Leksiyon 6 Materyal sa Pagpangandam sa Klase

Paggamit og Simbolismo aron Mas Makasabot sa Makatubos nga Gahom ni Kristo

Nakamatikod ba ka kon unsa ka kanunay nga ang mga kasulatan mogamit og mga simbolo sa pagtudlo kanato mahitungod ni Jesukristo? Sama pananglit, Siya gikompara ngadto sa tubig (tan-awa sa Juan 4:14), pan (tan-awa sa Juan 6:48), kahayag (tan-awa sa Juan 8:12), usa ka bato (tan-awa sa Helaman 5:12), sa adlaw (tan-awa sa Malaquias 4:2), ug usa ka magbalantay sa karnero (tan-awa sa Salmo 23:1). Bisan sa wala pa Siya matawo, si Jehova migamit og mga simbolo sa pagtabang sa Iyang mga sumusunod nga magpaabot sa Iyang pag-anhi ug sa Iyang makatubos nga gahom. Samtang magtuon ka og pipila ka ehemplo niini nga leksiyon, ikonsiderar kon sa unsang paagi nga ang mga simbolo nga anaa sa kasulatan makapalawom sa imong pagsabot ug paghigugma alang sa imong Manunubos.

Seksiyon 1

Unsay akong makat-onan mahitungod ni Jesukristo pinaagi sa simbolismo sa pagsakripisyo og mananap?

Sigon sa gipahinumdom diha sa usa ka artikulo bahin sa gahom sa simbolismo: “Ang simbolo sa ebanghelyo mahimong usa ka butang, hitabo, aksiyon, o pagtulon-an nga nagrepresentar og espirituhanong kamatuoran. … ‘Ang mga simbolo nakahatag kanato og paagi aron masabtan ang mga ideya ug mga emosyon nga dili mahulagway ginamit ang gahom sa mga pulong. Dad-on kita niini lapas pa sa pulong ug maghatag kanato og kabatid diha sa pagpahayag sa mga pagbati.’ [Joseph Fielding McConkie and Donald W. Parry, Guide to Scriptural Symbols (1990), 1]” (“Nganong mga Simbolo man?,” Liahona, Peb. 2007, 14, 15).

Diha sa mga kasulatan, usa sa nag-unang puno sa gahom nga mga simbolo sa Manluluwas mao ang pagsakripisyo og mananap. Sa dihang sila si Adan ug Eva mikaon sa gidili nga bunga ug kinahanglang mopahawa sa Tanaman sa Eden, gisugo sila sa pagsimba sa Ginoo ug paghalad og usa ka nating karnero isip sakripisyo ngadto Kaniya.

Pagtuon agi og Pagpangandam alang sa Klase

Basaha ang Moises 5:4–8, ug pamalandongi unsa ang ikatudlo ngari kanato sa simbolo sa paghalad og inosente, gamay nga nating karnero mahitungod sa gugma sa Dios ug sa sakripisyo ni Jesukristo. (Pahinumdom: Ang pagkasama mao ang pagkaparehas, pagkompara, o simbolo.)

Sa paggamit sa simbolismo sa pagsakripisyo og mananap, si Apostol Pedro mipamatuod nga kita matubos lamang “sa bililhong dugo ni Kristo, kinsa sama sa nating karnero, walay buling o mansa” (1 Pedro 1:19; tan-awa usab sa Alma 34:36).

Ang katawhan sa Ginoo sa pakigsaad nagtuman sa balaod sa pagsakripisyo og mananap isip simbolo sa pagsakripisyo ni Jesukristo—ug kana nga sakripisyo usa ka pahinumdom nga Siya motubos sa ilang mga sala. Nagtabang kini nga sila magpaabot niana nga adlaw.

Si Elder Jeffrey R. Holland sa Korum sa Napulog Duha ka Apostoles mitudlo:

Pinaagi sa paghalad sa ilang kaugalingong gagmay nga simbolikanhong mga nating karnero dinhi sa mortalidad, si Adan ug ang iyang kaliwatan mipahayag sa ilang pagsabot ug sa ilang pagsalig sa maulaong sakripisyo ni Jesus ang Usa nga Dinihogan. (“Tan-awa ang Kordero sa Dios,” Liahona, Mayo 2019, 44)

Pamalandong agi og Pagpangandam alang sa Klase

Sa unsang paagi nga ang pagsabot sa simbolismo sa pagsakripisyo og mananap makapalawom sa imong gugma ug pagdayeg sa makatubos nga sakripisyo ni Jesukristo alang kanimo?

Seksiyon 2

Sa unsang paagi ang mga simbolo sa Pagpalabay nagdasig kanako sa pagtinguha sa makatubos nga gahom sa Manluluwas sa akong kinabuhi?

