Leksiyon 9 Materyal sa Pagpangandam sa Klase

Nagmaya sa Balaang Pagkatawo ni Jesukristo

Ang milagrosong pagkatawo ni Jesukristo usa ka mahimayaong hitabo. Langitnong mga mensahero miawit og mga pagdayeg ngadto sa Dios (tan-awa sa Lucas 2:11–14), kabos nga mga magbalantay sa karnero misimba ni Jesus diha sa pasongan sa mga hayop (tan-awa sa Lucas 2:15–16), ug Maalamong mga Tawo mipasidungog Kaniya og mga gasa (tan-awa sa Mateo 2:11). Ang mga leksiyon diha sa yunit 3 mohatag kaninyo og oportunidad sa paglig-on sa inyong pagsabot sa mortal nga pangalagad ni Jesukristo. Ang Iyang pagkatawo ug ang Iyang kinabuhi sa tinuoray nagdasig og “maayong balita sa dakong kalipay … sa tanang mga tawo” (Lucas 2:10). Hunahunaa ang pagtan-aw sa video “The Nativity [Ang Pagkatawo]” (2:59) aron sa pagpasiugda og paagi sa inyong pagtuon.

Seksiyon 1

Unsaon nga ang pagsabot sa kagikan ni Jesukristo nagdugang sa akong pagsalig diha sa Iyang gahom sa pagluwas kanako?

Sama sa talagsaong mga kinaiya nga inyong napanunod gikan sa inyong mga ginikanan, si Jesukristo talagsaon sa unsay Iyang nadawat gikan sa Iyang mga ginikanan. Diha sa Basahon ni Mormon, gipanagna ni Alma nga ang Manluluwas “matawo kang Maria … siya ingon nga usa ka birhen, usa ka bililhon ug pinili nga tawo … ug [siya mahimong] manganak og usa ka batang lalaki, oo, gani ang Anak sa Dios” (Alma 7:10). Paghunahuna mahitungod kon giunsa sa kagikan sa Manluluwas pagkonektar ngadto sa Iyang abilidad sa paghimo og pag-ula alang sa tanang katawhan.

Magsugod kita sa pagkakita niini nga koneksyon tali sa kagikan sa Manluluwas ug sa Iyang gahom sa pagluwas sa dihang ang anghel Gabriel mipakita ngadto ni Maria ug misulti kaniya nga siya manganak og usa ka bata nga lalaki kinsa paganganlan og Jesus (tan-awa sa Lucas 1:26–31).

Pagtuon agi og Pagpangandam alang sa Klase

Basaha ang Lucas 1:32–35, ug timan-i kon giunsa ni Gabriel paghulagway ang Anak nga Lalaki nga ipanganak ni Maria. Mubo nga Sulat: Ang mga kasulatan nga nagpasabot ngadto sa pagpanamkon kang Jesukristo naghatag og gibug-aton nga Siya mao ang Anak sa Dios apan ayaw ibutyag kon giunsa niini nga milagro pagkahitabo [tan-awa sa Mateo 1:18–20; 1 Nephi 11:15, 18–21; Alma 7:10].)

Sa dihang mipahibalo ang anghel sa pagkatawo ni Jesukristo ngadto sa naduol nga mga magbalantay sa mga karnero, iyang gitudlo ang bata isip ang “Manluluwas, nga mao ang Kristo nga Ginoo” (Lucas 2:11; tan-awa usab sa Lucas 2:9–10). Ang abilidad ni Jesukristo nga mahimong atong Manluluwas posible tungod kay Siya natawo sa usa ka imortal nga Ginikanan (Langitnong Amahan) ug usa ka mortal nga ginikanan (Maria). Tungod sa Iyang mortal nga inahan, si Jesus hingpit nga makasinati og mga sakit, mga kaguol, ug mga tintasyon sa mortalidad (tan-awa sa Mga Hebreohanon 4:15). Kini nga mortal nga mga kasinatian mitugot sa Manluluwas nga “masayod sumala sa unod unsaon pagtabang ang iyang mga katawhan sumala sa ilang mga kahuyang” (Alma 7:12). Tungod sa Iyang imortal nga Amahan, maantos ni Jesus ang tanang mga hagit sa mortalidad.

Tungod sa Iyang mortal nga inahan, si Jesus mamatay. Tungod sa Iyang imortal nga Amahan, Siya makabuntog sa kamatayon.

Pagtuon agi og Pagpangandam alang sa Klase

Basaha ang Juan 10:17–18, ug hunahunaa kon giunsa sa talagsaong kagikan ni Jesukristo mihimo sa Iyang Pag-ula nga posible.

