Na Valetabu ni Turaga

E na valetabu e qaravi kina na cakacaka vakalotu ni nodra vakabulai na bula kei na mate ka veiyalayalati me da dina tiko e na noda bula taucoko.

Tukuni e na Bula i Joseph F. Smith

E na Okosita 1907 e na dua na lotu ni vakatatabu ni Uintah Stake Tabernacle mai Vernal, e Utah, e tukuna kina o Peresitedi Joseph F. Smith vei ira na Yalododonu, ni na sega ni kurabui ke na tara e dua na valetabu e na vanua oqo e na dua na siga.¹ E na vula o Noveba 1997 e vakavoutaki kina na tabernacle, ka vakatabui me Valetabu e Vernal Utah, me 51 ni valetabu ni Lotu.

Na nona bula kei na nona cakacaka vakalotu o Joseph F. Smith e vauci vata tiko kei na cakacaka ni vakavaletabu. E sotava na veika oqo e na nona se tiko mai Nauvoo e na vulaibatabata ni 1845–46, e na gauna e rau a vakaitavi tiko kina o tinana kei ganena Mercy R. Thompson, “e na cakacaka ni valetabu.” E muri a kaya kina o Peresitedi Smith, “E kea keitou a vauci kece na luvei tamaqu vei rau na neitou itubutubu.”² E tiko talega e na vakasobuduru ni Valetabu e Salt Lake e na 1853 kei na kena vakatabui na valetabu e na 1893. E na nona namaka tiko na kena vakatabui, e kaya: “E vasagavulu na yabaki na kena gadrevi, vinakati kei na nodra namaka tiko na lewenilotu taucoko me tara oti na vale oya.… Ni sa tara oti rawa na vale levu oqo ka sa vakarau me vakayagataki me baleta na veika vakalou, eda na tukuna talega ni da sa volekata yani na gauna e na vakacavari kina, e na dua na gauna cecere taudua vei keda?”³ E qai veiqaravi e imuri o koya me peresitedi ni Valetabu e Salt Lake mai na 1898 ki na 1911, e na ciwa na yabaki oya a Peresitedi tiko kina ni Lotu.

E vakaitavi talega o Peresitedi Smith e na kena vakatabui na valetabu mai St. George, Logan, kei na Valetabu e Manti. E na 1913 e vakatabuya o koya na vanua e na tara kina e ono na valetabu ni Lotu, mai Cardston, Alberta, Canada; ia e na 1915 e vakatabuya kina na vanua e sa laki wili tale tu ga me ikarua ni nona vanua, o Hawaii, na imatai ni valetabu e na taudaku kei Mereke i-cake. E sa vakila tiko mai o koya ni sa volekata tiko yani na Lotu na katuba ni tara valetabu: “Au sa raica na yaga ni kena tara na valetabu tale eso … e na vakatabui vua na Turaga me vakayacori kina na cakacaka vakalou e na vale ni Kalou, me rawa kina ni ra veisiko yani na tamata e na vale ni Turaga, ka sega ni taubaletaka e vica na drau na maile me ra laki vakayacora na cakacaka vakavaletabu.”⁴

iVakavuvuli i Joseph F. Smith

Na Valetabu me vakayacori kina na cakacaka tabu kei na cakacaka vakalou ni veivakabulai.

Eda sa vakaitavi e na cakacaka ni valetabu. Eda sa tara e va na valetabu e na vanua oqo, e rua na valetabu e na tokalau- ira ni vanua eda lako mai kina. E na gauna a se bula tiko kina na Parofita o Josefa Simici a tara ka vakatabui kina e dua, e sa vakadavori na yavu ni kena ikarua ka sa tara tale tiko ga na kena lalaga e na gauna e vakamatei kina o koya. E qai tara oti mai na nodra gumatua na lewenilotu e na dua na gauna dredre ni nodra bula, na gauna ni leqa vakailavo, ka sa mani vakatabui na vale oqo vua na Turaga. Na cakacaka vakalotu ni vale ni Kalou e vakayacori ga e loma me vaka sa vakavulica vei ira na veiliutaki taumada ni Lotu na Parofita o Josefa Simici.… Na kosipeli ga eda vulica tiko e na gauna oqo kei na cakacaka vakalotu, me baleti ira na bula tiko kei ira na mate, e veiqaravi kina na Parofita vakataki koya ka soli mai vua me baleta na Lotu.⁵

