“Leksiyon 4 Materyal sa Pagpangandam sa Klase: Pagpangita sa Katuyoan ug Hingpit nga Kalipay diha sa mga Nilalang sa Ginoo,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo (2023)
“Leksiyon 4 Materyal sa Pagpangandam sa Klase,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo
Leksiyon 4 Materyal sa Pagpangandam sa Klase
Pagpangita sa Katuyoan ug Hingpit nga Kalipay diha sa mga Nilalang sa Ginoo
Si Presidente M. Russell Ballard sa Korum sa Napulog Duha ka Apostoles miingon, “Hunahunaa kon unsay mahitabo kon kitang tanan mogahin og panahon sa mainampingong pagtan-aw sa kinaiyahan nga naglibot kanato ug mohalad sa atong kaugalingon sa dugang nga pagkat-on mahitungod sa iyang kalibotan nga gilalang sa Dios alang kanato!” (“God’s Love for His Children,” Ensign, Mayo 1988, 57). Samtang mamalandong ka sa milagro sa paglalang ikonsiderar unsay imong makat-onan mahitungod sa Tiglalang ug sa Iyang mga katuyoan alang kanato.
Seksiyon 1
Sa unsang paagi nga ang pagsabot sa katuyoan sa Paglalang magdala og dugang nga kahulogan sa akong kinabuhi?
Unsa ang imong mga mahunahuna ug bation kon magtan-aw ka sa mga bitoon sa langit inigka gabii—tingali kahibulong, katingala, balaang pagtahod, o kaha pagbati ba nga basta wala lang?
Ang siyensiya sa astronomiya naghatag kanato og daklit nga panglantaw ngadto sa makapahingangha nga gidak-on sa uniberso. Sa atoa lamang nga galaksiya adunay “gibanabana nga 200 ug 400 ka bilyon nga bitoon. Gani usa lamang kini sa binilyon nga mga galaksiya. … Kon tingubon, ang tanang galaksiya nga makita sa kalibotan naglangkob sa gibanabana nga 30 ka bilyon nga trilyon ka bitoon. Gani kana nga gidaghanon posible nga gamay ra nga bahin sa tanan nga anaa” (R. Val Johnson, “Worlds without Number,” Ensign, Ago. 2013, 45).
Sa usa ka talagsaong panan-awon bahin sa Paglalang, si Moises nakakita sa atong kalibotan ug sa mga lumulopyo niini, ug dayon nakakat-on siya mahitungod sa ka halapad nga kawanangan sa uniberso. Nahibaloan sab niya nga ubos sa direksiyon sa Langitnong Amahan, si Jesukristo ang milalang sa tanan nga butang (tan-awa sa Moises 2:1; tan-awa usab sa Mosiah 3:8; Juan 1:1–3). Nakasaksi sa mga binuhat sa Dios, si Moises “sa hilabihan natingala ug nahibulong (Moises 1:8) ug nangutana, “Sultihi ako, ako nangamuyo kanimo, ngano nga kini nga mga butang naingon, ug pinaagi sa unsa ikaw mibuhat kanila?(Moises 1:30; tan-awa usab sa mga bersikulo 27–37).
Pagtuon agi og Pagpangandam alang sa Klase
Basaha ang Moises 1:33, 38–39, ug pangitaa kon unsay nakat-onan ni Moises mahitungod kon ngano nga ang Dios milalang niining halapad kaayo nga uniberso ug sa tanang kinabuhi nga anaa niini.
Si Presidente DieterF. Uchtdorf, nga kaniadto sakop sa Unang Kapangulohan, misulti bahin sa katuyoan sa Dios sa Paglalang:
Ang Dios Mismo nag-ingon nga kita ang hinungdan nga Iyang gilalang ang [uniberso]! Ang Iyang buhat ug himaya—ang katuyoan niining nindot nga [uniberso]—mao ang pagluwas ug paghimaya sa katawhan. … Ang atong Langitnong Amahan milalang sa [uniberso] aron atong makab-ot unta ang atong potensiyal isip Iyang mga anak.
Kini ang kalainan sa tawo: itandi ngadto sa Dios, ang tawo walay bili; apan kita ang tanan alang sa Dios. (“Kamo Importante ngadto Kaniya,” Liahona, Nob. 2011, 20)
Pamalandong agi og Pagpangandam alang sa Klase
Unsay imong gibati sa pagkasayod nga kita ang hinungdan nga ang Langitnong Amahan ug si Jesukristo milalang sa uniberso?
