Dau Solia Nomu iKatini

O ira na talirawarawa ki na lawa ni ikatini era veivuke me rawa kina na inaki ni Kalou, e na taura na Nona veivakakalougataki.

Tukuni e na Bula i Joseph F. Smith

Me yacova na mua ni yabaki e na 1800, sa sotava na Lotu e dua na leqa levu vakadinau ka sivia sara na milioni na kena levu. Na Levu ni dinau ni Lotu oqo e bibi sara e na nona vakasama o Joseph F. Smith. E na lotuvakayabaki e na Okotova 1899 e tukuna kina: “Sa levu na itukutuku vinaka kei na ivakavuvuli eda sa vulica me baleta na noda itavi na Yalododonu Edaidai, e sega walega ni baleta na Lawa ni ikatini, me baleta talega na veika eso, e bibi talega me vaka na lawa ni ikatini. E sega tale ni dua na ka e tu me bibi sara baleta na ituvaki ni welfea ni Lotu edaidai, oya na noda raica vata na lawa oqo, me da rawa ni biuta taucoko na veika eda rawata e na lololo ni Turaga, me ra rawata kina na tamata na veika era dui vinakata.”¹

E na dua na yakavi ni oti e vitu na yabaki, ni biuta mai na nona valenivolavola o Peresitedi Smith ka raici Rachel sara e na mata ni vale ni Maqusa.

“I vei o tinamu?” e tarogi koya yani.

“Au sega ni kila.”

“E na rairai tiko beka ivei o koya?”

“Au sega ni kila.”

“E na gauna cava e na tiko kina e ke?”

“Au sega ni kila, Ta, Au sega talega ni kila e dua na ka. Au se qai yaco ga mai e vale ni suka na vuli.”

“Raica, luvequ” e tukuna, “Au vinakata me kila taumada o nomu Na, io me vaka ni o sega ni kila e dua na ka, au na tukuna vei iko.” e ligana e tiko kina e dua na tiki ni pepa.

“O sa raica na tiki ni pepa oqo?”

“Io saka.”

“Na kena ibalebale na Lotu sa galala mai na nona dinau taucoko.” E dredre sara o koya. “E na gauna oqo o sa kila kina e dua na ka!”²

iVakavuvuli i Joseph F. Smith

Na nomu talairawarawa kina lawa ni ikatini e na vakadeitaka na nomu yalodina ki na matanitu ni Kalou.

E vinakata na Kalou e dua na ikatini ni veika o rawata me biu e na Nona loma ni lololo; oqo na lawa e soli mai me vakayagataki taucoko e na iTeki e Saioni.³

Mai na ivakavuvuli oqo ( ni ikatini) e na vakatovolei kina na yalodina ni tamata e na nona Lotu. Mai na ivakavuvuli oqo e na kilai kina se ocei na tokona na matanitu ni Kalou kei ira na veicoqacoqa tiko. E na laurai talega e na ivakavuvuli oqo o ira era lomadra dina me ra vakayacora na loma ni Kalou ka talairawarawa ki na nona vakaro, ka vakasavasavataka na vanua o Saioni vua na Kalou, ia o ira na vorata na ivakavuvuli era sa tawasei ira mai na veivakalougatataki mai Saioni. E vuqa sara na veika bibi e tara tiko na ivakavuvuli oqo, e na kilai kina na nomu yalo dina se sega. E na vukuna oya e vakaraitaki kina na noda vakabauta na Kalou, me vaka na veivutunitaki ni ivalavala ca, na papitaiso me bokoci kina na ivalavala ca, se na isolisoli ni Yalo Tabu mai na veitabaki ni liga.⁴

Na lawa ni ikatini na veitarogi era na vakatovolei yadua kina na tamata. Ke dua na tamata e na lutu mai e na kena vakamuri na ivakavuvuli qo e na kilai ni sega ni duavata kei na veika me baleti Saioni, ka sega talega ni vakaycora tiko na nona itavi vakalotu, ka sega talega ni vakayacora e dua na ka me baleta na ke na tosoi tiko na matanitu ni Kalou. E sega ni cau mai o koya, se vakaitavitaki koya e na kena vakatetei na kosipeli kina veimatanitu e vuravura, ka sega talega ni vakayacora na veika e na rawa kina vua me taura na veivakalougatataki kei na cakacaka vakalotu ni kosipeli.⁵

