Leksiyon 3 Materyal sa Magtutudlo

Pagsalig kang Jesukristo, ang Atong Manluluwas ug Pangulo sa Kinabuhi nga Wala pa Dinhi sa Yuta

Didto sa kinabuhi nga wala pa dinhi sa yuta, ang Langitnong Amahan mitudlo kanato mahitungod sa Iyang plano sa kaluwasan. Didto kita adunay oportunidad sa pagbarog aron mosuporta sa Iyang plano ug mopaluyo kang Jesukristo isip atong Manluluwas. Niini nga leksiyon, ang mga estudyante motino og mga rason nga kita misalig ni Jesukristo nga mahimo natong Manluluwas ug pangulo sa kinabuhi nga wala pa dinhi sa yuta. Ang mga estudyante mokonsiderar usab unsaon sa pagbarog uban Kaniya diha sa ilang padayon nga pakiggubat batok ni Satanas ug sa iyang mga puwersa niini nga kinabuhi.

Mga Sugyot alang sa Pagtudlo

Pagpalambo sa Atong Pagtudlo ug Pagkat-on

Pag-follow up sa nakat-onan sa estudyante. Ang hugot nga pagtuo sa mga estudyante malig-on kon mahatagan sila og oportunidad nga makapaambit kon sa unsang paagi sila napanalanginan pinaagi sa paglihok sa mga pagdapit nga gihatag atol sa milabay nga klase. Sigon sa giya sa Espiritu Santo, pangita og mga oportunidad nga ma-follow up kon giunsa sa mga estudyante sa paggamit unsay ilang mga nakat-onan.

Si Jesukristo gipili nga mahimo natong Manluluwas ug Manunubos gikan pa sa sinugdanan.

Isip usa ka klase, gahini og pipila ka minuto ang pag-ila sa mga kamatuoran nga gipadayag na mahitungod sa atong kinabuhi nga wala pa dinhi sa yuta. (Kon gikinahanglan, papilia ang mga estudyante sa seksiyon 1 ba o 2 nga anaa sa materyal sa pagpangandam ug sa daklit nga pagrebyo niini. Ang mga estudyante tingali motino og usa o daghan pa sa mosunod nga mga kamatuoran: Didto sa Dako nga Konseho, ang Langitnong Amahan mipresentar sa Iyang plano sa kaluwasan aron makabalik kita sa Iyang presensiya ug mamahimong sama Kaniya. Ang kaandam ni Jesukristo nga mahimo natong Manluluwas mahinungdanon sa kalamposan sa plano sa Amahan. Didto sa kinabuhi nga wala pa dinhi sa yuta, si Jesukristo mao ang labing bantogan ug labing maalamon sa tanang anak sa Langitnong Amahan.)

Samtang magpadayon ang diskusyon sa imong klase, ikonsiderar kon asa sa mosunod nga mga pangutana ang tingali imong ipangutana nga mas makahuloganon sa imong mga estudyante. (Pahinumdom: Aron makapasiugda og makakabig nga mga kasinatian, tingali mas maayo nga mangutana og diyotay ug mohimo og mas lawom nga mga diskusyon mahitungod sa piho nga mga hilisgotan, kay sa isulay sa pagpangutana ang tanan nga gisugyot nga mga pangutana.)

• Sa unsang paagi nga ang kahibalo bahin sa plano sa kaluwasan makapanalangin sa tawo kinsa mibati nga ang ilang kinabuhi walay kahulogan o katuyoan? (Mahimo nimong rebyohon ang pamahayag ni Elder Robert D. Hales nga anaa sa seksiyon 1 sa materyal sa pagpangandam.) Sa unsang paagi nga ang kahibalo mahitungod sa plano sa kaluwasan nakatabang nimo atol sa lisod nga mga panahon?

• Ngano nga ang Manluluwas gikinahanglan diha sa plano sa Amahan? (Tan-awa sa seksiyon 1 sa materyal sa pagpangandam.)

• Sa pagkonsiderar sa personal nga bili nga gibayad ni Jesukristo sa pagtubos sa atong mga sala, unsa ang imong mga hunahuna o mga pagbati mahitungod sa Iyang kaandam nga mahimo nato nga Manluluwas? (tan-awa sa Moises 4:2).

• Unsa ang nakat-onan ni Abraham mahitungod sa lahi nga estado ni Jesukristo sa kinabuhi nga wala pa dinhi sa yuta? (Tingali makatabang ang paggamit sa mga kamatuoran nga gitudlo diha sa seksiyon 2 sa materyal sa pagpangandam.) Sa unsang paagi nga ang pagkahibalo bahin sa kabantogan ni Jesukristo sa kinabuhi nga wala pa dinhi sa yuta makatabang nimo sa pagsalig Kaniya uban sa mga hagit nga imong giatubang?

Aron sa pagtapos niini nga bahin sa leksiyon, mahimo nimong pangutan-on ang mga estudyante sa paghunahuna kon unsa kaha ang bation nga mahiapil sa Dakong Konseho sa dihang ang Langitnong Amahan mipresentar sa plano sa kaluwasan ug si Jesukristo ang napili nga mahimo natong Manluluwas. Pagdapit og usa o duha ka estudyante nga mopaambit sa ilang mga hunahuna ug mga pagbati.

