Leksiyon 26 Materyal sa Magtutudlo

Pagkahimong Mas mahisama ni Jesukristo

Si Jesukristo naghangyo kanato, isip Iyang mga disipulo, nga mahimong sama nga Siya mao (tan-awa sa 3 Nephi 27:27). Niini nga leksiyon, ang mga estudyante mohunahuna kon sa unsang paagi sila makahimo nga mas mahisama sa Manluluwas pinaagi sa pagpalambo pa og Kristohananong mga hiyas. Sila usab maadunay oportunidad sa pagpili og piho nga Kristohanon nga hiyas ug sa pagtino kon sa unsang paagi sila makabuhat sa pagpalambo niini sa hingpit nga paagi. 

Mga Sugyot alang sa Pagtudlo

Si Jesukristo nagpahimangno sa Iyang mga disipulo nga mahimong sama Kaniya.

Sa pagsugod sa klase, ipakita o pagdapit og usa ka estudyante sa pagbasa og kusog sa kang Presidente Dallin H. Oaks nga pamahayag diha sa seksiyon 1 sa materyal sa pagpangandam. Dayon pangutana:

• Unsa ang kalainan tali sa mahibalo og usa ka butang, magbuhat og usa ka butang, ug mahimong usa ka butang?

I-summarize ang konteksto sa 3 Nephi 27, ug dayon basaha ang 3 Nephi 27:27 nga magdungan. O mahimo ninyong tan-awon ang magkatukma nga klip gikan sa Book of Mormon Videos (ChurchofJesusChrist.org). Hunahunaa ang pagpakita sa mosunod nga kamatuoran: Si Jesukristo naghangyo sa Iyang mga disipulo nga mahimong sama nga Siya mao.

Makapakita kamo og pipila ka hulagway nga naghulagway sa mga hiyas ni Kristo. Dayon pagdapit og mga estudyante sa pagpili og usa o duha sa mosunod nga mga tudling nga basahon, mangita alang sa mga Kristohanong mga hiyas:

• Mateo 5:3–11

• 2 Pedro 1:4–7

• Alma 13:28

• Doktrina ug mga Pakigsaad 4:5–7

• Unsa ang pipila ka mga hiyas ni Jesukristo nga inyong gusto pa nga ipalambo? (Hunahunaa ang paglista sa mga hiyas nga giila sa mga estudyante diha sa pisara.)

• Sa unsang paagi kamo o ang usa ka tawo nga inyong kaila napanalanginan pinaagi sa pagpaningkamot nga mahimong mas mahisama sa Manluluwas? (Makarebyo kamo sa pamahayag ni Presidente Ezra Taft Benson diha sa seksiyon 1 sa materyal sa pagpangandam.)

Hunahunaa ang pagpakigbahin og usa ka butang sama sa mosunod nga talan-awon:

Kon magtan-aw sa usa ka lista sa Kristohanong mga hiyas, gibati ni Eliza nga nasanapan. Siya naglibog kon unsaon gayod niya sa paglangkob sa tanan niini nga mga hiyas sa iyang kinabuhi. Ingon og imposible kini.

• Mibati ba kamo sukad sama ni Eliza? Unsa nga tambag ang ihatag ninyo kaniya?

• Unsa ang ubang mga hagit ang atong maatubang kon maningkamot sa pagpalambo og Kristohanong mga hiyas?

• Unsa nga mga baroganan sa ebanghelyo ang makatabang kanato sa pagbati nga mas malaumon samtang kita naningkamot sa pagpalambo og Kristohanong mga hiyas? (Kon kinahanglan, mahimong hunahunaon sa mga estudyante ang pamahayag ni Presidente Dieter F. Uchtdorf sa seksiyon 2 sa materyal sa pagpangandam o mga kasulatan sama sa mosunod: Mosiah 4:27; Ether 12:27; o Doktrina ug mga Pakigsaad 78:17–18; 93:13.)

Pagpalambo sa Atong Pagtudlo ug Pagkat-on

Paggamit og mga istorya. Ang mga istorya makamugna og interes, makapalawom sa pagsabot, ug makahulagway sa paggamit. Uban sa mga istorya diha sa mga kasulatan, mga istorya nga magpalambo sa hugot nga pagtuo gikan sa mga lider sa Simbahan makapakita kon unsaon paggamit sa mga baroganan sa bag-o nga konteksto. Ang mga magtutudlo ug mga estudyante makapakigbahin usab og makadasig nga mga istorya gikan sa ilang mga kinabuhi.

Sa paghulagway sa konsepto nga mahimong sama sa Ginoo sa hinay-hinay, kamo mahimong mopakita og usa ka hulagway sa Mount Fuji ug mobasa sa mosunod nga kasinatian ni Elder Scott D. ug Sister Whiting. (O kamo makatan-aw o makapaminaw ni Elder Whiting nga nakigbahin niini nga kasinatian diha sa kinatibuk-ang komperensiya [https://www.churchofjesuschrist.org/study/general-conference/2020/10/13whiting?lang=ceb] gikan sa time code 2:35 hangtod sa 3:09)

Pipila ka tuig nang milabay, ang akong asawa ug ako mibarog sa sinugdanan sa agianan sa kinatas-ang bukid sa Japan, ang Mount Fuji. Sa pagsugod namo sa among pagtungas mitan-aw mi sa tumoy didto sa layo ug naghunahuna kon makaabot ba mi didto.

