Leksiyon 13 Materyal sa Magtutudlo

Pagpangalagad sama sa Manluluwas

Sa panahon sa Iyang kinabuhi, ang Manluluwas nangalagad ngadto sa uban samtang Siya milig-on sa hugot nga pagtuo, mipanalangin, miayo, mihupay, ug mipasaylo. Niini nga leksiyon, maangkon sa mga estudyante ang oportunidad sa pagpasabot kon unsay kahulogan sa pagpangalagad sama sa Manluluwas. Mohunahuna usab sila sa Kristohanong mga paagi nga sila makapangalagad ngadto niadtong naglibot kanila.

Mga Sugyot alang sa Pagtudlo

Ang Manluluwas mao ang atong hingpit nga ehemplo kon unsaon sa pagpangalagad uban ang gugma.

Mahimo ninyong sugdan ang klase pinaagi sa pagpakita og usa ka hulagway sa Manluluwas nga naghugas sa mga tiil sa Iyang Apostoles.

• Unsa ang atong makat-onan mahitungod sa pagpangalagad gikan ni Jesus nga naghugas sa mga tiil sa iyang Apostoles? (Hunahunaa ang pagrebyo sa pamahayag ni Elder Jeffrey R. Holland diha sa seksiyon 1 sa materyal sa pagpangandam.)

Pahinumdomi ang mga estudyante nga human mahugasan ang mga tiil sa Apostoles, ang Manluluwas mihatag kanila og usa ka bag-ong sugo. Hunahunaa ang pagbasa og dungan sa Juan 13:34–35 ug sa pagpakita sa mosunod nga kamatuoran: Kita mahimong mailhan isip mga disipulo ni Kristo kon kita maghinigugmaay sa usag usa ingon nga Siya nahigugma kanato.

Samtang kamo nagdapit sa mga estudyante sa pagpakigbahin kon unsa ang kahulogan niini nga kamatuoran alang sa ilang kaugalingong pagkadisipulo, mahimo ninyong hisgotan ang usa o dugang pa sa mosunod nga mga pangutana:

• Unsaon kaha nga ang paghigugma sa uban ingon nga ang Manluluwas naghigugma kanato pag-apekto sa paagi nga kamo mangalagad?

• Unsa ang nagtabang kaninyo sa pagpangalagad uban sa mas dakong Kristohanong gugma?

• Sa unsang paagi kita makahibalo kon kinsa ang nanginahanglan sa atong tabang ug unsa ang atong mahimo? (Isip bahin sa inyong panaghisgot, mahimo kamong makarebyo ug makahisgot sa mga pamahayag ni Presidente Russell M. Nelson ug Presidente Henry B. Eyring diha sa seksiyon 1 sa materyal sa pagpangandam.)

Hunahunaa ang pagdapit sa pipila ka estudyante sa pagpakigbahin kon giunsa nila pagbati ang gugma sa Manluluwas diha sa ilang mga kinabuhi samtang sila nangalagad ngadto sa uban o samtang ang uban nangalagad ngadto kanila.

Kamo makapakita sa mosunod nga wala mahuman nga pamahayag diha sa pisara: Kita makapangalagad uban ang Kristohanong gugma samtang kita …

Pahinumdomi ang mga estudyante nga sa seksiyon 1 sa materyal sa pagpangandam sila gidapit sa pagtuon ug sa pagpamalandong sa ehemplo sa Manluluwas sa pagpangalagad. Han-aya ang mga estudyante ngadto sa ginagmay nga mga grupo. Dapita sila sa pagrebyo sa mga ehemplo sa kasulatan nga ilang natun-an ug ang bisan unsa nga mga panghunahuna nga ilang girekord. Ipakita o hatagi ang matag grupo og usa ka kopya sa mosunod nga mga pangutana, ug dapita ang mga estudyante sa paghisgot og dungan niini.

• Unsa ang nagdani kaninyo labaw sa tanan mahitungod kon giunsa sa Manluluwas sa pagpangalagad diha sa istorya nga inyong gitun-an?

• Unsaon nga kita makasunod sa Iyang ehemplo samtang kita nangalagad ngadto sa uban? (Isip kabahin sa inyong panaghisgot, mahimo kamong magdungan og rebyo sa mga pamahayag ni Presidente Jean B. Bingham ug Sister Sharon Eubank diha sa seksiyon 1 sa materyal sa pagpangandam ug sa pagpakigbahin kon unsay inyong nagustohan gikan nini.)

• Giunsa sa inyong mga paningkamot sa pagpangalagad sama sa Manluluwas pagtabang kaninyo nga mas mapaduol ngadto Kaniya?

