Leksiyon 11 Materyal sa Magtutudlo

Pagpahimulos sa mga Panalangin sa Simbahan sa Ginoo

Sa panahon sa Iyang mortal nga pangalagad ug pag-usab sa ulahing mga adlaw, mitawag si Jesukristo og Apostoles ug gitukod ang Iyang Simbahan. Dinhi niini nga leksiyon, ang mga estudyante adunay oportunidad sa paghunahuna sa mga panalangin nga anaa nganha kanila pinaagi sa Simbahan sa Ginoo. Sila maghunahuna usab kon unsa ang ilang mahimo sa pagpauswag sa kasinatian sa ilang kaugalingon ug sa uban diha sa Simbahan.

Mga Sugyot alang sa Pagtudlo

Makakaplag kita og katuyoan diha sa Simbahan sa Ginoo.

Pagpalambo sa Atong Pagtudlo ug Pagkat-on

Pagmatinahuron sa ubang mga relihiyon. Samtang kamo naghisgot sa talagsaong mga panalangin sa Ang Simbahan ni Jesukristo sa mga Santos sa Ulahing mga Adlaw, siguroha nga ang inyong panaghisgot matinahuron sa ubang mga tinuohan. Kini mahimong importante ang paghatag og gibug-aton sa mahinungdanon ug positibong mga tampo nga nahimo sa ubang mga relihiyon sa tibuok kasaysayan ug nagpadayon sa paghimo sa atong panahon.

Mahimo ninyong sugdan ang klase pinaagi sa pagpakigbahin sa mosunod nga sitwasyon:

Si Isabella bag-ohay nga mihunong sa pagsimba. Miabot siya sa pagtuo nga mahimo siya nga espirituhanon nga dili moapil diha sa pagsimba. Human kamo masultihan mahitungod sa pipila ka espirituhanong mga higayon nga siya aduna sa iyang kaugalingon, mangutana siya kaninyo nganong kamo naghunahuna nga ang pag-apil diha sa simbahan importante.

• Unsa ka sagad kini nga panglantaw taliwala sa mga young adult nga inyong nailhan?

• Unsaon ninyo pagtubag kini nga pangutana ni Isabella?

Human makigbahin ang mga estudyante, mahimong inyong isulat ang mosunod nga ulohan diha sa pisara: Mga Panalangin sa Pag-apil diha sa Simbahan sa Ginoo. Dayon dapita ang mga estudyante sa paglista sa ilang mga ideya ubos niini nga ulohan.

Ang mga estudyante mahimong molista og pipila sa mosunod nga mga panalangin: pagdawat ug paggamit sa awtoridad ug mga yawe sa pagkapari, pagdawat og mga ordinansa ug paghimo og mga pakigsaad, pagkat-on og putli ug klaro nga doktrina, pagdawat og tabang sa paghinulsol, pagkaplag og mga oportunidad sa pagpundok sa Israel, pagtabang sa kabos ug pagtubag sa mga tawhanong mga panginahanglan, pag-apil sa buhat sa templo alang sa mga patay, pagbaton og mga kahigayonan sa pagserbisyo ug pakigkuyog sa uban, ug paglig-on sa mga pamilya.

• Hain niini nga mga panalangin sa inyong hunahuna ang mga talagsaon sa Simbahan sa Ginoo?

Samtang kamo aduna niini nga panaghisgotan, hunahunaa hain niining mosunod nga mga kalihokan ug mga pangutana ang makatabang sa pagpatataw sa talagsaong mga panalangin sa Simbahan. (Mahimong kamo walay panahon sa paghisgot sa tanan niining mga hisgotanan. Mahimo usab kamong mopili sa paglig-on sa lainlaing mga bahin sa panaghisgotan.)

Awtoridad ug mga Yawe sa Pagkapari

Mahimo ninyong hangyoon ang mga estudyante sa pag-role play sa mosunod nga sitwasyon nga magpares:

Ang inyong higala, kinsa nagpakita og interes sa Simbahan, nag-ingon, “Ako nakasabot nga ang inyong Simbahan gipangulohan og Apostoles. Unsa sila ka lahi sa mga lider sa ubang mga simbahan?”

Makabasa ang mga estudyante sa Mga Taga-Efeso 2:19–20; Mateo 10:1, 7–8; 16:19; Mga Buhat 1:21–22; ug Doktrina ug mga Pakigsaad 107:23 og dungan sa pagsugod niini nga kalihokan. (Mahimo kamong motimbang-timbang sa pagsabot sa mga estudyante sa mga yawe sa pagkapari ug modugang ngadto sa ilang pagsabot kon gikinahanglan. Tan-awa ang pakigpulong ni Presidente Russell M. Nelson “Mga Yawe sa Pagkapari (Priesthood)” [Liahona, Okt. 2005, 26–30], nga gipakisayran usab diha sa “Gusto pa og Dugang?” seksiyon sa materyal sa pagpangandam.)

