Leksiyon 19 Materyal sa Magtutudlo

Pag-abag sa Ginoo diha sa Katubsanan sa mga Patay

Ang pangalagad sa Manluluwas didto sa kalibotan sa mga espiritu mipaniguro nga ang tanang tawo nga nabuhi ug mabuhi pa dinhi sa yuta adunay oportunidad nga makadungog sa ebanghelyo sa Ginoo ug makadawat sa mga ordinansa sa kaluwasan. Niini nga leksiyon, ang mga estudyante mopaambit unsay ilang makat-onan mahitungod sa Manluluwas gikan sa Iyang pangalagad didto sa kalibotan sa mga espiritu. Sila dapiton usab nga moapil sa buhat sa templo ug sa family history aron sa pag-abag sa Ginoo diha sa Iyang makaluwas nga buhat alang sa mga patay.

Mga Sugyot alang sa Pagtudlo

Si Jesukristo nangalagad ngadto sa mga patay didto sa kalibotan sa mga espiritu.

Sa pagsugod sa klase, mahimo nimong ipakita ang mosunod nga mga imahe ug dapiton ang mga estudyante sa pagpasabot kon unsay nahitabo taliwala sa pagkamatay ug Pagkabanhaw sa Manluluwas. (O mahimo nimong rebyohon ang pamahayag ni Elder Spencer J. Condie sa sinugdanan sa materyal sa pagpangandam ug ipatubag sa mga estudyante ang sama nga pangutana.)

Pagpalambo sa Atong Pagtudlo ug Pagkat-on

Hatagi ang mga estudyante og mga oportunidad sa pagpraktis sa pagpaambit sa ebanghelyo. Ang mga klase sa Institute makahatag og luwas nga kahimtang sa mga estudyante nga magpraktis sa pagpasabot sa mga pagtulun-an sa Simbahan sa Ginoo. Pananglitan, pinaagi sa pagdrama-drama ang mga estudyante makapalambo sa ilang abilidad sa pag-istorya mahitungod sa ebanghelyo gamit ang yano ug klaro nga pinulongan.

Dapita ang mga estudyante sa paghanduraw nga sila adunay oportunidad sa pagpasabot bahin sa pangalagad sa Manluluwas didto sa kalibotan sa mga espiritu ngadto sa usa ka tawo nga dili kauban sa atong tinuohan. Ipakita ang mosunod nga mga pangutana, ug papilia og usa ang mga estudyante nga gusto nilang tubagon:

• Nakadungog ko nga ang inyong simbahan nagtudlo nga ang mga tawo moadto sa paraiso o bilanggoan sa mga espiritu kon sila mamatay. Parehas ra ba kana sa langit ug impiyerno?

• Nagdako ko nga gitudloan nga ang mga tawo nga namatay nga wala modawat ni Jesukristo isip ilang Manluluwas mawala na sa kahangtoran ug dili makaadto sa langit. Mao ba kana ang gitudlo sa inyong Simbahan?

• Bag-ohay lang nakadungog ko nga ang inyong simbahan naghimo og usa ka butang nga gitawag og bunyag alang sa mga patay. Morag lahi kaayo paminawon. Bahin sa unsa man kana?

Hatagi ang mga estudyante og panahon sa pagrebyo sa mga kasulatan nga makita diha sa seksiyon 1 sa materyal sa pagpangandam ug sa pag-andam og usa ka yano, klaro, ug husto sa doktrina nga tubag alang sa pangutana nga gipili.

Dayon dapita ang mga estudyante sa pagdrama-drama nga magkauban ug sa pagtubag sa mga pangutana nga ilang gipili. Kon mahuman na sila, mahimo nimong dapiton ang pipila ka estudyante sa pagpaambit sa unsay ilang nakat-onan sa usag usa.

Sa pagtabang nga mapasabot og maayo ang kamahinungdanon sa pangalagad sa Ginoo ngadto sa kalibotan sa mga espiritu, mahimo ka nga mangutana og usa o daghan pa sa mosunod nga mga pangutana:

• Unsay imong nakat-onan mahitungod ni Jesukristo ug sa Iyang tahas sa pagpangalagad niadtong anaa sa kalibotan sa mga espiritu? Rebyoha ang Doktrina ug mga Pakigsaad 138:12–19, 23–24, ug pangitaa ang mga pulong nga naghulagway kon sa unsang paagi nga ang mga matinud-anon misanong sa pagbisita sa Manluluwas. Ipaambit ngadto sa kauban kon unsay imong bation kon ikaw anaa niini nga panghitabo.

