Leksiyon 12 Materyal sa Magtutudlo

Pagkakaplag og Putli nga Kamatuoran diha sa mga Pagtulun-an ni Jesukristo

Si Presidente Russell M. Nelson miingon: “Ang putli nga doktrina ni Kristo gamhanan. Kini makapausab sa kinabuhi sa tanan kinsa makasabot niini ug magtinguha sa paggamit niini sa iyang kinabuhi” (“Putli nga Kamatuoran, Putli nga Doktrina, ug Putli nga Pagpadayag,” Liahona, Nob. 2021, 7). Dinhi niini nga leksiyon, ang mga estudyante makabaton og oportunidad sa pagpakigbahin kon sa unsang paagi ang ilang mga kinabuhi na-impluwensiya sa mga pagtulun-an ni Jesukristo. Maghisgot usab sila sa kahulogan sa ebanghelyo ug madapit sa paghunahuna kon unsa ang ilang mabuhat nga mahimong mas makapunting sa pagpuyo nini.

Mga Sugyot alang sa Pagtudlo

Nagtudlo si Jesukristo og mga kamatuoran nga nag-usab sa mga kinabuhi.

Makapakita kamo sa nag-uban nga hulagway, o lain nga inyong gipili kabahin ni Jesukristo nga nagtudlo, ug nagdapit og mga estudyante sa pagpakigbahin og posible nga mga rason kon nganong si “[Jesukristo mao] ang labing gamhanang magtutudlo kinsa sukad mipuyo o mopuyo” (Jeffrey R. Holland, “Teaching, Preaching, Healing,” Ensign, Ene. 2003, 33).

Aron sa pag-awhag og makahuloganong panaghisgot, kamo mahimong mangutana sa mosunod nga mga pangutana:

• Unsa nga impluwensiya aduna ang mga pagtulun-an sa Manluluwas diha niadtong kinsa nakadungog Kaniya nga nagtudlo? (Mahimo ninyong rebyohon ang mga ehemplo nga makaplagan sa seksiyon 1 sa materyal sa pagpangandam.) Unsa nga impluwensiya aduna ang Iyang mga pagtulun-an diha sa inyong kinabuhi?

• Unsa ang kinahanglan gayod natong buhaton kon gusto nato nga ang mga pagtulun-an ni Jesukristo adunay lawom ug malungtarong impluwensiya sa atong mga kinabuhi? (Mahimo ninyong rebyohon ang Juan 3:21; 7:17; 13:17 ug ang pamahayag ni Elder Holland sa seksiyon 1 sa materyal sa pagpangandam. Dayon kamo makadapit sa mga estudyante sa pag-ila og usa ka susamang baroganan ngadto sa mosunod: Samtang atong gamiton ang mga pagtulun-an sa Ginoo, kita makahibalo sa ilang kamatuoran, dugang nga kahayag, ug pagsinati og kalipay.)

Pahinumdomi ang mga estudyante nga sa seksiyon 1 sa materyal sa pagpangandam gidapit sila sa pagpili og pagtulun-an sa Manluluwas nga nag-impluwensiya sa ilang kinabuhi. Sila makapangita usab unta og pagtulun-an nga ilang gihunahuna nga may kalabotan sa ilang mga kinabuhi. Hatagi ang mga estudyante og pipila ka minuto sa pagrebyo sa ilang tudling ug sa tulo ka katugbang nga mga pangutana sa seksiyon 1 sa materyal sa pagpangandam. Awhaga ang mga estudyante kinsa wala pa mobuhat sa kalihokan sa pagpangita alang sa usa ka pagtulun-an sa Manunubos nga ilang ikapakigbahin.

Dapita ang mga estudyante sa pagpakigbahin sa pagtulun-an ni Jesukristo nga ilang napili ug ang ilang tubag ngadto sa dili mokubos sa usa sa tulo ka mga pangutana gikan sa materyal sa pagpangandam. Kamo makabuhat niini nga kalihokan isip usa ka klase o bahina ang mga estudyante ngadto sa gagmay nga mga grupo ug hangyoa sila sa pagbanos-banos og pakigbahin.

Si Jesukristo nagtudlo sa mga Nephite sa kahulogan sa Iyang ebanghelyo.

