Leksiyon 25 Materyal sa Magtutudlo

Pagpaningkamot nga Mahimong usa ka Matinud-anong Disipulo ni Jesukristo

Ang pagkamatinud-anong disipulo ni Jesukristo takos sa matag paningkamot tungod kay ang “Iyang paagi mao ang dalan nga paingon ngadto sa kalipay dinhi niini nga kinabuhi ug sa kinabuhing dayon sa kalibotan nga moabot” (“Ang Buhi nga Kristo: Ang Pagpamatuod sa mga Apostoles,” https://www.churchofjesuschrist.org/study/scriptures/the-living-christ-the-testimony-of-the-apostles/the-living-christ-the-testimony-of-the-apostles?lang=ceb). Niini nga leksiyon, ang mga estudyante moila kon unsa ang gikinahanglan sa Ginoo sa Iyang mga disipulo. Sila usab maghunahuna kon unsa ang ilang mabuhat nga mahimong mas may pasalig ug matinud-anon nga disipulo ni Jesukristo.

Mga Sugyot alang sa Pagtudlo

Gidapit kita ni Jesukristo nga mahimo Niyang mga disipulo.

Hunahunaa ang pagpakita og usa ka hulagway ni Jesus nga naghugas sa mga tiil sa Iyang Apostoles, ug hangyoa ang usa o duha ka estudyante sa pagpakigbahin kon unsa kaha ang ilang bation kon ang Manluluwas maghugas sa ilang mga tiil.

Mahimo ninyong ipakita ang mosunod nga mga pangutana ug hangyoa ang mga estudyante sa pagpalandong niini sulod sa usa ka minuto:

• Unsa ang akong makat-onan mahitungod sa mga hiyas sa Manluluwas gikan sa Iyang mga lihok ngadto sa Iyang Apostoles? Unsaon nako nga mas makasunod og maayo niining Kristohanong mga kalidad?

Ipasabot nga kini nga mga matang sa mga pangutana mao ang atong ikapangutana sa atong mga kaugalingon samtang kita naningkamot nga mahimong mas maayong mga disipulo ni Jesukristo. Ang usa ka disipulo ni Kristo mao ang usa ka tawo kinsa nagsunod sa Manluluwas ug nagpuyo sa Iyang mga pagtulon-an (tan-awa sa Doktrina ug mga Pakigsaad 41:5). Human ang Manluluwas mihugas sa mga tiil sa Apostoles, mitudlo Siya kanila og dugang pa mahitungod sa pagka-disipulo.

Dapita ang mga estudyante sa pagrebyo sa Juan 13:14–17, 34–35; 14:15 ug kompletoha ang mosunod nga pahayag: Ang usa ka disipulo ni Jesukristo …

Pagdapit og pipila ka mga estudyante sa pagpakigbahin sa ilang nakompleto nga mga pahayag, nga maglakip sa samang hugpong sa mga pulong nga “nagserbisyo sa uban,” “naghigugma sa uban,” ug “nagsunod sa Iyang mga sugo.” Samtang nagtubag ang mga estudyante, mahimo kang mangutana og follow-up nga mga pangutana sama niini:

• Kinsa gikan sa mga kasulatan o sa inyong kaugalingong kinabuhi ang nagpakita niini nga matang sa pagka-disipulo? Sa unsang paagi ang iyang ehemplo mitandog kaninyo?

Pagpalambo sa Atong Pagtudlo ug Pagkat-on

Hatagi ang mga estudyante og mga oportunidad alang sa kaugalingong pagtimbang-timbang. Ang kaugalingong pagtimbang-timbang mahimong makatabang nga himan alang sa personal nga paglambo. Sa pipila ka kahimtang, hinoon, kini mahimong mogiya sa mga estudyante sa pagbati nga nakasala o nawad-an og kadasig. Pahinumdomi ang mga estudyante samtang sila nagkompleto sa mosunod nga kaugalingong pagtimban-timbang sa pagpailob ug pagkalooy sa ilang mga kaugalingon. Ang Ginoo nag-ingon, “Ako magmaloloy-on ngadto sa inyong kahuyang” (Doktrina ug mga Pakigsaad 38:14).

Kamo mahimong makapakita o makahatag sa mga estudyante og kopya sa mosunod nga kaugalingong pagtimbang-timbang.

Kaugalingong Pagtimbang-timbang sa Pagka-disipulo

Materyal sa Magtutudlo alang sa Si Jesukristo ug ang Iyang Walay Kataposang Ebanghelyo––Leksiyon 25

Hunahunaa ang matag pamahayag ug hatagi og grado ang inyong kaugalingon naggamit sa mosunod nga timbang: 1 = dakong supak, 2 = ingon og supak, 3 = ni supak ni dili supak, 4 = ingon og uyon, ug 5 = dakong uyon.

1. Ako tinud-anay nga naningkamot nga mahimong disipulo ni Jesukristo.

2. Ako naninguha sa pagsunod sa mga sugo sa Manluluwas sa matag adlaw.

3. Ako naninguha sa paghigugma ug sa pagserbisyo niadtong naglibot kanako ingon nga buhaton ni Jesukristo.

4. Naningkamot ako sa pagsakripisyo sa kalibotanong mga tinguha aron sa pagsunod sa Manululuwas.

© 2023 pinaagi sa Intellectual Reserve, Inc. All rights reserved.

Kaugalingong Pagtimbang-timbang sa Pagka-disipulo

Materyal sa Magtutudlo alang sa Si Jesukristo ug ang Iyang Walay Kataposang Ebanghelyo––Leksiyon 25

Human ang mga estudyante dihay panahon sa pagrekord sa ilang mga tubag, dapita sila sa paggahin og pipila ka minuto sa pagpalandong kon unsay ilang nakat-onan gikan niining kaugalingon nga pagtimbang-timbang.

