“Leksiyon 3 Materyal sa Pagpangandam sa Klase: Pagsalig kang Jesukristo, ang Atong Manluluwas ug Pangulo sa Kinabuhi nga Wala pa Dinhi sa Yuta,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo (2023)
“Leksiyon 3 Materyal sa Pagpangandam sa Klase,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo
Leksiyon 3 Materyal sa Pagpangandam sa Klase
Pagsalig kang Jesukristo, ang Atong Manluluwas ug Pangulo sa Kinabuhi nga Wala pa Dinhi sa Yuta
Bisan dili ka makahinumdom, ang imong kasinatian uban ni Jesukristo nagsugod dugay na sa wala pa ikaw matawo. Kana nga relasyon ug kasayoran bahin sa plano sa Langitnong Amahan makahatag og katuyoan ug kahulogan sa imong kinabuhi sa yuta. Ang Yunit 2 makatabang aron ikaw mas makasabot sa mahinungdanong tahas sa Manluluwas didto sa Dakong Konseho sa Langit, sa plano sa Amahan sa kalipay, sa Paglalang, ug sa ubang mga asoy nga gipaambit diha sa Daang Tugon. Samtang nagtuon ka sa materyal gikan niini nga leksiyon, hunahunaa kon sa unsang paagi nga kini nga mga kamatuoran makalig-on sa imong pagsalig ni Jesukristo.
Seksiyon 1
Sa unsang paagi nga ang plano sa kaluwasan magdala og katuyoan ug kalinaw sa akong kinabuhi?
Nakasulay na ba ka nga nawala sa kalasangan, sa dakong pundok sa katawhan, o sa dakong siyudad? Unsay imong gibati sa maong kasinatian?
Sama sa imong pagkawala sa kalasangan o sa dakong siyudad, tingali mibati ka o tingali sa umaabot nga adlaw mobati nga nawala mahitungod sa kahulogan ug katuyoan sa imong kinabuhi. Samtang magkonsiderar ka niini nga mga pagbati, pamalandongi ang mosunod nga mga pulong ni Elder Robert D. Hales sa Korum sa Napulog Duha ka Apostoles:
Kanunay kong namalandong sa kawalay paglaom sa mga anak sa Dios nga nangahisalaag diha sa mangitngit ug awaaw nga kalibotan, wala masayod kinsa sila, diin sila gikan, nganong ania sila dinhi sa yuta, o kon asa sila paingon human sa ilang mortal nga mga kinabuhi.
Dili kita angayng mahisalaag. Gipadayag sa Dios ang mahangturon nga mga kamatuoran aron sa pagtubag niining mga pangutana. …
… Ang plano sa kaluwasan mao ang labing dako nga bahandi sa kahibalo nga sukad mahatag ngadto sa katawhan tungod kay gipasabot niini ang mahangturon nga tumong sa kinabuhi. (“Ang Plano sa Kaluwasan: Usa ka Sagradong Bahandi sa Kahibalo sa Paggiya Kanato,” Liahona, Okt. 2015, 25–26)
Ang atong Langitnong Amahan mipresentar sa Iyang plano sa kaluwasan didto sa Dakong Konseho sa Langit. Didto atong nahibaloan nga kon mosunod kita sa Iyang plano, mahimo kitang sama Kaniya, makabalik sa Iyang presensiya, ug makabaton og kinabuhing dayon, nga “mao ang “labing mahinungdanon sa tanan nga mga gasa sa Dios” (Doktrina ug mga Pakigsaad 14:7).
Nahibaloan usab nato nga ang plano sa Amahan nagkinahanglan og usa ka Manluluwas, kinsa mao ang mohimong posible nga kita makabuntog sa pisikal ug espirituwal nga kamatayon. Ang Langitnong Amahan mipili ni Jesus nga mahimo nga Manluluwas (tan-awa sa Abraham 3:27).