Pinaagi sa tabang ni Jesukristo, kita makadaog sa pakiggubat kang Satanas ug sa iyang mga sumusunod.

Ipakita ang nag-uban nga mga hulagway sa Gubat sa Langit. Dapita ang mga estudyante sa pagpaambit kon sa unsang paagi nga kini nga hulagway lahi kay sa atong nahibaloan gikan sa modernong pagpadayag mahitungod sa Gubat sa Langit. (Awhaga ang mga estudyante sa pagkuha og tubag gikan sa Moises 4:1–4, Pinadayag 12:7–11, ug sa pamahayag ni Presidente Gordon B. Hinckley sa seksiyon 3 sa materyal sa pagpangandam.)

Samtang ang mga estudyante mopakigbahin sa ilang mga panglantaw, ikonsiderar ang pagpangutana sa mga mosunod:

• Nganong mirebelde si Satanas? Unsay iyang mga taktika atol sa Gubat sa Langit? (tan-awa sa Moises 4:1, 3–4; Pinadayag 12:7–9). Giunsa niya sa paggamit kini nga mga taktika sa atong panahon karon?

• Sumala sa Pinadayag 12:11, sa unsang paagi nga kita midaog sa gubat batok ni Satanas ug sa iyang mga sumusunod didto sa kinabuhi nga wala pa dinhi sa yuta? (Tingali makadugang sa imong diskusyon ang pagrebyo sa pamahayag ni Brother Ahmad S. Corbitt nga anaa sa materyal sa pagpangandam. Tabangi ang mga estudyante nga matino ang mosunod nga kamatuoran ug isulat kini sa pisara: Sama sa atong gihimo didto sa kinabuhi nga wala pa dinhi sa yuta, kita makabuntog sa gahom ni Satanas pinaagi sa hugot nga pagtuo sa Pag-ula sa Manluluwas ug sa atong pagpamatuod Kaniya.)

• Sa unsang paagi nga ang imong pagpamatuod kang Jesukristo ug sa Iyang Pag-ula nakatabang sa imong pakiggubat batok kang Satanas ug sa iyang mga tintasyon? Unsa ang imong mahimo aron mapalambo ang imong pagsalig sa katakos sa Manluluwas sa pagtabang nga imong mabuntog ang gahom ni Satanas?

Sa pagtapos sa klase, mahimo kang mopakita ug mobasa og kusog sa mosunod nga pamahayag ni Elder Jörg Klebingat sa Seventy:

[Atol sa Gubat sa Langit,] kanato nga nagsangkap og hugot nga pagtuo sa umaabot diha sa Pag-ula ni Jesukristo, kadtong nadasig pinaagi sa mga pagpamatuod sa Iyang balaan nga tahas, kadtong naghupot og espirituhanon nga kahibalo ug ang kaisog sa paggamit niini diha sa pagpanalipod sa Iyang sagradong pangalan ang nag-una nga nakigbatok dinhi niining gubat sa mga pulong. Si Juan mitudlo nga ang maisog nga mga espiritu, ug [ang] uban, nakabuntog ni Lucifer ‘pinaagi sa dugo sa Kordero, ug pinaagi sa pulong sa ilang pagpamatuod’ (Pinadayag 12:11).

Oo, ang saad nga adunay usa ka Manluluwas nga mipaagas sa Iyang dugo didto sa Getsemani ug sa Kalbaryo ang midaog sa premortal nga gubat. Apan ang atong kaisog ug pagpamatuod, didto sa kinabuhi nga wala pa sa yuta ug kaandam sa pagpasabot, sa pagpangatarongan, ug pagdasig sa uban nga mga espiritu nakatabang usab nga santaon ang daghang mikuyanap nga mga bakak!

Ingon nga nakaangkon og kalamposan sa usa ka pakigbatok aron sa pagpanalipod Kaniya, kita nahimong mga saksi sa Iyang balaan nga ngalan. Tinuod gayod, ingon nga napamatud-an kanato diha sa pakig-away ug ingon nga nasiguro ang kasinsero ug kaisog, ang Ginoo sa kaulahian miingon kanato—mga sakop sa balay ni Israel—“Kamo mao ang akong mga saksi” (Isaias 43:10). Atong pangutan-on ang atong kaugalingon: Tinuod pa ba kini gihapon sa atong panahon karon?” (Jörg Klebingat, “Pagpanalipod sa Tinuohan,” Liahona, Sept. 2017, 29–30)

Dapita ang mga estudyante sa pagpamalandong sa pamahayag ni Elder Klebingat ug tinoa kon unsay ilang mahimo aron makabarog uban ni Jesukristo sa atong panahon. Mahimo nimo silang dapiton sa pagrekord sa ilang mga hunahuna ug mga impresyon.

Alang sa Sunod nga Higayon

Atol sa semana, mahimo nimong ipadala ang mosunod nga imbitasyon ngadto sa mga estudyante: samtang magbasa ka sa materyal sa pagpangandam alang sa leksiyon 4 ug mamalandong sa mga milagro sa Paglalang, ikonsiderar ang pagdala ngari nako, o pagdala ngadto sa klase, og litrato sa mga nilalang sa Dios nga makita ninyo nga makadasig kaayo.