17-р хичээлийн багшийн материал

Их Эзэний Сүмийн нэгэн хэсэг байх

Есүс Христ Өөрийн Сүмийг Палестин дахь дагалдагчдынхаа дунд зохион байгуулсантай адил нифайчууд, леменчүүдийн дунд мөн байгуулсан. Тэр арван хоёр шавиа дуудаад, Сүмээ удирдуулах санваарын эрх мэдлийг тэдэнд олгожээ. Энэхүү хичээл нь ариун ёслол дээр анхаарлаа төвлөрүүлж, үүнийг илүү утга учиртай, Христэд төвлөрсөн үйл ажиллагаа болгохын тулд юу хийж болохоо тодорхойлох боломжийг суралцагчдад олгоно. Суралцагчид мөн тойрог, салбарынхаа нэгэн хэсэг гэдгээ мөн нөхөрлөлийг бусад мэдрүүлэхийн тулд юу хийж чадахаа тодорхойлно.

Заах зөвлөмж

Есүс Христ ариун ёслолыг өгч, хүмүүст ойр ойрхон цугларахыг зарлиглаж, хэний ч шүтэн бишрэхийг хориглох ёсгүй гэж хэлсэн.

Дараах зургийг үзүүлээд, Есүс Христ нифайчууд, леменчүүдийн дунд тохинуулсан тохинууллынхаа хүрээнд арван хоёр шавьдаа санваарын эрх мэдлийг өгч, Сүмээ байгуулсан гэдгийг суралцагчдад сануул (3 Нифай 11:18–22; 12:1; 18:5, 37; 26:17–21-ийг үзнэ үү).

Христ гурван нифай шавийн хамт, Гари Л.Капп

• Их Эзэн эрт дээр үед төдийгүй өнөө үед Өөрийн Сүмийг байгуулахад ийм их ач холбогдол өгсөн нь яагаад чухал гэж та бодож байна вэ? (Та бэлтгэх материалын 1-р хэсэг дэх ахлагч Д.Тодд Кристоффэрсоны хэлсэн мэдэгдлийг уншихад суралцагчдыг урьж болно.)

Хэдийгээр Сүмийг олон талаас нь авч үзэж болох ч энэ хичээл дээр зөвхөн хоёр дээр нь төвлөрөхийг онцолно уу. Дараах асуултуудыг үзүүлээд, цааш судлахыг хамгийн их хүсэж буй асуултаа сонгоход суралцагчдыг урь. Үүнд:

• Ариун ёслолыг сүмийн утга төгөлдөр туршлагуудын нэг хэсэг болгохын тулд би юу хийж чадах вэ?

• Сүмд илүү найрсаг байж, бүгд бие биетэйгээ хамааралтай болохыг мэдрүүлсэн туршлагыг бүх хүнд өгөхийн тулд би хэрхэн тусалж болох вэ?

Заах, суралцах чадвараа сайжруулах

Жижиг бүлгээр ярилцах ярилцлага, даалгаврууд суралцагчдыг илүү гүн гүнзгий судлахад тусална. Жижиг бүлгүүдэд хуваах нь олон суралцагчийг татан оролцуулах боломж олгож, өөр хоорондоо бодол санаа, мэдрэмж, туршлагаа айж эмээлгүй хуваалцах орчинг үүсгэдэг. Жижиг бүлгүүд нь суралцагчдад нийгмийн болон харилцааны чадвараа хөгжүүлэхэд мөн тус болно. Жижиг бүлгээс ач холбогдол бүхий туршлага олж авахад нь туслахын тулд суралцагчдыг дараах зүйлсээр хангах нь чухал байж болох юм. Үүнд: (1) эшлэл, ерөнхий чуулган дээр хэлсэн үгийн хуулбар эсвэл бусад тараах материал зэрэг эх сурвалжууд, (2) тодорхой зааварчилгаа, бодол төрүүлэх асуултууд, (3) хэлэлцүүлэг өрнүүлэх хангалттай цаг зэрэг орно.

