Leksiyon 2 Materyal sa Pagpangandam sa Klase

Pagpalig-on sa Atong Pagpamatuod sa Buhi nga Kristo

Hunahunaa ang kasubo ug kasakit nga tingali gibati sa mga sumusunod ni Jesukristo samtang nagtan-aw sila Kaniya nga nag-antos ug namatay sa krus. Kay wala kaayo makasabot sa Iyang misyon, ingon og gibati nila ang kalibog ug pag-inusara samtang gipahimutang nila sa lubnganan ang Iyang lawas. Imong mahunahuna ang ilang kalipay ug katingala dihang pila lamang ka adlaw sila nakakita Kaniya nga buhi. Karon makapamatuod na sila nga Siya ang buhi nga Kristo! Samtang magtuon ka niini nga materyal, hunahunaa ang imong kaugalingong pagpamatuod sa buhi nga Kristo ug kon unsa Siya kaimportante diha nimo.

Seksiyon 1

Unsa ang kahulogan mahitungod sa pag-ingon nga “Si Jesus mao ang Kristo”?

Sa sinugdanan sa Iyang mortal nga pangalagad, duha ka disipulo ni Juan Bautista nakadungog ni Juan nga naghisgot mahitungod ni Jesus, “Tan-awa mao kana ang Kordero sa Dios!” (Juan 1:36). Sa dihang nadungog nila kini, sila misunod ni Jesus. Ang usa kanila, si Andres, nakakita sa iyang igsoong lalaki nga si Simon ug mipahibalo, “Nakita namo … ang Kristo” (Juan 1:41).

Ang pagpamahayag ni Andres nga si Jesus mao ang Kristo makahuloganon. Ang Gresyanhon nga pulong alang sa Kristo nagpasabot nga “ang gidihogan” ug katumbas sa pinulongan nga Hebreo sa Mesiyas. “Gigamit isip titulo sa usa ka katungdanan, ang [Kristo o Mesiyas] nagpasabot nga Hari ug Tigluwas kansang pag-anhi mahinamon nga gipaabot sa mga Judeo” (Ang Giya ngadto sa mga Kasulatan, “Mesiyas”).

Sa wala madugay sa Iyang pangalagad, si Jesus nangutana sa Iyang mga disipulo kon si kinsa Siya sa ilang hunahuna. Mitubag sila gamit ang mga ngalan sa pipila ka propeta. Si Jesus dayon miingon, “Apan kamo, unsa may inyong ikasulti? Kinsa man ako?” (Mateo 16:15).

Pagtuon agi og Pagpangandam alang sa Klase

Basaha ang Mateo 16:16–17.

Isip mao ang Kristo, si Jesus mao ang “dinihogan sa Amahan nga mahimo nga kinaugalingon nga tinugyanan diha sa tanan nga mga butang kalabot ngadto sa kaluwasan sa katawhan” (Ang Giya ngadto sa mga Kasulatan, “Usa nga Dinihogan”). Tungod kay si Jesus mao ang Kristo, Siya ang bugtong agianan ug mao lamang ang bugtong nga ngalan diin kita maluwas gikan sa mga sangpotanan sa sala ug kamatayon (tan-awa sa Mga Buhat 4:12; Mosiah 3:17).

Irekord ang Imong mga Hunahuna

Paggahin og pipila ka minuto nga mobasa sa ulohan sa “Jesukristo” diha sa Ang Giya ngadto sa mga Kasulatan (nga anaa sa ChurchofJesusChrist.org) ug pangitaa ang lahi nga mga ngalan, mga titulo, ug mga tahas nga gihatag ngadto kang Jesukristo. Irekord ang imong mga nakat-onan, ug pangandam sa pagpaambit niini sa imong klase.

Mahimo usab nimong basahon o paminawon ang “Si Kristo Gayud,” usa ka kanta nga gisulat ni Presidente James E. Faust, kinsa nakaserbisyo sa Unang Kapangulohan. Hunahunaa unsa kaha ang imong ikapaambit sa klase mahitungod sa unsay imong hunahuna ug gibati mahitungod sa maong kanta.

“Si Kristo Gayud,” ni James E. Faust, Jan Pinborough, ug Michael Finlinson Moody; gipasundayag sa The Tabernacle Choir at Temple Square atol sa Oktubre 2018 nga kinatibuk-ang komperensiya

Seksiyon 2

Sa unsang paagi ang mga Apostol sa Ginoo makaimpluwensiya sa akong pagpamatuod nga si Jesus mao ang Kristo?

Sa daghang bahin sa kalibotan, ang pagtuo sa kabalaan ni Jesukristo nagkakunhod (tan-awa sa Neil L. Andersen, “Kita Naghisgot ni Kristo,” Liahona, Nob. 2020, 88). Tingali ikaw nakasaksi og usa ka nagkahuyang nga hugot nga pagtuo kon asa ka nagpuyo, nakakita og usa ka tawo nga imong gimahal nga mipalayo sa Manluluwas ug sa Iyang Simbahan, o nakasinati og imong kaugalingon nga pagkigbugno sa kawalay pagtuo.