Na kena vakamuri na lawa ni ikatini e vakatau yadua sara vei keda, ka sa nomu digidigi taudua. E na vakatau sara ga vei au keu vinakata meu sauma na noqu ikatini se sega, na digidigi e noqu. E ka ga ni digidigi vei au, keu na vakayacora se sega; io au vakila niu sa vakayacora tiko, na noqu yalodina ki na Lotu, yalo dina ki na veika vakalotu, kau vakabauta talega ni dodonu ka vinaka me da vakamuria na lawa ni ikatini, au vakamuria tiko—e na ivakavuvuli me vaka au kila ni dodonu vei au meu vakamuria na lawa ni veivutuni, kei na papitaiso me bokoci kina na noqu ivalavala ca.⁶

O ira na sega ni sauma na nodra ikatini e na veiyabaki sa oti, era sa dinau tiko vua na Turaga, ka da sega ni rawa ni sauma, e sa sega ni vinakata na Turaga na ikatini eda sega ni sauma e na veiyabaki sa oti, io e na vosoti keda o koya me baleta na veiyabaki sa oti, ke me da na vakamuria vakaidina na nona lawa ni ikatini e na veiyabaki e sa tekivu yani oqo. Oqo na loma soli ka vinaka talega kau sa vakavinavinaka kina vakalevu.⁷

Au sa tukuna oti, kau na tukuna tale vakarua oqo, o ira na tagane kei na yalewa era sauma tikoga na nodra ikatini era na sega ni biuta rawa na lotu. E na sega ni dua na kena duidui ke lailai se levu na lawa qo ni Turaga; oqo na ivurevure ni ilavo ni Lotu; na ka e namaka na Kalou, e tukuna o koya ni o ira era sega ni vakamuria era na sega ni kilikili ka sega ni rawa ni taukena na veika mai Saioni. E na sega ni rawa ni dua na tamata e na biuta na lotu ke sauma tiko na nona ikatini. Sa donu oya. Baleta na cava? Baleta ke tiko vua na vakabauta me sauma tiko na nona ikatini, e na tiko talega vua na vakabauta e na Lotu kei na ivakavuvuli ni Kosipeli, ka tiko talega e lomana e so na veika vinaka, e na tiko talega vua na rarama. E na vei gauna taucoko ga e na vakayacora tiko kina na veika oqo [na saumi ni ikatini] e na sega ni rawa ni lutu tani mai na lotu se me rawai mai na vuni ca o Setani.⁸

Na iKatini e lawa ni Turaga me baleta na ilavo ni Nona Lotu kei na nodra vakalougatataki na Yalododonu.

Na lawa ni ikatini e lawa ni ivurevure ni lavo ni Lotu i Jisu Karisito ni Yalododonu Edaidai. Ke na sega, e na sega ni yaco rawa na inaki ni Turaga.⁹

Na Turaga … na vuna e solia mai kina na lawa ni ikatini, me rawa ni tiko e na nona lololo na Turaga na veika me vakayacori kina na inaki e vinakata o koya; na nodra kumuni na dravudravua, na kena kau na kosipeli ki na veimatanitu e vuaravura, na nodra qaravi o ira na namaki me ra dau veiqaravi, e na veigauna kece, e na cakacaka ni Turaga, kei ira talega e dodonu me ra vakavakarau tiko. Ke sega na lawa oqo e na sega ni rawa na veika oqo, se me na tara rawa kina na valetabu kei na kena qaravi, se me ra vakani na dravudravua. O koya gona e yaga kina na lawa ni ikatini e na Lotu, ka tusanaka kina vakabibi na Turaga..¹⁰

[Na iKatini] e vakayagataki me rawa ni tomani tiko kina na cakacaka vakalotu e na vale ni Kalou me vaka na … valetabu. E udolu vakaudolu na dola e vakayagataki me baleta na nodra vakavulici na cauravou kei na gone yalewa ni Saioni kei na kena qarauni na koronivuli ni Lotu. E udolu vaka udolu na dola e vakayagataki me ra vakaisulutaki ka vakani kina na dravudravua, kei ira talega na vakanuinui tiko ki na Lotu. Era rai vei “tinadra” me ra vukei ka tokoni, e dodonu ka matau talega vua na Lotu me qaravi ira na lewenilotu dravudravua kei ira na sese tu, na malumalumu kei na leqa, e na kena vinaka taucoko.¹¹