Ижил асуулт сонгосон байдлаар нь жижиг бүлэг (нэг бүлэгт гурваас дөрвөн хүн) бүрдүүлэхэд суралцагчдыг урина уу. Бүлэг тус бүрд асуултад нь тохирсон тараах материал өг. (Тараах хоёр материал хоёулаа энэ хичээлийн төгсгөлд байгаа.) Суралцагчдыг тараах материал дээрх асуулт, эх сурвалжуудыг ашиглан үр дүнтэй хэлэлцүүлэг өрнүүлэхэд урь. Бүлгийн хэлэлцүүлгийн үеэр та анги танхимаар явж, шаардлагатай бол зааварчилж, дэмжлэг үзүүлж болно.

Бүлгүүдэд сэдвээрээ ярилцах хангалттай цаг гаргаж өгсний дараа, Аврагчийн хүмүүст өгсөн сургаалаас сурч мэдсэн зарим зарчмаа ангийнхантайгаа хуваалцахад суралцагчдыг урина уу. Нэг сэдэв дээр хэдэн минут төвлөрөөд, дараачийн сэдвийг хөндөх нь тустай байж болох юм.

Суралцагчид дараахтай төстэй зарчмуудыг тодорхойлж болно. Үүнд:

• Бид ариун ёслолоос хүртэхдээ Есүс Христийг үргэлж санаж, Түүний зарлигуудыг дагахад бэлэн байгаагаа Тэнгэрлэг Эцэгт гэрчилдэг.

• Бид ариун ёслолоос хүртэж, Есүс Христийг үргэлж дурсан санахыг хичээснээр Ариун Сүнсийг өөрсөдтэйгөө хамт байлгана.

• Их Эзэн бидэнд Бурханы бүх хүүхдийг урьж дуудан, нэгэн хэсэг гэдгийг нь мэдрүүлж мөн Түүн дээр ирэхэд нь тэдэнд туслахыг зарлигласан.

Зарчмуудыг тодорхойлсны дараа та тэдгээрийг самбарт бичихийг суралцагчдаас хүсэж болно. Эдгээр зарчмын талаар санал бодлоо эсвэл байгаа асуултаа хуваалцахыг суралцагчдаас хүс.

Дараах асуултуудыг үзүүлээд, суралцагчдыг аль нэгийг нь эсвэл хоёуланг сонгож, тунгаан бодоход урина уу. Та төрсөн бодол, сэтгэгдлээ бичиж тэмдэглэхэд суралцагчдыг урамшуулж болно.

• Би өөрийгөө ариун ёслолоос хүртэхэд бэлдэж, үүнийг илүү чухал, Христэд төвлөрсөн үйл явдал болгохын тулд юу хийж болох вэ?

• Бусдад халуун дулаан мэдрэмж төрүүлж, Есүс Христийн Сүмийн нэгэн хэсэг гэдгийг нь мэдрүүлэн туслахын тулд би юу хийж болох вэ?

Дараагийн хичээлээр

Эргэн тойрондоо буй сайн мэдээний дагуу амьдрахад саад болж болох зарим нөхцөл байдлын талаар бодоход суралцагчдыг урина уу. Дараагийн хичээлийн бэлтгэх материалыг судлаад, ёс бус орчинд амьдарч байсан ч зөв шударга амьдрахыг хичээсэн Мормоны Номон дээрх хүмүүсийн үлгэр жишээнээс юу сурч болохыг олоход суралцагчдыг уриалан дэмж.

Ариун ёслолын адислал

Мормоны Номын сургаал ба номлол: Багшийн материал—17-р хичээл

Хэлэлцүүлгийн удирдагчдад зориулсан заавар

Бүлгийнхээ гишүүдтэй хэлэлцүүлэг өрнүүлэхдээ дараах зааврыг ашиглана уу. Бүлгийнхээ бүх гишүүнийг оролцоход урамшуулан дэмж. Гэхдээ хэнээс ч бодол санаагаа заавал хуваалцахыг шаардах ёсгүй.

Би ариун ёслолыг сүм дээрх туршлагынхаа хамгийн чухал хэсэг болгохын тулд юу хийж чадах вэ?