Si Presidente Russell M. Nelson mitudlo:

Ang misyon [ni Jesukristo] mao ang Pag-ula. Kana nga misyon para lang gyod sa Iyaha. Natawo sa usa ka mortal nga inahan ug imortal nga Amahan, Siya ra ang bugtong makahimo sa paghalad sa Iyang kinabuhi ug sa pagbawi niini pag-usab (tan-awa sa Juan 10:14–18). Ang mahimayaong mga sangputanan sa Iyang Pag-ula walay kinutoban ug mahangturon. Iyang gikuha ang ikos sa kamatayon ug gitemporaryo ang kaguol diha sa lubnganan. (“Ang Misyon ug Pangalagad ni Jesukristo,” Liahona, Abr. 2013, 20)

Pamalandong agi og Pagpangandam alang sa Klase

Unsa ang gitudlo niining duha ka kinaiyahan ni Jesukristo kaninyo mahitungod sa Iyang abilidad sa pakiglabot nganha kaninyo sa mortalidad ug sa pagluwas kaninyo sa kahangtoran?

Seksiyon 2

Sa unsang paagi ang pagkatawo ug kinabuhi ni Jesukristo usa ka pagpakita sa Iyang gugma alang kanako?

Paghunahuna sulod sa usa ka minuto kon unsa ka katingalahan nga ang Halangdong Jesus, kinsa milalang sa yuta, moanhi sa yuta isip usa ka walay mahimo nga masuso. Sa usa ka panan-awon, nakita ni Nephi kini nga buhat isip usa ka pahayag sa gugma.

Pagtuon agi og Pagpangandam alang sa Klase

Basaha ang 1 Nephi 11:13–22, ug hunahunaa kon unsa ang ikatudlo sa pagkatawo sa Manluluwas kaninyo mahitungod sa gugma Niya ug sa Iyang Amahan alang kaninyo. (Mubo nga Sulat: Ang pulong nga pagpakig-angay nagpasabot og boluntaryong pagkanaog gikan sa mas taas nga kahimtang ngadto sa mas ubos nga kahimtang o kondisyon. Hunahunaa kon giunsa ang pagpakig-angay nga gihulagway niini nga kasulatan magamit ngadto sa Amahan ug sa Anak.)

Namulong kabahin sa pagpakig-angay ni Jesukristo, si Presidente Tad R. Callister, kanhi Kinatibuk-ang Presidente sa Sunday School, mitudlo:

Gibaylo sa Dios nga Anak ang iyang langitnong panimalay uban sa tanan niining celestial nga mga dayan-dayan alang sa mortal nga pinuy-anan uban sa tanan niining kinaraang mga dayan-dayan. … Gibaylo Niya ang kamandoan sa usa ka dios ngadto sa magsalig ingon sa usa ka batang gamay. … Usa kadto ka pagbinayloay nga dili patas ang paagi. … Ang halangdong Jesus, ang tiglalang sa mga kalibotan nga dili maihap ang gidaghanon, mahangturon sa hiyas ug gahom, mihimo sa iyang pagsulod dinhi niini nga kalibotan nga giputos sa bakbak ug gipahigda sa pasongan sa mga hayop. (The Infinite Atonement [2000], 64)

Nakat-onan pa ni Nephi ang daghan mahitungod sa pagpakig-angay ni Kristo sa dihang iyang nakita sa panan-awon ang Manluluwas nga nangalagad taliwala sa mga katawhan ug nang-ayo sa ilang mga sakit (tan-awa sa 1 Nephi 11:26–31).

Pagtuon agi og Pagpangandam alang sa Klase

Basaha ang 1 Nephi 11:32–33, ug hunahunaa kon unsa ka ubos ang pagpakig-angay sa Manluluwas alang kaninyo (tan-awa usab sa 2 Nephi 26:24).

Si Elder D. Todd Christofferson sa Korum sa Napulog Duha ka Apostoles mitudlo:

Kon atong hisgotan ang pagkatawo ni Jesukristo, tukma natong pamalandongan ang unsay mosunod. Ang Iyang pagkatawo walay kinutoban ang kamakahuluganon tungod sa mga butang nga Iyang masinati ug antuson nga aron Siya mas makatabang kanato––tanan matapos diha sa Iyang Paglansang sa krus ug Pagkabanhaw (tan-awa sa Alma 7:11–12). Apan ang Iyang misyon naglakip usab sa katahom sa Iyang pagserbisyo, ang mga milagro sa Iyang pagpangalagad, ang kahopayan nga Iyang gidala ngadto sa mga nag-antos, ug ang hingpit nga kalipay nga Iyang gitanyag—ug nagtanyag pa gihapon—ngadto sa nagbangotan. (“Pagmalinawon,” Liahona, Dis. 2015, 36)

