“Leksiyon 26 Materyal sa Pagpangandam sa Klase: Pagkahimong Mas mahisama ni Jesukristo,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo (2023)
“Leksiyon 26 Materyal sa Pagpangandam sa Klase,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo
Leksiyon 26 Materyal sa Pagpangandam sa Klase
Pagkahimong Mas mahisama ni Jesukristo
Atol sa mortal nga pangalagad sa Manluluwas, “Siya kinasingkasing nga mihangyo sa tanan sa pagsunod sa Iyang panig-ingnan” (“Ang Buhi nga Kristo: Ang Pagpamatuod sa mga Apostoles,” https://www.churchofjesuschrist.org/study/scriptures/the-living-christ-the-testimony-of-the-apostles/the-living-christ-the-testimony-of-the-apostles?lang=ceb). Ang pagpaningkamot sa pagsunod sa panig-ingnan ni Jesukristo ug pagkahimong mas sama Kaniya usa ka tibuok kinabuhi nga panaw. Matuman nato kini sa hinayhinay ug sa tabang lamang sa Manluluwas (tan-awa sa Moroni 10:32). Samtang kamo magtuon sa materyal niini nga leksiyon, hunahunaa kon unsa ang inyong mabuhat aron mahimong mas tinuyo ang inyong mga paningkamot nga mahimong sama sa Manluluwas.
Seksiyon 1
Unsa nga matang sa tawo gusto sa Ginoo kanako nga mahimo?
Wala madugay human sa pangalagad sa Manluluwas taliwala sa mga Nephite ug mga Lamanite, mipakita si Jesukristo ngadto sa Iyang bag-ong gitawag nga napulog duha ka disipulo. Siya mitudlo kanila og dugang pa sa Iyang ebanghelyo ug gipahimangno kanila ang mahitungod sa ilang mga responsibilidad (tan-awa sa 3 Nephi 27:13–26). Ang Manluluwas dayon mingon: “Busa, unsa nga matang sa mga tawo kamo mahisama? Sa pagkatinuod Ako moingon nganha kaninyo, gani sama nga Ako mao” (3 Nephi 27:27).
Kini nga pagdapit nga “mahimong” sama sa Manluluwas gihatag ngadto sa tanang disipulo. Si Elder Dale G. Renlund sa Korum sa Napulog Duha ka Apostoles mitudlo:
Dihang mipili kita nga mabunyagan, gisugdan nato ang pagdala diha sa atong kaugalingon ang ngalan ni Jesukristo ug mipili nga ilhon ang atong kaugalingon uban Kaniya. Atong gipanaad ang pagkahimong sama Kaniya ug magpalambo sa Iyang mga hiyas. (“Walay Pagkapaling nga Pasalig ngadto ni Jesukristo,” Liahona, Nob. 2019, 23)
Paggahin og minuto sa pagpalandong og pipila sa mga hiyas sa Manluluwas. Tingali makatabang ang pagtan-aw sa video “Chrislike Attributes” (2:53).
