E Vueti Ira kece na Tamata o Jisu Karisito mai na Mate Vakayago.

Na Veisorovaki i Jisu Karisito era vakabulai taucoko kina na tamata mai na mate vakayago ka solia tale ga vei ira na isolisoli ni tucaketale kei na bula tawamudu.

Tukuni e na Bula i Joseph F. Smith

Me vaka e dua na daukaulotu ka dau wasea sara vakawasoma e na nona bula taucoko, na itukutuku ni kena vakalesuitale mai na kosipeli ni veivakabulai vei ira era makutu na rogoca. E vakavulica o koya ni Veisorovaki i Jisu Karisito e dua na cakacaka nuitaki ka bibi e na itukutuku ni bula vakatamata.

Na Veisorovaki ni noda iVakabula sa e vakagalalataki keda mai na mate vakayago ka vakarautaka talega vei ira na tamata kece na isolisoli ni tucake tale kei na bula tawamudu. E kena ikuri, ni Veisorovaki i Jisu Karisisto e rawai kina na mate vakayalo mai na nona vueti keda e na noda ivalavala ca ka vakarawarawataka vei keda na noda bula vakalou kevaka eda veivutuni ka vakamuria na ivakaro. Na galala ni Veisorovaki e na tukuni tiko e na wase ni ivola oqo; na veika me baleta na kena ivakarau e na tukuni e na iwasewase ni vola ka tarava.

E na gauna e mate kina o Alice na luvena yabaki 19 kei na nona “Daulomani o Alibo,” e na 29 ni Epereli 1901, e vakauta e dua na ivola vei luvena tagane o Joseph F Smith ka vakaraitaka tiko kina na nona vakabauta na Veisorovaki: “ se cuva tu ga na yaloda kina qele e na vanua ka laki vuki kina me kuvu na yagodra na noda daulomani Yalewa kei ira na tacidra Tagane lalai.… Io, eda na tovolea e na noda igu taucoko, e na veivuke ni Turaga, kei na yaloda talega eda vakila ni ra moce tiko na noda iyau e na taqomaki ira o Koya ka na dua na siga era na yadra mai na kuvu ni qele kina vakatukatuka kei na bula tawamudu. Io mai na veivakadeitaki talei kei na vakanuinui lagilagi ni Kosipeli i Jisu Karisito, e na sega walega ni yaga na kena bulataki, io e na rogo ca sara ka vakacacani! Io, ‘ na reki e soli e na iyatuvosa oya, au vakavinanaka vua na Kalou. Ni’u kila ni bula tiko na noqu Dasuveisorovaki!”¹

iVakavuvuli i Joseph F. Smith

E vakarautaka o Jisu Karisito na veisorovaki lagilagi me baleta na nodra vakabulai na tamata.

Eda vakabauta na Turaga o Jisu kei na nona ilesilesi ni veivakabulai vakalou, na nona ilesilesi ni veivakabulai e vuravura, na veisorovaki, e totoka, na veisorovaki lagilagi, e vakarautaka me baleta na vakabulai ni tamata.²

A se bera ni vakaotia na nona cakacaka o Jisu e na gauna e vakamatei kina, a sega talega ni vakaotia e na gauna a tucake tale mai kina e na mate; e dina ni a vakacavara na inaki ni nona a lako mai e vuravura, io e se bera ga ni vakayacora taucoko na nona cakacaka. E na gauna cava e na vakayacora kina? Me yacova ni vueti ka vakabulai ira na luvena tagane kei na yalewa na tamada o Atama o ira era sa sucu se o ira era na qai sucu mai e vuravura oqo me yacova na iotioti ni gauna vakavo sara ga o ira na luvei setani.Oya na nona ilesilesi.³

O Jisu Karisito, na Luveni Kalou bula, e ivakarau tudei me ra vakamuria na tamata, e ivakaraitaki talega vei ira kece na tamata. E sega ni dau ivalavala ca o koya; ka sega talega ni ca. E na vukuna, e sega kina na caka cala, se tawa vakabauta, se na veika cala tale e so. A sa vakatikori vakavinaka vua na vuku vaKalou ni se gone lailai sara me yacova na mate, ni oti na Nona tucaketale e sa mai taura kina na lagilagi ni Tamada, sa mai vakatalega na Kalou o koya, e tiko talega vua na kaukaua ni Kalou me vakaga na Kalou, ni tusanaka sa soli taucoko Vua na kaukaua, ka vakadaberi o Koya e na liga imatau i koya sa Cecere sara, e Daunivosa e vukuda, na tuakada, ka me da muri Koya duadua ga.⁴

