Leksiyon 22 Materyal sa Magtutudlo

Pag-apil uban ni Jesukristo sa Nagpadayon nga Pagpahiuli

Si Presidente Russell M. Nelson mipamatuod: “Kita mga saksi sa proseso sa pagpahiuli. Kon maghunahuna kamo nga hingpit na nga napahiuli ang Simbahan, ang sinugdanan pa lamang ang inyong nakita. Adunay daghan pa nga moabot” (“Latter-day Saint Prophet, Wife and Apostle Share Insights of Global Ministry,” Okt. 30, 2018, newsroom.ChurchofJesusChrist.org). Niini nga leksiyon, ang mga estudyante moila kon unsay ilang gibuhat o buhaton aron makaapil sa nagpadayon nga Pagpahiuli. Mahimo usab nilang ikonsiderar ang tabang nga ilang madawat gikan sa Manluluwas samtang maghimo sila sa Iyang buhat.

Mga Sugyot alang sa Pagtudlo

Si Jesukristo ang nagdumala sa buhat sa nagpadayon nga Pagpahiuli.

Ipakita ang mosunod nga mga pamahayag ni Presidente Nelson:

Bisan asa pa kamo magpuyo o unsay inyong kahimtang, ang Ginoo nga si Jesukristo mao ang inyong Manluluwas, ug ang propeta sa Dios, si Joseph Smith, mao ang inyong propeta. Siya giorden nang daan sa wala pa ang pundasyon niini nga yuta nga mahimong propeta niining kataposang dispensasyon, diin “walay itago” gikan sa mga Santos. Ang pagpadayag nagpadayon sa paggawas gikan sa Ginoo niining nagpadayon nga proseso sa pagpahiuli.

Alang kaninyo unsay gipasabot nga ang ebanghelyo ni Jesukristo napahiuli sa yuta? (“Paminaw Kaniya,” Liahona, Mayo 2020, 88)

Dapita ang pipila ka estudyante sa pagtubag sa pangutana ni Presidente Nelson ug sa pagpaambit kon unsay ipasabot sa Pagpahiuli ngadto nila. Mahimo dayon kang mangutana:

• Alang kaninyo unsay gipasabot nga ang Pagpahiuli usa ka nagpadayon nga proseso?

Pagpalambo sa Atong Pagtudlo ug Pagkat-on

Pangutana og follow-up nga mga pangutana nga makadasig og mas lawom nga pagkat-on. Kon ang mga estudyante motubag sa mga pangutana, mopaambit sa mga pagbati, o mohatag og mga ideya, paminaw og maayo sa unsay ilang gisulti ug kon giunsa nila pagsulti niini. Ilha kon ang follow-up nga pangutana makatabang ba sa estudyante nga makahunahuna og mas lawom, makagamit sa ilang personal nga kasinatian, o makasuta sa mga pagbati sa ilang kasingkasing. Ang follow-up nga mga pangutana kinahanglan nga natural, walay pinugsanay. Kini makapaapil, walay paghinobra.

Dapita ang mga estudyante sa pagpaambit og mga ehemplo bahin sa nagpadayon nga Pagpahiuli. (Mahimong makatabang ang pagrebyo sa pamahayag ni Elder LeGrand R. Curtis Jr. diha sa seksiyon 1 sa materyal sa pagpangandam ug pagpaambit og usa o duha ka ehemplo nga imong gitino.) Samtang nagpaambit ang mga estudyante, mahimo nimong ihunong og kadali ug mangutana og follow-up nga mga pangutana, sama niini:

• Sa unsang paagi nga ang [ehemplo sa estudyante] nakatabang ninyo o sa usa ka tawo nga inyong kaila nga mapaduol kang Jesukristo?

• Sa inyong hunahuna sa unsang paagi nga ang [ehemplo sa estudyante] makatabang sa pag-andam kanato alang sa Ikaduhang Pag-anhi?

• Sa unsang paagi nga ang [ehemplo sa estudyante] nakapalig-on sa inyong pagpamatuod nga mao kini ang buhat sa Ginoo?

Aron matabangan ang mga estudyante nga mas hingpit nga makadayeg sa kamahinungdanon sa pagpundok sa Israel diha sa nagpadayon nga Pagpahiuli, ikonsiderar ang pagpakita sa mosunod nga pamahayag ni Presidente Nelson: “[Ang] pagpundok [sa Israel] mao ang labing importanting butang nga nahitabo sa yuta karon” (Russell M. Nelson ug Wendy W. Nelson, “Paglaom sa Israel” [tibuok kalibotan nga debosyonal sa kabatan-onan, Hunyo 3, 2018], dugang ngadto sa New Era ug Ensign, 8, ChurchofJesusChrist.org).

Dapita ang mga estudyante sa paggahin og pipila ka minuto sa pagrebyo sa seksiyon 2 sa materyal sa pagpangandam ug sa pagpangita sa mga rason nga ang pagpundok sa Israel importante kaayo. Dayon mahimo nimong ipadrama-drama nila nga magkauban o isip usa ka klase kon unsaon nila pagtubag ang usa o daghan pa sa mosunod nga mga sitwasyon:

• Mopasabot ngadto sa usa ka klase sa high school nga seminary sa kaimportante sa pagpundok sa Israel.

