“Leksiyon 23 Materyal sa Pagpangandam sa Klase: Pagpuyo uban ang Paglaom samtang Kita Mangandam alang sa Ikaduhang Pag-anhi ni Jesukristo,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo (2023)
“Leksiyon 23 Materyal sa Pagpangandam sa Klase,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo
Leksiyon 23 Materyal sa Pagpangandam sa Klase
Pagpuyo uban ang Paglaom samtang Kita Mangandam alang sa Ikaduhang Pag-anhi ni Jesukristo
Pipila sa mga katawhan nagtan-aw sa Ikaduhang Pag-anhi sa Ginoo uban ang kahadlok ug kabalaka. Ang uban nagpaabot niini sa malipayong paagi. Si Elder Neil L. Andersen sa Korum sa Napulog Duha ka Apostoles mingon, “Walay makadasig sa akong tinguha sa pagpamulong bahin ni Kristo labaw pa kay sa paghanduraw sa Iyang pagbalik” (“Kita Naghisgot Kang Kristo,” Liahona, Nob 2020, 91). Samtang kamo magtuon, hinuktoki ang inyong mga pagbati mahitungod sa pagbalik ni Kristo ug unsaon sa pagpangandam uban ang hugot nga pagtuo makadugang sa inyong paglaom.
Seksiyon 1
Sa unsang paagi nga ang usa ka hustong pagsabot sa Ikaduhang Pag-anhi sa Manluluwas ug sa Iyang milenyal nga paghari magdala kanako og paglaom ug kalinaw?
Samtang Siya mitudlo sa Iyang mga disipulo didto sa Bungtod sa mga Olibo, gipadayag ni Jesus ang mga timailhan ug mga kahimtang nga mag-una sa Iyang Ikaduhang Pag-anhi. Ang Manluluwas mipadayag nga adunay mini nga mga Kristo, mini nga mga propeta, mga gubat, mga hungihong sa mga gubat, kagutom, modagsang nga mga sakit, mga linog, kalapasan, ug mga timailhan diha sa kalangitan (tan-awa sa Joseph Smith––Mateo 1:22–23, 28–30, 33).
Sama sa karaang mga disipulo sa Ginoo, mahimong mobati kamo og kakuyaw pinaagi sa mga timailhan sa Iyang pagbalik. Kaniadtong 1831, nadawat ni Propeta Joseph Smith ang usa ka pagpadayag nga mihatag sa panglantaw sa Ginoo mahitungod niini nga mga timailhan.
Pagtuon agi og Pagpangandam alang sa Klase
Basaha ang Doktrina ug mga Pakigsaad 45:34–35, 38–39, mangita alang sa unsaon ni Jesukristo pagpatan-aw kanato sa mga timailhan sa Iyang Ikaduhang Pag-anhi. Timan-i nga ang mahadlok ingon sa paggamit diha sa bersikulo 39 nagpasabot og diosnon nga pagtahod, pagsimba, ug katingala.
Kini importante ang paghinumdom nga ang mga timailhan sa Ikaduhang Pag-anhi sa Ginoo naglakip usab og mga panghitabo nga naglibot sa Pagpahiuli sa Iyang ebanghelyo. Hunahunaa kon giunsa pagtungha sa Basahon ni Mormon, sa pagpahiuli sa pagkapari, buhing mga apostoles ug mga propeta, misyonaryong buhat, templo ug family history nga buhat, ug sa pagpundok sa Israel sa pag-andam kanato alang sa pagbalik sa Manluluwas (tan-awa sa Malaquias 4:5–6; Pinadayag 14:6–7; 1 Nephi 21:13–26; 3 Nephi 21:1–11; Doktrina ug mga Pakigsaad 1:14, 17–18; 65).
Si Presidente Russell M. Nelson mipamatuod:
Ang atong Manluluwas ug Manunubos, si Jesukristo, mohimo sa uban Niyang labing gamhanan nga mga buhat karon ug sa higayon nga Siya mobalik na pag-usab. (“Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 96)
Ang Milenyum mosunod sa Ikaduhang Pag-anhi. Atol sa Milenyum, “si Kristo mohari dinhi sa yuta” sulod sa usa ka libo ka tuig (Mga Artikulo sa Hugot nga Pagtuo 1:10). Usa ka pagpadayag nga nadawat pinaagi ni Propeta Joseph Smith nagpahayag kon unsa sama ang kinabuhi atol sa Milenyum.
Pagtuon agi og Pagpangandam alang sa Klase
Basaha ang Doktrina ug mga Pakigsaad 101:26–32, 35, ug hunahunaa ang pagmarka sa mga kahimtang nga maana atol sa Milenyum.
