Leksiyon 17 Materyal sa Magtutudlo

Pagkaplag og Paglaom diha sa Kadaogan ni Jesukristo batok sa Kamatayon

Si Presidente Dallin H. Oaks sa Unang Kapangulohan mitudlo: “Ang Pagkabanhaw gikan sa mga patay mao ang makapaneguro pag-usab nga personal nga haligi sa atong pagtuo. Kini makadugang og kahulogan sa atong doktrina, kadasig sa atong kinaiya, ug paglaom sa atong umaabot” (“Unsa ang Nabuhat sa Atong Manluluwas alang Kanato?,” Liahona, Mayo 2021, 75). Atol niini nga leksiyon, ang mga estudyante maghisgot sa katinuod sa Pagkabanhaw ug mopaambit kon sa unsang paagi nga kini makahatag nila og paglaom sa higayon nga mag-atubang og mga hagit nga moabot sa mortal nga lawas.

Mga Sugyot alang sa Pagtudlo

Daghan sa mga nakakita ang nagpamatuod sa Pagkabanhaw ni Jesukristo.

Mahimo nimong sugdan ang klase pinaagi sa pagdapit sa mga estudyante sa pagsulat og mubo nga mga kapahayag kon ngano nga ang Pagkabanhaw ni Jesukristo importante gayod ngadto kanila. Dayon hatagi og panahon ang uban aron mopaambit diha sa ginagmay nga mga grupo o sa klase. Mahimo nimong ipangutana ang usa o daghan pa sa mosunod nga mga pangutana aron masusi kon unsay gikinahanglan sa estudyante nga angayng hisgotan sa mas detalyado atol sa klase:

• Ngano man nga ang atong mga lawas importante kaayo ngadto sa mahangtorong padulngan? (Tan-awa sa seksiyon 2 sa materyal sa pagpangandam.)

• Unsa kaha ang mahitabo kon walay pagkabanhaw? (Tan-awa sa 1 Mga Taga-Corinto 15:17–22 ug 2 Nephi 9:8–9.)

• Nganong importante man nga imong palig-onon ang imong pagsabot ug pagpamatuod bahin sa Pagkabanhaw ni Jesukristo? (Mahimo nimong rebyohon ang pamahayag ni Presidente Ezra Taft Benson diha sa seksiyon 2 sa materyal sa pagpangandam.)

Ikonsiderar ang pagpakita og usa ka hulagway sa nabanhaw nga Kristo nga nagpakita ni Maria diha sa lubnganan. Basaha og dungan ang Juan 20:14–18, ug ipahanduraw sa mga estudyante kon unsa kaha ang gibati ni Maria nga nakakita sa nabanhaw nga Ginoo. Dapita ang mga estudyante sa pagpaambit sa ilang mga hunahuna, mga pagbati, o mga impresyon.

Pahinumdomi ang mga estudyante nga diha sa seksiyon 1 sa materyal sa pagpangandam sila gidapit sa pagpili og asoy sa nakakita sa nabanhaw nga Kristo ug sa pagrekord sa ilang mga hunahuna ug mga pagbati mahitungod niini nga panghitabo. Hatagi og panahon ang mga estudyante sa pagrebyo sa ilang tudling o sa pagpili og usa kon gikinahanglan. Dayon papormaha sila og ginagmay nga mga grupo ug dapita sila sa pagpaambit sa unsay ilang nakat-onan gikan sa mga asoy nga ilang gitun-an. Mahimo dayon kang mangutana:

• Sa unsang paagi kaha nga kini nga mga asoy sa Pagkabanhaw makaimpluwensya sa hugot nga pagtuo sa usa ka tawo diha ni Jesukristo?

Mahimo nimong ipakita ang mosunod nga sitwasyon: Hunahunaa kon unsaon ninyo pagtubag ang usa ka higala nga moingon, “Ako nagtuo nga si Jesukristo usa ka maayo nga magtutudlo ug lider sa relihiyon. Gidawat nako ang iyang nindot nga mga pagtulun-an, apan dili ko motuo nga nahitabo gayod ang Pagkabanhaw.”

Isip kabahin sa inyong panaghisgotan, mahimo nimong ipangutana ang pipila sa mosunod nga mga pangutana:

• Unsaon kaha pagtubag ni Apostol Pablo kini nga pamahayag? (Mahimo nimong rebyohon ang 1 Mga Taga-Corinto 15:14, 17–22. Ang mga estudyante mahimong moila sa mga kamatuoran nga susama sa mosunod: Ang Pagkabanhaw mahinungdanon sa ebanghelyo sa Ginoo. Tungod sa Pagkabanhaw ni Jesukristo, ang tanan mabanhaw.)

• Ngano man nga ang Pagkabanhaw ni Jesukristo mao ang sentro sa Iyang ebanghelyo? Unsa nga mga kamatuoran mahitungod ni Jesukristo ug sa Iyang ebanghelyo ang napamatud-an tungod kay Siya nabanhaw? (Mahimo nimong rebyohon ang pamahayag ni Elder D. Todd Christofferson diha sa seksiyon 2 sa materyal sa pagpangandam.)

• Unsa ang imong mga hunahuna ug mga pagbati sa pagkasayod nga tungod ni Jesukristo ang tanang tawo—lakip na nimo—mabanhaw? (Kon ganahan ka, mahimo usab nimong ipaambit ang imong mga pagbati mahitungod niini nga pangutana.)

