Leksiyon 14 Materyal sa Magtutudlo

Pag-ila sa mga Milagro sa Manluluwas

Si Jesukristo mipahayag, “Ako mao ang usa ka Dios sa mga milagro” (2 Nephi 27:23). Niini nga leksiyon, ang mga estudyante makabaton og oportunidad sa pagpakigbahin kon unsay ilang nakat-onan mahitungod ni Jesukristo pinaagi sa mga milagro nga Iyang gihimo sa panahon sa Iyang mortal nga pagpangalagad. Maghunahuna usab ang mga estudyante kon unsay ilang mabuhat sa pagdawat sa mga milagro sa Ginoo diha sa ilang kaugalingong mga kinabuhi ug sa pag-ila sa mga milagro nga ila nang nadawat.

Mga Sugyot alang sa Pagtudlo

Si Jesukristo nag-ayo sa mga tawo sa pisikal ug espirituhanong paagi.

Hunahunaa ang pagpasundayag sa wala pa ang klase sa mosunod nga mga milagro nga motakdo sa “Irekord ang Inyong mga Hunahuna” nga kalihokan sa seksiyon 1 sa materyal sa pagpangandam. Samtang magsugod ang klase, giyahi ang atensiyon sa mga estudyante ngadto sa mga hulagway, ug pagdapit og usa o duha ka estudyante sa pagpakigbahin og lakbit sa ilang kinatibuk-ang panghunahuna mahitungod sa mga milagro ni Jesus.

Paghimo sa tubig ngadto sa bino

Pagpahunong sa unos

Pagbuhi sa patay

Nagpakaon og 5,000

Gipahiuli ang panan-aw

Mahimo kamong modapit og mga estudyante sa pag-adto sa “Irekord ang Inyong mga Hunahuna” nga kalihokan sa seksiyon 1 sa materyal sa pagpangandam ug sa pagrebyo sa milagro nga ilang gitun-an agi og pagpangandam alang sa klase. Kon sila wala mag-andam, dapita sila sa pagpili og usa ka milagro nga tun-an. Hatagi ang mga estudyante og pipila ka minutos sa pagrebyo o pagtuon sa milagro nga ilang gipili ug sa pagpamalandong sa ilang mga tubag ngadto sa duha ka pangutana gikan sa kalihokan.

Human mahatagi ang mga estudyante og igo nga panahon sa pagrebyo, dapita sila sa pagporma og ginagmay nga mga grupo kauban sa ubang mga estudyante kinsa mituon og laing milagro. Ang matag sakop sa grupo kinahanglang hatagan og oportunidad sa daklit nga pag-summarize sa milagro nga iyang gitun-an ug sa paghisgot sa iyang tubag ngadto sa dili mominos sa usa o duha ka nag-ubang mga pangutana.

Mahimo usab kamong modapit og usa ka estudyante sa pag-summarize sa istorya sa Ginoo nga nag-ayo sa lalaki nga paralitiko, girekord diha sa Marcos 2:5–12, nga gihisgotan sa seksiyon 1 sa materyal sa pagpangandam.

Mahimo dayon ninyong tabangan nga malig-on ang pagsabot sa mga estudyante pinaagi sa pagpangutana og usa o duha sa mosunod nga mga pangutana:

• Unsay atong makat-onan mahitungod sa gahom sa Manluluwas sa pagpang-ayo gikan niini nga milagro? (Tabangi ang mga estudyante sa pag-ila og usa ka kamatuoran sama sa si Jesukristo adunay gahom sa pag-ayo kanato sa espirituhanon ug pisikal nga paagi.)

• Sa unsang mga paagi kamo o ang usa ka tawo nga inyong kaila misinati og espirituhanon o pisikal nga pagkaayo? (Hunahunaa ang pagdapit sa usa o duha ka estudyante sa wala pa ang klase sa pag-anha nga andam sa pagpakigbahin sa ilang mga tubag ngadto niini nga pangutana. Pahinumdumi sila nga kinahanglang dili sila mobati nga napugos sa pagpakigbahin og bisan unsa nga hilabihan sa ka personal.)

Pagpalambo sa Atong Pagtudlo ug Pagkat-on

Pagdapit og pipila ka mga estudyante sa wala pa ang klase sa pag-anha nga andam sa pagpakigbahin. Ang pagkat-on diha sa klasehanan mahimong mapauswag kon kita modapit og pipila ka mga estudyante sa pag-anha nga andam sa ilang mga tubag ngadto sa piho nga mga pangutana gikan sa leksiyon, sa pagpakigbahin og may kalabotan nga mga kasinatian, o sa pagpamatuod bahin sa piho nga mga baroganan. Kini nga matang sa pagpangandam makatabang sa pag-amuma og panaghisgot, paglig-on sa pagkat-on, ug sa paghatag og importanting mga oportunidad alang niadtong kinsa nagbati og ka mas komportable sa pagpakigbahin kon sila adunay panahon sa pag-andam sa ilang mga hunahuna.

Dapita ang usa ka estudyante sa pagbasa og kusog sa pamahayag ni Presidente Dallin H. Oaks diha sa seksiyon 1 sa materyal sa pagpangandam, ug hunahunaa ang pagpangutana og usa o daghan pa sa mosunod nga mga pangutana aron sa pagtabang sa inyong mga estudyante sa pagkat-on pa og dugang sa lig-on nga paagi:

• Ngano sa inyong hunahuna ang usa ka gamhanang kausaban sa kasingkasing mahunahuna nga mas dako nga milagro kay sa pisikal nga mga milagro? Ngano nga kini mahinungdanon nga motan-aw kita ngadto sa Manluluwas alang niini nga milagro?