Ang pagsakripisyo sa unang natawo nga nating mga karnero nagpadayon sa tibuok kapanahonan sa Daang Tugon. Kini nga buhat nahimo nga makahuloganon labi na ngadto sa mga Israelita sa dihang gipalingkawas sila gikan sa ilang pagkaulipon sa mga Taga-Ehipto.

Ang sugilanon mahitungod sa pagkahaw-as gikan sa pagkaulipon sa mga Taga-Ehipto makatabang nato sa pagsabot kon sa unsang paagi nga ang Ginoo miluwas kanato gikan sa managlahing matang sa pagkaulipon nga atong masinati. Samtang ang pagkaulipon sa Isarelita sa sinugdanan usa ka matang sa pisikal nga pagkaulipon, si Elder Quentin L. Cook sa Korum sa Napulog Duha ka Apostoles mitudlo nga kita usab makasinati og pagkaulipon tungod sa sala, mga pagkaadik, o sa pagtuo [sa] sayop nga mga ideya (tan-awa sa “Mga Lamentaciones ni Jeremias: Pagbantay sa Pagkaulipon,” Liahona, Nob. 2013, 88–91).

Ang mga Israelita migahin og mga 400 ka tuig isip mga ulipon sa Ehipto. Apan ang Ginoo wala makalimot kanila. Nahibalo Siya sa ilang mga kasub-anan ug nakadungog sa ilang mga pangamuyo. Mianhi Siya sa pagluwas kanila ug mitawag kang Moises nga motabang. Sa gabii sa pagluwas sa Israel, ang Ginoo mipaila sa Pagpalabay, nga puno sa mga simbolo nga gituyo aron matudlo ang gahom sa Manluluwas sa pagluwas sa tanan nga mosunod Kaniya.

Pagtuon agi og Pagpangandam alang sa Klase

Basaha ang Exodo 12:3–13 ug ilha ang mga simbolo nga nagtudlo mahitungod sa makaluwas nga gahom ni Jesukristo ug unsaon aron makadawat niini.

Irekord ang Imong mga Hunahuna

Diha sa nagsunod nga talaan, irekord unsay imong hunahuna ang gipasabot sa matag usa sa mga simbolo sa Pagpalabay. Ikonsiderar unsa kaha ang ikatudlo niini nga mga simbolo kanato mahitungod sa makatubos nga gahom sa Manluluwas ug kon unsaon sa pag-akses niini. Mahimo nimong tun-an ang suporta nga mga kasulatan aron makaangkon og dugang nga mga pagtulon-an.

Simbolismo sa Pagpalabay

Bersikulo	Simbolo	Posible nga mga Kahulogan	Suporta nga mga Kasulatan*
Bersikulo 3	Simbolo Ang matag balay nagsakripisyo og usa ka nating karnero	Posible nga mga Kahulogan Ang makatubos nga gahom ni Jesukristo para sa tanan.	Suporta nga mga Kasulatan* 2 Nephi 26:25–28, 33
Bersikulo 5	Simbolo Laki nga nating karnero nga walay lama	Posible nga mga Kahulogan	Suporta nga mga Kasulatan* Juan 1:29; Mga Hebreohanon 5:8–9
Bersikulo 7	Simbolo Dugo gipahid sa mga haligi sa pultahan sa matag balay	Posible nga mga Kahulogan	Suporta nga mga Kasulatan* Mosiah 4:2; Alma 5:21
Bersikulo 8	Simbolo Tinapay nga walay igpapatubo (tinapay nga gihimo nga walay patubo, nga mao ang hinungdan nga ang pan mapan-os ug moagup-op)	Posible nga mga Kahulogan	Suporta nga mga Kasulatan* Juan 6:35, 48, 57–58; 1 Mga Taga-Corinto 5:7–8
Bersikulo 8	Simbolo Pait nga mga utanon	Posible nga mga Kahulogan	Suporta nga mga Kasulatan* Alma 41:11; Doktrina ug mga Pakigsaad 19:18
Bersikulo 11	Simbolo Bat-ang nga binaksan, sapatos nga gisul-ob, sungkod nga naa sa kamot, dinalidali nga pagpangaon	Posible nga mga Kahulogan	Suporta nga mga Kasulatan* Alma 34:32–33

• Pahinumdom: Ang nagsuporta nga mga tudling gituyo aron mahatag ang dugang nga pagtulon-an mahitungod sa mga simbolo nga gigamit sa Pagpalabay ug dili tuyo ang paghatag og klaro kaayo nga mga interpretasyon bahin niini.

Ang mosunod nga mga lagda makatabang nimo aron mas masabtan kon unsaon sa paghubad ang mga simbolo diha sa kasulatan:

• Tinguhaa ang pagsabot sa simbolo nga naa sa konteksto sa tudling.

• Gamita ang mga tabang sa pagtuon, sama sa mga footnote, Ang Giya ngadto sa mga Kasulatan, ug ang Bible Dictionary.