Pakigbahin sa mga estudyante nga ang Manluluwas midapit sa adunahang batan-on nga magmamando sa pagbuhat sa iyang kaugalingong pagtimbang-timbang. Pagdapit og usa ka estudyante sa pag-summarize sa istorya kabahin niining batan-on nga lalaki (tan-awa sa seksiyon 2 sa materyal sa pagpangandam), o kamo makadapit og estudyante sa pag-summarize sa istorya niining batan-ong lalaki (tan-awa sa seksiyon 2 sa materyal sa pagpangandam.

• Unsa ang mahinungdanon mahitungod sa pangutana “Unsa pa may akong kulang?”? (Mateo 19:20). Nganong importante kini alang sa tanan nga mga disipulo ni Jesukristo sa pagpangutana niini?

Dapita ang mga estudyante sa pagbasa sa Marcos 10:21, mangita alang sa giunsa ni Marcos sa paghulagway ang mga pagbati sa Manluluwas mahitungod niining adunahan nga batan-ong magmamando.

• Unsaon nga ang pagbati sa gugma sa Manluluwas makatabang kaninyo kon kamo makadiskobre og usa ka butang nga inyong kinahanglan nga usbon?

• Unsa ang gipasabot sa “pas-ana ang [inyong] krus” ug sunod kanako? (Mahimo ninyong rebyohon ang Hubad ni Joseph Smith, Mateo 16:25–26 [diha sa Joseph Smith Translation appendix] ug ang pahayag ni Elder Ulisses Soares gikan sa seksiyon 2 sa materyal sa pagpangandam.)

Kamo dayon makahimo sa mga estudyante sa pagparebyo sa pamahayag ni Elder Larry R. Lawrence sa seksiyon 2 sa materyal sa pagpangandam. Dayon ipakita ang mosunod nga mga pangutana, ug dapita ang mga estudyante sa pagrekord sa ilang mga hunahuna mahitungod sa pangutana nga ilang nakita nga labing may kalabotan:

• Unsa ang nagpugong kaninyo gikan sa pag-uswag sa espirituhanong paagi?

• Unsaon ninyo pagpakita sa Ginoo sa inyong tinguha sa pagpas-an sa inyong krus ug sa pagsunod Kaniya?

• Aduna bay bisan unsa nga inyong gibati nga inyong kinahanglang isakripisyo niini nga panahon nga mahimong usa ka mas maayong disipulo ni Jesukristo?

Ang Ginoo naglig-on sa Iyang mga disipulo.

Kamo makapakita sa mosunod nga pamahayag ni Presidente James E. Faust ug dapita ang mga estudyante sa pagpangita sa mga panalangin nga gisaad ngadto niatong andam sa pagbayad sa bili sa pagka-disipulo:

Daghan ang naghunahuna nga ang bili sa pagka-disipulo hilabihan sa ka mahal ug hilabihan ka bug-at. Alang sa uban, kini naglakip sa pagbiya og daghan kaayo. Apan ang krus dili sama ka bug-at ingon nga kini makita nga mao. Pinaagi sa pagkamasulundon kita makabaton og mas dakong kalig-on sa pagpas-an niini.

“Umari kanako, kamong tanan nga nabudlay ug nabug-atan ug papahulayon ko kamo.

“Isangon ninyo ang akong yugo diha kaninyo ug pagtuon kamo gikan kanako; kay ako maaghop ug mapaubsanon sa kasingkasing ug makakaplag kamog pahulay alang sa inyong mga kalag.

“Kay mas sayon ang akong yugo ug magaan ang akong luwan” (Mateo 11:28–30). (James E. Faust, “Pagka-disipulo,” Liahona, Nob. 2006, 22)

Makahangyo kamo sa mga estudyante sa pagtrabaho kauban ang usa ka kauban o diha sa gagmay nga mga grupo ug iparebyo kanila ang Mga Taga-Roma 8:16–18, 28, 35, 38–39. Dapita sila sa pagpangita alang sa mga kamatuoran nga makatabang kanila samtang sila nag-atubang sa mga hagit sa pagka-disipulo. (Ang mga estudyante mahimong moila og mga kamatuoran sama sa mosunod: Kon kita matinud-anong mga disipulo, kita mahimong mga isigkamanununod ni Jesukristo ug mahimaya uban Kaniya. Kon kita nahigugma sa Dios, tanang mga butang molihok alang sa atong kaayohan.)

Samtang ang mga estudyante nakigbahin sa mga kamatuoran nga ilang nakaplagan, hunahunaa ang pagpangutana sa mosunod nga mga pangutana:

• Unsaon kaha sa pagtuo nga mahimo kitang isigkamanununod uban ni Jesukristo pagtabang kanato nga magpagpabiling matinud-anong mga disipulo? (Makarebyo kamo sa 2 Nephi 9:18. Mahimo kini nga importante sa pagpahibalo nga ang isigkamanununod nagdawat og sama nga panulundon sa uban [tan-awa sa Doktrina ug mga Pakigsaad 76:50, 55–59; 84:38].)

• Giunsa sa imong gugma sa Dios ug sa Iyang gugma alang kaninyo pagsuporta kaninyo sa dihang ang dalan sa pagka-disipulo nahimong malisod?

Sa pagtapos sa klase, makahimo ka sa pagpakigbahin sa imong pagpamatuod sa mga baroganan sa pagka-disipulo nga inyong gihisgotan isip usa ka klase.

Alang sa Sunod nga Higayon