Leksiyon 24 Materyal sa Magtutudlo

Pagsalig diha ni Jesukristo isip ang Atong Maghuhukom

Sa “Ang Buhing Kristo: Ang Pagpamatuod sa mga Apostoles” atong mabasa, “Matag usa kanato mobarog aron pagahukman Kaniya [atong Manluluwas] sumala sa atong mga buhat ug sa mga tinguha sa atong mga kasingkasing” (https://www.churchofjesuschrist.org/study/scriptures/the-living-christ-the-testimony-of-the-apostles/the-living-christ-the-testimony-of-the-apostles?lang=ceb). Kini nga leksiyon motabang sa mga estudyante sa pagsabot kon nganong kita makabaton og hingpit nga pagsalig diha ni Jesukristo isip ang atong maghuhukom. Sila usab adunay oportunidad sa paghunahuna kon unsa ang ilang mabuhat sa pagpangandam alang sa Kataposang Paghukom.

Mga Sugyot alang sa Pagtudlo

Si Jesukristo mao ang atong maghuhukom.

Ipakigbahin ang mosunod nga talan-awon:

Handurawa nga kamo adunay usa ka higala kinsa gipasanginlan og seryosong krimen. Kamo nakaila usab sa biktima sa krimen. Gimahal ninyo ang duha ka tawo.

• Kon makapili kamo og usa ka maghuhukom alang sa inyong higala, unsa ang mga kalidad gusto ninyo nga maanaa sa maghuhukom?

• Unsa nga mga kabalaka kamo maaduna kon ang maghuhukom kulang og usa o sobra pa sa mga kalidad nga atong naila? (Sama pananglitan, unsa kaha kon ang maghuhukom mapuanguron apan dili makiangayon o makiangayon apan dili mapuanguron?)

Pahinumdomi ang mga estudyante nga sila gidapit sa pagpangandam alang sa klase pinaagi sa pag-ila og hiyas gikan sa kinabuhi sa Manluluwas nga nagpakita nga makasalig kita Kaniya nga mahimong usa ka matarong nga maghuhukom. Hatagi ang mga estudyante og pipila ka minuto sa pagrebyo sa hiyas nga ilang giila o, kon gikinahanglan, sa pag-ila og usa. Dayon hangyoa sila sa pagporma og gagmay nga mga grupo ug hatagi sila sa mosunod nga handout.

Si Jesukristo Mao “ang Matarong nga Maghuhukom” (2 Timoteo 4:8)

Materyal sa Magtutudlo alang sa Si Jesukristo ug ang Iyang Walay Kataposang Ebanghelyo—Leksiyon 24

Basaha og kusog ang Mga Salmo 9:8 ug 96:11–13. Dayon dapita ang matag sakop sa grupo sa pagpakigbahin og hiyas gikan sa kinabuhi sa Manluluwas nga nagpakita nga si Jesukristo naghukom sa tanang mga tawo uban sa pagkamatarong. Samtang kamo makigbahin og mga hiyas, mahimo ninyong hisgotan ang mosunod nga mga pangutana:

• Unsaon kaha niining hiyas pag-apekto kon sa unsang paagi si Jesukristo maghukom kanato?

• Sa unsang paagi kini nga hiyas nagdugang sa inyong pagsalig diha sa pagkaangayan sa Manluluwas nga mahimo ninyong maghuhukom?

Human maila ang piho nga mga hiyas, hisgoti kon sa unsang paagi si Jesukristo lahi gikan sa tanang tawo nga mga maghuhukom. (Hunahunaa ang pagrebyo sa mga pahayag ni Presidente Dallin H. Oaks ug Elder Richard G. Scott diha sa seksiyon 1 sa materyal sa pagpangandam.) Makahisgot usab kamo kon nganong importante nga ang Manluluwas maglangkob sa tanan niining mga hiyas isip atong maghuhukom.

© 2023 pinaagi sa Intellectual Reserve, Inc. All rights reserved.

Si Jesukristo Mao “ang Matarong nga Maghuhukom” (2 Timoteo 4:8)

Materyal sa Magtutudlo alang sa Si Jesukristo ug ang Iyang Walay Kataposang Ebanghelyo—Leksiyon 24

Human sa pagtugot og igo nga panahon alang sa panaghisgotan, kamo makadapit og pipila ka mga estudyante sa pagpakigbahin kon giunsa nila pagbati ang mahitungod ni Jesukristo ingon nga ilang maghuhukom.

Si Jesukristo mohukom kanato pinaagi sa atong mga buhat ug mga tinguha sa atong mga kasingkasing.

Pagpalambo sa Atong Pagtudlo ug Pagkat-on

Sa tataw isulti ang tinuod nga mga baroganan. Si Elder B. H. Roberts, kanhi sa Seventy, mitudlo, “Aron mahimong mailhan, ang kamatuoran kinahanglan gayod nga isulti ug kon mas tataw ug mas kompleto ang mga pahayag, mas maayo ang mga oportunidad nga maangkon sa Espiritu Santo alang sa pagpamatuod ngadto sa mga kalag sa katawhan nga ang buhat tinuod” (diha sa James E. Faust, “What I Want My Son to Know before He Leaves on HIs Mission,” Liahona, Hulyo 1996). Hatagi ang mga estudyante og mga oportunidad sa pag-ila ug pagsulti sa tinuod nga mga baroganan nga makaplagan diha sa mga kasulatan ug ang mga pulong sa karong mga propeta.

