Leksiyon 12 Materyal sa Pagpangandam sa Klase

Pagkakaplag og Putli nga Kamatuoran diha sa mga Pagtulun-an ni Jesukristo

Ang pagpuyo sa digital nga panahon naghatag kanato og kahibulongang dalan ngadto sa dili katupngang gidaghanon sa impormasyon. Ug gani naobserbahan ni Presidente Russell M. Nelson, “Usa sa mga katalagman sa atong panahon mao ang kagamay sa mga tawo nga nahibalo asa mangita alang sa kamatuoran” (“Putli nga Kamatuoran, Putli nga Doktrina, ug Putli nga Pagpadayag,” Liahona, Nob. 2021, 6). Samtang kamo maghunahuna mahitungod sa lainlaing mga mensahe ug mga tingog nga nag kompetensiya alang sa inyong atensiyon, hunahunaa kon sa unsang paagi si Jesukristo ug ang Iyang mga pagtulun-an mao ang kataposang tinubdan sa putling kamatuoran ug adunay gahom sa paggiya, paglig-on, ug pag-usab sa inyong kinabuhi (tan-awa sa Juan 14:6).

Seksiyon 1

Unsaon sa mga pagtulun-an ni Jesukristo pagpalambo sa akong kinabuhi?

Human sa Iyang Pagkabanhaw, si Jesus milakaw uban sa duha ka disipulo kinsa nagbiyahe ngadto sa Emaus. Sila wala makaila nga Siya mao ang nabanhaw nga Kristo. Samtang sila naglakaw, mitudlo si Jesus gikan sa mga kasulatan sa kahulogan sa Iyang balaan nga misyon. (Tan-awa sa Lucas 24:13–27.)

Pagtuon agi og Pagpangandam alang sa Klase

Basaha ang Lucas 24:31–32, ug pangitaa ang impluwensiya nga aduna ang pagtulun-an sa Manluluwas diha niini nga mga disipulo.

Mitudlo si Jesukristo uban ang “awtoridad gikan sa Dios” ug dili sama sa mga escriba ug mga Pariseo (Hubad ni Joseph Smith, Mateo 7:37 [sa Mateo 7:29, footnote a]). Sa dihang siya mitudlo didto sa Iyang lungsod nga natawhan sa Nazaret, ang katawhan “nahibulong sa iyang pagpanudlo: kay ang iyang pagpamulong inubanan man sa kagahom” (Lucas 4:32). Apan bisan tuod ang Ginoo mitudlo uban sa gahom, ang ubang mga tawo nakakita nga ang Iyang mga pagtulun-an ug doktrina hilabihan ka mahagiton ug mipili sa dili pagsunod Kaniya. Usa sa mao nga higayon nangutana ang Ginoo sa Iyang Apostoles, “Buot ba usab kamong mobiya kanako?” (Juan 6:67; tan-awa usab sa Juan 6:68–69).

Sa atong panahon, kita makapamati usab nga nahagit sa mga pagtulun-an ug doktrina ni Jesukristo. May mga higayon nga kita gani mobati nga gitintal sa “pagbiya.” Sa pagpabiling matinud-anon sa atong tibuok nga mga kinabuhi kini dili igo sa pagpaminaw lamang sa Iyang mga pulong.

Human mitudlo sa usa ka Pariseo nga ginganlan og Nicodemus sa importanting mga kamatuoran sa ebanghelyo, miingon ang Ginoo, “Siya nga magahimo sa matuod moduol sa kahayag, aron ikapadayag nga ang iyang mga buhat, nangahimo diha sa Dios” (Juan 3:21).

Sa lain nga higayon, samtang nagtudlo diha sa templo, miingon si Jesus, “Kon tuyoon ni bisan kinsa ang pagbuhat sa kabubut-on sa Dios, nan, iyang mahibaloan kon ang akong gitudlo, gikan ba sa Dios, o nagsulti ba lamang ako sa kinaugalingon kong pagbulot-an” (Juan 7:17). Wala madugay, samtang si Jesus mipakita og ehemplo sa pagserbisyo alang sa Iyang mga disipulo pinaagi sa paghugas sa ilang mga tiil, mingon Siya, “Kon kamo nahibalo niining mga butanga, dalaygon kamo kon kini inyong buhaton” (Juan 13:17).