E vakaraitaka talega na Turaga na kena vakayagataki, na qaravi kei na kena lewai ni ikatini mai vei iratou na Mataveiliutaki Taumada, na lewe ni iApositolo Le Tinikarua kei na Matabisopi Veiliutaki ni Lotu. Au kila e tiko e loma na vuku. E sega ni soli ga vua edua na tamata me vakayagataka, se me cicivaka duadua. Era vakaitavitaki era lewe tinikawalu na dau veiliutaki e na lotu na vakayagataki ni lavo ni lotu, o ira na tamata vuku yalo dina, tamata e rawata na ka me vakataki ira na le tinikawalu oqo. Me vaka au sa vakamacalataka oti ni vakatau tiko vei iratou oqo na kena vakayagataki na nodra ikatini na tamata me ratou vakayagataka e na veika eratou kila ni na vinaka e na Lotu;.… na ilavo taucoko oqo [ikatini] e na vakayagataka o ira na sa digitaka na Turaga ka solia talega vei ira na kaukaua me ra vakayacora, me rawa kina ka yaga vua na Lotu.¹²

Na Turaga … e vinakata vei ira na tamata era tiko e na itutu ni veiliutaki e na nona Lotu ka nodra itavi tiko na veituberi kei na veidusimaki vei ira na tamata ni Kalou me ra raica me vakamuri tiko na lawa ni Kalou me baleta na ikatini. Oqo na noda itavi meda vakayacora.… E dodonu me ra vakayacora o ira na iliuliu ni Lotu me ra vunautaka na ivakavuvuli oqo, me ra sega walega ni vakayacora na tamata na veika oqo me vaka ni nodra itavi, e baleta talega me tiko e so na ka e na lololo ni Turaga me qaravi kina na veika era vinakata na tamata. O ira na lewe ni Lotu, ni ra soqoni vata oya sa dua na ivavakoso ni Lotu, me dua na ka me baleta na Lotu, e sa nodra itavi na lewena tiko me ra vakarautaka mai na veika oya. E vinakata na Turaga me da vakamuria tiko na Nona Lawa e na kedra maliwa na tamata.¹³

Au via tukuna vei ira na tuakaqu kei ira na ganequ e na mataka lailai oqo e ke, niu nanuma ni sega tale ni dua na gauna ni o ira na lewenilotu i Jisu Karisito ni Yalododonu Edaidai e tiko vinaka sara na nodra ivakatagedegede ni bula, ni levu sara na nodra vakabauta kei na gugumatua e na gauna oqo. E vu mai na veika oqo mai na levu na ka. E dua na kena ivakadinadina vinaka na kena sa muri tiko vakavinaka na lawa ni ikatini.… Oqo e dua na ivakaraitaki vinaka ni o ira na Yalododonu Edaidai era sa vakayacora tiko vakavinaka na nodra itavi, ka tiko vinaka na nodra vakabauta e na Kosipeli, ka ra vinakata talega me ra vakamuria tiko na ivakaro ni Kalou, ka ra sa vakamuria tale tiko ga vakavinaka e na yalovakabauta na sala e dodonu me ra muria.

E dua tale na ka au via tukuna vei kemuni, oqo e na sala ga ni veivakavinavinakataki, oya mai na veivakalougatataki ni Turaga kei na nodra yalo vakabauta o ira na Yalododonu e na nodra saumi ikatini, e sa laki saumi rawa kina noda dinau vakalotu. E na siga ni kua na Lotu i Jisu Karisito ni Yalododonu Edaidai e sega tale ni dinautaka tale tu e dua na ilavo, ke tiko e na sauma sara vakatotolo. E vakatikori keda e na dua na ivakatagedegede me da sauma tiko na veika eda vinakata e na veigauna. Me da sa kua ni dinau tale, eda na sega tale ni dinau kevaka era na bulataka tiko vakaidina na Yalododonu Edaidai na nodra ivakavuvuli ni Lotu ka vakamuria vinaka na lawa ni ikatini. Oqo na lawa ni ilavo ni Lotu.

O koya gona au via tukuna yani vei kemuni, e na rairai eda na sega ni rawata sara vakatotolo, ia au na namaka na siga e na sega ni kerei kina vei iko e dua na dola me nomu cau me baleta tale e dua na ka, vakavo sara ga na ivakacavacava o solia wale me nomu cau kina lotu, baleta ni sa tiko taucoko na veika e vinakati e na lololo ni Turaga me saumi kina na veika e vinakati me vakatoroicaketaki kina na matanitu ni Kalou.… Oqo e ivakaro dina, na inaki uasivi ni Turaga me cicivaki vinaka kina na veika me baleta na Nona Lotu.¹⁴

Na ivakavuvuli ni saumi ni ikatini e ivakaraitaki ni talairawarawa ki na lawa.