E sega tale ni dua na yaca e na rukui ivuravura e soli mai, sai koya ga na yaca i Jisu Karisito, eda na vakabulai kina se me da bula kina vakalou e na matanitu ni Kalou.⁵

E tiko e so na veika dina e na inaki ni veisorovaki ka bibi sara. E na sega ni rawa me guilecavi; e na sega tale ni dua e na vakaliuci. Na itutu vakatama ni Kalou, na yaga ni veisorovaki ni noda Turaga kei na iVakabula, na kena vakalesui tale mai na kosipeli e na itabagauna oqo, me ciqomi e yaloda taucoko.⁶

Na Lutu nei Atama e kauta mai na mate e vuravura.

Na mate e sega ni ka me domobulataki. E vu mai kina e so na dina bibi me baleta na bula vakatamata. E dina e na tarai ira na rarawa o ira na sa yali na nodra itokani lomani, na mate e dua na veivakalougataki totoka e na cakacaka vakalou.

Eda sucu me da rawa ni biu kina e vuravura, oya me vakaisulutaki na yaloda e na yagoda. Na veivakalougataki oqo e imatai ni kabakaba ki na yago vakavuravura, na ikarua ni kabakaba oya na mate. Na mate e davo tikiva na sala kina torocake tawamudu; e dau dredre sara na kena vosoti, e sega ni dua e vakabauta na kosiplei i Jisu Karisito, vakabibi e na tucake tale, e na vinakata tale e dua na ka.… E yaga ka veivakalougatataki na mate… eda na sega ni na vakacegu ka marau sara vakalevu ke sega.⁷

E na gauna e sa ivalavala ca kina na tamata [o Atama] kina lawa vakalomalagi oya, ka vakatabui kina na nona vakayagataka na veika ni vuravura oqo, sa dodonu me yaco me vakavuravura, ni kauta mai vua na mate vakayago, me vaka a vakaraitaka na Kalou ni na vakayacora, kevaka e kania na “vuanikau tabu “⁸

Na mate sa mai totogi ni vorati ni lawa, e na sega ni levea rawa na tamata, na ivakaro ni Kalou ni, “Raica e na siga ko sa kana kina, ko na mate vakaidina,” [Mosese 3:17] na itotogi oqo e na vakamuria ira taucoko na vakayago, o ira era leqa ka dau vakanuinui me vakataki koya e na veika oqo.⁹

Eda kila ni da tamata ga vakavuravura baleta ni tiko vei keda na sore ni mate, io na kena dina eda tamata vakatuka, e tiko talega vei keda na sore ni bula tawamudu. Na tamata e rua, na yalo o koya e solia na bula, kaukaua, na vuku vei ira na tamata, kei na yago, e vakavaletaka na yalo ka me ganita na kena ibulibuli, rawata na veika e gadreva, e rau lomavata ka talairawarawara ki na ivakaro ni yalo tabu. Ni rau sa cokovata e rau sa mai tamata. E vakararavi tiko na yago kina yalo e na gauna e vakatawana tiko kina, io na yalo e na vakamuria talega na lawa me baleti koya ka lewai koya tiko e na nona tiko vakavuravura. E tiko e na yago oqo na sore ni malumalumu ka na yaco me vuca, e na gauna e dreu ka taucoko kina se me beti ni se bera na kena gauna, e na vosa vaka ivolanikalou, e dau kainaki tu me “ mate vakayago.”¹⁰

