Leksiyon 1 Materyal sa Magtutudlo

Pagdawat sa Imbitasyon sa Manluluwas sa Pagkat-on mahitungod Kaniya

Kini nga kurso naghatag og talagsaong oportunidad kanimo ug sa imong mga estudyante nga mapalambo ang inyong hugot nga pagtuo kang Jesukristo ug sa Iyang walay kataposang ebanghelyo. Niini nga leksiyon ang mga estudyante mokonsiderar unsay ilang mahimo aron mas mahingpit ang pagdawat sa imbitasyon sa Manluluwas sa pagkat-on mahitungod Kaniya. Sila usab mokonsiderar sa kaimportante sa pagkat-on og espirituwal nga kamatuoran pinaagi sa pagtuon ug sa hugot nga pagtuo.

Pagpalambo sa Atong Pagtudlo ug Pagkat-on

Gamita sa epektibong paagi ang materyal sa pagpangandam aron madasig sa pagkat-on. Ang materyal sa pagpangandam gidesinyo aron matabangan ang mga magtutudlo ug mga estudyante sa pag-andam aron dungan nga makabaton og makapalig-on nga mga kasinatian sa pagkat-on. Ikonsiderar ang mosunod nga mga tabang:

• Kon posible, kontaka ang mga estudyante nga nagpa-rehistro niini nga kurso sa dili pa ang unang adlaw sa ilang klase, ug dapita sila sa pagbasa sa materyal sa pagpangandam sa dili pa moadto sa klase.

• Tungod kay ang pipila ka estudyante wala pa makadawat daan sa materyal, ipakita nila unsaon sa pag-akses sa digital nga kopya o hatagi sila og inimprinta nga kopya sa materyal sa dili pa nimo sugdan ang imong diskusyon sa klase. Ihatag ang susama nga tabang ngadto sa tagsa-tagsa ka estudyante kinsa sa dili madugay moapil sa imong klase.

• Atol sa mga diskusyon sa klase, gamita ang mga kasinatian sa mga estudyante kauban sa materyal sa pagpangandam. Pangita usab og mga paagi nga magamit ang materyal sa pagpangandam atol sa klase alang niadtong wala daan mangandam.

• Panagsa dapita ang mga estudyante sa pagpaambit kon sa unsang paagi sila napanalanginan pinaagi sa pagtuon sa materyal sa pagpangandam.

Mga Sugyot alang sa Pagtudlo

Si Jesukristo nagdapit sa tanang katawhan sa pagkat-on mahitungod Kaniya.

Pahinumdom: Ang sentro sa misyon sa institute mao ang pagdasig og usa ka palibot diin ang tanan mobati nga luwas, gisuportahan, ug gihatagan og bili. Aron makatabang sa pagmugna og usa ka pagbati sa pagkahisakop, ikonsiderar ang paggahin og pipila ka oras diha sa sinugdanan sa klase nga magkailhanay ang usag usa. Mahimo nga maniid ka og mga paagi sa tibuok nga kurso aron makatabang sa tanang estudyante nga mobati nga gihangop ug gihigugma diha sa imong klase.

Sa pagsugod sa klase, ikonsiderar ang pagpakita og litrato ni Jesukristo ug ang daklit nga pagpaambit sa imong mga pagbati mahitungod Kaniya. Mahimo usab nga moimbitar ka og pipila ka estudyante sa pagpaambit unsay ilang gibati mahitungod sa Manluluwas.

Basaha ang Mateo 11:28–30 ug ang Doktrina ug mga Pakigsaad 19:23 ngadto sa klase, ug pangutan-a ang mga estudyante unsa ang nakadani kanila mahitungod sa mga imbitasyon ug sa mga panalangin nga gisaad. Mahimo nimong hatagan og gibug-aton ang personal ug mahigugmaon nga matang niini nga mga imbitasyon samtang ang mga estudyante motino og usa ka kamatuoran sama sa mosunod: Si Jesukristo nagdapit sa matag usa kanato nga magkat-on mahitungod Kaniya ug mosinati sa Iyang kalinaw.

• Unsa kaha ang buot ipasabot sa pagkat-on diha kang Kristo? (Kon gikinahanglan, dapita ang mga estudyante sa pagrebyo sa kang Elder Kim B. Clark nga pamahayag nga naa sa seksiyon 1 sa materyal sa pagpangandam.)

• Sa imong hunahuna ngano nga ang mga saad sa kalinaw, kapahulayan, ug napagaan nga mga alantoson konektado man sa pagkat-on mahitungod ni Jesukristo? Sa unsang mga paagi nimo nasinati kini nga mga matang sa mga panalangin?

Mahimo nimong isulat sa pisara ang mga pulong nga Ebanghelyo = Maayong mga Balita. Dayon dapita ang mga estudyante sa pagbasa sa 3 Nephi 27:13–16, 20–21 ug hisgoti ang mosunod nga mga pangutana nga managpares o diha sa ginagmay nga mga grupo.

