niini nga leksiyon, ang mga estudyante maadunay oportunidad sa paghunahuna kon unsay ilang mabuhat sa pagdugang sa ilang paglaom diha Kaniya.

Mga Sugyot alang sa Pagtudlo

Si Jesukristo nagpadayag nga Siya mao ang Kahayag ug Kinabuhi sa Kalibotan.

Sa pagsugod sa leksiyon, kamo makapakita sa mosunod nga hulagway:

• Ang mga kasulatan naghisgot og mga tawo “magalakaw sa kangitngitan” o “[naga]lingkod sa kangitngit” (tan-awa sa Mga Salmo 82:5; Doktrina ug mga Pakigsaad 95:6, 12; Mga Salmo 107:10–11; Lucas 1:79). Sa inyong hunahuna unsa ang girepresentar niining kangitngit?

Basaha og kusog ang Juan 8:12 ug ang Mosiah 16:9, ug hangyoa ang mga estudyante sa pagpangita kon unsaon ni Jesukristo nga makatabang kanato sa pagbuntog sa kangitngit. Ipakita ang mosunod nga kamatuoran diha sa pisara: Samtang kita magsunod ni Jesukristo, Siya ang mahimong kahayag ug kinabuhi sa atong mga kinabuhi.

• Sa unsang mga paagi si Jesukristo ang kahayag ug kinabuhi sa atong mga kinabuhi? (Kon gikinahanglan, dapita ang mga estudyante sa pagrebyo sa kang Presidente Dallin H. Oaks nga pamahayag gikan sa seksiyon 1 sa materyal sa pagpangandam.)

Aron pagtabang sa mga estudyante sa pagpangita og kalabotan niini nga leksiyon, kamo makapakita ug makabasa og kusog sa mga pangutana sa ubos. Dapita ang mga estudyante sa pagpalandong niini nga mga pangutana samtang nagtan-aw sila sa video “The Light That Shineth in Darkness [Ang Kahayag nga Nagdan-ag Taliwala sa Kangitngit]” (2:19).

• Unsaon kaha nga ang pagsunod kang Jesukristo isip ang Kahayag ug Kinabuhi sa Kalibotan nagpanalangin, naglig-on, ug nagtabang kaninyo?

• Kanus-a kamo nagsinati sa kahayag o sa kinabuhi nga si Jesukristo ang naghatag? Unsa nga kalainan ang nahimo nini, o makahimo niini, diha sa inyong kinabuhi?

Human nila matan-aw ang video, dapita ang mga estudyante sa pagrekord sa pipila sa mga hunahuna nga sila aduna mahitungod sa mga pangutana. Mahimo ninyong dapiton sila sa paghisgot sa ilang mga tubag isip usa ka klase o sa gagmay nga mga grupo.

Kamo makapakita sa nag-ubang imahe sa Templo sa Salt Lake ug makabasa og dungan sa pamahayag ni Sister Sharon Eubank diha sa seksiyon 1 sa materyal sa pagpangandam. O kamo makapakita sa katukma nga bahin sa video (0:00–1:17) gikan sa iyang pakigpulong “Kristo: Ang Kahayag nga Nagdan-ag Taliwala sa Kangitngit” (Liahona, Mayo 2019, 73–74).

• Unsa ang pipila ka mga paagi ang kaaway “naninguha sa pag-awop sa atong kahayag, pagguba sa koneksyon,” o sa pagputol kanato gikan sa kahayag sa Manluluwas? (Sharon Eubank, “Kristo: Ang Kahayag nga Nagdan-ag Taliwala sa Kangitngit,” 73).

• Unsa ang pipila ka paagi kita makakonektar o magpabiling konektado ngadto ni Jesukristo, ang tinuod nga tinubdan sa kahayag ug kinabuhi? (Makadapit kamo sa mga estudyante sa pagrekord kon unsay ilang mabuhat.)

Ang paglaom magkadugang samtang atong ayohon ang atong pagtutok diha ni Jesukristo.

Ipakita ang mosunod nga kamatuoran gikan sa “Ang Buhi nga Kristo: Ang Pagpamatuod sa mga Apostoles”: Si Jesukristo “mao ang kahayag, ang kinabuhi ug ang paglaom sa kalibotan.”

Nag-agad sa mga panginahanglan sa inyong mga estudyante, kini mahimong makatabang ang daklit nga pagrebyo sa katin-awan sa paglaom ug sa ikaduhang pamahayag ni Elder Dieter F. Uchtdorf sa seksiyon 2 sa materyal sa pagpangandam. Dayon mahimo ka nga mangutana:

• Unsaon kita sa pagpanalangin kon kita modangop ngadto sa Langitnong Amahan ug ni Jesukristo isip ang kataposang tinubdan sa paglaom? Nganong kini makatabang nga mahibalo nga ang paglaom usa usab ka gasa?