O ira kece na tamata era na sucu mai e vuravura oqo era na mate. Veitalia sara se o cei o koya, na vanua e vakaitikotiko kina, e sucu mai na kedra maliwa na vutuniyau se na turaga, se e na kedra maliwa na lolovira kei na dravudravua e vuravura, e sa nabataki tu na nona bula mai vua na Turaga, yacova yani o koya na ivakataotioti e na kena gauna dodonu. Me da nanuma dei tiko oqo. E sega ni ka me da yalolailai kina se me da maduataka; me kua sara. Au marautaka niu a sucu meu bula kau mate me’u bula tale kina. Au vakavinavinaka vua na Kalou me baleta na nona vuku. E solia vei au na marau kei na sautu, na veika e sega ni solia rawa vei au na vuravura, se me kauta tani mai vei au na vuravura. E sa vakaraitaka vei au na Kalou, e na kosipeli i Jisu Karisito. Au kila kina ni dina. O koya gona, au sega kina ni loma lailai, rawa se me’u luluvu kina.

Na ka ga au na vakayacora e na vuravura oqo me vueti au kina, oya me solia vei au na marau kei na sautu, na vakanuinui kei na veivueti e na bula oqo, kei na vakanuinui lagilagi ni veivakabulai kei na bula vakalou e na iserau ni noqu Kalou e na vuravura sa bera mai. E sega ni dua na betena me’u tagicaka me laki yacova sara na gauna au na mate kina. E dina, niu malumalumu me vakavuna na noqu tagica na noqu itokani se na wekaqu ni mate. Au na tagi tale ga niu raici ira na so era yalobibi tiko.

E tiko vei au na loloma me baleta na yalodra na luveni tamata. Au rawa ni tagi vata kei ira e na gauna era tagi kina; Au rawa talega ni marau kei ira kevaka era na marau; io, e sega ni dua na kena yaga vei au meu tagicaka se me’u rarawa me baleta na lako mai ni mate e vuravura. Au tukuna tiko yani oqo na mate vakavuravura, na mate ni yago.… [Yalododonu Edaidai] mo kila tiko ni sa yaco mai na mate vei ra na tamata me baleta na ivalavala ca i Atama, me vaka kina na bula dodonu i Jisu Karisito e na yaco mai kina vei ira na bula, e dina ni ra na mate, era na bula tale.¹¹

Na Veisorovaki i Jisu Karisito e vakamalumalumutaka na mate vakavuravura e na nodra tucake tale mai na mate na tamata.

Eda na sega ni vakayagataka na noda digidigi e na gauna e yaco kina na mate; eda na sega tale ga ni rawa ni kauta mai na kena itekitekivu vei keda; e lako mai me baleta na nodra ivalavala ca na imatai ni noda itubutubu. E na vuku ni ka oqo e sega ni lewa kina na tamata na kena yaco mai vua na mate, e na sega talega ni na kauta rawa mai na bula vua; baleta e mate e na vuku ni valavala ca i Atama, me bula tale kina na tamata, ke rawa se mani sega, mai na yalo dodonu i Jisu Karisito, kei na kaukaua ni nona tucake tale. Na tamata kece ni ra na mate era na bula kece tale.¹²

O Jisu Karisito … e imatai ni tamata e tucake tale mai na mate, me vaka na nona vakaduri cake, era na vakaduri talega kina na luvei Tamana, vei ira ka tarai ira kece na iru kei Atama. E na vuku ni dua na tamata sa yaco mai kina na mate vakavuravura vei ira kece na tamata, io e na Yalododonu i Karisito era na vakabulai taucoko, mai na mate na tamata taucoko; kevaka era vinaka se ca, era loaloa se vulavuala, vesu se galala, vuli se sega ni vuli, era gone se qase, e sega ni dua na kena yaga [raica 1 Korinica 15:21–22; Alama 11:44]. Na mate e lako vata mai kei na lutu ni imatai ni noda tubutubu ka sa vakagalalataki mai e na tucake tale ni Luveni Kalou, e sega ni dua na ka daru na vukea kina.¹³

Eda kila taucoko [ni Luveni Kalou] e sa laveti cake ki na kauveiletai; ni a vakamavoataki na yasa ni serena, ka drodro sobu mai na nona dra mai yagona; ni sa vutugu e na kauveilatai ka solia kina na yalona; ni sa kau tani mai na yagona e na kauveilatai … ka vakaisulutaki e na lineni savasava ka vakadavori e na ibulubulu ka se bera ni vakadavori tale kina e dua na yago ni tamata.¹⁴

