Leksiyon 20 Materyal sa Magtutudlo

Pagkaplag sa Akong Luna diha sa Panon sa Maayong Magbalantay

Si Elder Gerrit W. Gong mitudlo nga ang Maayong Magbalantay “mangita ug mopundok kanato” ug “motudlo kanato kon unsaon sa pagpangalagad diha sa gugma” (“Maayong Magbalantay, Kordero sa Dios,” Liahona, Mayo 2019, 97). Niini nga leksiyon, ang mga estudyante maghisgot sa kaimportante sa pagkahibalo nga ang Maayong Magbalantay nagpangga sa tanang tawo. Ang mga estudyante makakat-on usab sa kaimportante sa pagpalambo og usa ka kasingkasing sa magbalantay aron sila makapangita ug makatabang sa pagpabalik sa nawala nga mga karnero sa Ginoo.

Mga Sugyot alang sa Pagtudlo

Si Jesukristo mao ang Maayong Magbalantay.

Mahimo nimong sugdan ang klase pinaagi sa pagpakita sa nag-uban nga mga hulagway sa mga magbalantay sa karnero ug mga karnero.

Hisgoti og kadali ang kalainan tali sa usa ka magbalantay sa karnero ug sa usa ka sinuholan (tan-awa sa seksiyon 1 sa materyal sa pagpangandam).

Tingali makatabang ang pagpakita usab sa imahe ni Jesukristo nga naghulagway isip ang Maayong Magbalantay gikan sa sinugdanan sa materyal sa pagpangandam sa klase ug sa pagsulat diha sa pisara sa mosunod nga dili kompletong pamahayag: Ang Maayong Magbalantay …

Dapita ang mga estudyante sa pagrebyo nga magkauban o diha sa ginagmay nga mga grupo Juan 10:11, 14–16; Salmo 23:1–4; 3 Nephi 18:28–31 ug sa pagpangita og mga paagi aron kompletohon ang pamahayag diha sa pisara. Human sa paghatag og panahon alang sa mga panaghisgot diha sa ginagmay nga grupo, mahimo nimong ipasulat sa pipila ka estudyante ang ilang kompleto nga mga pamahayag diha sa pisara. Ang ilang mga pamahayag mahimong maglakip sa mga kamatuoran nga susama sa mosunod: Ang Maayong Magbalantay motugyan sa Iyang kinabuhi alang sa Iyang mga karnero. Ang Maayong Magbalantay nakaila ug inihap ang Iyang mga karnero. Ang Maayong Magbalantay moatiman, mogiya, ug manalipod sa Iyang mga karnero.

Samtang ang mga estudyante moila og mga kamatuoran mahitungod sa Maayong Magbalantay, hunahunaa kon hain sa mosunod nga mga pangutana ang imong ipangutana aron sa pagtabang nga mapalawman ang ilang gugma ug pagpasalamat alang Kaniya:

• Ngano nga importante man nga masabtan nga ang Manluluwas nakaila ug inihap ang Iyang mga sumusunod? Unsay imong mga hunahuna ug mga pagbati samtang namalandong ka nga ang Maayong Magbalantay mitugyan sa Iyang kinabuhi alang sa matag usa kanato?

Imong papilion ang mga estudyante og usa sa mga hugpong sa mga pulong diha sa Salmo 23:1–4 (sama sa “lunhawng sibsibanan,” “tin-aw nga katubigan,” “gitultolan niya ako,” “dalan nga angay kong subayon,” o “gipanalipdan mo ako pinaagi sa imong sungkod ug bunal”) ug dapita sila sa pagpaambit kon unsay gitudlo ngari kanato niining mga hugpong sa mga pulong mahitungod sa Maayong Magbalantay.

• Unsa ang pipila ka paagi nga imong gibati ang gugma ug pagpakabana sa Maayong Magbalantay alang nimo? Giunsa ka Niya pagtabang sa lisod nga panahon?

Mahimo nimong basahon, kantahon, o paminawon ang bersyon sa himno sa “Ang Dios ang Akong Magbalantay” (Mga Himno, nu. 61). (Ikonsiderar ang pagpakita sa mga pulong.) Dapita ang mga estudyante sa paghunahuna og mga panahon nga ang Ginoo nagbantay kanila.

Ang Maayong Magbalantay nagdapit sa tanang tawo ngadto sa Iyang panon.