Kamo makadapit og mga estudyante sa paghunahuna mahitungod sa usa ka tawo nga ilang kaila kinsa mahimong mibati og nawad-an og kadasig, masulub-on, gimingaw, nabug-atan, o naguol. Pagdapit og mga estudyante sa pagrebyo sa Moroni 7:40–42 ug sa Ether 12:4, mangita sa mga kamatuoran mahitungod sa paglaom diha ni Kristo nga makapausab kon unsaon nato pagsinati ang kinabuhi.

Human natugotan ang mga estudyante og igo nga panahon sa pagtuon, pagdapit og pipila ka mga estudyante sa pagpakigbahin sa mga kamatuoran nga ilang nakaplagan ug unsaon niini nga mga kamatuoran nga makadugang sa paglaom sa usa ka tawo diha ni Kristo.

Hunahunaa ang paghangyo sa mga estudyante sa pagdangop ngadto sa asoy sa kasulatan nga ilang gipili sa pagtuon gikan sa seksiyon 2 sa materyal sa pagpangandam. Hatagi sila og pipila ka minuto sa pagrebyo sa unsay ilang natun-an. Bahina ang klase ngadto sa gagmay nga mga grupo ug hangyoa ang mga estudyante sa pagpakigbahin sa ilang asoy sa kasulatan ug unsay ilang nakat-onan gikan niini mahitungod sa paglaom diha ni Kristo.

Aron matabangan ang mga estudyante sa pagbati sa kamahinungdanon sa pagbaton og paglaom diha ni Kristo, mahimo kamong mopakita sa tanan o bahin sa mosunod nga pamahayag ni Presidente Uchtdorf, kinsa kaniadto nagserbisyo diha sa Unang Kapangulohan. Human ang mga estudyante dihay minuto sa pagbasa ug pagpalandong niini nga pamahayag, makadapit kamo og usa o duha ka estudyante sa pagpamatuod sa ilang paglaom diha ni Jesukristo ug giunsa niini pag-apekto sa ilang mga kinabuhi.

Uban ni Jeremias ako mopahayag, “Bulahan ang tawo … kansang pagsalig mao ang Ginoo” [Jeremias 17:7].

Uban ni Joel ako mopamatuod, “Ang Ginoo [mao] ang paglaom ug ang kusog sa mga anak sa Israel” [Joel 3:16].

Uban ni Nephi ako mopadayag: “Mopadayon sa unahan uban ang pagkamakanunayon kang Kristo, magbaton sa usa ka hingpit nga kahayag sa paglaom, ug usa ka gugma sa Dios ug sa tanan nga mga tawo. Busa, kon kamo mopadayon sa unahan, magbusog sa pulong ni Kristo, ug molahutay hangtod sa kataposan, tan-awa, sa ingon miingon ang Amahan: Kamo makabaton og kinabuhi nga dayon” [2 Nephi 31:20]. …

Ug ngadto sa tanan kinsa nag-antos––sa tanan kinsa mibati sa kawalay kadasig, kabalaka, o kasubo—ako moingon uban sa gugma ug labihan kahingawa alang kaninyo, ayaw gayod palupig.

Ayaw gayod og hunong.

Ayaw gayod tugoti ang pagkawalay paglaom nga mobuntog sa inyong espiritu.

Hangopa ug salig diha sa Paglaom sa Israel, kay ang gugma sa Anak sa Dios mowagtang sa tanang kangitngit, mopagaan sa tanang kasub-anan, ug modasig sa matag kasingkasing. (“Ang Walay Kinutoban nga Gahom sa Paglaom,” Liahona, Nob. 2008, 24)

Pagdapit og mga estudyante sa paghunahuna mahitungod sa mosunod nga mga pangutana ug irekord ang ilang mga panabot, mga panumdoman, o mga pagbati:

• Unsay inyong nakat-onan karong adlawa nga makatabang kaninyo sa pagkaplag og paglaom atol sa mga panahon sa pakigbisog o kawalay paglaom?

• Unsa nga yanong mga butang kamo makahimo sa pagdugang sa inyong hugot nga pagtuo ug paglaom diha ni Jesukristo?

Alang sa Sunod nga Higayon

Aron sa pagtabang sa mga estudyante alang sa kataposang klase niini nga kurso, kamo makapadala sa mosunod nga mensahe atol sa semana: Samtang inyong tun-an ang materyal sa pagpangandam alang sa atong kataposang klase, palandonga kon unsay inyong nakat-onan gikan niini nga kurso. Giunsa sa unsay inyong nakat-onan pag-impluwensya sa inyong pagsabot ug sa hugot nga pagtuo diha ni Jesukristo?