Samtang kamo maghunahuna mahitungod sa pagbalik sa Manluluwas ug sa Iyang milenyal nga paghari, hunahunaa kon unsaon sa mosunod nga tambag gikan ni Elder Ronald A. Rasband sa Kurom sa Napulog Duha ka Apostoles mahimong magamit sa inyong kinabuhi:
Bisan unsa pa kadaotan ug kaguliyang sa kalibotan, gisaaran kita sa atong inadlaw nga pagkamatinud-anon kang Jesukristo sa “kalinaw sa Dios, nga lapaw sa tanang pagpanabot” [Mga Taga-Filipos 4:7]. Ug kon si Kristo moabot sa tanang gahom ug himaya, ang daotan, rebelyon, ug ang inhustisya matapos. …
… Oo, nagpuyo kita sa malisod nga panahon, apan kon kita magpabilin sa dalan sa pakigsaad, dili kita kinahanglan nga mabalaka. Mopanalangin ko kaninyo nga samtang inyo kining buhaton, dili kamo mabalaka sa mga panahon diin kita nagpuyo o sa mga kabalaka nga moabot sa inyong dalan. … Mopanalangin ko ninyo nga motuo sa mga saad ni Jesukristo, nga Siya buhi, ug nga Siya nagtan-aw kanato, nag-atiman nato ug nagbarog tupad nato. (“Ayaw Kabalaka,” Liahona, Nob. 2018, 20, 21)
Palandonga agi og Pagpangandam alang sa Klase
Unsa nga mga hunahuna ug mga pagbati kamo aduna samtang kamo naghanduraw sa pagbalik sa Manluluwas ug sa Iyang milenyal nga paghari? Unsaon nga ang pagtutok diha sa Manluluwas nagdugang sa inyong mga pagbati sa paglaom ug kalinaw samtang kamo nag-atubang sa mga hagit sa ulahing mga adlaw?
Seksiyon 2
Unsaon nga ako mas maayong makapangandam sa akong kaugalingon ug sa uban alang sa pagbalik sa Ginoo?
Kalabot sa mga timailhan sa Ikaduhang Pag-anhi (tan-awa sa Mateo 24), ang Manluluwas mitudlo sa sambingay sa napulo ka birhen. Kini nga sambingay naghatag og impormasyon sa mga kinaiya sa Judeo nga kasal. Ang pamanhunon, inubanan sa iyang suod nga mga higala, moadto inig kagabii sa panimalay sa pangasaw-unon alang sa seremonyas sa kasal. Human sa seremonyas, ang mga nanambong sa kasal moadto sa balay sa lalaki alang sa usa ka kumbira. Ang mga bisita sa kasal kinsa mikuyog sa panon gipaabot nga magdala sa ilang kaugalingong mga lampara sa pagpaila nga sila kauban sa pundok sa kasal.
Si Presidente Dallin H. Oaks sa Unang Kapangulohan mitudlo nga ang pamanhunon nagrepresentar ni Jesukristo, ug ang mga birhen mga miyembro sa Iyang Simbahan (tan-awa sa “Pagpangandam alang sa Ikaduhang Pag-anhi,” Liahona, Mayo 2004, 8).
Pagtuon agi og Pagpangandam alang sa Klase
Basaha ang Mateo 25: 1–13, ug palandonga ang inyong mga pagpangandam alang sa pagbalik sa Ginoo. (Pahinumdom: ang Hubad ni Joseph Smith alang sa Mateo 25:12 basahon nga “Kamo wala makaila kanako” imbis “Wala ako makaila kaninyo.”)
Ang Ginoo misulti niini kabahin niadtong kinsa andam alang sa kumbira sa kasal: “Kay sila mga maalamon ug nakadawat sa kamatuoran, ug nakadawat sa Balaan nga Espiritu Santo alang sa ilang paggiya, ug wala malimbongi—sa pagkatinuod Ako moingon nganha kaninyo, sila dili pagaputlon ug ilabay ngadto sa kalayo, apan molahutay niana nga adlaw” (Doktrina ug mga Pakigsaad 45:57).
Mingon usab si Presidente Nelson mahitungod sa Importansya sa pagkuha sa Espiritu Santo isip atong giya:
Sa umaabot nga mga adlaw, dili na posible ang espirituhanong pagsugakod kon wala ang giya, direksiyon, ug makahupay nga impluwensiya sa Espiritu Santo. …
Mohangyo ko kaninyo sa pagpagpalambo sa inyong espirituhanong kapasidad sa pagdawat og pagpadayag. (“Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 96)
Irekord ang Inyong mga Hunahuna
Irekord ang inyong tubag ngadto sa mosunod nga pangutana gikan ni Presidente Oaks: “Kon [ikaw] nahibalo nga [ikaw] makigkita sa Ginoo ugma––pinaagi sa [imong] kamatayon nga wala sa oras o pinaagi sa Iyang kalit nga pag-abot––unsa may [imong] buhaton karong adlawa?” (“Pagpangandam alang sa Ikaduhang Pag-anhi,” Liahona,, Mayo 2004, 9).