Si Pablo nagtudlo nga kita mahimong magmaya tungod sa kadaogan ni Jesukristo batok sa kamatayon.

Pagpalambo sa Atong Pagtudlo ug Pagkat-on

Tubaga ang personal nga mga hilisgotan uban sa pag-amping ug kaluoy. Samtang maghisgot ka mahitungod sa mga hilisgotan nga makamugna og bug-at nga mga pagbati, magmahimong sensitibo sa mga sitwasyon ug mga pagbati sa imong mga estudyante. Pagkat-on mahitungod sa kinabuhi sa imong mga estudyante aron masayod ka kon unsaon nga matudlo sa labing maayong paagi ang sensitibo nga mga hilisgotan. Atol sa klase, bantayi ang mga ekspresyon sa mga estudyante ug hunahunaa kon ang panaghisgotan sa klase makapaapekto ba sa mga estudyante.

Ipaambit ang mosunod nga istorya mahitungod ni Alisa, anak ni Elder Paul V. Johnson sa Seventy:

Hapit usa ka tuig ang milabay, ang among anak nga si Alisa namatay. Nanlimbasog siya sa kanser hapit walo ka tuig, naoperahan og kadaghan, daghang nagkalain-laing pagtambal, makapaikag nga mga milagro, ug hilabihang mga kasubo. Nakita namo ang pagkunhod sa iyang pisikal nga kondisyon sa dihang hapit na matapos ang iyang mortal nga kinabuhi. Labihan kasakit tan-awon nga nahitabo kana sa among bililhong anak—ang sanag nga malipayong mata sa gamayng bata kinsa nagtubo nga may talento, talagsaong babaye, asawa, ug inahan. Abi nako og ang akong dughan mabuak. (“Ug Wala Nay Kamatayon,” Liahona, Mayo 2016, 121)

• Nakasinati ka na ba o ang usa ka tawo nga imong kaila sa susama nga mga pagbati? Kon mao, unsa man ang mga sirkumstansya?

Dapita ang mga estudyante sa pagrebyo sa pamahayag ni Elder Johnson diha sa seksiyon 3 sa materyal sa pagpangandam ug sa 1 Mga Taga-Corinto 15:52–55. Mahimo nimong isugyot nga pangitaon nila ang mga pagtulun-an nga makahatag og kahupayan ug paglaom. Mahimo dayon kang mangutana:

• Sa unsang paagi nga ang doktrina sa Pagkabanhaw makahatag og kahupayan ug paglaom ngadto sa mga tawo nga nanglimbasog sa makapaluya nga mga sakit, makawagtang sa kinabuhi nga mga pagkaangol, mga kakulangan, o kamatayon sa usa ka minahal? (Ang mga estudyante mahimong moila og kamatuoran nga susama sa mosunod: Kita mabanhaw uban sa dili madunot ug imortal nga mga lawas.)

• Kanus-a nga ang pagsabot sa katinuod sa Pagkabanhaw nakatabang nimo o sa usa ka tawo nga imong kaila?

Ikonsiderar ang pagpaambit og dugang pa mahitungod sa kasinatian ni Alisa:

Gisiksik ni Alisa kon pila ang gidaghanon sa nakalahutay sa matang sa kanser nga anaa niya, ug ang gidaghanon dili makapadasig. Siya misulat: “Apan adunay usa ka tambal, busa ako wala mahadlok. Giayo na ni Jesus ang akong kanser, ug ang inyo. … Ako mahimong mas maayo. Nalipay ko nga nasayod niini.”

Atong mapulihan ang pulong nga kanser sa bisan hain sa ubang pisikal, mental o emosyonal nga mga sakit nga atong atubangon. Tungod sa Pagkabanhaw, nangaayo usab kini. (“Ug Wala Nay Kamatayon,” Liahona, Mayo 2016, 122)

• Unsa man ang atong makat-onan gikan sa mga kasinatian ni Alisa ug ni Elder Johnson?

Ikonsiderar ang pagkanta sa himno nga “Siya Nabanhaw!” (Mga Himno, nu. 118).

Dayon ipakita ang mosunod nga mga pangutana, o ang pipila nga sa imong pamati mas makatabang sa imong mga estudyante, ug dapita ang imong mga estudyante sa pagpamalandong ug sa pagrekord sa ilang mga hunahuna, mga pagbati, ug mga impresyon.

• Sa unsang paagi nga ang Pagkabanhaw sa Manluluwas nakahatag o makahatag nimo og kalinaw ug paglaom samtang nag-atubang ka og mga hagit sa pagkamortal?

• Sa unsang paagi nga imong magamit ang imong nakat-onan mahitungod sa Pagkabanhaw aron mapalig-on ang imong pagpamatuod o ang pagpamatuod sa laing tawo?

Human sa igong panahon alang sa pagsulat ug pagpamalandong, dapita ang pipila ka estudyante sa pagpaambit sa unsay ilang gisulat.

Alang sa Sunod nga Higayon

Sa pag-awhag og pagpangandam alang sa sunod nga klase, mahimo nimong ipadala ang mosunod nga mensahe ngadto sa mga estudyante: Samtang magtuon ka sa materyal sa pagpangandam alang sa leksiyon 18, hunahunaa ang mahitungod sa tahas sa grasya diha sa imong kinabuhi.