Leksiyon 2 Materyal sa Magtutudlo: Pagpalig-on sa Atong Pagpamatuod sa Buhi nga Kristo

“Leksiyon 2 Materyal sa Magtutudlo: Pagpalig-on sa Atong Pagpamatuod sa Buhi nga Kristo,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo (2023)

“Leksiyon 2 Materyal sa Magtutudlo,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo

Leksiyon 2 Materyal sa Magtutudlo

Pagpalig-on sa Atong Pagpamatuod sa Buhi nga Kristo

Niadtong Enero 1, 2000, ang Unang Kapangulohan ug ang Korum sa Napulog Duha ka Apostoles mimantala sa ilang pagpamatuod sa kabalaan ni Jesukristo sa usa ka dokumento nga gitawag og “Ang Buhi nga Kristo: Ang Pagpamatuod sa mga Apostoles” (anaa sa ChurchofJesusChrist.org). Dinhi niini nga leksiyon ang mga estudyante adunay oportunidad nga makapasabot sa kahulogan sa sagradong titulo ni Kristo ug sa pagpaambit kon sa unsang paagi nga ang ilang hugot nga pagtuo malig-on pinaagi sa mainampoong pagtuon sa “Ang Buhi nga Kristo.”

Mga Sugyot alang sa Pagtudlo

Si Jesus mao ang Kristo.

Pagpalambo sa Atong Pagtudlo ug Pagkat-on

Magpokus sa pagkakabig, dili sa paghurot og tudlo sa materyal. Komon lang nga mobati og kahingawa mahitungod sa pagtiwas sa tibuok nga materyal sa usa ka leksiyon. Kon mobati ka man og ingon niini, ikonsiderar ang pagporma og usab sa imong hunahuna aron makapokus kon unsay gisinati sa imong mga estudyante diha sa ilang mga hunahuna ug kasingkasing. Ang mga estudyante ba adunay panahon nga ilang gikinahanglan aron maghunahuna ug mobati mahitungod sa kahulogan niini nga mga kamatuoran nga ilang gikat-onan? Hinumdomi kanunay ang maalamong tambag gikan ni Presidente Dallin H. Oaks nga, “Dili nato mapugos ang espirituhanong mga butang” (“Sa Iyang Kaugalingong Panahon, sa Iyang Kaugalingong Paagi,” Liahona, Ago. 2013, 24).

Dapita ang mga estudyante sa pagpangita og pipila ka ehemplo gikan sa nailhan sa moral ug espirituwal nga mga lider sa tibuok kasaysayan. (O puwede kang maghimo og kaugalingon nimong mga sanglitanan.) Hisgoti sa daklit kon sa unsang paagi nga kini nga katawhan nakaimpluwensiya sa kalibotan alang sa kaayohan. Mahimo dayon nimong ipakita ang usa ka litrato ni Jesukristo ug mangutana:

Sa unsang paagi nga si Jesukristo talagsaon tali sa mga tawo nga nailhan sa moral ug sa espirituwal nga mga lider?

Dapita ang mga estudyante sa pagrebyo sa Mateo 16:13–17.

1:30

Unsa ang mahangtoron nga kahulogan mahitungod sa pag-ingon ni Pedro ngadto kang Jesus nga, “Ikaw [ba] mao ang Kristo, ang Anak sa Dios nga buhi”? (Mateo 16:16). (Tingali makatabang nga marebyo sa mga estudyante ang unsay ilang nakat-onan sa seksiyon 1 sa materyal sa pagpangandam. Ang mga estudyante tingali mopahayag sa mga kamatuoran sama sa mosunod: Si Jesus mao ang Kristo, ang usa nga dinihogan o Mesiyas. Nagrepresentar Siya sa Amahan ug mao lamang ang paagi nga kita maluwas.)
Unsa ang imong hunahuna mahitungod sa kaimportante sa pag-angkon ug pagpalig-on sa imong personal nga pagpamatuod nga si Jesus mao ang Kristo? (Mahimo nimong dapiton ang pipila ka estudyante sa pagpaambit kon giunsa nila sa pag-angkon ang ilang pagpamatuod nga si Jesus mao ang Kristo.)

