Leksiyon 21 Materyal sa Magtutudlo

Pagpaminaw sa Tingog sa Ginoo sa Ulahing mga Adlaw

“Sa kalibotan karon, [si Jesukristo] ug ang Iyang Amahan nagpakita ngadto sa batang lalaki nga si Joseph Smith, sinugdanan sa dugay nang gisaad nga ‘kapaigoan sa kahingpitan sa mga panahon’” (“Ang Buhi nga Kristo: Ang Pagpamatuod sa mga Apostoles,” ChurchofJesusChrist.org). Niini nga leksiyon, ang mga estudyante dapiton sa paghunahuna kon sa unsang paagi nga ang pagsaksi ni Joseph Smith kang Jesukristo makapalig-on sa ilang hugot nga pagtuo diha Kaniya. Ang mga estudyante dapiton usab sa pagtino kon unsaon nila sa pagpalambo sa ilang kapasidad sa pagpaminaw sa tingog sa Manluluwas.

Mga Sugyot alang sa Pagtudlo

Si Joseph Smith nakakita sa Dios nga Amahan ug ni Jesukristo.

Ipakita ang mosunod nga pamahayag ni Presidente Gordon B. Hinckley:

Si Propeta Joseph Smith usa ka dili hitupngan nga saksi sa buhi nga Kristo. (Gordon B. Hinckley, “What Hath God Wrought through His Servant Joseph!,” Ensign, Ene. 1997, 2)

• Unsay nakapahimo ni Joseph Smith nga usa ka “dili hitupngan nga saksi sa buhi nga Kristo”?

Isulat sa pisara ang mosunod nga pamahayag: Pinaagi sa unang kasinatian, si Joseph Smith nakakat-on nga …

Dapita ang matag estudyante sa pagpili ug pagrebyo sa Joseph Smith—Kasaysayan 1:16–17, Doktrina ug mga Pakigsaad 76:22–24, o Doktrina ug mga Pakigsaad 110:2–4, mangita og paagi aron kompletohon ang pamahayag diha sa pisara. Dayon dapita ang mga estudyante sa pagpaambit sa ilang nakompleto nga mga pamahayag, nga mahimong maglakip sa mosunod nga mga kamatuoran: Ang Langitnong Amahan ug si Jesukristo buhi; si Jesukristo ug ang Langitnong Amahan managbulag ug managlahi nga mga binuhat; si Jesukristo adunay nahimaya, nabanhaw nga lawas; si Jesukristo nakaila sa atong ngalan; si Jesukristo mao ang Bugtong Anak sa Amahan; si Jesukristo mao ang Tiglalang; si Jesukristo mao ang atong Manlalaban ngadto sa Amahan.

Samtang nagpaambit ang mga estudyante, ikonsiderar ang pagpangutana og mga pangutana nga makatabang nila nga mas mapalawman ang ilang pagsabot sa kamatuoran nga ilang giila. Pananglitan:

• Nganong importante man kini nga kamatuoran nga mahibalo mahitungod kang Jesukristo?

• Sa unsang paagi nga kini nga kamatuoran makapalig-on sa imong pagpamatuod sa Manluluwas?

• Sa unsang paagi nga kini nga kamatuoran makapalambo sa imong tinguha sa pagsunod Kaniya?

Human sa oras sa panaghisgot, dapita ang usa o duha ka estudyante nga mopaambit sa ilang pagpamatuod ni Joseph Smith isip usa ka saksi sa Manluluwas.

Kita mahimong makadungog sa tingog sa Ginoo.

Pagpalambo sa Atong Pagtudlo ug Pagkat-on

Pagpasiugda og mapuslanong mga kasinatian sa pagkat-on. Aron matabangan ang mga estudyante nga makabaton og mas makahuloganon nga mga kasinatian sa pagkat-on, pangita og mga paagi nga makonekta ang unsay ilang nakat-onan ngadto sa ilang mga kahimtang, mga interes, ug mga pangutana. Gamita ang mga kapanguhaan gikan sa materyal sa pagpangandam ug ang personal nga mga kasinatian sa mga estudyante aron sa pagsuhid kon sa unsang paagi nga ang mga kamatuoran sa ebanghelyo nakaapekto o makaapekto sa ilang kinabuhi.

Ikonsiderar ang pagpaambit sa mosunod nga sitwasyon o sa usa nga imong kaugalingon:

Ang mga misyonaryo misulti sa imong higala nga kon modangop siya sa Ginoo, siya makadawat og pagpadayag ug makadungog sa Iyang tingog. Samtang gusto niyang motuo niini nga saad, mibati siya og kabalaka nga masaypan niya nga ang iyang kaugalingong mga hunahuna Iyang tingog. Siya nangutana, “Unsaon nimo pagkahibalo nga nakadungog ka sa tingog sa Ginoo?”

Dapita ang pipila ka estudyante sa pagpaambit kon unsaon nila pagtubag. Mahimo usab nimong papaambiton ang mga estudyante og ubang mga hagit o mga kabalaka nga ilang giatubang sa pagpaminaw sa tingog sa Manluluwas.