E voroka na Karisito na ilati ni bulubulu, e vakadruka na mate kei na ibulubulu ka tucake mai “a sa yaco me kedrai sevu era sa moce tu.” [1 Korinica 15:20.]¹⁵

E lako mai o Koya ki vuravura … e vakaisulutaki e na rua na kaukaua—na kaukaua me mate, e vu mai vua na tinana; na kaukaua me vorata kina na mate ke vinakata, e rawata mai vei Tamana. Io, e tiko ruarua Vua na kaukaua me bula tawamudu kei na kaukaua me kua kina ni tarai koya na ocaoca ni mate, me rarawa kina e na vuku ni tamata kece, ka me tucake mai na ibulubulu kina bula vou—na tamata e sa tucake tale, ka vakasulumi e na tuka kei na bula tawamudu, me ra rawa kina ni tucake tale mai na tamata kina bula tawamudu, ke ra na talairawarawa Vua. Era na tucake ga mai, se ra tamata vinaka se tamata ca. Era na tucake ga mai na ibulubulu ke ra vinakata se sega. Era sega ni rawa ni vukei ira. Eda na sega ni rawa ni tarova na liga ni mate vakavuravura vei keda, se levea na tucake tale ni yagoda mai na ibulubulu; ni sa tucake tale na Kalou mai na mate e na vakakina na tamata taucoko.¹⁶

E matata na noda vakabauta ni o Jisu Karisito e dina ka vakakina na tucake tale ni tamata mai na mate kina bula. Eda vakabauta ni sega tale ni dua na ivalavala ni tucaketale mai na mate ki na bula; e na gauna sa tucake kina, ka maroroya na yacana, me vaka na mavo ni mavoa e ligana, na yavana, kei na yasa ni sarena, me rawa ni vakaraitaki koya kina vei ira na vakatitiqataka tiko na nona tucake tale mai na mate, ni sai koya dina oqo, na Turaga a vako e na kauveilatai, bulu e na ibulubulu, e tucake tale mai na mate ka mai bula, e na vakatalega kina vei ira kece na luvena tagane kei na yalewa o Atama era sucu mai e na vuravura oqo.¹⁷

Eda na tucake tale mai na ibulubulu, e na rogo na biukila, mai na ka oqo e na tucake tale kina na yagoda ka na curuma tale kina na yaloda, me ra na mai yalo bula, ka na sega tale ni yavu se na veibiu, era na sega tale ni veitawasei, me tuka ka tawamudu.¹⁸

Na veigacagaca kece e buli kina na yago vakavuravura oqo e na sega ni vakarusai, ka sega tale ni tarovi na kena bula, io e na siga ni tucake tale na veika vakayago e na mai veisotari tale, na sui kina sui na lewe kina lewe. E na lako mai na yago ni sa vakadavori, ni na sega na tubu se na cakacaka tale eso e na yaco e na ibulubulu. E na gauna sa vakadavori kina na yago, e na gauna e na tucake tale kina, ka veisau me taucoko na ituvaki ni yagona e na okati e na lawa ni vakalesui tale. Io, e na ia tiko ga na yalo me rabailevu ka vakatoroicaketaki, e na tubu me taucoko sara na yago ni oti na tucaketale.¹⁹

E rau na duavata tale kina na yalo kei na yago. Eda na veiraici vakayago, e na yagoda me vaka eda tiko e na bula vakavuravura. E na kau na yaloda me vaka ni ra vakadavori sobu, e dina e na tara yani na veigacagaca lalai na cakacaka ni veivakalesui tale mai; na gacagaca taucoko, na sui taucoko e vakamavoataki, na leqa ni yago e vu mai na vakacalaka se mai na veika tale eso, e na vakavoui taucoko ka biu tale e na kena itutu dodonu. Na lewe kei na veisema ni yago e na vakalesui tale ga ki na kena itutu. Eda na veikilai tale ka na marautaka sara na noda veimaliwai me tawamudu, ke da na vakamuria tiko ga na lawa ni Kalou.²⁰