• Unsa nga mga panalangin ang makuha lamang diha sa gahom ug awtoridad sa balaang pagkapari? (Hunahunaa ang pagrebyo sa mga pamahayag ni Presidente Dallin H. Oaks ug Elder Robert D. Hales diha sa seksiyon 2 sa materyal sa pagpangandam.) Kanus-a kamo nakasinati niini nga mga panalangin?

Mga Ordinansa sa Pagkapari ug mga Panalangin

• Unsa ang inyong mga pagbati mahitungod sa pagdawat sa sagradong mga ordinansa ug sa paghimo sa sagradong mga pakigsaad uban sa Dios? (Mahimo ninyong dapiton ang mga estudyante sa pagpamalandong sa mga panalangin nga naghulat kanila samtang sila nagpadayon sa unahan diha sa dalan sa pakigsaad.)

Katin-aw mahitungod sa Doktrina sa Ginoo

• Giunsa kita sa pagpanalipod gikan sa “tanang hangin sa tuloohan” (Mga Taga-Efeso 4:14) samtang kita nag-apil diha sa Simbahan? (Rebyoha ang Mga Taga-Efeso 4:11-14 nga magdungan.) Giunsa sa kinatibuk-ang komperensiya pagtabang kaninyo sa pagkat-on ug pagsabot sa doktrina ni Kristo?

Buhat sa Templo

• Giunsa sa templo ug family history nga buhat pagpanalangin kaninyo sa personal nga paagi?

Pagpundok sa Israel

• Sa unsang mga paagi ang Simbahan sa Ginoo nagtabang kaninyo sa pagpundok sa duha ka bahin sa tabil? Giunsa niini nga mga lihok pagpanalangin sa inyong kinabuhi?

Hangyoa ang mga estudyante sa pagpili og usa sa mga panalangin nga gilista diha sa pisara nga gusto nila nga mapahimuslan pa og hingpit sa ilang kinabuhi. Hatagi ang mga estudyante og panahon sa paghimo og usa ka plano, lakip ang paglista og mga lakang nga ilang himoon sa pagdawat sa panalangin nga ilang giila.

Makahimo kita sa atong mga ward ug mga branch nga mga dapit sa pag-abiabi.

Mahimo ninyong pangutan-on ang mga estudyante kon unsa ang ilang buhaton kon hangyoon sa pagserbisyo uban sa usa ka tawo diha sa ilang ward o branch kinsa adunay lahi kaayo nga mga opinyon o kinsa mahimong mahagitong ikauban og trabaho.

• Giunsa ninyo sa pagtubo diha sa inyong pagkatinun-an samtang kamo nagserbisyo ug nagtrabaho kauban sa ubang miyembro sa Simbahan? (Tan-awa ang mga pamahayag ni Elder D. Todd Christofferson diha sa seksiyon 2 sa materyal sa pagpangandam.)

Hunahunaa ang pagrebyo sa Moroni 6:4–5 og dungan ug sa pagpangutana sa mga estudyante kon sila diha bay mga kasinatian sa simbahan nga sila mibati nga nahinumdoman, naamomahan, o nalig-on sa usa ka tawo. Mahimo usab sila nga maghunahuna mahitungod sa mga panahon nga mibati sila nga nag-inusara sa simbahan.

• Ngano kaha nga ang ubang mga tawo mahimong dili mobati nga sila sakop sa simbahan? Unsa ang atong mahimo sa pagtabang sa uban nga mobati nga gihigugma ug apil sa simbahan? (Mahimo ninyong rebyohon ang ehemplo nga gipakigbahin ni Sister Carole M. Stephens nga makaplagan diha sa seksiyon 3 sa materyal sa pagpangandam.

Pahinumdomi ang mga estudyante nga agi og pagpangandam alang sa klase gidapit sila sa paghunahuna og usa ka tawo kinsa mapanalanginan pinaagi sa ilang pagpakigdait. Hatagi ang mga estudyante og pipila ka panahon sa pagpamalandong kon unsa ang ilang mabuhat sa pagtabang niini nga tawo nga mobati nga gihigugma ug giabiabi sa simbahan.

Alang sa Sunod nga Higayon

Sa pagdasig sa mga estudyante sa pagpangandam alang sa sunod nga klase, hunahunaa ang pagpadala sa mosunod nga mensahe sulod sa semana: Sama sa unsa kaha ang paglingkod sa tiilan sa Manluluwas ug maminaw Kaniya nga nagtudlo? Samtang inyong basahon ang materyal sa pagpangandam alang sa leksiyon 12, hunahunaa ang impluwensiya sa mga pagtulun-an ni Kristo diha sa inyong kinabuhi.