E sega ni vakabekataki, ni vuqa sara na qaqa ni ivolanikalou e rawa ni wiliki yani me baleta na ivakavuvuli ni ikatini, sa vakaraitaka vei keda na Kalou e na itabagauna oqo, ka vinakata kina na noda veivuke me da vakasavasavataki e na noda talairawarawa kina nona ivakaro, me rawa talega na vanua oqo me noda Saioni; ka yalataki kina vei keda, kevaka eda na talairawarawa ki na lawa ni Kalou, ka vakabauti koya se vakanuinui vua, e na toro voleka yani vua e na toro mai vakavoleka o koya vei keda, ka na veikauwaitaki mai o koya ka vakalougatataki keda talega. E na vunauca na dauvakacaca, e na vakavuna talega me vuavuai vinaka o vuravura, ka solia na nona kaukaua vua ka dauqaravi ira na manumanu, na dauteitei kei na vakatawa ni manumanu. E na levu kina na nona pulumakau, e na vakavutuniyautaki koya e na ligana imatau kei na ligana i mawi, e na vuqa sara e nona, baleta ni a vakararavi o koya vua na Kalou; e toso voleka yani o koya vua, ka vinakata me vakaraitaka vua, se’u na dolava, se segai, na katuba ni lomalagi, ka sovaraka vei kemudou na ka ni veivakalougatataki, me na sautu dina sara. [raica Malakai 3:10]. O ira kece na sa taura oti na kosipeli i Jisu Karisito me ra taura talega na vosa oqo, ka vakamuria, e na nodra igu taucoko. E so na tamata e na rairai na taura vakamamada, o ira oqo e ra na lutu dina ka sega ni toso voleka rawa mai, era na lomaloma rua ni tokona se vakadinadinataka na Turaga, era na sega ni vakayacora na ivakaro e solia mai ka ra na sega talega ni kila na Kalou e tukuna tiko na veika dina, ka na rawa talega ni vakayacora na nona vosa kei na nona veiyalayalati vei ira na nona tamata e na gauna era rawa ni talairawarawa vua ka vakamuria na nona lawa.…

… Keirau sota kei na dua na tuakaqu—E na sega ni yaga me’u kaciva na yacana, io o koya mai vei ira na udolu na tamata e rawa ni solia talega na nona ivakadinadina, e na sega walega ni vakavosa mai na ivakaraitaki ni nona dau lewa maqosa, bula sautu, vakatorocaketaki e wavoliti koya e na vanua veidravuisiga. E na gauna ni tatamusuki oqo e vuavuai vinaka sara na nona itei, baleta na vuavuai vinaka ni nona itei, io na nodra were na kai nona e tubua tu e na co, e na gauna ni tatamusuki e na veimama walega se na lailai sara na ka e na rawata mai kina. Na cava beka na nomu rai? Au raica ni a vakalougatataki koya na Kalou; ka vakalougatataki koya dina, ni tamata vuku o koya, e sega walega ni cakacaka vakavuku o koya e maqosa talega, ka rerevaka na Kalou, ka vinakata e lomana me vakamuria na nona lawa.… e dau sauma o koya na nona ikatini, e dau nanuma na nona cau, e dau talairawarawa ki na lawa ni Kalou, e sega talega ni dau rere me solia na nona ivakadinadina vei ira na nona itokani kei ira na kai nona, e na vuku talega ni nona talairawarawa e sa vakalougatataki koya kina na Kalou ka biuti koya e na vanua e tiko kina e na gauna oqo. E sega ni o koya duadua; e tiko tale e so era sautu e na salavata ga oya. Au vakadinadinataka yani ni sa vakalougatataki koya na Kalou, e vakalougatataka na nona qele, na nona cakacaka, ni rawata kina na veika e na kena levu taucoko, ka taura mai kina na veivakalougatataki me rawa kina ni cakacaka. E vakaraitaka ka vakayacora na veika vinaka vua na Turaga; e kila vinaka na Turaga na lomana ka vakalougatataki koya vakakina.¹⁵