• Unsay imong nakat-onan mahitungod sa mga tinguha ug kinaiya ni Jesukristo pinaagi sa Iyang pangalagad ngadto sa kalibotan sa mga espiritu? (Mahimo nimong rebyohon ang Doktrina ug mga Pakigsaad 138:29–35. Ang mga tubag mahimong maglakip sa mga kamatuoran nga susama sa mosunod: Ang pangalagad ni Jesukristo ngadto sa kalibotan sa mga espiritu nagpakita sa Iyang gugma ug sa Iyang tinguha sa pagtanyag og kaluwasan sa tanang tawo. Ang Manluluwas nagtugot kanatong tanan nga motabang sa Iyang mahinungdanon nga buhat alang sa mga patay.)

• Unsay imong mga hunahuna o mga pagbati alang sa Manluluwas samtang maghunahuna ka nga ang Iyang pangalagad moabot sa tanang tawo—lakip na sa imong mga katigulangan nga namatay nga walay ebanghelyo?

Kita makaabag sa Manluluwas diha sa pagtubos sa mga patay.

Ikonsiderar ang pagpakita sa nag-uban nga hulagway sa Manluluwas ug niini nga pamahayag gikan sa “Ang Buhi nga Kristo”: “Siya mihatag sa Iyang kinabuhi aron sa pag-ula sa mga sala sa tanang mga katawhan. Ang Iyang kinabuhi usa ka gasa nga gihatag alang sa tanan kinsa magpuyo dinhi sa yuta.” (“Ang Buhi nga Kristo: Ang Pagpamatuod sa mga Apostoles,” ChurchofJesusChrist.org). Siguroa nga ang mga estudyante nakasabot nga ang puli [vicarious] nagpasabot nga paglihok o pagpuli sa laing tawo.

Dayon ipakita ang mosunod nga hulagway, ug mangutana:

• Sa unsa nga mga paagi nga ang atong buhat alang sa mga patay nagsunod sa sundanan sa Manluluwas? (Rebyoha uban sa mga estudyante ang pamahayag ni Presidente Russell M. Nelson diha sa seksiyon 2 sa materyal sa pagpangandam.)

Base sa mga tubag sa mga estudyante, mahimo nimong ipakita ang usa ka baroganan nga susama sa mosunod: Samtang moapil kita sa buhat sa family history ug sa templo, kita nagsunod sa ehemplo sa Manluluwas pinaagi sa paghimo alang sa uban sa butang nga dili nila mahimo sa ilang kaugalingon.

• Sa unsang paagi nga ang paghimo sa buhat sa templo ug sa family history nakapalig-on o makapalig-on sa inyong pagpamatuod bahin sa Pag-ula ni Jesukristo?

Dapita ang mga estudyante sa pagrebyo sa pamahayag ni Elder Dale G. Renlund diha sa seksiyon 2 sa materyal sa pagpangandam ug sa pag-ila sa mga panalangin nga ilang nasinati o gustong masinati pinaagi sa paghimo sa buhat sa templo ug sa family history. Dayon hatagi ang mga estudyante og oportunidad sa pagpaambit isip usa ka klase o diha sa ginagmay nga mga grupo kon sa unsang paagi nga sila o ang usa ka tawo nga ilang kaila napanalanginan pinaagi sa paghimo sa buhat alang sa mga patay.

Ipakita ang mosunod nga mga pamahayag ni Presidente Nelson:

Imbitaron ko kamo sa pagkonsiderar sa mainampoong paagi kon unsa nga matang sa sakripisyo—ug ilabi na sa sakripisyo sa panahon—ang inyong mahimo sa buhat sa family history ug sa templo niining tuiga. (Russell M. Nelson, sa “Make Sacrifices for Family History, President Russell M. Nelson Challenges,” Peb. 12, 2017, ChurchofJesusChrist.org)

Hatagi ang mga estudyante og panahon sa paghunahuna ug sa pagsulat agi og tubag sa imbitasyon ni Presidente Nelson. Mahimo nilang gamiton ang nahabilin nga oras sa pag-abli sa FamilySearch ug sa pagpangita og ngalan nga mahimo nilang dad-on sa templo. Awhaga ang mga estudyante nga naggamit sa FamilySearch sa pagtabang niadtong dili pamilyar niini.

Alang sa Sunod nga Higayon

Sa pag-awhag og pagpangandam sa mga estudyante alang sa sunod nga klase, ikonsiderar ang pagpadala sa mosunod nga mensahe o usa nga imong kaugalingon: Samtang magtuon ka sa leksiyon 20, ikonsiderar kon unsa ang espirituhanon nga mga ideya nga mahimo nimong mabatonan gikan sa mga pulong nga tigbalantay sa karnero, sinuholan, toril sa mga karnero, uban nga karnero, sibsibanan nga malunhaw, and nawala nga karnero.