Leksiyon 16 Materyal sa Magtutudlo

Paghangop sa Mahinungdanon nga Sakripisyo sa Pag-ula sa Manluluwas

Ang Pag-ula ni Jesukristo mao ang labing importante nga bahin sa plano sa Langitnong Amahan sa kaluwasan. Atol niini nga leksiyon, mahimong mapalawman sa mga estudyante ang ilang pagpasalamat sa bugti nga gibayad ni Jesukristo “aron sa pag-ula alang sa mga sala sa tanang mga katawhan” (“Ang Buhi nga Kristo: Ang Pagpamatuod sa mga Apostoles,” ChurchofJesusChrist.org). Dapiton sila sa pagkonsiderar kon unsay ilang mabuhat aron ang paghinulsol mahimong mas nakasentro kang Kristo ug mahimong malipayon nga bahin sa ilang kinabuhi.

Mga Sugyot alang sa Pagtudlo

Tungod sa Pagkapukan, kita nagkinahanglan sa Pag-ula ni Jesukristo.

Pagpalambo sa Atong Pagtudlo ug Pagkat-on

Pag-ugmad og kahimtang nga makaayo sa espirituhanong pagkat-on. Si Presidente Boyd K. Packer mitudlo nga “ang inspirasyon moabot dayon sa malinawon nga mga kahimtang” (“Reverence Invites Revelation,” Ensign, Nob. 1991, 21). Ang kahimtang ba nimo sa pagkat-on han-ay, limpyo, ug komportable? Unsa ang mga butang nga mahimong makabalda sa mga estudyante sa proseso sa pagkat-on, ug unsaon nimo nga maminosan kini? Mobati ba ang mga estudyante nga giabiabi kon sila moabot? Sa unsang paagi nga ang sagrado nga musika o mga hulagway nga may kalabotan sa ebanghelyo makatabang sa pag-andam sa mga estudyante alang sa pagkat-on?

Mahimo nimong sugdan ang klase pinaagi sa pagpaambit sa mosunod nga sitwasyon:

Si Logan nagpasalamat sa Pag-ula ni Jesukristo, apan wala niya batia kanunay ang dinalian nga panginahanglan alang sa Manluluwas diha sa iyang kinabuhi. Siya nagtuo nga kay buotan man siya nga tawo, nagsunod gayod sa mga sugo, nagserbisyo sa Simbahan, ug dili sad-an og bisan unsang dagko nga mga sala, ang Pag-ula sa Ginoo dili kaayo kinahanglanon sa iyang sitwasyon.

• Unsaon ninyo paghulagway sa panglantaw ni Logan bahin sa Pag-ula sa Ginoo? Unsa ang sayop nga mga pagdahom ni Logan mahitungod sa Pag-ula sa Manluluwas?

• Sa unsang paagi nga ang pagtuon bahin sa Pagkapukan makaimpluwensya sa unsay pagbati ni Logan mahitungod sa Pag-ula ni Jesus?

Ikonsiderar ang pagpakita sa mosunod nga pamahayag ni Presidente Ezra Taft Benson:

Presidente Ezra Taft Benson

Walay usa ang igo ug tukma nga nasayod nganong gikinahanglan niya si Kristo hangtod nga iyang masabtan ug madawat ang doktrina sa Pagkapukan ug ang epekto niini sa tanang katawhan. (A Witness and a Warning: A Modern-Day Prophet Testifies of the Book of Mormon [1988], 33)

Dapita ang mga estudyante sa paglista nga sila lang o adunay kauban bahin sa mga epekto sa Pagkapukan nila ni Adan ug Eva. (Ang mga estudyante mahimong motan-aw sa seksiyon 1 sa materyal sa pagpangandam alang sa tabang.) Mahimo dayon nimo silang dapiton sa pagpaambit nganha sa klase sa unsay ilang nakit-an. Human sa pagpaambit sa mga estudyante, ikonsiderar ang pagtabang nila nga mapalawman ang ilang pagsabot pinaagi sa pagpangutana og usa o daghan pa sa mosunod nga mga pangutana:

• Ngano man nga ang tanang tawo, lakip na ang “maayo” ug “masulundon ” nga mga tawo sama ni Logan, adunay dinalian ug karon dayon nga panginahanglan alang sa Pag-ula sa Ginoo? (Kon makatabang, basaha ang 2 Nephi 9:7–9. Ang mga estudyante mahimong moila og baroganan nga susama sa mosunod: Pinaagi lamang sa Pag-ula ni Jesukristo nga kita makabuntog sa mga kahimtang sa pisikal ug espirituhanong kamatayon.)

• Unsa ang kahulogan sa pisikal ug espirituhanon nga kamatayon? (Kon kinahanglanon, rebyoha ang pamahayag ni Elder D. Todd Christofferson diha sa seksiyon 1 sa materyal sa pagpangandam.) Sa inyong hunahuna ngano man nga si Jacob mihulagway sa pisikal ug espirituhanon nga kamatayon isip usa ka “makalilisang nga mangtas”? 2 Nephi 9:10).

• Unsa ang imong mga pagbati alang sa Manluluwas, nasayod nga Siya lamang ang paagi nga inyong mabuntog ang pisikal ug espirituhanon nga kamatayon? (tan-awa sa Mosiah 3:17).

Si Jesus nag-antos sa Getsemani ug sa krus aron kita makahinulsol ug mahimong matubos.