• Susiha kon ang karaan o modernong mga propeta mikomentaryo ba sa mga bersikulo ug sa mga simbolo niini.

• Hinuktoki, pamalandongi, ug pag-ampo mahitungod sa tudling ug sa mga simbolo niini.

Alang sa dugang nga tabang sa pagsabot sa mga simbolo sa ebanghelyo, tan-awa sa Gerald N. Lund, “Understanding Scriptural Symbols,” Ensign, Okt. 1986, 22–27.

Seksiyon 3

Unsa ang ikatudlo ngari nako sa ubang mga simbolo diha sa Daang Tugon mahitungod sa makatubos nga gahom sa Manluluwas?

Si Elder Bruce R. McConkie sa Korum sa Napulog Duha ka Apostoles mitudlo:

Ang matag balaan nga ordinansa o ang pagpahigayon nga giorden sa Dios, ang matag sakripisyo, simbolismo, ug pagkasusama … [gi]establisar … aron sa pagpamatuod kang [Jesukristo] …

Makaayo ug tukma ang pagpangita og mga pagkasusama kang Kristo bisan asa ug sa balikbalik nga paggamit niini aron siya ug ang iyang mga balaod padayon nga anaa sa kinaibabwan sa atong mga hunahuna. (The Promised Messiah: The First Coming of Christ [1978], 28, 453)

Pagtuon agi og Pagpangandam alang sa Klase

Ang Daang Tugon puno sa daghang matahom nga mga simbolo nga nagpamatuod sa makatubos nga gahom sa Manluluwas. Aron mapalawman ang imong pagsabot, basaha ang usa sa mga tudling sa ubos ug dayon pamalandongi ang nagsunod nga mga pangutana nga angayng tun-an.

• Ang Israel nakadawat og tinapay gikan sa langit: Exodo 16:1–4, 14–16, 35 (tan-awa usab sa Juan 6:5–14, 48–51)

• Tubig gikan sa bato: Exodo 17:1–6 (tan-awa usab sa Juan 4:7–15)

• Ang Adlaw sa Pag-ula: Levitico 16:2–6, 17 (tan-awa usab sa Mga Hebreohanon 9:6–12; 10:11–12)

• Ang mga Israelita giluwas gikan sa mga bitin: Mga Numero 21:4–9 (tan-awa usab sa Juan 3:14–15; Alma 33:19–21)

Mga Pangutana sa Pagtuon

• Unsa ang posibling mga simbolo ni Jesukristo (sa laing pagkasulti, unsa nga butang, hitabo, sirkumstansiya, o mga tawo nga gitumong o nagrepresentar Kaniya) dinhi niini nga tudling?

• Unsa kaha ang girepresentar niini nga mga simbolo ug gitudlo kanato mahitungod sa balaan nga misyon ni Jesukristo?

• Sa unsang paagi nga ang pagsabot niini nga mga simbolo makalig-on sa akong hugot nga pagtuo kang Jesukristo ug sa Iyang gahom sa pagluwas kanako?

Gusto pa og Dugang? (Opsiyonal)

Unsa ang dugang nga mga simbolo sa kasulatan diha sa Daang Tugon nga makatabang nako sa pagkat-on og daghan pa bahin ni Jesukristo?

Aniay pipila ka ehemplo sa mga simbolo sa kasulatan nga nagtudlo mahitungod sa Manluluwas:

• Si Abraham nga naghalad sa iyang anak nga si Isaac: Genesis 22:1–13 (tan-awa usab sa Jacob 4:5)

• Si Isaias nga nagdapit niadtong mga giuhaw sa pag-inom: Isaias 55:1–2 (tan-awa usab sa 2 Nephi 9:50–51)

• Si Jonas nga gilamoy sa dakong isda: Jonas 1:17; 2:10 (tan-awa usab sa Mateo 12:38–40)

Ang karaan nga pagsakripisyo og mananap maghatag ba og kapasayloan sa atong sala?

Si Propeta Joseph Smith mitudlo nga ang Manluluwas mao lamang ang tinubdan sa kapasayloan. Ang tigpahigayon sa pagsakripisyo og mananap sa karaang kapanahonan, bisan pa, napahinumdoman niini nga balaang gasa:

Sa pagkatinuod, ang pagpaagas sa dugo sa usa ka mananap dili makahatag og kaayohan sa tawo, gawas kon kini gihimo sa imitasyon, o usa ka timailhan [o simbolo], o pagpasabot sa unsay ihalad pinaagi sa gasa sa Dios Mismo—ug kini nga pagpahigayon himoon sa nagkahiusa nga panan-aw nga may hugot nga pagtuo sa gahom niana nga mahinungdanong sakripisyo alang sa kapasayloan sa mga sala. (Mga Pagtulon-an sa mga Presidente sa Simbahan: Joseph Smith [2007], 57)