3 Нифай 18:6–12; 20:8–9, бэлтгэх материалын 2-р хэсэг дэх ахлагч Дэвид А.Бэднар, Д.Тодд Кристоффэрсон нарын сургаалыг уншина уу. Тэгээд дараах асуултуудыг ярилц. Үүнд:

• Бид ариун ёслолоос хүртэхдээ Тэнгэрлэг Эцэгт юуг гэрчилдэг вэ?

• Ариун ёслол ямар арга замаар биднийг Аврагчтай ойртуулж болох вэ? Таныг Есүс Христ дээр илүү их төвлөрч, Түүнтэй илүү ойр байгаагаа мэдрэх үед амьдрал тань хэрхэн өөрчлөгддөг вэ?

• Ахлагч Бэднар, Кристоффэрсон нарын хэлснээр, ариун ёслол хэрхэн бидний амьдрал, зан чанарт долоо хоног бүр нөлөөлөх ёстой вэ? Эдгээр адислалын талаар өөрсдийн туршлагад үндэслэн гэрчлэх хүсэлтэй хүн байна уу?

• Ариун ёслолыг утга учир бүхий, Христэд төвлөрсөн үйл явдал болгоход танд юу хамгийн их тусалсан бэ?

© 2021 by Intellectual Reserve, Inc. Бүх эрх хамгаалагдсан.

Ариун ёслолын адислал

Багшийн тараах материал

Бүх хүнийг Сүмд халуун дотно хүлээн авах

Мормоны Номын сургаал ба номлол: Багшийн материал—17-р хичээл

Хэлэлцүүлгийн удирдагчдад зориулсан заавар

Бүлгийнхээ гишүүдтэй хэлэлцүүлэг өрнүүлэхдээ дараах зааврыг ашиглана уу. Бүлгийнхээ бүх гишүүнийг оролцоход уриалан дэмж. Гэхдээ бодол санаагаа заавал хуваалцахыг хэн нэгнээс шаардах ёсгүй.

Сүмд илүү халуун дулаан уур амьсгал бүрдүүлж, бүх хүнд Сүмийн нэгэн хэсэг гэдгийг нь мэдрүүлэхийн тулд би хэрхэн тусалж болох вэ?

Та хүмүүс тойрог, салбарынхаа нэгэн хэсэг гэдгээ мэдэрдэггүй байж болох хэдэн нийтлэг шалтгааныг тодорхойлсноор хэлэлцүүлгээ эхлүүлж болно. 3 Нифай 18:22–25, бэлтгэх материалын 3-р хэсэг дэх Кэрол Ф.Макконки эгчийн хэлсэн мэдэгдлийг унших цаг гаргаарай. Тэгээд дараах асуултуудыг ярилц. Үүнд:

• Эдгээр шүлгийн ямар сургаал, зарчмыг Сүмийн бүх гишүүн ойлгосон байх нь чухал гэж та бодож байна вэ? Яагаад?

• Макконки эгчийн мэдэгдлээс юу нь танд хамгийн чухал санагдсан бэ? “Христийн мэлмийгээр [бусдыг] харах” гэдэг нь ямар утгатай гэж та бодож байна вэ? (Кэрол Ф.Макконки, “Lifting Others” [video], ChurchofJesusChrist.org).

• Аврагчийн амьдралын ямар жишээ тэдний нөхцөл байдал ямар байхаас үл харгалзан Бурханы бүх хүүхдэд хоорондоо хамааралтай гэдгийг мэдрүүлж, халуун дулаан мэдрэмж төрүүлэх гэсэн Түүний хүслийг харуулдаг вэ?

• Бид тойрог, салбартаа ирсэн гишүүд, зочдод нэгэн хэсэг гэдгийг нь илүү сайн мэдрүүлж, халуун дулаан мэдрэмж төрүүлэхийн тулд хэрхэн Аврагчийн үлгэр жишээг дагаж чадах вэ? Сүмийн нэгэн хэсэг гэдгийг тань мэдрүүлж, халуун дулаан мэдрэмж төрүүлэхэд хүмүүс танд хэрхэн тусалсан бэ?

© 2021 by Intellectual Reserve, Inc. Бүх эрх хамгаалагдсан.

Бүх хүнийг Сүмд халуун дотно хүлээн авах

багшийн тараах материал 2