“Leksiyon 10 Materyal sa Pagpangandam sa Klase: Pagsunod sa Ehemplo ni Jesukristo sa Pagnunot,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo (2023)
“Leksiyon 10 Materyal sa Pagpangandam sa Klase,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo
Leksiyon 10 Materyal sa Pagpangandam sa Klase
Pagsunod sa Ehemplo ni Jesukristo sa Pagnunot
Makahunahuna ba kamo og mga tawo sa inyong kinabuhi kinsa “manunuton, maaghop, mapainubsanon, mapailubon, puno sa gugma, mauyunon sa pagdawat sa tanan nga mga butang diin ang Ginoo makakita nga angay ipahamtang nganha [kanila], bisan ingon sa usa ka bata nga motugyan sa iyang kaugalingon ngadto sa iyang amahan”? (Mosiah 3:19). Kini nga Kristohanong mga hiyas anaa makab-ot ni bisan kinsa kanato kinsa nagtinguha niini. Ang Manluluwas mao ang hingpit nga ehemplo sa pagnunot ngadto sa kabubut-on sa Langitnong Amahan. Samtang kamo magtuon, hunahunaa ang kamahinungdanon sa mosunod nga pamahayag ni Presidente Ezra Taft Benson: “Ang mga kalalakin-an ug mga kababayen-an kinsa mosalig sa ilang mga kinabuhi ngadto sa Dios makadiskobre nga Siya makahimo og daghan pa sa ilang mga kinabuhi kay sa ilang mahimo” (“Jesus Christ––Gifts and Expectations [Si Jesukristo––Mga Gasa ug Mga Gilauman],” Ensign, Dis. 1988, 4).
Seksiyon 1
Unsaon sa pagkamapainubsanon ug pagkamaaghop paghatag kanako og gahom?
Pipila sa katawhan mibati nga ang pagkamapainubsanon usa ka timaan sa kahuyang. Sila mahimong maghunahuna nga ang mapainubsanon nga mga tawo mahinadlukon ug maulawon. Ug gani kini nga mga pulong wala maghulagway ni Jesukristo, kinsa mao ang hingpit nga ehemplo sa pagkamapainubsanon ug pagkamaaghop.
Hunahunaa ang pipila ka mga ehemplo sa kalig-on, kaisog, ug kawalay pagpanuko sa Manluluwas: Masaligon Siya nga mipadayag sa Iyang tinuod nga pagkatawo, bisan kon kini mibutang sa Iyang kinabuhi sa peligro (tan-awa sa Juan 8:54–59); walay kahadlok Siya nga milimpyo sa templo sa dihang kini gihugaw-hugawan (tan-awa sa Mateo 21:12–13; Juan 2:14–17); Maisugon Siya nga mipanalipod sa gidaugdaog (tan-awa sa Juan 8:1–11; Marcos 2:14–17); ug Siya walay kahadlok nga nag-atubang sa mga pasangil ug pagsaway (tan-awa sa Mateo 16:1–12; Lucas 20:19–26).
Unsaon sa pagkamapainubsanon paggiya ngadto sa mas dako nga personal nga gahom ug kalig-on? Atong nakat-onan nga ang “pagpaubos mao ang pag-ila sa mapasalamatong paagi sa atong pagsalig diha sa Ginoo—ang pagsabot nga kita kanunay nga nanginahanglan alang sa Iyang suporta. …
“… Sa panahon sa Iyang mortal nga pangalagad, si [Jesukristo] kanunay nga miila nga ang Iyang kalig-on miabot tungod sa Iyang pagsalig diha sa Iyang Amahan. Miingon Siya: ‘Ako walay arang nga mahimo sa akong kaugalingon. … Wala ko man tinguhaa ang pagbuhat sa akong kaugalingong kabubut-on kondili sa kabubut-on sa Amahan nga nagpadala kanako’ (Juan 5:30)” (Gospel Topics, “Humility,” topics.ChurchofJesusChrist.org).
Ang mapainubsanong pagnunot sa Manluluwas ngadto sa kabubut-on sa Iyang Amahan konektado usab ngadto sa Iyang kaaghop (tan-awa sa Mateo 11:29). Si Elder David A. Bednar sa Korum sa Napulog Duha ka Apostoles mitudlo:
Ang kaaghop usa ka mahinungdanong kinaiya sa Manunubos ug mailhan pinaagi sa matarong nga pagtubag, andam sa pagkamanunuton, ug lig-on sa pagpugong sa kaugalingon. …
Ang Bantugang Manunubos, kinsa “nakatugkad sa tanang mga butang” [Doktrina ug mga Pakigsaad 88:6] ug nag-antos, nagkadugo, ug namatay “aron magahinlo kanato gikan sa tanang pagkadili makatarunganon” [1 Juan1:9], mabinationg mihugas sa abugong mga tiil sa Iyang mga disipulo [Juan 13:4–5]. Ang sama nga kaaghop usa ka talagsaong timaan nga kinaiya sa Ginoo isip usa ka sulugoon ug lider.