Si Presidente Thomas S. Monson mipamatuod:
Ang mahinungdanong bahin sa plano [sa kaluwasan] mao ang atong Manluluwas, si Jesukristo. Kon wala ang Iyang maulaong sakripisyo, ang tanan mawala. (“Ang Hingpit nga Dalan sa Kalipay,” Liahona, Nob. 2016, 80)
Pamalandong agi og Pagpangandam alang sa Klase
Sa unsang paagi nga ang imong kahibalo sa plano sa kaluwasan nagdala og kahulogan o katuyoan sa imong kinabuhi? Kon gibati nimo ang kawalay kasiguroan mahitungod sa katuyoan sa imong kinabuhi, sa unsang paagi kaha nga ang pagtuon sa plano sa kaluwasan ug sa tahas sa Manluluwas niini makatabang?
Seksiyon 2
Nganong didto sa kinabuhi nga wala pa dinhi sa yuta kita midawat ni Jesukristo nga mahimo natong Manluluwas?
Ang Perlas nga Labing Bililhon mihatag og makapadani nga asoy bahin ni Abraham nga nagkat-on mahitungod sa mga planeta ug mga bitoon. Nakita ni Abraham nga ang magmando ug ang labing hayag nga bitoon gitawag og Kolob ug maoy labing duol sa presensiya sa Dios (tan-awa sa Abraham 3: 2–17).
Nakat-onan usab ni Abraham nga sama nga adunay mga kalainan tali sa mga bitoon, adunay mga kalainan usab tali sa espiritu nga mga anak sa Dios. Ang ubang mga espiritu “labaw nga maalamon” kay sa uban, samtang ang Ginoong Dios “labaw pa nga maalamon kay kanilang tanan” (Abraham 3:18–19). (Pahinumdom: Ang kaalam dinhi niini nga tudling nagpasabot sa kahayag ug kamatuoran nga nadawat sa usa ka indibidwal [tan-awa sa Doktrina ug mga Pakigsaad 93:28, 36].)
Dinhi niini nga konteksto, diin ang Kolob nagrepresentar kang Jesukristo (tan-awa sa Abraham 3:3, 16), unsa ang gitudlo niini mahitungod Kaniya?
Pagtuon agi og Pagpangandam alang sa Klase
Basaha ang Abraham 3:22–24, ug pangitaa kon unsay atong makat-onan mahitungod sa atong relasyon kang Jesukristo didto sa kinabuhi nga wala pa dinhi sa yuta. (Pahinumdom: Ang mga Espiritu dinhi niini nga tudling nagpasabot sa espiritu nga mga anak sa Langitnong Amahan.)
Nahibaloan ni Abraham nga ang kaduol sa Kolob ngadto sa Dios ang naghimo niini nga “[labing talagsaon] sa tanan nga [bitoon] … tungod kay kini duol [ngadto Kaniya]” (Abraham 3:16). Mao usab ngari kanato, isip mga anak sa Dios. Ang atong espiritu, kahayag, ug himaya mag-agad sa atong kaduol ngadto sa Tiglalang, nga si Jesukristo, kinsa maoy “labing duol ngadto sa trono sa Dios” ug “nagtakda … nga momando sa tanan niadto diin nahisakop sa mao nga han-ay” (Abraham 3:2, 3).
Pamalandong agi og Pagpangandam alang sa Klase
Sa unsang paagi nga ang pagkasayod sa kahalangdon ni Jesukristo sa kinabuhi nga wala pa dinhi sa yuta nakapadasig kanimo sa pagsalig Kaniya ug sa pagpaduol Kaniya?
Seksiyon 3
Sa unsang paagi nga si Jesukristo makatabang kanako sa pagbuntog sa daotang mga impluwensiya sa akong palibot?
Usahay, tingali mobati ka nga nabug-atan tungod sa pagkontra ni Satanas samtang maningkamot ka sa pagsunod ni Jesukristo ug pagpuyo sa Iyang ebanghelyo. Tingali makatabang ang paghinumdom nga dili kini ang unang higayon nga ikaw nakasaksi o nakasinati sa daotang impluwensiya ni Satanas.
