Leksiyon 15 Materyal sa Magtutudlo

Pagpaduol ngadto ni Jesukristo pinaagi sa Sakramento

Si Elder Peter M. Johnson sa Seventy mitudlo, “Adunay espiritwal nga paglamdag nga nauban sa sakramento—personal kini, impluwensyal, ug gikinahanglan kini” (“Gahom sa Pagbuntog sa Kaaway,” Liahona, Nob. 2019, 112). Niini nga leksiyon, ang mga estudyante adunay oportunidad sa pagpaambit kon sa unsang paagi nga ang sakramento mahimong usa ka personal ug gamhanan nga impluwensya sa ilang kinabuhi. Sila mokonsiderar usab kon unsay ilang mabuhat aron mas mapaduol ngadto sa Manluluwas samtang moambit sila sa sakramento ug maningkamot sa paghinumdom Kaniya sa kanunay.

Mga Sugyot alang sa Pagtudlo

Gipasiugdahan ni Jesukristo ang sakramento isip paghinumdom sa Iyang mahinungdanon nga sakripisyo sa pag-ula.

Pahinumdomi ang mga estudyante nga nianang gabii sa wala pa ang Iyang Paglansang sa Krus, ang Manluluwas mikaon sa pagkaon alang sa Kasaulogan sa Pagpalabay uban sa Iyang mga disipulo. Atol niini nga pagpangaon, ang Manluluwas mipasiugda sa sakramento.

Pagpalambo sa Atong Pagtudlo ug Pagkat-on

Dapita ang mga estudyante sa paghanduraw sa mga tudling ug mga asoy sa kasulatan. Kini makatabang nila nga makabaton og mas dakong panabot ug empatiya alang niadtong ilang gitun-an. Kini makatabang usab nila nga mobati sa kamatuoran ug kaimportante sa mga baroganan nga ilang gitun-an.

Aron matabangan ang mga estudyante nga mobati sa kaimportante sa Kataposan nga Panihapon, mahimo nimong ipakita ang imahe nga naghulagway sa panghitabo ug dapiton ang usa ka estudyante sa pagbasa og kusog sa Mateo 26:19–20, 26–30. Dapita ang mga estudyante sa paghunahuna kon unsa kaha ang bation nga maanaa didto samtang ang Manluluwas nangalagad sa sakramento sa unang higayon. Awhaga ang pipila ka estudyante sa pagpaambit sa unsay ilang gihunahuna o gibati.

Ikonsiderar ang pagdapit sa mga estudyante sa paghunahuna nga kon pananglit dili sila mga Kristiyano ug nakasaksi sa pagpangalagad sa sakramento sa unang higayon diha sa usa ka panagtigom sa Simbahan. Atol sa panagtigom, ang kongregasyon nanganta sa “Jesus sa Nazaret, Hari ug Dios” (Mga Himno, nu. 106) ug ang pan ug tubig sa sakramento gipanalanginan ug giapud-apod. (Tingali makatabang nga ang mga estudyante ang mobasa sa mga pulong niini nga himno.) Dapita ang mga estudyante sa pagsulat sa pipila nila ka pangutana mahitungod sa sakramento kon pananglit dili sila Kristiyano.

Human sa pagsulat sa mga estudyante sa ilang mga pangutana, hangyoa sila sa pagporma og ginagmay nga mga grupo. Dapita ang mga sakop sa grupo sa pagpuli-puli og pangutana ug pagtubag sa ilang mga pangutana.

Samtang ang mga estudyante maghisgot sa ilang mga pangutana, paglakaw-lakaw libot sa lawak ug paminaw sa unsay ilang gipaambit. Base sa unsay imong nadungog, tinoa kon ang pagpangutana sa mosunod nga mga pangutana makatabang ba sa imong mga estudyante nga mas makakat-on og lawom diha sa panaghisgot sa klase:

• Unsa ang girepresentar sa mga simbolo sa sakramento? (Ang mga estudyante mahimong moila og usa ka kamatuoran sama sa mosunod: Ang pan ug bino, o tubig, nagrepresentar sa lawas ug dugo ni Jesukristo ug sa Iyang Pag-ula alang kanato.)

• Unsay gitudlo sa mga kasulatan mahitungod sa Manluluwas pinaagi sa mga simbolo sa pan, bino, ug tubig? Nganong importante man nga ang pan pikas-pikason sa dili pa kita mokaon niini?

• Nganong importante man kaha nga kita mokaon sa pan ug moinom sa tubig, ug dili lang motan-aw niini? (Mahimo nimong rebyohon ang pinabaga nga mga tuldok diha sa seksiyon 1 sa materyal sa pagpangandam aron mapalambo ang inyong panaghisgotan.)

Ikonsiderar ang pagdapit sa mga estudyante sa pagpamalandong sa kaimportante sa mga simbolo sa sakramento ug kon sa unsang paagi nga kini makatabang sa pagpahinumdom nato sa personal nga matang sa sakripisyo sa Manluluwas.