• Sumala sa Manluluwas, unsa ang mahinungdanong mga kamatuoran sa ebanghelyo? Ngano nga kini nga mga kamatuoran usa man ka maayong mga balita? (Mahimo nimong rebyohon ang pamahayag ni Elder Jeffrey R. Holland nga naa sa seksiyon 1 niini nga materyal sa pagpangandam.)

• Sa unsang mga paagi nga ang pagkat-on ug pagsunod sa ebanghelyo nakatabang nimo sa pagkat-on bahin sa Manluluwas ug pagkahimong mas mahisama Kaniya?

Ang Ginoo nagtudlo kanato unsaon sa pagkat-on og espirituhanong kamatuoran.

Aron matabangan ang mga estudyante nga makapamalandong sa kamahinungdanon kon unsaon nga kita makakat-on og espirituwal nga kamatuoran mahitungod ni Jesukristo ug sa Iyang ebanghelyo, mahimo nimong ipresentar ang mosunod nga senaryo:

Si Chloe, nga imong higala, siyentipikanhon og panghunahuna. Ingon og kanunay siyang magkinahanglan og pruweba sa tanang butang sa dili pa siya motuo niini. Tungod kay siya nahibalo nga ikaw mituo ni Jesukristo, nangutana siya kon unsaon nga siya makahibalo nga Siya tinuod gayod. Unsaon nimo sa pagtubag?

Mahimo kang modapit og mga estudyante nga mopaambit sa ilang tubag kauban sa kapares, ug dayon hisgotan diha sa klase ang mga limitasyon sa pagsalig sa siyentipikanhong paagi sa pagkat-on mahitungod sa Manluluwas. (Mahimo nimong ipaambit ang kang Elder Paul V. Johnson nga pamahayag nga naa sa seksiyon 2 sa materyal sa pagpangandam.) Aron mapalawman ang inyong diskusyon, ikonsiderar nga ipangutana ang usa o mas daghan sa mosunod nga mga pangutana:

• Unsa ang paagi sa Ginoo sa pagkat-on sa espirituwal nga kamatuoran? (Ikonsiderar ang pagbasa sa Doktrina ug mga Pakigsaad 88:118.)

• Unsay buot ipasabot sa pagkat-on pinaagi sa hugot nga pagtuo? (Tingali makatabang ang pagrebyo sa kang Presidente Russell M. Nelson nga pamahayag nga naa sa seksiyon 2 sa materyal sa pagpangandam. Mahimo usab nga tabangan nimo ang mga estudyante sa pagtino og usa ka kamatuoran nga susama niini: Samtang kita maningkamot sa pagkat-on sa ebanghelyo pinaagi sa paglihok inubanan sa hugot nga pagtuo, ang atong hugot nga pagtuo kang Jesukristo molambo.)

• Unsa ang pipila ka ehemplo sa mga tawo diha sa kasulatan o mga tawo nga imong nailhan kinsa nagkat-on pinaagi sa paglihok inubanan sa hugot nga pagtuo? Paggahin og usa ka minuto ug paghunahuna og usa ka panahon sa dihang ikaw nakakat-on og usa ka butang mahitungod ni Jesukristo tungod kay ikaw milihok inubanan sa hugot nga pagtuo. Unsay imong nakat-onan mahitungod Kaniya?

Mahimo nimong hatagan ang mga estudyante og pipila ka minuto sa pagpamalandong ug pagrekord sa unsay ilang ganahan kaayong makat-onan mahitungod sa Manluluwas atol niini nga kurso ug kon unsaon nga sila makapalambo sa ilang abilidad sa pagkat-on mahitungod Kaniya. Awhaga sila sa pagsulat sa ilang mga tumong. Pangita og mga oportunidad nga marebyo sa mga estudyante ang ilang mga tumong sa moabot nga mga semana.

Pagpalambo sa Atong Pagtudlo ug Pagkat-on

Pakigsultihi ang mga estudyante sa gawas sa klase. Aron matimbang-timbang ang panginahanglan sa mga estudyante ug makadasig kanila sa pagtuon sa materyal sa pagpangandam, tingali makapangita ka og mga paagi sa pagpakigsulti nila pinaagi sa pagpadala og mensahe. Mahimo nimong gamiton ang mga sugyot nga naa sa seksiyon nga gitawag og “Alang sa Sunod nga Higayon” o magdesinyo og imong kaugalingon nga mensahe.

Alang sa Sunod nga Higayon

Awhaga ang mga estudyante samtang sila magtuon alang sa sunod nga klase sa pagpangita kon unsay gikatudlo ngari kanato sa lainlaing mga ngalan ni Jesukristo mahitungod Kaniya. O puwedeng dapiton nimo ang mga estudyante sa pagpamalandong nganong giisip man nato ang Manluluwas nga mao ang “buhi nga Kristo.”