Leksiyon 10 Materyal sa Magtutudlo

Pagsunod sa Ehemplo ni Jesukristo sa Pagnunot

Si Jesukristo mianhi sa yuta sa pagbuhat sa kabubut-on sa Iyang Amahan (tan-awa sa Juan 5:19). Niini nga leksiyon ang mga estudyante makahimo sa paghunahuna kon giunsa sa hingpit nga ehemplo sa Manluluwas sa pagnunot may kalabot ngadto sa balaang mga hiyas sa pagkamapainubsanon ug pagkamaaghop. Ang mga estudyante mohunahuna usab kon unsa ang ilang mahimo sa pagpatigbabaw sa Dios sa mas hingpit nga paagi diha sa ilang mga kinabuhi.

Mga Sugyot alang sa Pagtudlo

Si Jesukristo misunod sa kabubut-on sa Langitnong Amahan sa tanang butang.

Hunahunaa ang pagpakigbahin sa mosunod nga hitabo:

Bag-o pa lamang ang pagtawag ni Lucas nga mahimong presidente sa elders korum. Human modawat sa tawag, nangutana siya sa bishop, “Unsa ang akong buhaton nga mahimong usa ka tinuod nga lig-ong lider, usa nga ang mga tawo gustong mosunod?” Ang bishop mihunong sa makadiyot ug dayon nag-ingon, “Magpaubos ug magmaaghop.” Nagpasalamat si Lucas sa bishop alang sa iyang tambag, apan mibiya siyang magul-anon nga ang pagkamapainubsanon ug pagkamaaghop tingali mohimo kaniyang tan-awon sama sa usa ka huyang nga lider.

• Unsa ang posibleng wala masabti ni Lucas mahitungod sa mga hiyas sa pagkamapainubsanon ug pagkamaaghop?

• Kon ibale-wala ni Lucas ang tambag sa bishop, unsa nga matang sa lider siya tingali mamahimo?

Hunahunaa ang pagpakita sa mosunod nga pagpatin-aw sa pagkamapainubsanon ug pagkamaaghop gikan ni Elder David A. Bednar, ug hisgoti kon giunsa kini sa pagpakiglabot ngadto sa pagnunot sa atong kabubut-on ngadto sa Dios:

Ang pagkamapainubsanon kasagaran nagpasabot og pagsalig diha sa Dios ug sa kanunay nagkinahanglan alang sa Iyang giya ug suporta. …

Ang kaaghop … mailhan pinaagi sa matarong nga pagtubag, andam sa pagkamanunuton, ug lig-on sa pagpugong sa kaugalingon. (“Maaghop ug Mapaubsanon sa Kasingkasing,” Liahona, Mayo 2018, 32)

Hunahunaa ang pagpakita sa hulagway ni Jesukristo nga nag-ampo diha sa Tanaman sa Getsemani. Dapita ang mga estudyante sa pagbasa sa Lucas 22:39–44 ug pangita alang sa unsay gitudlo niini nga kasinatian kanato mahitungod sa pagnunot. Mahimo usab kamong mangutana:

• Unsa ang ubang mga ehemplo gikan sa kinabuhi sa Manluluwas nga nagtudlo kanato mahitungod sa pagkamapainubsanon, pagkamaaghop, ug pagnunot? (Kon kini motabang sa mga estudyante, kamo makapakita og dugang nga mga hulagway gikan sa kinabuhi sa Manluluwas nga may kalabot ngadto sa pagnunot. Mahimo usab ninyong rebyohon ug hisgotan ang pamahayag ni Elder David A. Bednar diha sa seksiyon 1 sa materyal sa pagpangandam.)

• Sa unsa nga mga paagi kitang tanan napanalanginan tungod kay si Jesus minunot sa Iyang kabubut-on ngadto sa Amahan? Mahimo usab ninyong ipakita ang mosunod nga kamatuoran: Si Jesukristo “mituman sa kabubut-on sa Amahan sa tanan nga mga butang gikan sa sinugdanan” (3 Nephi 11:11).)

• Sa unsang paagi kamo ug ang mga tawo sa inyong kinabuhi mapanalanginan kon kamo mas manunuton ngadto sa kabubut-on sa Dios? (Kamo mahimong makadapit og mga estudyante sa paggahin og pipila ka minuto sa pag-ila sa hilom nga paagi ug sa pagsulat og usa ka butang nga sila makabuhat nga mahimong manunuton ngadto sa kabubut-on sa Dios.)

Tingali kini makatabang og kadiyot sa paghinumdom og usab sa hitabo ni Lucas ug sa pagdapit sa mga estudyante sa pagpakigbahin kon unsaon ni Lucas ug sa iyang korum nga mapanalanginan kon siya mosunod sa tambag sa bishop nga magpaubos ug magmaaghop nga lider.