Kita nagpaduol ngadto sa Manluluwas kon kita mahunahunaong nag-ambit sa sakramento.

Ipakita ang mosunod nga sitwasyon.

Bisan kon wala tuyoa ni Julia, kanunay siya nga mobati og kalaay atol sa pag-apud-apod sa sakramento. Siya nasayod nga importante kini apan naglisod nga mobati niana. Kon ang sakramento ipahigayon ngadto sa kongregasyon, kanunay niya nga makita ang iyang kaugalingon nga naghunahuna og mga butang sama sa trabaho ug mga buluhaton sa eskwelahan, sa iyang sosyal nga kinabuhi, ug kon unsay iyang buhaton human sa pagsimba. Usahay mag-scroll siya diha sa social media sa iyang phone.

• Unsaon nimo paghulagway ang pamaagi ni Julia sa sakramento? Unsa ang mga oportunidad ug mga panalangin nga tingali mawala ni Julia tungod sa iyang pamaagi sa sakramento?

• Sa imong hunahuna sa unsang paagi nga ang kasinatian ni Julia tingali mausab kon ang Manluluwas Mismo mao ang mihatag niya sa pan ug tubig?

Dapita ang pipila ka estudyante sa pagrebyo og hilom sa 3 Nephi 18:7, 10–12; 20:8–9, ang pipila mobasa sa Doktrina ug mga Pakigsaad 20:77, 79, ug ang uban sa pagtuon sa pamahayag ni Sister Cheryl A. Esplin diha sa seksiyon 2 sa materyal sa pagpangandam. Dapita ang mga estudyante sa pagpangita sa lainlaing mga baroganan, mga kinaiya, ug mga panalangin nga may kalabotan sa sakramento. Ikaw o sila mahimong mosulat sa ilang nakit-an diha sa pisara.

Samtang magpaambit ang mga estudyante sa unsay ilang nakit-an, mahimo usab nimo silang dapiton sa pagpaambit og personal nga mga kasinatian o mga ehemplo nga may kalabotan sa ilang mga ideya. Sila mahimo usab nga mopaambit og mga ehemplo o mga kasinatian gikan sa mga tawo nga ilang giistorya diha sa pagpangandam alang sa klase (tan-awa sa “Hisgoti agi og Pagpangandam alang sa Klase” diha sa seksiyon 2 sa materyal sa pagpangandam.)

Samtang ang mga estudyante maghisgot kon unsay gipasabot sa kanunay nga mohinumdom sa Manluluwas, mahimo ka nga mangutana:

• Sa unsang paagi nga ang kanunay nga paghinumdom sa Manluluwas makaimpluwensya sa atong inadlaw-adlaw nga kinabuhi? Unsaon nga mahimo nimo kini sa mas maayong paagi sa tibuok semana?

Ikonsiderar ang paghatag og panahon sa mga estudyante sa pagpamalandong ug pagsulat mahitungod sa ilang kaugalingong partisipasyon diha sa sakramento. Mahimo nilang ikonsiderar kon unsaon nga mapalambo ang ilang kasinatian atol sa sakramento ug ang ilang mga paningkamot nga “sa kanunay mohinumdom kaniya” (Doktrina ug mga Pakigsaad 20:77).

Kon ang mga estudyante adunay mga pangutana mahitungod sa katakos sa pag-ambit sa sakramento, o kon mibati ka nga giaghat sa paghisgot niini nga hilisgotan isip usa ka klase, adto sa seksiyon 3 sa materyal sa pagpangandam. Pwede kang mangutana:

• Nganong importante man nga kita “mosusi” sa atong kaugalingon samtang mangandam kita sa pagdawat sa sakramento? (tan-awa sa 1 Mga Taga-Corinto 11:27–29).

• Unsay imong mga gibati mahitungod sa pamahayag ni Elder John H. Groberg mahitungod sa katakos sa pag-ambit sa sakramento (gikan sa seksiyon 3 sa materyal sa pagpangandam)? Sa unsang paagi nga kini nga tambag makahatag og paglaom niadtong nanglimbasog sa mga kahuyang, mga sala, o ubang mga hagit?

Sa pagtapos sa klase, ang imong mga estudyante o ikaw mahimong mopaambit og pagpamatuod kon sa unsang paagi nga ang ordinansa sa sakramento makatabang nato sa pagduol ngadto sa Manluluwas. O ang mga estudyante mahimong mopaambit sa unsay ilang gibati ug nakat-onan gikan sa leksiyon.

Alang sa Sunod nga Higayon

Sa pag-awhag og pagpangandam alang sa sunod nga klase, ikonsiderar ang pagpadala sa mosunod nga mensahe (o usa nga imong kaugalingon) nianang semanaha: Samtang magtuon ka sa materyal sa pagpangandam, hunahunaa kon ngano nga ang Pag-ula ni Jesukristo mao man ang labing importante nga panghitabo sa kasaysayan sa tawo.