Pagpalambo sa Atong Pagtudlo ug Pagkat-on

Gamita ang mga tabang sa pagtuon. Ang Mga Tabang sa Pagtuon, nga anaa sa Mga Kasulatan nga seksiyon sa Gospel Library, naglakip og mga kapanguhaan sama sa Ang Giya ngadto sa mga Kasulatan, mga giya nga pakisayran sa Biblia ug sa Basahon ni Mormon, sa Bible Dictionary, ug sa Topical Guide. Kini nga mga kapanguhaan mikuha gikan sa sumbanang mga kasulatan aron matabangan ang mga magbabasa sa pagkat-on mahitungod sa piho nga hilisgotan. Samtang magtuon ang mga estudyante subay sa hilisgotan, tabangi sila nga makakita sa kaimportante sa pagsabot sa konteksto ug sa sulod sa mga tudling sa kasulatan aron matabangan sila nga makadiskobre sa tuyo sa dinasig nga tagsulat.

Pahinumdomi ang mga estudyante nga agig pagpangandam sa klase sila dapiton sa pagpangita sa “Jesukristo” diha sa Ang Giya ngadto sa mga Kasulatan ug pagtino sa sagradong mga ngalan, titulo, ug mga tahas nga gihatag alang sa Ginoo. Hatagi ang mga estudyante og pipila ka minuto sa pagrebyo sa unsay ilang nakit-an. Ang mga estudyante dayon mopaambit sa unsay ilang nadiskobrehan ngadto sa klase o sa ginagmay nga grupo. Kon sa imong hunahuna makapalambo kini sa pagkat-on sa imong mga estudyante, mahimo nimong ipakita ug dapiton sila sa pagtubag sa usa o duha sa mosunod nga mga pangutana:

Unsa nga mga pagbati ang moabot sa imong kasingkasing kon maghunahuna ka mahitungod ni Jesukristo isip [isukip ang ngalan, titulo, o tahas]?
Sa unsang paagi nga ang pagkaila kang Jesukristo isip [isukip ang ngalan, o titulo, o tahas] makaimpluwensiya sa imong hugot nga pagtuo Kaniya?

Mahimo nimong awhagon ang mga estudyante sa pagpili ug pagtuon sa ngalan, titulo, o tahas ni Jesukristo nga gusto nilang makat-onan pa og dugang.

Ang Apostoles sa Ginoo mga espesyal nga mga saksi nga Siya mao ang Kristo.

Hunahunaa ang pagdapit sa mga estudyante sa pagpaambit kon unsa ka komon nga ang ilang mga higala mituo ni Jesukristo. Mahimo usab nga dapiton nimo sila sa pagpaambit unsay ilang nadungog bag-ohay lang mahitungod sa Manluluwas diha sa social media o sa sikat nga pasundayag.

Basaha og dungan ang Doktrina ug mga Pakigsaad 107:23, ug ikonsiderar ang pagsulat sa pisara sa mosunod nga pamahayag: Si Jesukristo mitawag og Apostoles nga mahimong espesyal nga mga saksi Kaniya sa tibuok kalibotan. Dayon ipangutana:

Sa imong tan-aw, ngano kaha nga ang mga pagpamatuod sa tinawag nga Apostoles sa Ginoo importante kaayo sa atong panahon?
Sa unsang paagi kining espesyal nga mga saksi nakalig-on sa imong pagpamatuod kang Jesukristo? (Tingali makatabang ang pagdapit og pipila ka estudyante sa pagpaambit unsay ilang nakat-onan o gibati samtang nagtan-aw sila sa “Special Witnesses of Christ” nga mga video gikan sa seksiyon 2 sa materyal sa pagpangandam. Mahimo ninyong tan-awon og dungan isip usa ka klase ang usa sa ilang mga paborito.)