• Mopaambit sa usa ka tawo nga dili kauban nato og tinuohan kon sa unsang paagi nga ang pagpundok sa Israel makapanalangin sa tanang tawo.

• Mopasabot og mga paagi nga kita makaabag sa Ginoo sa pagpundok sa Israel ngadto sa usa ka miyembro sa Simbahan nga mibati nga dili sigurado kon unsaon nga sila makatabang.

Human sa mga pagdrama-drama mahimo nimong dapiton ang usa ka estudyante sa pagbasa og kusog sa pamahayag ni Presidente Dieter F. Uchtdorf diha sa seksiyon 1 sa materyal sa pagpangandam. Mahimo usab nimong hatagan og igong panahon ang mga estudyante sa pagrekord sa ilang mga hunahuna mahitungod sa mosunod nga mga pangutana:

• Unsaon nimo sa paghulagway ang imong mga paningkamot aron mapadayon ang buhat sa Ginoo diha sa nagpadayon nga Pagpahiuli?

• Unsay imong matampo karon aron mapadayon ang Iyang buhat? (Ikonsiderar ang pagrebyo sa pamahayag ni Presidente Bonnie H. Cordon diha sa seksiyon 2 sa materyal sa pagpangandam.)

Ang Manluluwas motrabaho uban kanato kon kita mohimo sa Iyang buhat.

Ikonsiderar ang pagpaambit sa mosunod nga mga sitwasyon:

Si Maria nakadawat og bag-ong calling sa iyang ward ug mibati nga nabug-atan. Samtang mibiya siya sa opisina sa bishop, miingon siya sa iyang kaugalingon: “Unsaon kaha nako sa paghimo niini nga calling? Dili ko angayan. Adunay uban nga mas angayan kaayo. Tingali mohangyo ko sa bishop nga mangita og lain.”

• Unsay imong ikatambag ni Maria?

Dapita ang mga sakop sa klase sa pagrebyo sa Jacob 5:70–72, Doktrina ug mga Pakigsaad 38:7, ug Doktrina ug mga Pakigsaad 49:27 ug sa pagpangita og usa ka baroganan nga makatabang ni Maria. Ang mga estudyante mahimong moila og usa ka baroganan sama sa mosunod: Samtang mohimo kita sa buhat sa Ginoo, Siya anaa sa atong taliwala ug motrabaho uban kanato.

• Sa unsang paagi nga ang kahibalo nga ang Manluluwas motrabaho uban kanato makatabang ni Maria? Sa unsang paagi nga kini nga kahibalo makatabang nimo?

• Nganong importante man nga mahibaloan nga ang Amahan nag-uban sa Manluluwas atol sa Iyang mortal nga pangalagad? (Mahimo nimong rebyohon ang pamahayag ni Elder Kim B. Clark diha sa seksiyon 3 sa materyal sa pagpangandam aron matabangan ang mga estudyante sa pagtubag niini nga pangutana.)

• Kanus-a ikaw mibati og kasigurohan nga ang Langitnong Amahan ug si Jesukristo nag-uban nimo samtang naghimo ka sa Ilang buhat?

Ang mga estudyante mahimong mamalandong bahin sa kaandam sa Manluluwas nga motrabaho uban kanila samtang naghimo sila sa Iyang buhat. Samtang namalandong sila, mahimo nimong ipakita ang mosunod nga lista nga adunay pinabaga nga mga tuldok ug dapita ang mga estudyante sa pagbasa sa gipili nga bersikulo sa matag himno. Awhaga ang mga estudyante sa pagrekord sa ilang mga hunahuna ug mga pagbati mahitungod sa unsay ilang gibasa.

• “Magpadayon Tang tanan” (Mga Himno, nu.150), bersikulo 3

• “Gitawag Kitang Tanan” (Mga Himno, nu. 154), bersikulo 3

• “Duol Na ang Takna” (Mga Himno, nu. 166), bersikulo 4

• “Moadto Ako Bisan Asa sa Pagbuot Mo” (Mga Himno, nu. 168), bersikulo 3

Sa pagtapos sa klase, mahimo nimong hangyoon ang usa o duha ka estudyante sa pagpaambit sa ilang kasinatian kalabot niini nga kamatuoran: Samtang mohimo kita sa buhat sa Ginoo, Siya anaa sa atong taliwala ug motrabaho uban kanato.

Alang sa Sunod nga Higayon

Ikonsiderar ang pag-awhag sa mga estudyante pipila ka adlaw sa dili pa ang klase nga magtuon sa materyal sa pagpangandam alang sa leksiyon 23. Mahimo nimong ipadala ang mosunod nga mensahe: Tan-awa ang “Pagpangandam alang sa Ikaduhang Pag-anhi” (1:00), ug ikonsiderar kon sa unsang paagi nga ang materyal diha sa leksiyon 23 makatabang nimo sa pagpangandam alang sa pagbalik ni Jesukristo.