Leksiyon 6 Materyal sa Magtutudlo

Paggamit og Simbolismo aron Mas Makasabot sa Makatubos nga Gahom ni Kristo

Ang mga kasulatan puno sa mga simbolo ni Jesukristo ug sa Iyang ebanghelyo. Bisan sa wala pa ang Iyang pagkatawo, ang Manluluwas nagtabang sa Iyang katawhan nga makasabot kon kinsa Siya ug nganong sila nagkinahanglan Kaniya. Kini nga leksiyon magsuhid sa mga simbolo nga anaa sa kasulatan nga makapalig-on sa atong hugot nga pagtuo kang Jesukristo ug sa Iyang tahas isip atong Manunubos.

Mga Sugyot alang sa Pagtudlo

Pagpalambo sa Atong Pagtudlo ug Pagkat-on

Pagpasiugda og makahuloganon nga diskusyon. Ang mga magtutudlo makapasiugda og makahuloganon nga diskusyon kon sila magmugna og usa ka palibot sa pagkat-on diin anaa ang gugma ug pagsalig aron ang mga estudyante mobati nga luwas sa paghatag sa ilang mga pangutana, ug motug-an sa ilang mga pagduhaduha ug mga kahadlok, mopaambit og personal nga mga kasinatian, ug mopahayag sa ilang mga pagpamatuod.

Ang Ginoo mipaila sa pagsakripisyo og mananap aron sa pagpamatuod sa Iyang makatubos nga gahom.

Pagdrowing o pagpakita og usa ka hulagway sa usa ka kasingkasing (o laing komon nga simbolo) sa pisara. Hangyoa ang mga estudyante sa pag-ila sa mga butang nga gisimbolohan sa kasingkasing. Ipasabot nga ang mga kasulatan naggamit og mga simbolo sa pagsaksi kang Jesukristo (tan-awa sa 2 Nephi 11:4). Mahimo usab tingali nga papangitaon nimo ang mga estudyante og pipila ka ehemplo sa mga simbolo nga nagtudlo bahin ni Kristo.

Irebyo sa daklit o ipa-summarize sa usa ka estudyante ang konteksto sa gipauban nga litrato ni Adan ug ni Eva. Dapita ang mga estudyante sa pagrebyo sa Moises 5:4–8 sa pagpangita sa mga simbolo dinhi niini nga litrato.

Aron mapalawman pa ang panabot sa mga estudyante bahin sa simbolismo niini nga hulagway, ikonsiderar ang pagpangutana sa mga mosunod:

• Unsa nga importanting mga kamatuoran ang gitudlo mahitungod ni Jesukristo pinaagi sa mga simbolo sa usa ka nati nga karnero, usa ka altar, ug pagpaagas sa dugo? (Mahimo nimong rebyohon ang pamahayag ni Elder Jeffrey R. Holland diha sa seksiyon 1 sa materyal sa pagpangandam. Tabangi ang mga estudyante nga madiskobre ang kamatuoran nga susama sa mosunod: Ang pagsakripisyo og usa ka kinamagulangan nga nating karnero nagsimbolo sa makatubos nga sakripisyo ni Jesukristo.)

• Unsa nga mga simbolo ang gigamit nato karon sa paghinumdom sa Pag-ula sa Manluluwas?

Pahinumdom: Kon ang imong mga estudyante mopahayag og kadili komportable sa pagsakripisyo og mananap, pahinumdomi sila nga kadaghanan sa mga tawo sa Daang Tugon nagpuyo sa katilingban nga nag-atiman og mga mananap, diin komon ang pagpamuhi og mga mananap nga ihawon para pagkaon. Ipasabot nga ang Ginoo migamit sa inadlaw-adlaw nga kasinatian sa mga tawo aron sa pagtudlo og puno sa gahom nga leksiyon mahitungod sa Iyang makatubos nga sakripisyo.

Ang mga kasulatan naglangkob og daghang simbolo nga nagpamatuod sa balaan nga misyon ni Jesukristo.

Pahinumdom: Kini nga seksiyon naglangkob og duha ka opsiyon sa pagtudlo. Hukmi kon asa nga opsiyon ang pinakamaayo alang sa imong mga estudyante. Ang opsiyon 1 naghatag og mas giniyahan nga kasinatian sa pagkat-on.

Opsiyon 1: Ang Simbolismo sa Pagpalabay

Depende sa kahibalo sa imong mga estudyente, tingali importante ang daklit nga pagrebyo sa mga hitabo nga naghatod ngadto sa Pagpalabay ug dayon ipabasa og dungan ang Exodo 12:3–13.

Aron mahatagan ang mga estudyante og oportunidad nga maghisgot sa kahulogan sa mga simbolo sa Pagpalabay, mahimo nimo silang patrabahoon sa ginagmay nga grupo ug mokompleto o mohisgot sa “Posible nga mga Kahulogan” nga seksiyon sa “Ang Simbolismo sa Pagpalabay” nga tsart nga anaa sa seksiyon 2 sa materyal sa pagpangandam. O puwede kang maghatag og usa ka simbolo ngadto sa matag grupo ug hangyoon sila sa pagbasa sa suporta nga mga kasulatan, morekord sa posible nga kahulogan alang sa ilang simbolo, ug dayon mopaambit sa klase sa unsay ilang nakat-onan.