Hunahunaa ang talagsaong ehemplo nga gihatag alang kanato sa pagpakig-angay sa Manluluwas. Si Bishop Richard C. Edgley, kinsa miserbisyo sa Presiding Bishopric, mipasabot:

Busa unsa ang gipasabot niini alang kanato? Ang atong pagsabot sa pagpakig-angay ni Kristo kinahanglang maglakip lapas pa sa atong mga pagbati sa kahibulong ug lawom nga pasalamat. Isip mga miyembro sa Iyang Simbahan, ingon nga gitawag sa pagrepresentar Kaniya ug sa pagpamatuod Kaniya, ang atong dakong oportunidad mao ang pagpaninguha sa pagsunod Kaniya. …

Sama sa Manluluwas, ang atong labing dako nga kaayohan tingali mahimo pinaagi sa pag-alagad ngadto bisan “sa labing gagmay niining akong mga igsoon” [Mateo 25:40]. Kita kinahanglan gayod maghinumdom nga bisan unsa pa ang kahimtang sa kinabuhi o piho nga calling, ang matag tawo usa ka pinalanggang anak sa Dios, ug ang atoa mao ang pagpangalagad gani bisan ngadto sa labing ubos ug sa pagserbisyo kanila ingon nga ang Agalon moserbisyo kanila. (“The Condescension of God,” Ensign, Dis. 2001, 20, 21)

Irekord ang Inyong mga Hunahuna

Paggahin og pipila ka panahon sa pagbasa o pagpaminaw ngadto sa mga pulong sa usa o dugang pa sa mosunod nga mga himno. Dayon i-rekord ang mga hunahuna ug mga pagbati nga kamo aduna. Hunahunaa nga ang Manluluwas “nakatugkad sa tanan nga mga butang” (Doktrina ug mga Pakigsaad 88:6) aron Siya makaluwas kaninyo. Hunahunaa usab kon unsaon kaha ninyo sa pagsunod sa Iyang ehemplo diha sa inyong pagserbisyo sa uban.

• “O Dios, ang Amahan nga Walay Katapusan” (Mga Himno, nu. 105)

• “’Katam-is nga Kantahon sa Gugma Niya nga Walay Sama” (Mga Himno, nu.101)

• “Jesus sa Nazaret, Hari ug Dios” (Mga Himno, nu.106)

• “Kita sa Dios Gihigugma, Anak Niya Gipadala” (Mga Himno, nu.109)

• “Ginoo Ikaw Matuman” (Mga Himno, nu.110)

• “Ako Nagpabilin nga Natingala” (Mga Himno, nu. 114)

Gusto pa og Dugang? (Mahimong sundon o dili)

Sa unsang paagi ako makakat-on pa og dugang mahitungod sa pagkatawo ni Jesukristo?

Ang mosunod nga mga kasulatan naglangkob og pipila ka panagna ug mga asoy kabahin sa pagkatawo sa Manluluwas:

• Mga panagna sa Daang Tugon: Isaias 7:14; 9:6–7; Miqueas 5:2

• Mga panagna sa Basahon ni Mormon: Mosiah 3:8; Helaman 14:2–5; 3 Nephi 1:15–21

• Jose sa Nazaret nakahibalo nga si Maria manganak sa Anak sa Dios: Mateo 1:18–25

• Ang pagkatawo ni Jesukristo: Lucas 2:1–20

• Ang Maalamong mga Tawo nangita sa batang Kristo: Mateo 2:1–11

Asa pa ako makakat-on og dugang mahitungod ni Maria ug ni Jose?

Aron sa pagbaton og dugang nga panabot mahitungod sa mga kinabuhi ni Maria ug ni Jose, basaha ang “Mary and Joseph [Maria ug Jose]” ni Susan Winters (New Era, Dis. 2006, 28–33). Aron makakat-on pa og dugang mahitungod sa kinabuhi ug ehemplo ni Maria, basaha ang “Si Maria, ang Inahan ni Jesus” ni propesor sa relihiyon sa BYU Gaye Strathearn (Liahona, Ene. 2019, 12–17) o “Following Mary’s Example [Pagsunod sa Ehemplo ni Maria]” ni Becky Craven, Ikaduhang Magtatambag sa Kinatibuk-ang Kapangulohan sa Young Women (New Era, Dis. 2018, 24–27).