Si Jesus naghatag sa hingpit nga panig-ingnan sa matarong nga pagtubag ug andam nga pagdawat samtang Iyang giantos ang grabe nga kasakit didto sa Getsemani.
“Ug sa paghiabot niya sa dapit, siya miingon sa [Iyang mga disipulo], Pag-ampo kamo aron dili kamo mahidalin-as ngadto sa panulay.
“Ug siya … miluhod, ug nag-ampo,
“Nga nag-ingon, Amahan, kon buot ka, kuhaa kining kopa gikan kanako: hinoon, dili ang akong pagbuot maoy matuman, kondili ang imo”[Lucas 22:40–42].
Ang kaaghop sa Manluluwas niining mahangturong kamahinungdanon ug grabe kasakit nga kasinatian nagpakita alang sa matag usa kanato sa kaimportante sa pagbutang sa kaalam sa Dios ibabaw sa atong kaugalingon nga kaalam. (“Maaghop ug Mapaubsanon sa Kasingkasing,” Liahona, Mayo 2018, 32–33)
![Prayer at Gethsemane [Pag-ampo didto sa Getsemani], ni Del Parson](https://assets.ldscdn.org/7b/e6/7be645d1a5f211ecb962eeeeac1ef8bc67e9f1bc/gethsemane_art_lds.jpeg)
Pamalandong agi og Pagpangandam alang sa Klase
Giunsa pagpanalangin ang inyong kinabuhi tungod kay si Jesukristo maaghop nga “mituman sa kabubut-on sa Amahan sa tanan nga mga butang gikan sa sinugdanan”? (3 Nephi 11:11). Sa unsang paagi kamo mahimong mas manunuton ngadto sa kabubut-on sa Dios?
Seksiyon 2
Unsaon sa paghimo ug pagsunod sa mga pakigsaad pagtabang kanako sa pagbuhat sa kabubut-on sa Dios?
Samtang kamo nagpamalandong sa inyong kinabuhi, mahimong matingala kamo kon unsaon gayod ninyo sa pagpaubos ug pagmaaghop sama sa Manluluwas. Sa mapasalamatong paagi, gipakita ni Jesukristo kanato kon unsaon sa pagnunot sa atong kabubut-on ngadto sa Dios.
Sa sinugdanan sa Iyang pagpangalagad, miadto si Jesus ni Juan Bautista sa pagdawat sa ordinansa sa bunyag. Sa una nagpanuko si Juan ug miingon, “Ako mao ang may kinahanglan nga imong bautismohan [bunyagan], ug ikaw na hinoon ang mianhi kanako?” Gisultihan ni Jesus si Juan nga kini angay aron sila “makatuman sa tanang pagkamatarong” (tan-awa sa Mateo 3:13–17).
Pagtuon agi og Pagpangandam alang sa Klase
Basaha ang 2 Nephi 31:6–7, 11–13 sa pagkat-on kon unsay gisulti ni Nephi mahitungod sa ehemplo sa Manluluwas sa pagpaubos. Pangita og mapuslanong mga lakang nga inyong magamit sa mapainubsanong pagnunot ngadto sa kabubut-on sa Dios.
Ang pagnunot sa ordinansa sa bunyag nagbutang kanato diha sa dalan sa pakigsaad. Kon kita maglakaw niini nga dalan, maninguha kita sa pagsunod sa mga sugo ug niana nagnunot sa kabubut-on sa Dios. Si Presidente Russell M. Nelson miingon mahitungod sa dalan sa pakigsaad:
Ang inyong pasalig nga mosunod sa Manluluwas pinaagi sa paghimo og mga pakigsaad uban Kaniya ug dayon sa pagtuman niadto nga mga pakigsaad moabli sa pultahan ngadto sa tanang espirituhanong mga panalangin ug pribilehiyo nga mahimong maanaa sa mga lalaki, babaye, ug mga anak bisan asa. (“Samtang Dungan Kita nga Magpadayon sa Unahan,” Liahona, Abr. 2018, 7)
Pamalandong agi og Pagpangandam alang sa Klase
Giunsa pagpanalangin ang inyong kinabuhi, o unsaon niini nga mapanalanginan, pinaagi sa pagnunot ngadto sa kabubut-on sa Ginoo pinaagi sa paghimo ug pagsunod sa mga pakigsaad sa ebanghelyo?