Mahimo kamong modapit og pipila ka estudyante sa pagpakigbahin sa klase og mga nindot nga bahin gikan sa pagpanaghisgot sa ilang grupo. Makadugang kamo og daghang mga kataposan ngadto sa wala mahuman nga pamahayag diha sa pisara samtang ang mga estudyante nakigbahin.

Makakat-on kita sa paghigugma ug sa pagpangalagad ngadto sa tanang mga anak sa Dios.

Hunahunaa ang pagrebyo isip usa ka klase sa sambingay sa maayong Samarianhon diha sa Lucas 10:25–37. Mahimo ninyong awhagon ang mga estudyante sa pagtandi sa mga kinaiya ug mga lihok sa mga pari ug mga Levite ngadto sa Samarianhon. Dapita ang mga estudyante sa pagpakigbahin kon unsa ang ilang nakat-onan gikan sa sambingay mahitungod sa pagpangalagad ngadto sa uban ingon sa gibuhat sa Manluluwas. Aron sa pag-awhag og mas lawom nga hunahuna ug sa pagpakigbahin, mahimo kamong mangutana og pipila sa mosunod nga mga pangutana:

• Ngano kaha nga ang Manluluwas mipili sa usa ka Samarianhon isip ehemplo nga kinahanglan atong sundon?

• Unsaon sa Samarianhon diha sa sambingay mapahisama ngadto ni Jesukristo?

• Unsa ang magpugong kanato gikan sa pagpangalagad ngadto sa uban ingon nga ang Manluluwas mobuhat? Sa unsang paagi kita makakuha sa tabang sa Langitnong Amahan ug ni Jesukristo sa pagbuntog niini nga mga babag?

Aron sa pagtabang sa mga estudyante sa paghunahuna kon unsaon nila sa pagpangalagad sa Kristohanong mga paagi, ipakita o paghatag og papel nga aduna sa mosunod nga mga sitwasyon (mahimo usab nga kamo maghimo og pipila nga inyong kaugalingon). Makadapit kamo og mga estudyante sa pagpili og pipila niini ug sa paghisgot sa mga hagit nga kini aduna ingon man sa Kristohanong mga paagi sa pagpangalagad sa matag sitwasyon. Kamo makapabuhat niini nga mga kalihokan sa mga estudyante isip usa ka klase o sa ginagmay nga mga grupo.

• Ang imong higala misugid kaninyo nga sila adunay problema sa pornograpiya.

• Kamo gihatagan sa buluhaton sa pagpangalagad ngadto sa usa ka tawo kinsa nag-ingon nga mas gusto sila nga kamo dili mobisita.

• Kamo adunay usa ka higala kinsa bag-ohay nga mipakita isip usa ka bayot ug wala mobati nga sila angay pa ba sa simbahan.

• Kamo nakigtrabaho sa usa ka tawo kinsa bag-ohay lang nga nakasinati og pagkamatay sa usa ka minahal.

• Nakamatikod kamo og usa ka higala kinsa kaniadto namulong uban sa hugot nga pagtuo mahitungod sa tambag sa propeta nga sa karon hilabihan ka manaway.

Pagpalambo sa Atong Pagtudlo ug Pagkat-on

Awhaga ang mga estudyante sa paghimo og matarong nga lihok. Hatagi ang mga estudyante og mga oportunidad sa pagpamalandong kon unsaon nila sa paglihok diha sa hugot nga pagtuo ug sa paggamit sa unsay ilang nakat-onan. Samtang kamo kanunay mag-awhag sa mga estudyante sa pagpamalandong ug sa paggamit unsay ilang nakat-onan, kamo makatabang kanila sa pagdugang sa ilang kapasidad alang sa matarong nga lihok. Sunda kon angay.

Dapita ang mga estudyante sa pagpamalandong ug pagrekord sa ilang mga hunahuna mahitungod sa mosunod nga mga pangutana:

• Kinsa ang inyong gibati nga angay bayawon, lig-unon, o awhagon?

• Unsa nga Kristohanong serbisyo ang inyong mabuhat alang niini nga tawo?

Hunahunaa ang pagpamatuod sa importansiya sa paglihok diha sa espirituhanong mga panghunahuna sa pagpanalangin sa mga kinabuhi sa uban ug sa hingpit nga kalipay nga magagikan sa pagpangalagad sama sa Manluluwas.

Alang sa Sunod nga Higayon

Sulod sa semana, hunahunaa ang pagpadala sa mga estudyante sa mosunod nga mensahe o usa nga inyong kaugalingon: Samtang kamo magtuon sa materyal sa pagpangandam alang sa leksiyon 14, hunahunaa kon unsa ang labing dakong milagro kamo mahimong makasinati.