Seksiyon 2
Sa unsang paagi nga akong makaplagan ang kalipay diha sa mga nilalang sa Ginoo?
Human ang mga langit ug ang yuta nalalang, ang Dios mipahulay sa ikapito nga adlaw gikan sa Iyang tanang buluhaton ug miingon, “ang tanan nga mga butang nga Ako mihimo nahuman, ug Ako, ang Dios, nakakita nga sila mga maayo” (Moises 3:2). Dayon Siya mipanalangin sa ikapito nga adlaw. Unsa ang imong nakat-onan mahitungod sa Tiglalang gikan sa Iyang paggahin og panahon aron makita ang katahom sa Nilalang? Sa miaging semana, kapila ka migahin og panahon sa paghunahuna ug pagtagamtam sa mga nilalang sa Ginoo?
Sa usa ka pagpadayag ngadto ni Propeta Joseph Smith, ang Ginoo mitino sa temporal ug esprituwal nga mga panalangin nga moabot niadtong kinsa motuman sa pagbalaan sa Adlawng Igpapahulay, (tan-awa sa Doktrina ug mga Pakigsaad 59: 9–19). Kini nga mga panalangin naglakip sa pagtagamtam sa “kahingpitan sa yuta” (Doktrina ug mga Pakigsaad 59:16).
Pagtuon agi og Pagpangandam alang sa Klase
Basaha ang Doktrina ug mga Pakigsaad 59:16–20, ug pangita og mga paagi nga gusto sa Ginoo nga kita makabenipisyo sa Iyang mga nilalang.
Sa tanan nga katingalahan dinhi sa yuta, kita mga talagsaong nilalang sa Dios. Ang Langitnong Amahan ug si Jesukristo “nanaog aron maghimo og tawo diha sa ilang kaugalingon nga hitsura … lalaki ug babaye” (Abraham 4:26–27). Si Presidente Gordon B. Hinckley mipamatuod:
Ang atong mga lawas sagrado. Gilalang kini sa hitsura sa Dios. Kini kahibulongan, ang pinakamahinungdanon nga nilalang sa Dios. (“Be Ye Clean,” Ensign, Mayo 1996, 48)
Ang pagkadawat og lawas mahinungdanon sa atong mahangturon nga pag-uswag (tan-awa sa Doktrina ug mga Pakigsaad 93:33–34). Si Elder David A. Bednar sa Korum sa Napulog Duha ka Apostoles mitudlo:
Ang atong pisikal nga lawas nakapahimong posible sa kalapad, kaladmon, ug sa kadaghan sa kasinatian nga dili mahitabo didto sa kinabuhi nga wala pa dinhi sa yuta. (“Kita Nagtuo sa Pagkaputli,” Liahona, Mayo 2013, 41)
Sukwahi sa Manluluwas, si Satanas motuis sa balaang katuyoan sa atong lawas ug moagni kanato sa sayop nga paggamit niini. Si Presidente Susan W. Tanner, kanhi Kinatibuk-ang Presidente sa Young Women, mitudlo:
[Si Satanas] motintal sa kadaghanan sa pagpanamas-tamas niining mahinungdanong gasa sa lawas pinaagi sa pagkadili putli, dili ligdong, sa pagtagbaw sa kaugalingon, ug sa mga adiksyon. Iyang danihon ang uban sa pagbaliwala sa ilang mga lawas; ang uban iyang tintalon nga simbahon ang ilang mga lawas. Sa bisan asa nga kahimtang, iyang agnihon ang kalibotan nga tagdon ang lawas nga usa lamang ka butang. …
Ang atong mga lawas mao ang atong mga templo. Dili kita ubos apan mas sama sa Langitnong Amahan tungod kay kita adunay lawas. … Hinaot nga atong tahoron ang atong mga lawas samtang ania pa sa kalibotan aron ang Ginoo mopabalaan ug mohimaya niini alang sa kahangtoran. (“Ang Kabalaan sa Lawas,” Liahona, Nob. 2005, 13, 15)
Buhaton
Gahini og pinakaminos pipila ka minuto karong adlawa ang pagtagamtam sa gasa sa imong lawas ug sa katahom sa nilalang. Maglakawlakaw, maminaw sa ulan, mosimhot og pipila ka preskong bulak, mokaon og pipila ka preskong prutas, motan-aw sa mga panganod, molingkod daplin sa sapa, motan-aw sa mga bitoon, maminaw sa huni sa mga langgam, o mogunit og usa ka bag-ong natawo nga masuso. Ikonsiderar ang pagrekord kon sa unsang paagi nga ang gasa sa lawas ug sa mga nilalang nga ania sa yuta naghatag kanimo og kalipay. Pangandam sa pagpaambit sa imong kasinatian atol sa klase.