• Unsaon ninyo sa pagpasabot sa milagro sa usa ka kausaban sa kasingkasing ngadto sa usa ka tawo nga wala masiguro kon unsa ang kahulogan niana?

• Unsa nga mga butang ang mabuhat sa mga tawo sa pagpakita sa Ginoo nga sila nagtinguha niini nga milagro? Unsang piho nga lihok kamo makahimo sa pagpakita sa Ginoo nga kamo nagtinguha og daghan pa nga usbon sa inyong kasingkasing? (Mahimong kinahanglan nga inyong pahinumdoman ang mga estudyante nga ang usa ka kausaban sa kasingkasing usa ka proseso, dili usa ka hitabo. Kini mahimong makatabang ang paghatag sa mga estudyante og panahon sa pagrekord sa ilang mga hunahuna ug mga pagbati.)

Ang mga milagro mahitabo sumala sa atong hugot nga pagtuo ug kabubut-on sa Dios.

Pahinumdomi ang mga estudyante nga usa ka milagro nga gibuhat sa Manunubos sa panahon sa Iyang mortal nga pagpangalagad mao ang pag-ayo sa usa ka sanlahon. Dapita ang usa ka estudyante sa daklit nga pakigbahin kon unsa kaha sama ang kinabuhi sa usa ka sanlahon sa mga panahon sa Bag-ong Tugon ug sa unsang paagi ang pagkaayo makausab sa iyang kinabuhi.

Pagbasa og dungan sa Marcos 1:40–42, ug dapita ang mga estudyante sa pagtan-aw kon giunsa pagduol sa sanlahon ang Ginoo alang sa usa ka milagro.

• Unsay atong makat-onan gikan niini nga istorya mahitungod kon unsaon pagduol ang Ginoo kon maninguha og usa ka milagro? (Mahimo ninyong rebyohon ang pamahayag ni Presidente Jorge F. Zeballos diha sa seksiyon 2 sa materyal sa pagpangandam. Tabangi ang mga estudyante sa pag-ila og usa ka baroganan sama niining usa: Samtang kita naggamit sa atong hugot nga pagtuo diha ni Jesukristo, Siya makahimo og mga milagro sa atong mga kinabuhi sumala sa Iyang kabubut-on.)

• Unsaon nato sa pagpalambo ang hugot nga pagtuo nga mosalig sa kabubut-on sa Ginoo kon maninguha og usa ka milagro? (Hunahunaa ang pagrebyo sa mga pamahayag sa mga lider sa Simbahan sa seksiyon 2 sa materyal sa pagpangandam.)

Kini mahimong makatabang sa pagdapit og pipila ka mga estudyante sa wala pa ang klase sa pagrebyo sa mga istorya nga gipakigbahin ni Presidente Oaks o Elder David A. Bednar nga makaplagan ubos sa pangutana “Sa unsang paagi ako makapalambo og hugot nga pagtuo sa pagsalig sa kabubut-on sa Ginoo kon maninguha og usa ka milagro?” diha sa “Gusto pa og Dugang?” nga seksiyon sa materyal sa pagpangandam. Sa panahon sa klase, mahimo ninyong dapiton kini nga mga estudyante sa pagpakigbahin og usa sa mga istorya ug unsa ang ilang nakat-onan gikan niini mahitungod sa mga milagro ug sa pagsalig sa kabubut-on sa Ginoo.

Hunahunaa ang pagbasa sa pamahayag ni Elder Ronald A. Rasband sa seksiyon 3 sa materyal sa pagpangandam. Dapita ang mga estudyante sa pagpakigbahin og mga ehemplo sa gagmay ug yano nga mga milagro nga ilang nasaksihan. (Ang mga estudyante mahimong mohisgot og mga milagro sama sa pagdawat og pagpadayag, pagbuntog sa makadaot nga batasan, pagdawat sa gahom sa pagpasaylo sa usa ka tawo, pagkamalig-on kon mag-atubang og kalisdanan, pagsinati og nagtubo nga abilidad sa paghuman sa usa ka malisod nga buhat, ug uban pa.)

• Unsa ang gipadayag niining “gagmay nga mga milagro” mahitungod sa Langitnong Amahan ug ni Jesukristo?

Aron sa pagtabang sa mga estudyante sa paggamit kon unsay ilang nakat-onan gikan nini nga leksiyon, hunahunaa ang paghatag kanila og panahon sa pagpamalandong ug pagrekord sa ilang mga hunahuna ug mga pagbati mahitungod sa mosunod nga pangutana:

• Unsa ang akong mabuhat nga mas makaamgo ug bukas ngadto sa mga milagro sa Ginoo diha sa akong kinabuhi?

Hunahunaa ang pagpakigbahin og pagpamatuod nga si Jesukristo usa ka Dios sa mga milagro, o kamo makadapit og usa o dugang pa nga mga estudyante sa pagbuhat sa mao.

Alang sa Sunod nga Higayon

Aron sa pag-awhag sa mga estudyante sa pag-andam alang sa sunod nga klase, hunahunaa ang pagpadala sa mosunod nga hulagway ug mensahe: Sama sa unsa ang inyong labing bag-o nga kasinatian sa sakramento? Samtang kamo magtuon sa materyal sa pagpangandam alang sa leksiyon 15, pamalandonga kon nganong si Jesukristo gusto kaninyo moapil matag semana niining sagradong ordinansa.