Samtang ang mga estudyante mopaambit sa ilang mga hunahuna mahitungod sa mga simbolo sa Pagpalabay, ikonsiderar ang pagpangutana og follow up nga mga pangutana nga makatabang nila sa paggamit sa kahulogan sa mga simbolo diha sa ilang kinabuhi. Kining follow up nga mga pangutana puwedeng sugdan og sama sa mga mosunod:

• Unsa ang gitudlo niini nga mga simbolo …

• Sa unsang paagi magamit ang kahulogan niini nga simbolo …

• Kanus-a ka nakakita …

Human sa inyong paghisgot, ikonsiderar ang pagdapit sa mga estudyante sa pagrekord sa unsay ilang nakat-onan o gibati mahitungod sa Manluluwas, o sa ilang relasyon Kaniya, gikan sa mga simbolo sa Pagpalabay. Mahimo usab nga magdapit ka og mga estudyante kinsa andam nga mopaambit sa unsay ilang gisulat.

Para Magamit nga Pakisayran sa Magtutudlo

Simbolismo sa Pagpalabay

Bersikulo	Simbolo	Posible nga mga Kahulogan	Suporta nga mga Kasulatan*
Bersikulo 3	Simbolo Ang matag balay nagsakripisyo og usa ka nating karnero	Posible nga mga Kahulogan Ang makatubos nga gahom ni Jesukristo para sa tanan.	Suporta nga mga Kasulatan* 2 Nephi 26:25–28, 33
Bersikulo 5	Simbolo Laki nga nating karnero nga walay lama	Posible nga mga Kahulogan Ang Manluluwas mao ang Kordero sa Dios, hingpit ug walay sala.	Suporta nga mga Kasulatan* Juan 1:29; Mga Hebreohanon 5:8–9
Bersikulo 7	Simbolo Dugo gipahid sa mga haligi sa pultahan sa matag balay	Posible nga mga Kahulogan Pinaagi sa pakigsaad kita makagamit sa dugo ni Kristo nga mabuntog ang espirituwal nga kamatayon. Ang dugo ni Kristo motubos ug mopanalipod kanato.	Suporta nga mga Kasulatan* Mosiah 4:2; Alma 5:21
Bersikulo 8	Simbolo Tinapay nga walay igpapatubo (tinapay nga gihimo nga walay patubo, nga mao ang hinungdan nga ang pan mapan-os ug moagup-op)	Posible nga mga Kahulogan Si Jesus mao ang Pan sa Kinabuhi. Wala siyay lama.	Suporta nga mga Kasulatan* Juan 6:35, 48, 57–58; 1 Mga Taga-Corinto 5:7–8
Bersikulo 8	Simbolo Pait nga mga utanon	Posible nga mga Kahulogan Nagpuyo kita sa napukan nga kalibotan ug ubos sa kapaitan sa sala.	Suporta nga mga Kasulatan* Alma 41:11; Doktrina ug mga Pakigsaad 19:18
Bersikulo 11	Simbolo Bat-ang nga binaksan, sapatos nga gisul-ob, sungkod nga naa sa kamot, dinalidali nga pagpangaon	Posible nga mga Kahulogan Ang makatubos nga gahom ni Jesukristo kinahanglan gamiton sa walay langay.	Suporta nga mga Kasulatan* Alma 34:32–33

• Pahinumdom: Ang nagsuporta nga mga tudling gituyo aron mahatag ang dugang nga pagtulon-an mahitungod sa mga simbolo nga gigamit sa Pagpalabay ug dili tuyo ang paghatag og klaro kaayo nga mga interpretasyon bahin niini.

Opsiyon 2: Mga Simbolo ni Kristo sa Daang Tugon

Dapita ang mga estudyante sa pagbasa og kusog sa pamahayag ni Elder Bruce R. McConkie nga anaa sa seksiyon 3 sa materyal sa pagpangandam. Dayon ipangutana:

• Sa unsang paagi nga ang pagtan-aw sa mga simbolo ni Jesukristo nakalig-on, o sa unsang paagi nga kini makapalig-on, sa imong hugot nga pagtuo Kaniya?

Ipamatuod nga kita makakat-on og mas daghan pa mahitungod ni Jesukristo kon atong maila ang hulagway, mga matang, ug mga simbolo nga nagpamatuod Kaniya.

Rebyohon ang upat ka tudling sa Daang Tugon nga gilista sa seksiyon 3 sa materyal sa pagpangandam. Dapita ang mga estudyante sa pagporma og ginagmay nga mga grupo ngadto sa ubang mga estudyante kinsa gustong mohisgot sa parehas nga tudling nga pinakaganahan nilang hisgotan. Dayon dapita ang matag grupo sa pagbasa og dungan sa ilang gipili nga tudling ug paghisgot sa mga pangutana nga tun-anan nga makita diha sa seksiyon 3.

Human sa paghatag og igong panahon alang sa makahuloganong panaghisgot, pagdapit og pipila ka estudyante sa pagpaambit sa unsay ilang nakat-onan o gibati mahitungod ni Jesukristo isip resulta sa ilang diskusyon sa ginagmay nga grupo.

Alang sa Sunod nga Higayon

Sa dili pa ang sunod nga klase, mahimo kang magpadala og mensahe sa mga estudyante ug mangutana: Nahunahunaan ba ninyo kon unsaon nga magkauyon ang kaangayan sa Dios ngadto sa Iyang gugma ug kaluoy? Samtang magbasa ka sa materyal sa pagpangandam alang sa leksiyon 7, ikonsiderar ang relasyon tali sa balaang mga hiyas sa kaangayan, kaluoy, ug gugma.