Eda nuitaka ni na yaco mai na siga me da raica kina na tara ni valetabu e na veivanua, me rawarawa vei ira na tamata; eda sa kila ni dua na itavi bibi era vakaivuataki tiko kina na tamata ni Kalou e na siga edaidai, ka me ra vakagolea na lomadra na qase vei ira na gone, me vakayacori kina na cakacaka e dodonu me ra vakayacora o ira, me rawa kina vei ira me ra tiko vata tale e na ivau ni veiyalayalati vou ka tawamudu mai na dua na kawa tamata kina dua tale.⁶

Na Valetabu e sega ni dola raraba vei ira na tamata. Na kena inaki me vakayacori kina na cakacaka vakalotu tabu, me vaka na nodra vakabulai o ira na bula tiko kei na mate. Na vei cakacaka e qaravi taumada na papitaiso, edaumeni, vakamau, na veivauci.… E levu na cakacaka e baleti ira tiko na mate, na cakacaka ni tu vakaveisosomitaki. E tiko vei keda na Yalododonu Edaidai na vakanuinui ni nodra vakabulai o ira sa biuta na vuravura oqo ka ra sega ni vakamuria na kosipeli, kevaka era na vakamuria vinaka na veika e vinakati e na vuravura kadua, na vanua era veitawasei kina na yalo. E vunautaki vei ira na kosipeli mai vei ira na tamata cakacaka ni Turaga era sa curu yani e parataisi, o ira ga sa vakaraitaka na vakabauta kei na veivutuni e rawa ni vakayacori na nodra papitaiso e ke (e na loma ni Valetabu), ka taura talega vakakina na cakacaka vakalotu e ganiti ira me ra rawa ni vakabulai ka vakalagilagi kina e muri.⁷

E na sega ni dua na tamata e na curu rawa kina matanitu ni Kalou ia e na inaki duadua ga sa vakarautaka o Jisu Karisito vei ira na luve ni tamata.… E na sega talega ni dua na tamata e bula tiko e vuravura se sa mate e na sega ni rogoca na kosipeli i Jisu Karisito. Ni ra sa taura ka vakamuria, na cakacaka vakalotu ni kosipeli e na vakayacori me baleti ira, ka ra qai vakayacora na wekana se dua tale na wekana e na dua tale na itabagauna mai muri, me rawa kina ni vakamuri na lawa kei na veika kece e nakiti me baleta na kosipeli i Jisu Karisito me vakayacori. E na vakayacori kina na veiyalayalati kei na veika e lavaki me baleta na nodra vakabulai o ira na bula tiko kei ira talega na sa mate.⁸

O ira na tagane se yalewa Yalododonu Edaidai, e ra vakawaletaka na yaga ni cakacaka vakalotu e na Vale ni Kalou, ka sega talega ni gadreva na veika e vinakati e na kosipeli me vaka na cakacaka e gadrevi kei na kena cakacaka vakalotu, e na sega ni matata vinaka sara vua na cakacaka levu e ra kacivi kina na Yalododonu Edaidai me ra vakayacora e na itabagauna oqo, ka na sega talega ni marautaka na veivakalougataki e na kauta mai ke da na talairawarawa kina lawa ka cecere cake mai na lawa ni tamata.⁹

Me kua ni dua na tamata me taura vakamamada na cakacaka vakalotu e na vale ni Kalou.¹⁰

