Leksiyon 5 Materyal sa Magtutudlo

Pagkahimong Katawhan sa Pakigsaad sa Ginoo

Si Presidente Russel M. Nelson nagtudlo nga ang paghimo ug pagtuman sa mga pakigsaad ngadto ni Jesukristo “moabli sa pultahan ngadto sa tanang espirituhanong mga panalangin ug pribilehiyo nga mahimong maanaa” sa tanang katawhan (“Samtang Dungan Kita nga Magpadayon sa Unahan,” Liahona,, Abr. 2018, 7). Niini nga leksiyon, ang mga estudyante mahatagan og oportunidad nga makapaambit kon sa unsang paagi nga ang paghimo ug pagtuman sa mga pakigsaad sa ebanghelyo ngadto ni Jehova makapanalangin sa ilang kinabuhi ug kon unsay ilang mahimo aron malig-on ang ilang pasalig nga matinud-anong magsubay sa dalan sa pakigsaad.

Mga Sugyot alang sa Pagtudlo

Si Jesukristo nagpadayag nga Siya mao si Jehova, ang Dios sa Daang Tugon.

Pagpalambo sa Atong Pagtudlo ug Pagkat-on

Hinumdomi ang kaimportante sa konteksto. Ang kahulogan sa usa ka tudling sa kasulatan giimpluwensiyahan sa konteksto. Ang pagtabang sa mga estudyante nga makasabot sa konteksto sa mga kasulatan makatabang aron sila makasabot sa sulod, lakip ang katuyoan sa dinasig nga mga tigsulat.

Ipakita ang mosunod nga pamahayag: “Sa pagkatinuod, sa pagkatinuod, ako magaingon kaninyo, nga sa wala pa si Abraham mao na Ako” (Juan 8:58). Pahinumdomi ang mga estudyante nga si Jesus mihimo niini nga pamahayag human sa pagdumili sa pipila ka eskriba ug mga Pariseo sa pagdawat sa Iyang pagpangangkon nga Siya mao ang Kahayag sa Kalibotan ug nga Siya nagbuhat sa buluhaton sa Iyang Amahan. Midemanda sila nga makaila kon si kinsa gayod siya (tan-awa sa Juan 8:25).

• Nganong kini nga pamahayag gikan sa Manluluwas mao man ang hinungdan nga misulay ang mga eskriba ug mga Pariseo sa pagbato Kaniya? (Tingali importante ang pagrebyo sa konteksto alang sa Exodo 3 ug dayon mobasa sa mga bersikulo 13–14 niana nga kapitulo ug sa pamahayag ni Elder Bruce R. McConkie nga anaa sa seksiyon 1 sa materyal sa pagpangandam. Tabangi ang mga estudyante sa pag-ila og usa ka kamatuoran nga susama sa mosunod: Si Jesukristo mao si Jehova, ang Dios sa Daang Tugon ug ang Halangdon nga Ako Mao.)

• Unsa ang gitudlo ngari kanato sa mga ngalan nga Jehova ug Ako Mao mahitungod sa kinaiyahan ni Jesukristo? (Samtang ang mga estudyante magpaambit unsay ilang nakat-onan gikan sa seksiyon 1 sa materyal sa pagpangandam, mahimo nimong isulat sa pisara ang mosunod nga mga pulong nga: walay pagkausab, mahangtoron, ug anaa nang daan.) Sa unsang paagi ang pagkahibalo nga si Jesukristo walay pagkausab, mahangtoron, ug anaa nang daan makatabang nimo sa pagsalig Kaniya?

Mahimo kang modapit og pipila ka estudyante nga mopaambit nganong sila misalig sa Ginoo.

Si Jehova nagdapit kanato sa paghimo ug pagtuman sa sagradong mga pakigsaad.

Ikonsiderar ang pagpangutana:

• Ngano nga kita adunay pagsalig sa mga pakigsaad nga atong gihimo ngadto sa Ginoo? (Sa inyong diskusyon, siguroa nga masabtan sa mga estudyante ang kahulogan sa pakigsaad, nga makita sa seksiyon 2 sa materyal sa pagpangandam.)