Seksiyon 3
Unsay akong mabuhat aron ipatigbabaw ang Dios sa akong kinabuhi?
Diha sa mga kasulatan, ug sa karon, ang mga tawo sa pakigsaad sa Ginoo kasagaran nga gipasabot isip ang balay ni Israel. Si Presidente Nelson mitudlo:
Usa ka kahulogan sa pulong nga Hebreo mao ang Israel nga “ipatigbabaw ang Dios.” Mao nga ang ngalan mismo nga Israel nagpasabot og tawo kinsa andam nga ipatigbabaw ang Dios labaw sa tanan diha sa iyang kinabuhi. Kana nga konsepto hilabihang nakadasig kanako!
Ang pulong nga andam mahinungdanon niini nga paghubad sa Israel. Kitang tanan adunay atong kabubut-on. … Makapili kita nga ipatigbabaw ang Dios labaw sa tanan diha sa atong mga kinabuhi, o dili. Makapili kita nga tugotan ang Dios nga maoy labing gamhanang impluwensiya sa atong mga kinabuhi, o dili. …
Andam ba kamo nga tugotan ang Dios nga maoy mahimong labing importante nga impluwensiya sa inyong kinabuhi? Tugotan ba ninyo ang Iyang mga pulong, Iyang mga sugo, ug Iyang mga pakigsaad nga moimpluwensiya sa inyong buhaton matag adlaw? Tugotan ba ninyo ang Iyang tingog nga maoy prayoridad kay sa bisan unsa pang uban? Kamo andam ba nga himoon ang bisan unsa nga Iyang ipabuhat kaninyo nga mas importante kay sa bisan unsang ambisyon? Kamo andam ba nga ipatuhop ang inyong kabubut-on ngadto sa Iyang kabubut-on? (“Ipatigbabaw ang Dios Labaw sa Tanan,” Liahona, Nob. 2020, 92, 94)
Gikan sa mga kasulatan ug sa mga kinabuhi sa mga disipulo karong panahona kita makakat-on sa mga oportunidad, mga hagit, ug mga panalangin nga moabot kon kita mopili sa pagpatigbabaw sa Dios sa atong mga kinabuhi.
Pagtuon agi og Pagpangandam alang sa Klase
Susiha ang usa o dugang pa sa mosunod nga mga ehemplo sa mga indibidwal kinsa nagpatigbabaw sa Dios, ug palandonga ang mga pangutana nga nagsunod:
-
Si Naaman ang sanlahon nangayo og panabang gikan ni propeta Eliseo: 2 Mga Hari 5:9–14.
-
Si Maria may ingon og anghel nga bisita kinsa nagpadayag nga si Maria mahimong inahan ni Jesus: Lucas 1:26–38.
-
Si Enoc napili sa Ginoo sa pagtawag sa mga tawo sa paghinulsol: Moises 6:31–34, 37–39.
-
2:23 -
3:2
-
Samtang kamo naghunahuna sa inyong mga paningkamot sa pagpatigbabaw sa Dios diha sa inyong mga kinabuhi, hunahunaa ang mosunod nga pagpamatuod ni Presidente Bonnie L. Oscarson, kanhi Kinatibuk-ang Presidente sa Young Women:
Ako magpamatuod nga adunay dagkong mga panalangin nga giandam kon kita andam usab sa pagsulti ngadto sa Amahan, “Apan, ang imong pagbuot mao ang matuman” [tan-awa sa Doktrina ug mga Pakigsaad 109:44] ug ipahiangay ang atong kabubut-on ngadto sa kabubut-on sa Ginoo. … Kini mao ang pagsulay sa kinabuhi. Samtang kita mas nagkamaayo sa pagbuhat niini, atong makaplagan ang mas dakong kalipay, nagtubo nga abilidad sa pagdawat og personal nga pagpadayag, mas dakong kapasidad sa pagserbisyo niadtong naglibot kanato, mas dugang nga panabang sa pagsugakod sa mga pagsulay, ug usa ka mas Kristohanong kinaiya. (“Leaders Address Importance of Conversion at BYU Women’s Conference,” Mayo 9, 2017, ChurchofJesusChrist.org)
Irekord ang Inyong mga Hunahuna
Unsa ang usa ka butang nga inyong gibati nga kamo kinahanglan magsugod sa pagbuhat o mohunong sa pagbuhat sa pagpatigbabaw sa Dios nga mas hingpit diha sa inyong kinabuhi? Unsaon kaha ninyo pagdapit ang panabang sa Ginoo samtang kamo monunot pa sa hingpit ngadto sa Iyang kabubut-on?