Eda na sega ni bula wale tikoga e na vica na yabaki eda mai tiko kina e na vuravura oqo, io e na bula ga sa tawayalani; eda gadreva me da marautaka na veivakalougataki e na veiyabaki kece me tawamudu, ia ke vaka sa vakadeitaki vei keda e na kaukaua ni veivauci me vaka a soli vua na iApositolo o Pita mai vua na Luveni Kalou, eda na sega ni rawa ni mai taukena. Me yacova ni da sa vakadeitaka e na ivakavuvuli oya, e na bula mai muri e na noda na tama, na tina, tuakada, ganeda, watida, luveda, se o noda itokani, na noda iyau se veidokai, se na veika vakavuravura “raica na veiyalayalati, bubului kei na yalayala kece ga sa cakava na tamata,” [raica V&V 132:7] e na waicala ga e na ibulubulu, vakavo saraga o ira na sa vauci ka vakadonui e na kaukaua ni Kalou.¹¹

Me da curuma yani na valetabu e na yalodina kei na inaki me da vakayacora kina na loma ni Kalou.

Ni dua na tamata … e kauta tiko mai na nona ivolatara mai vua na Bisopi … ka vinakata me mai papitaisotaka e vica na nona era sa mate, ni sa tiko vua na veika e ganiti ka sa vakadonui vinaka mai, e sa vakayacora kina na veika e gadreva. E sa mai papitaisotaki ira na nona era sa mate. E sa vakadonui talega me laki vakayacora tale eso na cakacaka vakalotu me baleti ira. Ni sa mai vakacavara oti na cakacaka ni veiqaravi e mai vakayacora e sa mai vakaraitaka sara na nona vinakata me vakagalalataki mai e na Lotu. E na gauna oqo, e dua na ka noqu qoroya na tamata oqo, baleta tiko ga na gugumatua ni nona vakayacora na cakacaka me baleti ira na nona itokani era sa mate ni bera me vakayacora na cakacaka me baleti koya vakataki koya. Eso e rairai na kaya, “Na cakacaka oya e na vakadonuya na Turaga?” Sega sara ga ni macala, e rairai e na vakadonui, e na vukudra na sa mate, e sa volai tu vakaitukutuku ni sa vakayacori na cakacaka kei na veika tale eso e gadrevi me vaka e lavaki e na lawa sa vakasala kina na Kalou. E dodonu kece na veika e sa vakayacori, mai na nodra veituberi o ira e tiko vei ira na kena lewa, io na cava ga e sega kina ni dodonu ni sa dodonu vei ira na mate? Io na cava e na soli vua na tamata e vakayacora na veika e vakayacora? E na sega so ni levu. “Ia ka cava na kena yaga vua na tamata, kevaka e rawati vuravura kece, ka vakayalia na yalona?” [Marika 8:36.]

Na ka e na yaco vua na tamata e vakaqara me curu loto se me vakarawarawa taki na nona curuma yani na vale ni Turaga e na lasu se me lasutaka, o koya oqo: Na tamata e tovolea me lawakicataka na Kalou e na nona viavia ka mani sega, me rawa kina ni butakoca na veika e soli mai vei keda se na veivakalougatataki e na vale ni Kalou, e na sega ga ni yaga vua ke vakasamataka. Ke da vinakata me da taura na veivakalougatataki kei na cakacaka vakalotu ni vale ni Kalou, me da taura e na yalododonu, ka me da curuma yani na vale e na vakabauta kei na yalododonu ka laki vakayacora vakavinaka na loma ni Kalou e na veika kece, me kua walega ni vagauna, me da vakayacora na veika kece e vakarota e na veisiga kece ni noda bula. Ke me tomana tiko na marau e na yalododonu, e na tiko kei keda na veivakalougataki, e na raici keda mai na Kalou ni o keda na luvena; e na gauna ga eda sa gole tani mai kina na sala dodonu ka sega ni vakayacora na noda itavi, e na biuti keda kina na Yalo Tabu ni Kalou me biuti keda tu me da luveniyali.…