Pahinumdomi sila nga si Oliver Cowdery gitudloan mahitungod sa pagpaminaw sa tingog sa Manluluwas sa dihang aduna siyay gihambin nga mga pangutana mahitungod sa propetikanhong tawag ni Joseph Smith. Dapita ang mga estudyante sa pagrebyo sa Doktrina ug mga Pakigsaad 6:14–15, 22–23, mangita sa unsay gitudlo sa Ginoo kang Oliver Cowdery mahitungod sa pagpaminaw sa Iyang tingog.

• Unsa ang atong makat-onan mahitungod sa pagpaminaw sa tingog sa Ginoo gikan sa kasinatian ni Oliver? (Ang mga estudyante mahimong motino og usa ka kamatuoran sama sa mosunod: Kita makapaminaw sa tingog sa Ginoo pinaagi sa Espiritu Santo. Ang tingog sa Manluluwas modan-ag sa atong hunahuna ug mohatag kanato og kalinaw.)

• Nganong importante man nga kita kanunayng magtinguha sa pagpaminaw sa tingog sa Manluluwas—labi na sa atong panahon karon?

• Sa unsa nga paagi nga ang imong kinabuhi napanalanginan pinaagi sa pagpaminaw sa tingog sa Ginoo?

Ikonsiderar ang pagpakita sa mosunod nga pamahayag ni Presidente Russell M. Nelson:

Kon kita magtinguha nga maminaw—tinuod nga pagpaminaw—sa Iyang Anak, kita giyahan nga makahibalo unsay buhaton sa bisan unsa nga sirkumstansya. …

Isip mga disipulo ni Jesukristo, ang atong mga paningkamot sa pagpaminaw Kaniya kinahanglan nga mas gitinguha nato. (Russell M. Nelson, “Paminaw Kaniya,” Liahona, Mayo 2020, 89)

Mahimo ka nga mopaambit og personal nga ehemplo bahin sa usa ka paagi nga imong nadungog ang tingog sa Ginoo diha sa imong kinabuhi. O mahimo nimong ipakita ang usa ka ehemplo gikan sa usa ka lider sa Simbahan, nga makita diha sa “Paminaw Kaniya” nga koleksyon sa video diha sa Media sa Ebanghelyo (ChurchofJesusChrist.org).

Hatagi ang matag estudyante sa mosunod nga handout.

Paminaw Kaniya!

Materyal sa Magtutudlo alang sa Si Jesukristo ug ang Iyang Walay Kataposang Ebanghelyo—Leksiyon 21

Hunahunaa nga gihatagan ka og oportunidad nga maghimo og usa ka mubo nga video nga nagpahayag kon giunsa nimo sa pagpaminaw ang tingog sa Manluluwas. Pagsulat og mubo nga outline sa unsay imong ipaambit agi og tubag sa giaghat nga “Giunsa Nako sa Pagpaminaw Kaniya.” Ang mosunod nga mga pangutana tingali makatabang nimo sa paghimo sa imong outline:

• Unsa nga mga kasinatian ang nakatabang nimo aron mas makasabot kon sa unsang paagi nga ang Ginoo makigsulti nimo?

• Unsa nga mga ideya nga mahimo nimong iapil gikan sa mga pamahayag nila ni Presidente Russell M. Nelson ug Sister Michelle D. Craig diha sa seksiyon 2 sa materyal sa pagpangandam?

• Unsaon nimo sa pagpaambit sa imong mga hunahuna ug mga pagbati sa paagi nga mas daling masabtan sa uban?

Gikan sa imong outline, paghimo og mubong mensahe (usa ngadto sa duha ka parapo) nga mahimo nimong ipaambit diha sa klase.

Kon ganahan ka, mahimo nimong pamalandongan ug irekord na lang ang gusto nimong buhaton aron mapalambo ang imong kapasidad sa pagpaminaw sa tingog sa Ginoo.

© 2023 pinaagi sa Intellectual Reserve, Inc. All rights reserved.

Paminaw Kaniya!

Materyal sa Magtutudlo alang sa Si Jesukristo ug ang Iyang Walay Kataposang Ebanghelyo—Leksiyon 21

Human sa igo nga panahon, dapita ang pipila ka mga estudyante sa pagpaambit sa “Paminaw Kaniya” nga mensahe diha sa klase. Awhaga ang mga estudyante sa pagpaambit usab sa ilang “Paminaw Kaniya” nga mensahe sa gawas sa klase. Himoon kini pinaagi sa manag-atubang nga panagsultihanay, pagtawag sa telepono, o pag-text o diha sa social media.

Kon itugot sa panahon, ikonsiderar ang pagdapit sa mga estudyante nga mas matinguhaon sila sa ilang mga paningkamot sa pagpaminaw sa Ginoo. Mahimo sila nga mogahin og pipla ka minuto sa pagplano ug pag-eskedyul kon unsaon nila paghimo niini.

Alang sa Sunod nga Higayon

Ikonsiderar ang pagpadala sa mosunod nga mensahe, o usa nga imong kaugalingon, pipila ka adlaw sa dili pa ang imong sunod nga klase: Samtang magtuon ka sa materyal sa pagpangandam alang sa leksiyon 22, hunahunaa kon unsay ipasabot alang nimo sa nagpadayon nga Pagpahiuli.