Dapita ang mga estudyante sa hilom nga pagrebyo sa Pinadayag 20:12 ug sa Doktrina ug mga Pakigsaad 137:9 ug irekord ang usa ka kamatuoran mahitungod kon unsaon kita sa paghukom. Hangyoa ang usa ka pares sa mga estudyante sa pagpakigbahin sa kamatuoran nga ilang naila. Gamit sa panabot sa mga estudyante, mahimong inyong irekord diha sa pisara ang usa ka kamatuoran nga susama sa mosunod: Ang matag usa kanato mobarog sa atubangan sa Ginoo ug pagahukman sumala ngadto sa atong mga buhat ug mga tinguha sa atong mga kasingkasing. Aron mapalawom ang pagsabot sa mga estudyante, kamo makapangutana og usa o daghan pa sa mosunod nga mga pangutana:

• Ngano sa inyong hunahuna ang atong mga buhat importante diha sa Kataposang Paghukom? (Ipasabot nga ang mga buhat makaapil sa pagsunod sa mga sugo, pagdawat sa mga ordinansa, pagsunod sa mga pakigsaad, paghinulsol, ug sa pagserbisyo sa uban.)

• Nganong kamo naghunahuna nga kita pagahukman usab pinaagi sa atong mga hunahuna ug mga tinguha sa atong mga kasingkasing? (Mahimo kamong makigbahin sa mosunod nga pahayag ni Presidente Oaks: “Ang mga tinguha nga atong gihimo motino sa atong kausaban, sa atong kalamposan, ug sa atong mamahimo” [“Tinguha,” Liahona”, Mayo 2011, 42.])

• Nganong kini importante ang kanunay nga pagtimbang-timbang kon giunsa sa atong mga tinguha, mga pulong, ug mga lihok sa pag-impluwensiya kon unsa kita mamahimo? (Hunahunaa ang pagrebyo sa pamahayag ni Presidente Oaks sa seksiyon 2 sa materyal nga pagpangandam.)

Pahinumdomi ang mga estudyante nga si Alma ang Batan-on nangutana og lawom nga mga pangutana nga makatabang kanato sa paghatag og bili kon unsa kita mamahimo. Dapita ang mga estudyante sa pagrebyo sa Alma 5:15–16, 19, 26–27 ug sa pagpamalandong og dili mominos sa usa ka pangutana nga labing kalabot ngadto sa ilang mga kinabuhi. Human hatagi og igo nga panahon alang sa hilom nga pagpamalandong, awhaga ang usa o duha ka estudyante sa pagpakigbahin kon unsaon nga ang paggahin og panahon alang sa matinuorong pagpamalandong nagtabang o makatabang kanila nga mahimong mas mahisama sa Manluluwas.

Sama nga si Alma nagsugyot, dapita ang mga estudyante sa paghanduraw sa ilang mga kaugalingon nga nagbarog sa atubangan sa Dios aron pagahukman.

• Unsa kaha ang inyong pagabation niini nga higayon? Ngano?

• Kinsa ang imong labing gusto nga makauban kanimo?

• Nganong importante ang pagsabot nga agig dugang ngadto sa pagkamao ang atong maghuhukom, si Jesukristo mao usab ang atong Manlalaban ngadto sa Amahan? (Mahimo kamong morebyo kon unsa ang gipasabot nga si Jesukristo mao ang atong manlalaban [tan-awa sa seksiyon 2 sa materyal sa pagpangandam].)

Basaha og kusog ang Doktrina ug mga Pakigsaad 45:3–5, ug dapita ang mga estudyante sa paghanduraw nga si Jesukristo piho nga nangamuyo alang kanila.

• Unsa kaha ang inyong bation nga maminaw ngadto ni Jesukristo nga nangamuyo sa inyong kaayohan sa atubangan sa Langitnong Amahan? (Mahimo kamong morebyo sa kang Elder Dale G. Renlund nga kinutlo diha sa seksiyon 2 sa materyal nga pagpangandam sa pagsiguro sa mga estudyante nga nakasabot nga ang Manluluwas wala mobatok sa kabubut-on sa Amahan isip atong Manlalaban.)

• Unsaon sa pagsabot ug sa pagdawat sa tahas sa Manluluwas isip atong Manlalaban pagdala og paglaom ngadto sa usa ka tawo kinsa nagbati nga siya dili gayod mahimong igo ka maayo sa pagbalik ngadto sa presensya sa Dios?

• Unsa ang inyong mamahimo karon sa pagpakita sa Ginoo nga kamo nagtinguha Kaniya nga mahimo ninyong Manlalaban?

Mahimo kamong magpamatuod nga ang Ginoo dili lamang molaban alang kanato sa Kataposang Paghukom apan nga Siya usab andam nga mahimong atong Manlalaban karon (tan-awa sa Doktrina ug mga Pakigsaad 29:5–6). Siya mangaliyupo sa atong kaayohan samtang kita maningkamot sa Iyang tabang. Mahimo usab nga inyong ipasalida ang video “Jesus Christ is Our Advocate” (0:48) uban ni Elder D. Todd Christofferson sa Korum sa Napulog Duha ka Apostoles.

Alang sa Sunod nga Higayon

Sa pag-awhag sa mga estudyante sa pagbasa sa materyal sa pagpangandam sa wala pa ang sunod nga klase, hunahunaa ang pagpadala og mensahe susama sa mosunod: Samtang kamo magtuon sa materyal sa pagpangandam alang sa leksiyon 25, pangutan-a ang inyong kaugalingon: Unsa nga impluwensiya ang akong inadlaw nga pagka-disipulo aduna diha sa akong mahangturong padulngan?