Aron matabangan ang mga estudyante sa paghunahuna og maayo mahitungod sa mahangtoron nga kamahinungdanon sa pahimo ug pagtuman sa mga pakigsaad ngadto sa Dios, ikonsiderar ang paghisgot sa mosunod nga senaryo.

Ang imong higala nga si Jim midawat sa imbitasyon nga magpabunyag. Hinoon, human sa pag-adto sa usa ka open house sa templo nagduhaduha na siya. Iya kang gitug-anan nga, “Didto sa open house sa templo, nga maanindot kaayo, akong nadiskobrehan nga kon moadto ka sa templo kinahanglan ka nga mohimo og mas daghan pang pakigsaad kay sa imong ipangsaad atol sa bunyag. Kadtong tanan nga mga pasalig tingali sobra ra kaayo alang nako.”

Dapita ang katunga sa klase sa pagsiksik sa pamahayag ni Elder D. Todd Christofferson nga naa sa seksiyon 2 ug pangitaa ang mga panalangin sa paglakaw subay sa dalan sa pakigsaad. Hangyoa ang laing katunga sa klase sa pagsiksik sa Abraham 2:8–11 ug mangita sa gisaad nga mga panalangin sa pagtuman sa pakigsaad ni Abraham.

Human mahatagan og panahon ang mga estudyante sa pagsiksik, mahimo nimo ipares ang mga estudyante ngadto sa lain ug hangyoon sila sa pagpaambit kon sa unsang paagi nga ang mga kamatuoran nga ilang gitino makatabang ni Jim nga mausab ang iyang panglantaw bahin sa mga pakigsaad.

Aron matabangan ang mga estudyante nga mobati sa kamatuoran ug kaimportante sa mga pakigsaad sa ebanghelyo, mahimo nimong hisgotan ang usa o duha sa mosunod nga mga pangutana:

• Sa imong hunahuna ngano kaha nga si Jesukristo nagkinahanglan nga kita mohimo og mga pakigsaad aron makadawat sa Iyang talagsaon nga mga panalangin? Sa unsang paagi nga napanalanginan ang imong kinabuhi pinaagi sa pagtuman sa mga pakigsaad?

• Unsa ang koneksiyon tali sa pakigsaad ni Abraham ug sa balaan nga templo? (Mahimo nimong basahon ang pamahayag ni Presidente Nelson nga naa sa seksiyon 2 ug tabangi ang mga estudyante nga makasabot nga pinaagi lamang sa templo nga kita makadawat sa gasa sa kinabuhing dayon, nga mao ang kinadak-ang panalangin diha sa Pakigsaad ni Abraham. Dayon mahimo nimong dapiton ang mga estudyante sa pagpaambit kon sa unsang paagi nga sila napanalanginan o mapanalanginan pinaagi sa paghimo ug pagtuman sa mga pakigsaad sa templo.

Dayon mahimo nimong hatagan ang mga estudyante og panahon sa pagrekord og usa ka panalangin sa pakigsaad nga ilang gitinguha ug unsay ilang mahimo aron makadawat niana nga panalangin. (Human marekord sa mga estudyante ang ilang mga hunahuna, mahimo nimong ihatag ang mosunod nga panglantaw gikan ni Elder Jeffrey R. Holland sa Korum sa Napulog Duha ka Apostoles: “Ang ubang panalangin moabot dayon, ang uban dugay, ug ang uban dili moabot hangtod didto sa langit; apan para niadtong mohangop sa ebanghelyo ni Jesukristo moabot kini” [“An High Priest of Good Things to Come,” Ensign, Nob. 1999, 38].)

Alang sa Sunod nga Higayon

Sa dili pa ang sunod nga klase, ikonsiderar ang pagpadala ngadto sa mga estudyante sa mosunod nga mensahe: Gusto ka bang mahibalo kon unsay ikatudlo sa nating karnero, haligi sa pultahan, pan nga walay igpatubo, mga utanon, ug usa ka sungkod nganha kanimo mahitungod ni Jesukristo? Tun-i ang materyal sa pagpangandam alang sa leksiyon 6 aron mahibaloan.