Nagpasabot sa importansiya sa paggamit sa mga pagtulun-an ni Jesukristo, si Elder Jeffrey R. Holland sa Korum sa Napulog Duha ka apostoles miingon:

“Busa, unsa man?” Naghunahuna ako nga mao kana ang gitubag sa Manluluwas sa matag adlaw isip dili mabulag nga elemento sa Iyang pagtudlo ug pagsangyaw. Ang Iyang mga wali ug mga pag-awhag walay kapuslanan kon ang tinuoray nga mga kinabuhi sa Iyang mga disipulo wala mausab.

“Busa, unsa man?” Kamo ug ako nahibalo nga daghan kaayong mga tawo wala makahimo sa koneksiyon tali sa unsay ilang gisulti nga ilang gituohan ug sa unsang paagi sila sa tinuoray nagpuyo sa ilang mga kinabuhi. (“Teaching, Preaching, Healing,” Liahona,, Ene. 2003, 37)

Pagtuon agi og Pagpangandam alang sa Klase

Paghunahuna mahitungod sa mga pagtulun-an sa Manluluwas nga makaplagan diha sa mga Ebanghelyo (Mateo, Marcos, Lucas, ug Juan) ug diha sa 3 Nephi 11–27. Pagpili og usa ka pagtulun-an nga nahimong ilabi ka importante nganha kaninyo ug tun-i kini pag-usab.

Samtang kamo magtuon ug mamalandong, irekord ang inyong mga hunahuna mahitungod sa mosunod nga mga pangutana:

1. Unsa ang labing nakadani kaninyo mahitungod niining piho nga pagtulun-an gikan sa Manluluwas?

2. Sa unsang paagi kini nga pagtulun-an miapekto sa inyong kinabuhi?

3. Giunsa niini paghimo kaninyo nga mas mapaduol ngadto ni Jesukristo?

Sulod sa klase nga andam sa pagpakigbahin sa pagtulun-an nga inyong naila ug giunsa niini sa pag-impluwensiya sa inyong kinabuhi. Kon kamo dili makahunahuna og pagtulun-an gikan sa Manluluwas nga nakaimpluwensiya kaninyo, nan pangita og usa nga mahimong makahuluganon sa inyong kinabuhi. Tun-i kini ug eskwela nga andam sa pagpakigbahin kon unsay labing nakadani kaninyo mahitungod niini nga pagtulon-an.

Seksiyon 2

Hain sa mga pagtulun-an sa Ginoo ang labing importante sa akong kaluwasan?

Si Presidente Boyd K. Packer sa Korum sa Napulog Duha ka Apostoles mitudlo:

Ang tanang kamatuoran takos nga mahibaloan. Ang ubang mga kamatuoran mas mga mapuslanon, apan adunay mga kamatuoran nga labing takos nga mahibaloan. (“Truths Most Worth Knowing” [Church Educational System nga debosyonal alang sa mga young adult, Nob. 6, 2011], ChurchofJesusChrist.org)

Kita makatan-aw ngadto sa Manluluwas alang sa giya kabahin sa unsay labing takos nga mahibaloan. Human sa Iyang Pagkabanhaw, mipakita si Jesukristo ngadto sa daghang mga tawo, lakip sa Iyang Napulog Duha ka Apostoles. Iyang gisugo ang Iyang Apostoles sa pagsangyaw sa Iyang ebanghelyo ngadto sa tanang mga tawo. Gipaniguro usab Niya nga kadtong kinsa mituo sa Iyang ebanghelyo ug nabunyagan maluwas. (Tan-awa sa Marcos 16:15–16.)

Sa dihang si Jesukristo mipakita ngadto sa mga Nephite, Siya mitudlo Kanila sa kahulogan sa Iyang ebanghelyo ug nganong kini importante sa ilang kaluwasan.

