Leksiyon 9 Materyal sa Magtutudlo

Nagmaya sa Balaang Pagkatawo ni Jesukristo

Ingon nga gipahayag sa usa ka anghel, ang pagkatawo ni Jesukristo rason alang sa “dakong kalipay” (Lucas 2:10). Atol nini nga klase, ang mga estudyante adunay oportunidad sa pagpasabot kon ngano nga ang talagsaong kagikan ni Jesukristo importante ngadto Kaniya nga mahimong atong Manluluwas. Dapiton usab ang mga estudyante sa pagpakigbahin sa ilang mga pagbati mahitungod sa balaang gugma nga gipakita pinaagi sa pagpakig-angay sa Dios ug giunsa niana nga gugma pag-impluwensya sa mga pagpili nga ilang himoon.

Mga Sugyot alang sa Pagtudlo

Si Maria nakahibalo nga siya mahimong inahan sa Anak sa Dios.

I-drowing ang mosunod nga dayagram diha sa pisara, ug dapita ang pipila ka mga estudyante sa pagpakigbahin og mga kinaiya nga ilang napanunod gikan sa ilang mga ginikanan.

dayagram sa kagikan

Dapita ang mga estudyante sa pagrebyo sa Lucas 1:30–35 ug pangitaa kon giunsa ni anghel Gabriel sa paghulagway ang anak nga lalaki nga ipanganak ni Maria.

Pagpalambo sa Atong Pagtudlo ug Pagkat-on

Likaye ang pagpangagpas. Pagpugong sa paghisgot uban sa mga estudyante sa doktrinal nga mga hisgotanan nga ang mga propeta ug apostoles wala mopili sa pagtudlo o mahitungod niana nga sila wala maghimo og opisyal nga pahayag. Sama pananglitan, ang mga lider sa Simbahan nagpasidaan batok sa pagpangagpas mahitungod kon giunsa pagpanamkon ang Manluluwas (tan-awa sa Ang mga Pagtulon-an ni Harold B. Lee, ed. Clyde J. Williams [1996], 14). Sa ingon nga mga kahimtang, OK ra ang yanong pag-angkon nga kita wala mahibalo o kana nga impormasyon wala maipadayag. Paghatag og gibug-aton sa unsay atong nahibaloan ug unsay ikapamatuod sa Espiritu Santo isip kamatuoran diha sa mga kasingkasing sa mga estudyante.

I-drowing ang nag-uban nga dayagram diha sa pisara.

dayagram sa kagikan ni Jesukristo

Aron sa pagtabang sa mga estudyante sa paghunahuna mahitungod sa kamahinungdanon sa talagsaong kagikan ni Jesukristo, hunahunaa ang pagpangutana sa pipila sa mosunod nga mga pangutana:

• Unsang talagsaon nga mga kinaiya ang napanunod ni Jesukristo gikan ni Maria? gikan sa Langitnong Amahan?

• Sa unsang paagi ang talagsaong kagikan ni Jesukristo kalabot ngadto sa Iyang Pag-ula ug Pagkabanhaw? (Isip kabahin sa panaghisgotan, mahimo ka nga makarebyo uban sa mga estudyante sa Juan 10:17–18 ug sa pamahayag ni Presidente Russell M. Nelson diha sa seksiyon 1 sa materyal sa pagpangandam. Tabangi ang mga estudyante sa pag-ila og kamatuoran sama sa mosunod: Tungod sa Iyang talagsaong kagikan, si Jesukristo adunay gahom sa pag-ula alang sa atong mga sala ug sa paghalad sa Iyang kinabuhi sa pagpakamatay ug sa pagpakabuhi pag-usab.)

Aron sa pagtabang sa mga estudyante sa paghunahuna pa og lawom mahitungod niini nga doktrina, makadapit kamo kanila sa pagrekord sa ilang mga hunahuna ug mga panghunahuna mahitungod niini nga mga pangutana:

• Unsa ang ikatudlo kaninyo sa duha ka kinaiyahan ni Jesukristo mahitungod sa Iyang abilidad sa pakiglabot nganha kaninyo diha sa mortalidad?

• Unsaon sa mga hugpong sa mga pulong niini nga kapahayag gikan sa “Ang Buhi nga Kristo: Ang Pagpamatuod sa mga Apostoles” (anaa sa ChurchofJesusChrist.org) sa pagpakiglabot sa usag usa ug nganha kaninyo: “[Si Jesukristo] mao ang Unang Natawo sa Amahan, ang Bugtong Anak diha sa unod, ang Manunubos sa kalibotan”?

Nakita ni Nephi diha sa panan-awon ang pagpakig-angay sa Dios.

Hunahunaa ang pagpakita sa mosunod nga mga hulagway ni Jesus isip Tiglalang sa kalibotan, isip usa ka huyang nga masuso, ug isip usa ka nag-inusara nga tawo diha sa krus. Pangutan-a ang mga estudyante kon unsay gitudlo niini nga mga hulagway mahitungod sa pagpakig-angay ni Jesukristo. Kon gikinahanglan, basaha ang pagpatin-aw sa pagpakig-angay nga makaplagan diha sa seksiyon 2 sa materyal sa pagpangandam.