Ang mga tawo sa pakigsaad motugot nga ang Dios magpatigbabaw sa ilang mga kinabuhi.

Ang mga estudyante makarebyo sa pamahayag ni Presidente Russell M. Nelson diha sa seksiyon 3 sa materyal sa pagpangandam ug sa daklit hisgoti ang kaimportante sa pulong andam. Mahimo kamong mopamatuod nga kita mahimong katawhan sa Ginoo kon andam kitang mopili sa pagpatigbabaw sa Dios sa atong mga kinabuhi.

Pagpalambo sa Atong Pagtudlo ug Pagkat-on

Awhaga ang mga estudyante sa pagpakigbahin kon unsa ang ilang nakat-onan. Kon ang mga estudyante hatagan og mga oportunidad sa pagpakigbahin sa ilang mga hunahuna, mga pagbati, ug mga panghunahuna ngadto sa uban, kini makatabang kanila sa paglig-on sa ilang pagpamatuod, makadugang sa ilang abilidad sa pagsulti sa mga kamatuoran sa ebanghelyo ug makadugang sa ilang pagsalig sa pagsulti mahitungod sa ebanghelyo diha sa ubang mga sitwasyon.

Sa pagtabang sa mga estudyante sa paghunahuna og lainlaing mga paagi kita makapatigbabaw sa Dios diha sa atong mga kinabuhi, kamo makapakita sa mosunod nga mga panudlo o makahatag kanila og hand-out.

Ipatigbabaw ang Dios Labaw sa Tanan

Materyal sa Magtutudlo alang sa Si Jesukristo ug ang Iyang Walay Kataposang Ebanghelyo—Leksiyon 10

Igahin ang mosunod nga pipila ka minuto sa pag-andam og mubo nga hunahuna mahitungod sa pagnunot sa kabubut-on sa Dios. Ang imong hunahuna kinahanglan nga maglakip og ehemplo sa pagnunot gikan sa mga kasulatan o sa inyong kinabuhi o kinabuhi sa usa ka tawo nga inyong nailhan. Kini mahimo usab nga maglakip kon unsaon nga kita makagamit niana nga ehemplo diha sa atong mga kinabuhi. Hunahunaa ang paggamit og usa sa mosunod nga mga kapangohaan samtang kamo nag-andam:

• Seksiyon 2 sa materyal sa pagpangandam, nga naghisgot sa paghimo ug pagsunod sa pakigsaad

• Usa sa mga asoy sa kasulatan (ni Naaman, Maria, o Enoc) nga makaplagan diha sa seksiyon 3 sa materyal sa pagpangandam

© 2023 by Intellectual Reserve, Inc. All rights reserved.

Ipatigbabaw ang Dios Labaw sa Tanan

Materyal sa Magtutudlo alang sa Si Jesukristo ug ang Iyang Walay Kataposang Ebanghelyo—Leksiyon 10

Human ang mga estudyante adunay igong panahon sa pag-andam, dapita sila sa pagporma og gagmay nga mga grupo. Ang gidak-on sa grupo kinahanglang magpakita sa gidak-on sa oras nga nahibilin sa klase. Kon mas gamay na lang ang nahibilin sa oras, mas gamay usab ang grupo. Kini motabang sa pagsiguro nga ang tanang mga estudyante makapakigbahin sa ilang mga hunahuna.

Sa dili pa mahuman ang klase, kamo makahatag sa mga estudyante og pipila ka minuto sa pagpamalandong og hilom ug sa pagrekord sa ilang mga hunahuna mahitungod niini nga pangutana sa seksiyon 3 sa materyal sa pagpangandam: Unsa ang usa ka butang nga inyong gibati nga inyong kinahanglang sugdan o hunongon sa pagbuhat aron mopatigbabaw ang Dios sa mas hingpit nga paagi sa inyong kinabuhi?

Alang sa Sunod nga Higayon

Sa pag-awhag og pagpangandam sa estudyante alang sa sunod nga klase, hunahunaa ang pagpadala sa mosunod nga mensahe sulod sa semana: Si Presidente Dallin H. Oaks sa Unang Kapangulohan miingon, “Ang pagtambong ug ang pagkaaktibo diha sa usa ka simbahan motabang kanato nga mahimong mas maayo nga mga tawo ug mas maayong mga impluwensiya sa mga kinabuhi sa uban.” (“Ang Panginahanglan alang sa usa ka Simbahan,” Liahona, Nob. 2021, 24). Samtang inyong tun-an ang materyal sa pagpangandam alang sa leksiyon 11, pangita alang sa lainlaing mga paagi nga ang pagsimba makapanalangin sa inyong kinabuhi ug sa mga kinabuhi sa inyong pamilya ug mga higala.