Niu sa mai tinia tiko oqo na ivakavuvuli ni ikatini e baleta tiko na talairawarawa kina kena lawa e na levu sara na ka vinaka e da na rawata, mai na talairawarawa oya, mai vei ira tale na so. E na rairai levu sara, se voleka na udolu vaka udolu na keda isau ka sauma vinaka noda ikatini, ka vakalevutaka kina na ilavo eda sauma e na noda ikatini mai na keda isau. Io mai na vinaka e na yaco mai vei keda e na noda talairawarawa ki na lawa ni Kalou e na levu sara na veika vinaka mai muri e na yaga vei ira na dravudravua. E na vakalougatataki vakalevu o koya sa solia mai vei koya sa taura.

Na ka e leqa tiko oqo, e na gauna e sa vutuniyau kina e dua na tamata, e sa vakila ni sa dravudravua ki na nona talairawarawa ki na lawa ni Kalou. Na vutuniyau e na vakavuna na tamata me ra dravudravua e na nodra qaravi koya sa Cecere Sara. O ira na tamata dravudravua e rawarawa sara ni sauma na nodra ikatini ka solia tale e so na veivuke me baleti ira na vakaleqai tu; ia kevaka e yaco me milionea, se me levu na nona ilavo, e na dau nanumi koya ga vaka i koya. E na vakavuna, ni na sega ni rawa ni taura kina na ivakaraitaki levu ni nona loloma kei na loloma veivueti ni Kalou vei koya, e dodonu me taura mai na levu ni veika vinaka e vakayacora mai na veika e rawata.

Na talairawarawa sa ikoya na ka e gadreva o koya sa Cecere Sara. Na talairawarawa oqo e vinakata o Koya mai vei Eparaama. Au vosa tiko oqo me baleta na talairawarawa vua na Kalou, ka sega vua na tamata; kau bolea na tamata e rawa ni vakadinadinataka na talairawarawa vua na Kalou, me vaka na saumi ni ikatini, e na sega ni vinaka mai na talaidredre—e na vinaka vua na tamata vaka i koya ka vinaka talega vei ira na tamata kece. Kevaka sa talairawarawa na tamata ki na lawa ni ikatini, e sa dodonu vua me taura talega na veivakalougatataki ni Kalou vakataki koya, me kila talega ni tiko na veika e gadrevi e na lololo ni Turaga me ra qaravi kina na dravudravua, na kena vakau na Kosipeli e veivanua tani, na tara ni valetabu, na kena rawati na Nona inaki; ia kevaka e sega ni talairawarawa kina lawa oqo, e na sega ni dua na ka e na tu, ka na tarova na veivakalougatataki e dodonu me solia vua na Turaga.¹⁶

Me iUlutaga ni Vuli

Na cava na lawa ni ikatini ni Turaga? (Raica V&V 119:3–4.) Na ivakavuvuli cava ni kosipeli eda vulica ni da sauma na noda ikatini? Baleta na cava “edua kina na ivakavuvuli levu” na noda talairawarawa ki na lawa me baleta na saumi ni ikatini?
Na cava e rawa ni ra cakava na lewenilotu ka ra sega ni dau sauma na nodra ikatini e na gauna e liu ka ra sa via vakamuria na ke na ivakaro e na gauna oqo? Na cava so na vuni nodra dau lutu e na saumi ni ikatini na tamata? Na cava e vakavuna na “yalo e dau nanumi koya ga vakataki koya”?
Na cava e so na inaki e vakayagataki kina na ilavo ni ikatini? E na vakayagataki vakacava na ikatini me vukea na veika vakayalo se vakayago baleti ira na lewenilotu kei na tamata tale eso?
O cei e lewa na kena vakayagataki na ilavo ni Lotu [iKatini] (Raica V&V 120.)
E rawa ni vakavulici vakacava na saumi ni ikatini e na loma ni vuvale?
Na veivakalougatataki cava e yalataka na Turaga vei ira na sauma na nodra ikatini? (Raica Malakai 3:10–12.) O sa vakalougatataki vakacava mai na nomu talairawarawa ki na lawa ni ikatini?

*Prove Me Now Herewith,* mai vei Glen S. Hopkinson, kedrai itaba ni vuda Yaloddonu yalodina e na nodra soqona tiko mai na nodra ikatini, e dau saumi vaka iyaya ka sega ni vakailavo ki na valenivolavola levu ni ikatini volekata na Valetabu e Salt Lake.