Ikonsiderar ang pagpakita sa hulagway ni Pedro ug sa Manluluwas (tan-awa sa seksiyon 2 sa materyal sa pagpangandam) diha sa baybayon sa Dagat sa Galilea ug sa pagdapit sa usa ka estudyante sa pagpasabot kon unsay nanghitabo. Tingali makatabang ang pagbasa sa Juan 21:15–17 ug ang paghisgot sa mosunod nga pangutana:

• Unsay imong nakit-an nga mahinungdanon mahitungod sa mensahe sa Manluluwas ngadto ni Pedro? (Mahimo nimong isulat ang mosunod nga baroganan diha sa pisara: Kita nagpakita sa atong gugma alang sa Manluluwas pinaagi sa pag-atiman sa Iyang mga karnero.)

Ikonsiderar nga marebyo uban sa mga estudyante ang pamahayag ni President Bonnie H. Cordon diha sa seksiyon 2 sa materyal sa pagpangandam.

• Sa imong hunahuna unsa ang ipasabot sa pagbaton og usa ka “kasingkasing sa magbalantay”?

Pagpalambo sa Atong Pagtudlo ug Pagkat-on

Tinguhaa nga maapil ang tanang estudyante. Aron mahisama sa Manluluwas kita kinahanglan nga motabang sa tanang estudyante, dili igsapayan ang ilang kaaktibo sa Simbahan, gidak-on sa ilang hugot nga pagtuo, mga pagpili sa kinabuhi, panagway, o pagsabot sa ebanghelyo. Samtang magdumala ka og mga panaghisgotan, paningkamoti nga makamugna og palibot nga adunay gugma ug pagsalig aron ang matag estudyante mobati nga sila gikinahanglan ug mahimong makapaambit sa ilang mga hunahuna, mga pagbati, ug talagsaon nga mga ideya.

Ikonsiderar ang pagpaambit sa mosunod nga sitwasyon o usa nga imong kaugalingon aron sa pag-aghat og panaghisgotan sa klase:

Gihangyo ka nga mangalagad ni Jake. Gikontak nimo siya pinaagi sa social media, mihangyo nga makigkita niya. Siya mitubag sa mosunod nga mensahe: “Dili na kinahanglan nga mobisita pa ka nako. Misulay ko sa pag-adto sa ward sa miaging tuig ug dili ko komportable. Dili ko angayan o morag wala ko nahisakop sa simbahan. Dili na kinahanglan nga mag-usik ka sa imong panahon nako.”

Dapita ang pipila ka estudyante sa pagpaambit kon unsaon nila pagtubag si Jake. Isip kabahin sa panaghisgotan, mahimo nimong ipangutana ang pipila sa mosunod nga mga pangutana:

• Unsa kaha ang ipasabot niini nga sitwasyon nga magbaton og usa ka kasingkasing sa magbalantay?

• Sa unsang paagi nga ang sambingay sa nawala nga karnero may kalabotan niini nga sitwasyon? (Ikonsiderar ang pagrebyo sa Lucas 15:4–7 ug ang pamahayag ni Elder Gary E. Stevenson diha sa seksiyon 2 sa materyal sa pagpangandam.)

• Sa unsang mga paagi nga kita mamahimong “nawala nga karnero”? Kon ikaw mibati nga nawala, unsay gibuhat sa uban sa pagtabang nimo nga makabalik? Kon ikaw sa kasamtangan mibati nga nawala, unsa man ang labing kinahanglanon nimo gikan sa mga miyembro sa Simbahan? (Kon makatabang sa imong mga estudyante, mahimo nimo silang hangyoon sa pagporma og ginagmay nga mga grupo ug ipapangita nila sa seksiyon 3 sa materyal sa pagpangandam ang mga baroganan nga makatabang sa usa ka tawo nga mas mobati nga nahisakop sa ilang ward o branch.)

• Unsay imong nakat-onan mahitungod sa Manluluwas samtang mitabang ka niadtong nawala o mibati nga sila wala nahisakop?

Hatagi ang mga estudyante og pipila ka minuto sa pagpamalandong kon unsay ilang mahimo sa pagtabang sa uban nga mobati nga bililhon, gikinahanglan, ug nalakip diha sa panon sa Ginoo. Awhaga ang mga estudyante nga irekord ug lihokon ang ilang mga impresyon.

Sa pagtapos, mahimo nimong ipaambit ang imong mga pagbati alang sa Maayong Magbalantay o dapiton ang usa ka estudyante sa pagpaambit sa iyang mga pagbati alang Kaniya.

Alang sa Sunod nga Higayon

Nianang semanaha mahimo nimong ipadala ang mosunod nga mensahe, o usa nga imong kaugalingon, ngadto sa mga estudyante. Samtang magtuon ka sa leksiyon 21, hunahunaa ang imong gibuhat o buhaton sa matag adlaw aron makadungog sa tingog sa Ginoo.