Pahinumdomi ang mga estudyante nga agi og pagpangandam sa klase, sila gidapit sa pagbasa sa Marcos 14:33–37, Lucas 22:43–44, ug Doktrina ug mga Pakigsaad 19:18 ug sa pagrekord sa ilang mga hunahuna ug mga pagbati. Hatagi og panahon ang mga estudyante sa pagrebyo niini nga mga tudling. Dayon papormaha sila og ginagmayng grupo ug hatagi sila sa mosunod nga handout.

Si Jesukristo Nag-antos aron sa Pagluwas Kanato

Materyal sa Magtutudlo alang sa Si Jesukristo ug ang Iyang Walay Kataposang Ebanghelyo—Leksiyon 16

Basaha ang mosunod nga mga pangutana ug pokusan kadtong ganahan kaayo nga hisgotan sa inyong grupo.

1. Unsay inyong mga hunahuna ug mga pagbati alang sa Manluluwas samtang namalandong kamo sa Iyang pag-antos alang ninyo? Unsay gitudlo mahitungod Kaniya ngari kanato sa Iyang kaandam sa pag-antos? (Ikonsiderar ang pagbasa sa 1 Nephi 19:9.)

2. Nganong gikuha man sa Langitnong Amahan ang Iyang Espiritu samtang ang Manluluwas nag-antos sa krus? (Ikonsiderar ang pagrebyo sa Marcos 15:34 ug sa pamahayag ni Elder Jeffrey R. Holland diha sa seksiyon 2 sa materyal sa pagpangandam.) Sa unsang paagi nga makatabang kini kanato nga hinumdoman ang kasinatian sa Ginoo diha sa krus kon kita mobati nga nag-inusara, nakalimtan, o gisalikway?

3. Sa unsang paagi nga ang pagpamatuod bahin sa Pag-ula sa Ginoo makatabang kanato kon kita nagduhaduha sa atong indibidwal nga bili? (Mahimo ninyong rebyohon ang Doktrina ug mga Pakigsaad 18:10–11.) Sa unsang paagi nga ang pagpokus kang Jesukristo ug sa Iyang Pag-ula makaimpluwensya sa unsay atong panglantaw sa atong potensyal ug sa umaabot?

4. Unsa nga mensahe ang atong gipakita sa atong kaugalingon ug sa Manluluwas kon kita mopili sa paghinulsol? Nganong malipay man ang Manluluwas kon kita maghinulsol? (tan-awa sa Doktrina ug mga Pakigsaad 18:13).

5. Kon adunay tawo nga mobati og walay kasigurohan mahitungod sa katinuod sa Pag-ula sa Ginoo, unsa man ang puwede niyang buhaton aron makabaton og pagpamatuod bahin niini?

© 2023 pinaagi sa Intellectual Reserve, Inc. All rights reserved.

Si Jesukristo Nag-antos aron sa Pagluwas Kanato

Materyal sa Magtutudlo alang sa Si Jesukristo ug ang Iyang Walay Kataposang Ebanghelyo—Leksiyon 16

handout sa magtutudlo

Depende sa mga panginahanglan sa imong mga estudyante, mahimo nimo silang dapiton sa pagpaambit unsay nagustohan nila atol sa ilang mga panaghisgot. O mahimo nimong pokusan ang doktrina sa paghinulsol pinaagi sa pagpakita sa mosunod nga mga pamahayag. Dapita ang mga estudyante sa pagkonsiderar kon hain niini ang may kalabotan gayod nila samtang magtan-aw sila sa ilang kaugalingong panginahanglan alang sa paghinulsol.

1. Ang paghinulsol morag sama sa usa ka silot nga kinahanglang likayan.

2. Ang paghinulsol morag sama sa usa ka sagradong gasa nga angayng hangopon sa kalipay.

Aron matabangan ang mga estudyante sa pagpamalandong sa ilang kinaiya ngadto sa paghinulsol, ikonsiderar ang pagbasa og kusog sa pamahayag ni Presidente Russell M. Nelson diha sa seksiyon 3 sa materyal sa pagpangandam. Mahimo dayon usab nimong tabangan ang mga estudyante sa pag-ila niini nga kamatuoran: “Kon inubanan sa hugot nga pagtuo, ang paghinulsol moabli sa atong agianan ngadto sa gahom sa Pag-ula ni Jesukristo” (“Makabuhat og Mas Maayo pa ug Mahimong mas Maayo,” Liahona, Mayo 2019, 67). Dayon ipangutana:

• Sa unsang mga paagi nga ang hugot nga pagtuo ug paghinulsol moabli sa atong agianan ngadto sa gahom sa Manluluwas?

• Unsa ang atong buhaton aron tan-awon ang paghinulsol isip usa ka sagrado nga gasa ug hangopon kini sa mas malipayong paagi?

Human sa pagtubag sa mga estudyante, mahimo nimo silang hatagan og panahon sa pagsulat sa butang nga ilang buhaton aron ang paghinulsol mahimong mas malipayon ug makahuluganon nga bahin sa ilang kinabuhi.

Kon itugot sa panahon, mahimo nimong dapiton ang pipila ka estudyante sa pagpaambit kon sa unsang paagi nga ang paghinulsol nakatabang nila nga makagamit sa makalimpyo nga gahom sa Manluluwas. Pahinumdomi ang mga estudyante nga dili mosulti sa nangagi nga mga sala samtang sila mopaambit.

Alang sa Sunod nga Higayon

Sa pag-awhag og pagpangandam sa estudyante alang sa leksiyon 17, ikonsiderar ang pagpadala sa mga estudyante sa mosunod nga mensahe ug imahe: Samtang magtuon ka sa materyal sa pagpangandam alang sa leksiyon 17, pamalandongi ang kamahinungdanon sa walay sulod nga lubnganan sa Manluluwas.

Walay sulod nga lubnganan ni Jesukristo