Pagtuon agi og Pagpangandam alang sa Klase

Basaha ang 3 Nephi 27:13–14, 19–21, ug hunahunaa ang pagmarka sa sukaranang mga butang sa ebanghelyo sa Manluluwas.

Si Brother Daniel K. Judd, kanhi Unang Magtatambag sa Kinatibuk-ang Kapangulohan sa Sunday School, mingon:

Samtang ang ebanghelyo ni Jesukristo naglakip sa tanang kamatuoran, dili ang tanang kamatuoran managsama ang bili. Ang Manluluwas klaro nga mitudlo nga ang Iyang ebanghelyo, una ug labing importante, mao ang Iyang maulaong sakripisyo. Ang Iyang ebanghelyo mao usab ang pagdapit sa pagdawat sa mga panalangin sa Pag-ula pinaagi sa hugot nga pagtuo diha ni Kristo, paghinulsol, bunyag, pagdawat sa Espiritu Santo, ug paglahutay nga matinud-anon hangtod sa kataposan. …

… Importante nga kita moamuma niadtong atong gitudloan ug gigiyahan pinaagi sa pagtumong sa mahinungdanong mga doktrina … kay sa paggahin sa bililhong panahon mahitungod sa mga hilisgutan ug mga tinubdan nga dili kaayo importante. (“Giamomahan sa Maayong Pulong sa Dios,” Liahona, Nob. 2007, 93–94)

Si Presidente Dieter F. Uchtdorf, kaniadto Ikaduhang Magtatambag sa Unang Kapangulohan, mitanyag sa mosunod nga tambag:

Kon kamo naghunahuna nga ang ebanghelyo wala kaayo makahatag og benepisyo kaninyo, ako modapit kaninyo sa pag-atras, pagtan-aw sa inyong kinabuhi gikan sa mas taas nga ang-ang, ug ipasayon ang inyong pamaagi ngadto sa pagkadisipulo. Pag-focus sa sukaranang mga doktrina, mga baroganan, ug sa paggamit sa ebanghelyo. Mosaad ko nga ang Dios mogiya ug mopanalangin kaninyo sa inyong dalan padulong sa makatagbaw nga kinabuhi, ug ang ebanghelyo siguradong mas makahatag og benepisyo kaninyo. (“Makabenepisyo Kaayo Kini!,” Liahona, Nob. 2015, 22)

Pamalandong agi og Pagpangandam alang sa Klase

Unsa ang mahitabo kon atong kalimtan ang mga sukaranan sa ebanghelyo ug hatagan og gibug-aton ang dili kaayo importante nga mga pagtulun-an? Unsa ang labing nakatabang kaninyo sa pagpabiling naghatag og gibug-aton diha sa mga sukaranan?

Gusto pa og Dugang? (Mahimong sundon o dili)

Asa ako makakat-on pa og dugang mahitungod sa mga pagtulun-an sa Ginoo?

Usa sa labing gamhanan nga mga wali sa Ginoo makaplagan diha sa Mateo 5–7 (tan-awa usab sa 3 Nephi 12–14).

Diha sa pakigpulong sa “Mga Pagtulun-an ni Jesus” (Liahona, Nob. 2011, 90–93), si Presidente Dallin H. Oaks mihisgot og importanting mga kamatuoran nga gitudlo ni Jesukristo.

Mihisgot si Elder D. Todd Christofferson sa kaimportante sa kinauyokang mga baroganan sa ebanghelyo sa Ginoo diha sa pakigpulong sa “Ang Doktrina ni Kristo” (Liahona, Mayo 2012, 86–90).

Unsa ang akong makat-onan mahitungod sa pagtulun-an gikan sa Manluluwas?

Diha sa pakigpulong “Pagtudlo uban sa Gahom ug Awtoridad sa Dios” (Liahona, Nob. 2013, 96–98), si Brother David M. McConkie, kanhi Unang Magtatambag sa Kinatibuk-ang Kapangulohan sa Sunday School, mitudlo og labing importanting mga baroganan sa pagtabang kanato sa pagtudlo nga mas sama sa Manluluwas.