Christ and the Creation [Si Kristo ug ang Paglalang], ni Robert T. Barrett

batang Jesus naghigda sa pasongan sa mga hayop

The Crucifixion [Ang Paglansang sa Krus], ni Harry Anderson

Sa pagpadayon niini nga panaghisgotan, kamo makahan-ay sa mga estudyante ngadto sa ginagmay nga mga grupo ug makahatag sa matag grupo og kopya sa mosunod nga handout.

Ang Pagpakig-angay sa Dios

Materyal sa Magtutudlo alang sa Si Jesukristo ug ang Iyang Walay Kataposang Ebanghelyo—Leksiyon 9

Bahina ang mosunod nga mga buluhaton sa pagbasa diha sa inyong grupo. Samtang inyong basahon, pangitaa kon giunsa sa Ginoo pagboluntaryo og kanaog gikan sa mas taas nga pagkabutang ngadto sa usa ka mas ubos nga kahimtang.

1. Abraham 3:24–25, 27; Mga Taga-Filipos 2:7–8

2. 1 Nephi 11:14–22

3. 1 Nephi 11: 26–27, 31–33

4. Ang mga pahayag ni Presidente Tad R. Callister ug Elder D. Todd Christofferson diha sa seksiyon 2 sa materyal sa pagpangandam ug ang mosunod nga pahayag ni Sister Wendy Ulrich, kanhi sakop sa kinatibuk-ang konseho sa magtatambag sa Relief Society:

[Ang Manluluwas] natawo nga bata nga walay mahimo sa usa ka mortal nga lawas ug gipadako sa dili hingpit nga [mga ginikanan]. Kinahanglan Siyang makat-on sa paglakaw, pag-istorya, pagtrabaho, ug pakigsabot-sabot sa uban. Gutomon ug kapoyon Siya, mobati og emosyon sa tawo, ug masakit, mag-antos, magdugo, ug mamatay. (“Dili Sala nga Mahimong Huyang,” Liahona, Abr. 2015, 23)

Dayon hisgoti og dungan ang mosunod nga mga pangutana:

• Unsa ang gitudlo niini nga mga pagbasa kanato mahitungod sa pagpakig-angay ni Jesukristo?

• Unsa ang gitudlo kanato sa pagpakig-angay ni Jesukristo mahitungod sa gugma sa atong Manluluwas ug sa atong Langitnong Amahan alang kanato? Sa unsang paagi ang Ilang gugma alang kaninyo nag-apekto sa inyong gugma alang Kanila?

© 2023 by Intellectual Reserve, Inc. All rights reserved.

Ang Pagpakig-angay sa Dios

Materyal sa Magtutudlo alang sa Si Jesukristo ug ang Iyang Walay Kataposang Ebanghelyo—Leksiyon 9

handout sa magtutudlo

Human sa igo nga panahon alang sa panaghisgotan, kamo makapakita ug makapakigbahin sa inyong mga pagbati mahitungod sa mosunod nga pahayag: Ang pagpakig-angay ni Jesukristo nagpakita sa gugma sa Langitnong Amahan ug ni Jesukristo alang sa matag usa kanato.

• Unsa ang atong makat-onan gikan sa Manluluwas pinaagi sa Iyang ehemplo sa pagpakig-angay sa pagtabang sa labing kubos kanato? (Kon gikinahanglan, ang mga estudyante makarebyo sa pamahayag ni Bishop Richard C. Edgley diha sa seksiyon 2 sa materyal sa pagpangandam. Makapamalandong usab ang mga estudyante sulod sa usa ka minuto kon unsaon kaha nila sa pagsunod sa ehemplo sa Manluluwas samtang sila maningkamot sa pagpangalagad sa tanang mga anak sa Langitnong Amahan.)

Pahinumdomi ang mga estudyante nga diha sa seksiyon 2 sa materyal sa pagpangandam, sila gidapit sa pagbasa o pagpaminaw ngadto sa mga pulong sa mga himno nga nagsulti sa pagpakig-angay sa Manluluwas. Ang mga estudyante makarebyo sa usa sa mga himno ug dayon ipakigbahin sa klase ang mga pulong ug mga hugpong sa mga pulong nga labing nakadani kanila. Kon itugot sa panahon, mahimo usab ninyong kantahon og dungan ang usa o duha ka bersikulo gikan niini nga mga himno.

Aron sa pagtabang sa mga estudyante sa paggamit unsay ilang nakat-onan ug nabati atol sa klase, dapita sila sa pagpamalandong ug pagrekord sa ilang mga tubag ngadto sa mosunod nga pangutana o usa nga inyong kaugalingong pagpili:

• Unsa ang inyong mabuhat sa pagpakita sa Manluluwas sa inyong pasalamat alang sa Iyang pagkaandam sa pagpakig-angay aron Siya makatubos ug makaluwas kaninyo?

Alang sa Sunod nga Higayon

Sa pagpahinumdom sa mga estudyante sa pagtuon sa materyal sa pagpangandam alang sa sunod nga klase, hunahunaa ang pagpadala sa mosunod nga mensahe o usa nga inyong kaugalingon: Unsa nga prayoridad aduna ang Manluluwas diha sa inyong kinabuhi niini nga semana? Hunahunaa kon unsaon sa materyal sa pagpangandam alang sa leksiyon 10 pagtabang kaninyo sa pagtubag niini nga pangutana.