Ang panumpa nga mahimong sama sa Manluluwas magdala kanato lapas pa sa pagkaila mahitungod Kaniya. Si Presidente Dallin H. Oaks sa Unang Kapangulohan mitudlo:
“Sukwahi sa mga institusyon sa kalibotan, nga nagtudlo kanato nga mahibalo og mga butang, ang ebanghelyo ni Jesukristo naghagit kanato nga mahimong usa ka mahiyasong tawo. …
Ang ebanghelyo ni Jesukristo usa ka plano nga nagpakita kanato kon unsaon nga mamahimo sa unsay gitinguha sa atong Langitnong Amahan nga kita mamahimo. (“The Challenge to Become,” Liahona, Ene. 2001, 32)
Si Presidente Ezra Taft Benson mingon sa atong tinguha nga mamahimo sama sa Manluluwas:
Ang lalaki [o babaye] mao ang labing maayo ug labing bulahan ug malipayon kansang kinabuhi labing duol sa sundanan nga si Kristo. Kini walay labot sa yutan-ong katigayonan, gahom, o dungog. Ang bugtong tinud-anay nga pagsulay sa pagkahalangdon, pagkabulahan, ug pagkamalipayon mao ang kon unsa kaduol ang kinabuhi ngadto sa pagkahisama sa Agalon, si Jesukristo. Siya mao ang matarong nga dalan, ang hingpit nga kamatuoran, ug ang buhong nga kinabuhi. (“Jesus Christ—Gifts and Expectations,” Ensign, Dis. 1988, 2)
Paghisgot agi og Pagpangandam alang sa Klase
Paghunahuna og usa ka tawo nga inyong nailhan kinsa usa ka panig-ingnan sa usa ka Kristohanon nga tawo. Hunahunaa ang pagtabang ngadto kanila ug sa pagpangutana kanila kon giunsa sila sa pagpanalangin pinaagi sa pagpaningkamot sa pagsunod sa ilang kinabuhi subay sa Manluluwas.
Seksyon 2
Unsay akong mabuhat aron mas mahimong sama ni Jesukristo?
Si Elder Scott D. Whiting sa Seventy mitudlo mahitungod sa proseso nga mahimong mas mahisama ni Jesukristo:
Ang pagsabot sa pahimangno nga mahimong sama Kaniya maayo, apan kana nga pagsabot kinahanglang ubanan sa lig-ong tinguha nga mousab sa atong kaugalingon, usa ka lakang matag higayon, lapas sa kinaiyanhon nga tawo. Aron mapalambo ang tinguha, kinahanglan gayod kitang masayod kon kinsa si Jesukristo. Kinahanglan gayod kitang masayod og usa ka butang bahin sa Iyang kinaiya,ug kinahanglan gayod kitang motan-aw sa Iyang mga hiyas diha sa kasulatan, mga tulumanon sa pagsimba, ug ubang balaang mga dapit. Samtang magsugod kita sa pagkasayod og dugang pa bahin Kaniya, atong makita ang Iyang mga hiyas diha sa uban. Modasig kini kanato sa atong kaugalingong paningkamot, kay kon ang uban makakab-ot sa pipila ka paagi sa Iyang mga hiyas, mao usab kita. (“Pagkahimong sama Kaniya,” Liahona, Nob. 2020, 13)
Sama sa gitudlo ni Elder Whiting, kita makakaplag sa mga hiyas ni Jesukristo sa tibuok kasulatan (tan-awa, sama pananglitan sa Mateo 5:3–11; Alma 13:28; Doktrina ug mga Pakigsaad 4:5–7). Si Apostol Pedro mitudlo usab nga pinaagi sa “balaanong gahom” sa Manluluwas kita makadawat sa “balaanong kinaiyahan” (2 Pedro 1:3, 4).
Pagtuon agi og Pagpangandam alang sa Klase
Basaha sa 2 Pedro 1:4–8, ug hunahunaa ang pagmarka sa balaanong hiyas nga kita makadawat ug makapalambo uban sa tabang sa Manluluwas. (Tan-awa sa “Gusto Pa og Dugang?” nga seksiyon alang sa dugang pa nga mga ideya.)
Mahimong kamo usahay mobati nga nasanapan o nawad-an og kadasig kon kamo motandi sa inyong mga kaugalingon ngadto sa Manluluwas. Sa ingon nga mga higayon, ibutang sa hunahuna nga bisan gani ang Manluluwas “wala makadawat sa kahingpitan sa sinugdanan, apan nakaangkon og grasya ug dugang pa nga grasya” (Doktrina ug mga Pakigsaad 93:12). Kamo makakaplag og hingpit nga kalipay uban sa nag-anam-anam nga pag-uswag.
Hinumdomi nga kamo dili makabuhat niini nga mag-inusara. Si Presidente Dieter F. Uchtdorf, samtang nagserbisyo isip usa ka magtatambag sa Unang Kapangulohan, mitudlo:
Kristohanong mga hiyas [kinaiya] mga gasa gikan sa Dios. Dili kini mapalambo kon wala ang Iyang panabang.