Pagtuon agi og Pagpangandam alang sa Klase
Basaha ang Moises 4:1–4, ug pangitaa ang mga kalahian tali ni Satanas ug sa Manluluwas.
Ang pagrebelde ni Satanas nagsugod sa unsay gitawag diha sa basahon sa Pinadayag nga Gubat sa Langit (tan-awa sa Pinadayag 12:7). Usa kini ka sangka tali niadtong anaa sa habig sa Langitnong Amahan ug ni Jesukristo ug niadtong mga misupak Kanila ug mipili nga mosunod ni Satanas.
Pagtuon agi og Pagpangandam alang sa Klase
Basaha ang Pinadayag 12:7–11, ug ikonsiderar ang pagmarka sa imong mga kasulatan kon giunsa nimo sa pagbuntog si Satanas ug ang iyang mga sumusunod didto sa kinabuhi nga wala pa dinhi sa yuta. (Pahinumdom: Si Adan gitawag nga Miguel didto sa kinabuhi nga wala pa dinhi sa yuta [tan-awa sa Ang Giya ngadto sa mga Kasulatan, “Miguel,” ChurchofJesusChrist.org].) Sa unsang paagi kaha nga ang imong gimarkahan o gihunahuna samtang nagbasa ka magamit sa imong padayon nga pagpakiggubat kang Satanas dinhi sa yuta?
Si Presidente Gordon B. Hinckley misulti mahitungod niini nga panagsungi:
Kana nga gubat, nga labihan ka kapait, nga labihan ka grabe, wala gayod mahunong. Kini ang gubat tali sa kamatuoran ug sayop, tali sa kabubut-on ug pagpamugos, tali sa mga sumusunod ni Kristo ug niadtong kinsa wala moangkon Kaniya. …
… Giawayan kini diha sa atong kaugalingong mga kinabuhi, sa matag adlaw, diha sa atong mga panimalay, diha sa atong trabahoan, diha sa atong mga kaubanan sa eskwelahan. … Kitang tanan nahilambigit niini––bata, batan-on, o hamtong, kada usa kanato. (“Usa ka Walay Katapusan nga Panagbangi, usa ka Siguradong Kadaugan,” Liahona, Hunyo 2007, 4, 7)
Si Brother Ahmad S. Corbitt sakop sa Kinatibuk-ang Kapangulohan sa Young Men mihalad og usa ka mensahe bahin sa paglaom diha sa atong padayon nga pagpakig-away sa daotan:
Si Satanas igmat nga milingla sa ikatulo nga bahin sa espiritung mga anak sa Langitnong Amahan nga siya ang ipatigbabaw imbis nga ang Dios. Apan dili kamo! Nakita ni Apostol Juan nga inyong nabuntog si Satanas “sa pulong sa [inyong] pagpanghimatuod” [Pinadayag 12:11]. …
… Ang pagkasayod nga inyong nabuntog si Satanas pinaagi sa pulong sa inyong pagpamatuod kaniadto motabang kaninyo sa paghigugma, pagpaambit, ug pagdapit karon ug sa kanunay—sa pagdapit sa uban nga moduol ug motan-aw, moduol ug motabang, ug moduol ug magpasakop, samtang kanang samang gubat alang sa mga kalag sa mga anak sa Dios nagpadayon. (“Makahimo Kamo sa Pagpundok sa Israel!,” Liahona, Mayo 2021, 61)
Buhaton
Ikonsiderar sa mainampoong paagi kon sa unsang paagi nga ang paglig-on sa imong hugot nga pagtuo kang Jesukristo ug sa Iyang ebanghelyo makatabang nimo sa pagbuntog ni Satanas ug “pagsalikway” sa iyang mga pagtintal (Alma 37:33). Ikaw mahimo usab nga motino sa mga buhat nga imo nang nahimo (o himoon) sa pagtabang nimo nga makabuntog sa impluwensiya ni Satanas sa imong kinabuhi.