Ang kakulang sa pagtuo kang Jesukristo dili talagsa sa atong panahon karon. Sama pananglit, bisan human nga nakita sa mga Lamanite ug sa mga Nephite ang talagsaong “mga timailhan ug mga katingalahan” mahitungod sa pagkatawo sa Manluluwas, ang mga tawo sa wala madugay “misugod sa pagkaanam og ka kulang sa pagkahibulong … ug misugod sa dili pagtuo sa tanan diin sila nakadungog ug nakakita” (3 Nephi 2:1).

Aron matabangan ang matag usa kanato sa atong pagtuo Kaniya, ang Ginoo mitawag og Apostoles nga mahimong espesyal nga mga saksi Kaniya ngadto sa tanang katawhan (tan-awa sa Mateo 28:19–20; 3 Nephi 12:1; Doktrina ug mga Pakigsaad 107:23).

Si Presidente Gordon B. Hinckley nagtudlo:

Ang ila maoy usa ka talagsaon nga calling; Apostoles sila ni Ginoong Jesukristo, nga Siya ang mipili ug misugo. Gimandoan sila sa pagsaksi sa katinuod nga Siya buhi pinaagi sa gahom ug awtoridad sa balaang pagka-apostol. (“Special Witnesses of Christ,” Ensign, Abr. 2001, 4)

Pamalandong agi og Pagpangandam alang sa Klase

Hunahunaa kadtong mga panahon diin imong nadungog ang Apostoles sa Ginoo nga mipaambit sa ilang pagsaksi sa Manluluwas. Sa unsang paagi nga ang ilang mga pagpamatuod nakaimpluwensiya sa imong kaugalingon nga pagpamatuod Kaniya? Mahimo kang motan-aw og usa o mas daghan sa mga pagpamatuod sa buhing Apostoles sa Ginoo gikan sa “Special Witnesses of Christ” nga mga video series (nga anaa sa ChurchofJesusChrist.org).

Seksiyon 3

Sa unsang paagi ang akong kinabuhi mausab pinaagi sa pagtuon sa “Ang Buhi nga Kristo”?

Niadtong Enero 1, 2000, ang Unang Kapangulohan ug ang Korum sa Napulog Duha ka Apostoles mimantala sa ilang pagpamatuod mahitungod sa Manluluwas diha sa usa ka dokumento nga gitawag og “Ang Buhi nga Kristo: Ang Pagpamatuod sa mga Apostoles” (nga anaa sa ChurchofJesusChrist.org).

Si Elder Robert D. Hales sa Korum sa Napulog Duha ka Apostoles misulti mahitungod niining makasaysayan nga dokumento:

“Ang Buhi nga Kristo: Ang Pagpamatuod sa mga Apostoles” giandam nang daan alang sa panahon diin kita mas nagkinahanglan niini. (“Kinatibuk-ang Komperensiya: Paglig-on sa Pagtuo ug Pagpamatuod,” Liahona, Nob. 2013, 7)

Si Presidente Russell M. Nelson nakamatikod usab:

Daghang miyembro ang nakasag-ulo sa mga kamatuoran niini. Ang uban walay nahibaloan bahin niini. Samtang magtinguha kamo nga mas makat-on pa mahitungod ni Jesukristo, moawhag ako kaninyo sa pagtuon sa “Ang Buhi nga Kristo.” (“Pagdawat sa Gahom ni Jesukristo diha sa Atong Kinabuhi,” Liahona, Mayo 2017, 39)

Pagtuon agi og Pagpangandam alang sa Klase

Basaha og maayo ang “Ang Buhi nga Kristo”, ug ikonsiderar ang pagmarka sa mga bahin niini nga mahinungdanon para nimo. Ikonsiderar ang pag-ampo sa dili ka pa magsugod aron ang Espriitu makatabang nimo nga mobati sa kamatuoran ug kaimportante kon unsay imong gitun-an.

Buhaton

Ang pagmemorya sa “Ang Buhi nga Kristo” igo na nga makahatag sa mga gikinahangalan niini nga kurso sa Pagpalambo sa Pagkat-on. Ikonsiderar ang pagtakda og tumong nga mamemorya ang tanan o ang mga parte niini nga dokumento samtang paningkamotan nimo ang paglig-on sa imong pagpamatuod sa buhi nga Kristo.

Gusto pa og Dugang? (Opsiyonal)

Asa ko makakat-on og dugang pa mahitungod sa kahulogan sa managlahing mga ngalan ug titulo ni Jesukristo?

Unsa ang kinahanglan nga isulti sa Ginoo mahitungod sa Iyang kaugalingon nga kabalaan?

Alang sa pipila ka ehemplo bahin ni Jesukristo nga namahayag sa Iyang kabalaan, basaha ang Marcos 14:53–65, Juan 10:22–39, 3 Nephi 11:10–11, ug Doktrina ug mga Pakigsaad 35:1–2.