Seksiyon 3
Unsaon nako sa pagpalawom ang akong panabot bahin sa mga nilalang sa Ginoo pinaagi sa pagtuon sa mga kasulatan ug sa siyensiya?
Usa ka paagi nga kita makakat-on mahitungod sa mga nilalang sa Dios mao ang pinaagi sa siyensiya. Sama pananglit, nakakat-on kita og daghan mahitungod sa mga nahimo sa tawhanon nga lawas pinaagi sa medikal nga pagsiksik, mahitungod sa nagkadaiya nga matang sa kinabuhi sa kalibotan pinaagi sa ekolohiya, mahitungod sa dagan sa panahon pinaagi sa meteorology ug daghan pa.
Tingali dunay mga panahon nga makakat-on ka og butang gikan sa siyensiya nga ingon og nagsukwahi sa mga kasulatan. Kon makasugat ka og daw nanagsungi, ang mosunod nga panglantaw gikan ni Presidente Ressel M. Nelson makatabang:
Walay panagsungi tali sa siyensiya ug relihiyon. Ang kasungian motumaw lang gikan sa dili kompleto nga kasayoran sa siyensiya o relihiyon, o sa duha. …
… Ang tanang kamatuoran usa ka bahin sa ebanghelyo ni Jesukristo. Naggikan man kini nga kamatuoran sa siyentipiko nga laboratoryo o gikan sa pagpadayag sa Ginoo, magkauyon kini. (“Church Leaders Gather at BYU’s Life Sciences Building for Dedication,” Church News, Abr. 17, 2015, ChurchofJesusChrist.org).
Samtang ang siyensiya makatabang nato sa pagpasabot sa unsang paagi nga ang natural nga mga proseso mahitabo, ang ebanghelyo sa Ginoo nagtutok sa ngano. Ang siyensiya ug ang relihiyon kanunay nga makapagawas og managlahing mga hut-ong sa mga pangutana. Ang mga propeta diha sa kasulatan nag-una gayod sa paghatag og gibug-aton sa unsay atong kinahanglan nga masabtan mahitungod sa Tiglalang ug sa Iyang mga katuyoan. (Tan-awa sa “Science and Our Search for Truth,” New Era, Hulyo 2016, 26–29.) Sa paghisgot sa mga kinutoban sa siyentipikanhong kahibalo, si Presidente Dallin H. Oaks mitudlo:
Ang pamaagi sa siyensiya motultol kanato ngadto sa gitawag nato og siyentipikanhong kamatuoran. Apan ‘ang siyentipikanhong kamatuoran’ dili maoy kinatibuk-ang tuyo sa kinabuhi. Kadtong dili magkat-on ‘pinaagi sa pagtuon ug usab pinaagi sa hugot nga pagtuo’ (Doktrina ug mga Pakigsaad 88:118) nagbutang og kinutoban sa ilang panabot sa kamatuoran ngadto sa pwede nilang mapamatud-an sa siyentipikanhong pamaagi. …
Makakaplag kita og tinuod ug molahutay nga kalipay pinaagi sa pagkahibalo ug paglihok sa kamatuoran kon kinsa kita, sa kahulugan sa mortal nga kinabuhi, ug kon asa kita human kita mamatay. Kadto nga mga kamatuoran dili makat-unan pinaagi sa siyensya o mga sekyular nga pamaagi. (“Kamatuoran ug Ang Plano,” Liahona, Nob. 2018, 25)
Kon atong tipunon ang espirituwal ug siyentpikanhong pagkat-on mahitungod sa Paglalang, mapalawman niini ang atong panabot bahin sa Dios, bisan kon duna pa kitay wala matubag nga mga pangutana. Samtang maghunahuna ka mahitungod sa imong kaugalingong mga pangutana, hinumdomi nga unya sa Milenyum ang tanan nga butang ipadayag, lakip ang “mga butang sa kahitas-an ug mga butang nga ania sa ubos, mga butang diha sa yuta ug ibabaw sa yuta, ug sa langit.” (Doktrina ug mga Pakigsaad 101:34).
Pamalandong agi og Pagpangandam alang sa Klase