Ang bugtong panabang nga kitang tanan nagkinahanglan gihatag kanato nga libre pinaagi sa Pag-ula ni Jesukristo. Ang pagbaton og hugot nga pagtuo diha kang Jesukristo ug sa Iyang Pag-ula nagpasabot og hingpit nga pagsalig diha Kaniya—pagsalig sa Iyang walay kinutoban nga gahom, kaalam, ug gugma. … Sa pagtinguha nga mahimong labaw pa ka sama sa Manluluwas, nagkinahanglan kita nga motimbang-timbang pag-usab sa atong kinabuhi ug mosalig, pinaagi sa dalan sa tinuod nga paghinulsol, diha sa mga katakos ni Jesukristo ug sa mga panalangin sa Iyang Pag-ula. (“Pagkahimo nga Sama ni Jesukristo,” Liahona, Ene. 2009, H2)
Palandonga agi og Pagpangandam alang sa Klase
Unsa nga mga hagit ang inyong nasinati.o mahimong masinati, kon maningkamot sa pagpalambo og Kristohanong mga hiyas? Unsaon nga ang Ginoo makatabang kaninyo, o giunsa kamo sa pagtabang, nga mahimong mas sama Kaniya?
Seksiyon 3
Hain sa Kristohanong mga hiyas gusto sa Ginoo kanako nga mopunting sa pagpalambo?
Samtang kamo maghunahuna mahitungod sa mga Kristohanong mga hiyas nga inyong gusto nga ipalambo, ilha ang inyong mga kalig-on ug mga kahuyang. Kamo mahimong makagamit sa mosunod nga mga kalihokan sa pagkat-on og pag-ila sa hiyas nga inyong gusto nga ipunting karon dayon.
Irekord ang Inyong mga Hunahuna
-
Pag-ila og hiyas nga palamboon. Pagmainampoon sa paghunahuna og usa ka Kristohanong hiyas nga ang Ginoo gusto kaninyo nga ipalambo pa. Mahimong kini makatabang kaninyo sa pagkompleto sa “Kalihokan Kabahin sa Hiyas” makaplagan diha sa Isangyaw ang Akong Ebanghelyo: Usa ka Giya sa Misyonaryo nga Pangalagad ([2019], 139).
-
Pagkat-on gikan sa Manluluwas. Hunahunaa kon giunsa ni Jesukristo sa pagpanig-ingnan sa hiyas nga inyong buhaton. Makaplagan ug mabasa ninyo ang mahitungod sa panig-ingnan niini nga hiyas diha sa mga kasulatan. Samtang kamo mamalandong sa panig-ingnan sa Manluluwas, irekord kon unsay inyong nakat-onan.
-
Pag-ila og usa ka panig-ingnan sa karon nga panahon. Paghunahuna og usa ka tawo nga inyong kaila kinsa panig-ingnan sa hiyas nga inyong gipili nga buhaton. Hunahunaa ang pagpakigsulti ngadto niana nga tawo ug pagkat-on kon unsay nagtabang kaniya sa pag-ugmad niini nga hiyas. Irekord ang imong mga hunahuna ug mga panumdoman.
Pangandam sa pagpakigbahin og usa ka butang nga inyong nakat-onan gikan niini nga kasinatian atol sa inyong klase.
Samtang kamo magpadayon sa pagtrabaho paingon sa pagpalambo og Kristohanong mga hiyas, kanunay rebyoha ang inyong pag-uswag. Ayaw itandi ang inyong mga kaugalingon ngadto sa uban. Pagmaya sa gagmay nga kalamposan. Pagkat-on gikan sa inyong mga sayop. Salig nga ang Manluluwas mohatag og tabang ug kalig-on samtang kamo naningkamot nga mahimong mas mahisama Kaniya.