Sa among pagpadayon, ang kakapoy, sakit sa mga kaunoran, ug ang mga epekto sa kataas miresulta na. Sa among hunahuna, importante alang namo nga tutokan lamang ang sunod nga lakang. Moingon mi, “Siguro dili dayon ko makaabot sa ibabaw, apan mahimo nako kining sunod nga lakang karon dayon.” Paglabay sa panahon ang lisod nga buluhaton sa kataposan makab-ot ra—usa ka lakang human sa laing lakang. (Scott D. Whiting, “Pagkahimong sama Kaniya,” Liahona, Nob. 2020, 12–13)

• Sa unsang paagi ang kasinatian sa mga Whiting kalabot ngadto sa pagkahimong mas mahisama ni Jesukristo?

Human ang mga estudyante mipakigbahin sa ilang mga hunahuna, ipakita ang mosunod nga pamahayag ni Elder Whiting:

Ang pagkahimong sama ni Jesukristo magkinahanglan og pag-usab sa atong mga kasingkasing ug mga hunahuna, sa pagkatinuod, sa atong kinaiya mismo, ug ang pagbuhat sa ingon posible lamang pinaagi sa makaluwas nga grasya ni Jesukristo. …

Aron makita ang tinuod nga pag-uswag, kinahanglan kamo og padayong paningkamot. Sama sa pagsaka sa usa ka bukid nga nagkinahanglan og pagpangandam daan ug paglahutay ug pagpadayon atol sa pagtungas, mao usab kini nga biyahe nga nagkinahanglan og tinuod nga paningkamot ug sakripisyo. Ang tinuod nga Kristiyanismo, diin naningkamot kita nga mahimong mahisama sa atong Agalon, kanunay nga nagkinahanglan sa atong labing maayong mga paningkamot. (Scott D. Whiting, “Pagkahimong sama Kaniya,” Liahona, Nob. 2020, 13, 14)

Dapita ang mga estudyante sa pagdangop ngadto sa “Irekord ang Inyong mga Hunahuna” nga kalihokan diha sa seksiyon 3 sa materyal sa pagpangandam. Dayon pagpili hain sa mosunod nga mga kalihokan ang labing motubag sa mga panginahanglan sa inyong mga estudyante:

1. Dapita ang mga estudyante sa paggahin og panahon sa pagkompleto sa “Kalihokan Kabahin sa Hiyas” makaplagan diha sa Isangyaw ang Akong Ebanghelyo o palandonga kon unsay ilang nakat-onan o makat-onan gikan sa kasinatian.

2. Hatagi ang mga estudyante og panahon sa pagpili ug pagbasa (o pagsugod og basa) sa usa sa mga pakigpulong diha sa “Gusto pa og Dugang?” nga seksiyon sa materyal sa pagpangandam. Mahimo usab nga sila mangita sa ilang kaugalingong kapangohaan sa pagtuon pinaagi sa pagsiksik alang sa usa ka Kristohanong hiyas diha sa Gospel Library.

3. Pagdapit og pipila ka estudyante sa pagpakigbahin gikan sa mga kasulatan kon giunsa sa Manluluwas sa pagpanig-ingnan sa hiyas nga ilang napili sa pagtrabaho. (Tan-awa sa lakang 2 diha sa “Irekord ang Inyong mga Hunahuna” nga kalihokan diha sa seksiyon 3 sa materyal sa pagpangandam.)

4. Pagdapit og mga estudyante sa pagpakigbahin kon unsay ilang nakat-onan pinaagi sa pagpakigsulti ngadto sa usa ka tawo nga ilang kaila mahitungod sa pagkahimong mas mahisama sa Manluluwas. (Tan-awa ang “Paghisgot agi og Pagpangandam alang sa Klase” nga kalihokan diha sa seksiyon 1 o ang ikatulo nga lakang sa “Irekord ang Inyong mga Hunahuna” nga kalihokan diha sa seksiyon 3 sa materyal sa pagpangandam alang sa mga ideya.)

Sa pagtapos sa klase, kamo makapakita sa mosunod nga mga pangutana ug sa pagdapit sa mga estudyante sa pagpamalandong ug pagrekord sa ilang mga panumdoman:

• Unsaon sa pagpalambo o pagpalig-on sa Kristohanong hiyas nga inyong gipili pag-impluwensya sa inyong kinabuhi ug mga relasyon?

• Unsa nga gagmay ug yanong mga lakang kamo makahimo niini nga semana sa pag-ugmad niini nga hiyas?

• Unsaon ninyo sa pagpaningkamot sa tabang sa Ginoo sa pagpalambo o paglig-on niini nga hiyas?

Hunahunaa ang pagdapit og pipila ka mga estudyante sa pagpakigbahin og usa ka butang nga ilang gibati, gikat-onan o gisulat atol sa panaghisgot niining adlawa. Mahimo usab kamong makigbahin sa inyong pagpamatuod.

Alang sa Sunod nga Higayon

Aron sa pag-awhag sa mga estudyante sa pagtuon sa materyal sa pagpangandam alang sa sunod nga klase, hunahunaa ang pagpadala sa mosunod nga mensahe o usa nga inyong kaugalingon:Samtang kamo nagtuon sa leksiyon 27, hunahunaa ang koneksyon tali sa mga pulong paglaom, kahayag, ug kinabuhi.