Sa dua dina na vakasama lagilagi vei au mada ga, kei ira talega era sa kila na dina se sa ciqoma e yalodra, vei ira eda sa veibiu e ke, eda na veisotari tale ka na sega ni veisau na kedra rairai. E da na sota kei ira na tamata e da a dau veikilai vata e na noda bula tiko vakayago—e sega tale ni dua na tamata, se me dua tale na mataqali tamata, se na tamata vata ga e na dua tale na kena ibulibuli, e na dua tiko ga na kena irairai kei na kena ibulibuli, o koya ga na tamata eda kila e noda itokani e na bula vakavuravura, o ira talega na vakaleqai tu vakayago. E sega walega ni tamata e vakaleqai vakabibi e na we ni mavoa, se buli tu vakaca, se me sa yali na tiki ni yagodra, na veika kece oqo e na vakavinakataki e na kena gauna, me vaka na loloma e vakarautaka na Kalou. Na yago e buli tu vakaca e na vakavinakataki; e na kautani na ca tale eso vakayago, o ira na turaga kei na marama era na yacova yani na vakauasivitaki ni yalodra, me vaka na veivakauasivitaki e buli keda kina na Kalou mai na ivakatekivu. E na inaki oqo era sucu kina o ira na turaga kei na marama kei ira na luvena me rawa ni ra Kalou, ka taukena vata kei Jisu Karisito, era vakavinakataki, vakayago ka vakayalo talega, mai na nodra talairawarawa kina lawa e vakarautaka na kena veigacagaca me ra vakauasivitaki kina o ira taucoko na luvena.²¹

Me vaka na ikabakaba yadudua kina torocake tawamudu me tauri kina na veika e sa vakaraitaki oti mai na ivakaraitaki vakalou, me da kila kina ni o ira ga na tucake tale mai kei ira na tamata vakalagilagitaki era rawa ni itubutubu ni gone vakayalo. O ira ga na yalo vakalou era sa yacova yani na ivakatagedegede ni matua e na sala e digitaki ki na bula tawamudu; io na yalo e sa sucu vei ira e na vuravura tawamudu e na tuberi tiko e na vei kabakaba ni bula, e vakatau tiko e na vakatagedegede ni bula vakalou e rau bulataka tiko na nona itubutubu sa vakalagilagi.²²

Au sega ni vakasamataka tale e dua na ka taleitaki mai na veika sa vakadeitaka vei keda na kosipeli i Jisu Karisito—e dina ni da na mate, io eda na bula tale, dina ni da na qeyavu yani kina veika vakavanua e buli kina na yagoda, e na vakalesuitale mai vei keda yadudua ka na vakavoui, me da na mai yalo bula me vaka e vakayacora vei keda na iVakabula mai liu; e na nona vakayacora e vakarawarawataka kina vei keda taucoko.²³

Me iUlutaga ni Vuli

Na cava “na ilesilesi ni veivakabulai vakalou” i Jisu Karisito e na yavu ni veivueti?
Na cava eda “vakadonuya e yaloda taucoko” na dina kei na kaukaua ni Veisorovaki? Na veivakalougatataki cava e na yaco mai vei ira na vakayacora?
E “tamata rua” vakacava na tamata? (Raica talega V&V 88:15–16.) Na veivakalougataki cava e na soli vei keda baleta ni da kila na veika oqo?
Na cava na mate vakavuravura? E na vukei iko vakacava mo kila ni “ mate e davo e na sala ni veivakatorocaketaki tawamudu”?
Na ivakavuvuli cava e na vukei keda me da kua ni rerevaka kina na mate vakavuravura e na noda bula? Na cava eda na sega ni marau kina ni da”sucu me da bula, ka mate, ka qai bula tale”?
E na sala cava e “vakaisulu kina e na rua na kaukaua o Jisu Karisito”?
Na cava na kena ibalebale me da tucake tale mai? Na ibulibuli cava e na laurai e yagoda e na gauna eda tucake tale mai kina?
Na cava e tarai iko e na gauna o kila kina ni a rawata vei iko o Jisu Karisito na tucake tale mai na mate ka mo na bula tawamudu? E na vukei iko vakacava na kila oqo mo vakamuria kina na nomu veiyalayalati kei na Kalou?
Na cava e na vukei iko mo kila kina ni dua na siga eda na mate ka tucake tale mai?