Basaha og dungan ang mosunod nga sitwasyon:

Si Amelia bag-ohay lamang nga mibalik ngadto sa kalihokan sa Simbahan human sa mga tuig nga nagpalayo. Samtang ang mga tawo maloloy-on ngadto kaniya, kasagaran niyang bation ang pagkanawala ug pagkawalay kadasig atol sa mga pakigpulong ug mga leksiyon. Sa kasagmuyo, usa ka adlaw niana siya nagsulti kanimo, “Sa miaging adlaw akong nadunggan ang usa ka tawo nag-ingon nga ang ebanghelyo nangahulogan og ‘maayong balita.’ Sa tinuod dili ingon niana ang akong gibati. Ang ebanghelyo maingon og komplikado, ug adunay daghang mga gilaoman. Kini ingon og mas sama sa usa ka palas-anon kay sa panalangin.”

• Unsa ang mahimong mahitabo atol sa mga pakigpulong, mga leksiyon, o mga panaghisgot sa ebanghelyo nga makabiya og usa ka tawo nga mobati sama ni Amelia?

• Unsa ang posibleng wala masabti ni Amelia mahitungod sa kahulogan ug katuyoan sa ebanghelyo?

Pagpalambo sa Atong Pagtudlo ug Pagkat-on

Pagkat-on uban sa mga estudyante. Human masinati ang grabe nga mga sangputanan sa panapi sa kaparian, ang mga miyembro sa Simbahan sa panahon ni Alma kinsa mipabilin nga matinud-anon mga “makanunayon ug dili matarog” (Alma 1:25) sa ilang mga tinuohan ug miila nga “ang tigsangyaw dili labaw kay sa tigpaminaw, ni ang magtutudlo maayo pa kay sa tinudloan, ug sa ingon niana silang tanan managsama” (Alma 1:26). Samtang inyong gitagad ang mga estudyante isip sama kaninyo, kamo mahimong mas andam sa pagkat-on uban ug gikan kanila. Palandonga kon giunsa sa inyong mga estudyante pagbati sa dihang nagpakita kamo og tinuod nga interes sa unsay ilang gihunahuna ug gibati.

Dapita ang mga estudyante sa pagrebyo sa 3 Nephi 27:13–14, 19–21 ug pangitaa ang importanting mga elemento sa ebanghelyo ingon nga gitudlo sa Manluluwas.

Sa pag-amuma og makahuloganong panaghisgot, kamo dayon makapangutana og mga pangutana nga susama sa mosunod:

• Sumala sa Manluluwas, unsa ang labing importanting mga elemento ug kataposang panalangin sa pagpuyo sa Iyang ebanghelyo? (Tabangi ang mga estudyante sa pag-ila sa mosunod nga kamatuoran: Samtang atong gamiton ang hugot nga pagtuo diha ni Jesukristo, maghinulsol, magpabunyag, modawat sa Espiritu Santo, ug molahutay hangtod sa kataposan, kita makabarog nga walay lama sa atubangan sa Dios sa kataposang adlaw.)

• Unsaon sa pagbutang ni Jesukristo diha taliwala sa ebanghelyo pag-usab sa panan-aw ni Amelia ug pagbati mahitungod niini? Sa unsang paagi ang pagtutok diha sa Manluluwas mi-impluwensiya sa paagi kamo maghunahuna mahitungod ug sa pagpuyo sa ebanghelyo?

• Unsa nga mga hagit ang atong masugatan kon mawad-an kita og pagpunting diha ni Jesukristo ug sa sukaranang mga elemento sa Iyang ebanghelyo? (Mahimo nimong rebyohon ang pamahayag ni Brother Daniel K. Judd diha sa seksiyon 2 sa materyal sa pagpangandam.) Unsa nga mga butang ang nakaingon nga kamo mawad-an og pagpunting diha sa mga sukaranan sa ebanghelyo? Unsa ang labing nakatabang kaninyo sa pagpabiling naghatag og gibug-aton diha sa mga sukaranan?

Dapita ang mga estudyante sa pagrebyo sa pamahayag ni Presidente Dieter F. Uchtdorf diha sa seksiyon 2 sa materyal sa pagpangandam ug irekord unsay ilang mabuhat nga mas maayo ang pagpunting diha sa sukaranang mga baroganan ug mga paggamit sa ebanghelyo.

Mahimo usab kamo nga makapangutana kon ang pipila ka mga estudyante andam ba sa pagpakigbahin kon unsa kaha ang ilang buhaton sa pagpunting diha sa labing importanting mga butang samtang sila naningkamot sa pagpuyo sa ebanghelyo.

Sa pagtapos, kamo o usa ka estudyante makapamatuod sa kanindot ug sa gahom sa pagpuyo sa walay kataposang ebanghelyo ni Jesukristo.

Alang sa Sunod nga Higayon