Pahinumdomi ang mga estudyante nga niadtong Enero 1, 2000, ang Unang Kapangulohan ug ang Korum sa Napulog Duha ka Apostoles mipaambit sa ilang pagpamatuod mahitungod sa Manluluwas diha sa “Ang Buhi nga Kristo.” Hatagi ang mga estudyante og kopya sa dokumento, o dapita sila sa pag-abli niini diha sa ilang elektronik nga mga device.

2:45

Aron matabangan ang mga estudyante nga mapalawman pa ang ilang pagpasalamat alang sa dokumento nga “Ang Buhi nga Kristo,” paapila sila sa mosunod nga kalihokan. Dapita sila sa pagtrabaho nga may kapares, ug hatagi ang matag estudyante og usa sa mga handout nga naa sa ubos. Siguroa nga ang mga estudyante adunay daghang oras sa pagrebyo ug pagpaambit sa usag usa sa unsay ilang nakita diha sa “Ang Buhi nga Kristo.”

Mga Mensahe alang sa Atong Panahon diha sa “Ang Buhi nga Kristo”

Materyal sa Magtutudlo alang sa Si Jesukristo ug ang Iyang Walay Kataposang Ebanghelyo—Leksiyon 2

Si Elder Robert D. Hales sa Korum sa Napulog Duha ka Apostoles mitudlo:

“Ang Buhi nga Kristo: Ang Pagpamatuod sa mga Apostoles” giandam nang daan alang sa panahon diin kita mas nagkinahanglan niini. (“Kinatibuk-ang Komperensiya: Paglig-on sa Pagtuo ug Pagpamatuod,” Liahona, Nob. 2013, 7)

Rebyoha ang “Ang Buhi nga Kristo” alang sa mga mensahe diin gibati nimo nga gikinahanglan kaayo sa atong panahon. Pangandam sa pagpaambit sa unsay imong nakita kauban sa imong kapares sa pagtuon.

Paghisgot pa og Daghan mahitungod ni Jesukristo

Materyal sa Magtutudlo alang sa Si Jesukristo ug ang Iyang Walay Kataposang Ebanghelyo—Leksiyon 2

Si Elder Neil L. Andersen sa Korum sa Napulog Duha ka Apostoles miingon:

Samtang ang kalibotan maghisgot og gamay ni Jesukristo, maghisgot kita og daghan bahin Kaniya. Samtang ang atong tinuod nga kinaiya isip Iyang mga disipulo mapadayag, daghan sa naglibot nato ang maandam sa pagpaminaw. (“Kita Naghisgot kang Kristo,” Liahona, Nob. 2020, 90)

Rebyoha ang “Ang Buhi nga Kristo” alang sa mga mensahe nga gibati nimo nga importanting mapaambit sa kalibotan nga naghisgot og diyotay bahin ni Jesukristo. Pangandam sa pagpaambit sa unsay imong nakita kauban sa imong kapares sa pagtuon.

Sa pagtapos sa klase, dapita ang mga estudyante sa pagpaambit kon sa unsang paagi nga ang ilang hugot nga pagtuo kang Jesukristo nalig-on o malig-on pinaagi sa pagtuon sa “Ang Buhi nga Kristo.” Hatagi sila og panahon nga makahimo og tumong sa unsay ilang mabuhat aron mapalambo ang ilang pagpamatuod kang Jesukristo pinaagi sa dugang nga pagtuon o pagmemorya niining dinasig nga dokumento.

Alang sa Sunod nga Higayon

Ikonsiderar ang pagpadala sa imong mga estudyante sa dili pa ang sunod nga klase sa mosunod nga pagtulon-an o usa nga lahi nga imong gibati nga makapadasig sa ilang interes: Samtang imong tun-an ang materyal sa pagpangandam leksiyon 3, ikonsiderar nganong gipili nimo ang pagsunod ni Jesukristo didto sa kinabuhi nga wala pa dinhi sa yuta.