Ke’u kila e yaloqu niu sa cala vua e dua na tuakaqu; se sega ni vakamuria na lawa ni Kalou; se au sa ivalavala ca vua e dua na lewenilotu, se e dua e veiliutaki icake vei au e na Lotu ni Kalou, au kila ni noqu itavi taumada meu lako ka laki vakameautaka na veika kece ni bera niu lako yani kina vale oya.… Ke dua na ka cala au vakayacora vei iko; keu butakoca e dua na ka mai vei iko; ke’u sega ni dina e na nodaru veiyalayalati; se au vakayacora e so na ka e vakacalai au kina e na iserau ni Kalou se vei ira na taciqu, au na tovolea me’u laki sausaumi ni bera ni’u tovolea tale meu curuma yani na vale ni Kalou. Io au sega walega ni via vakayacora na veika oqo me inaki ni noqu via curuma yani na nona vale. Au vakayacora na veika oqo ni sa noqu itavi me’u vakayacora; me rawa talega ni’u kilikili e na noqu lako yani, ka laki tu e na itutu tabu e na iserau ni Turaga, e dodonu ga me’u vakadodonutaka na veika kece vei ira na tuakaqu, au a cala vei ira.

E dodonu meu vakaraitaka na noqu veidokai vei ira e dodonu me ra dokai. E dodonu vei au me’u doka na Kalou na Tamaqu Vakalomalagi, oqo, mai na gauna oqo, ka lako yani, me tawamudu. Oqo na ivakavuvuli me’u muria me dodonu na veika au vakayacora, meu sausaumi ke gadrevi ka vakameautaka na veika dredre au vakayacora. Au sa rogoca na nodra veimaliwai vakaveiwekani na taciqu, ka ra vauci vata e na ivau vou ni veiyalayalati tawamudu, e na nodra duidui, ka tiko e lomadra na yalo ca, vakataki ira ga, ka ra sega ni rawa ni vakamalumalumutaki ira me ra lako yani me ra laki veivosoti, me rawa kina na veibulubuluti, ka raica na malumalumu ni kai nodra, ka na raica talega kina o koya na nona malumalumu. Io … ke na sega ni soli vei ira na veivakadonui me ra curuma yani na vale ni Kalou, era na vakila ni dua na cala levu e vakayacori vei ira.

Io, au tarogi iko mada, E dodonu vei ira na tamata oqo me ra lako yani i kea? Ke dua na tamata e se yalocataka tikoga e lomana na kai nona, e sega ni na vosoti koya se me buluta na veika e tu yalona, e na kilikili beka me curuma yani na vale ni Kalou? O sa sega ni tarovi koya rawa. E na drau sara vakadrau e na curu tiko yani e na ituvaki vata ga oya, ka sa sega ni yaga na veika eda na tukuna se cakava. Era na namaka beka na Kalou me tiko kei ira, ka na seraka na Nona lagilagi vei ira? Kakua ni vakaisini iko. E na gauna ga eda kilikili tiko kina e na vakaraitaki koya na Kalou vei keda. E na gauna eda sa vakavakarau kina eda na raici Koya, eda na tautauvata kaya, edaidai ka’u sa kila vakatikina ga; ia maimuri, ka’u na kila me vaka ka’u sa kilai. Io e na yaco na veika oqo ke da kilikili tiko, ka na sega me yacova na gauna oya.¹²

Mo dina tiko kina veiyalayalati o vakayacora e na vale ni Turaga.

Me baleta na veika e na noda Lotu kei na veiyalayalati tawamudu, e sega ni dua na veidinadinati e na vakayacori, se na ivakavuvuli me wasei; era vu taucoko ga mai vua na Kalou ka kune e na vatu ni yabaki tawamudu; e ra na bula tikoga e na gauna e vakarusai ka kavoro kina na matanitu, kaukaua kei na vanua; e na nona veivuke o koya sa Cecere sara eda na taqomaka na noda veiyalayalati tabu, ka dina tiko ga vua na noda Kalou, e na vo ni gauna kece se me tawamudu.¹³

Na Turaga e na vakalougatataki iko,e na gauna oqo, e na yaca talega ni Turaga au sa vakakalougataki iko kina—na ivavakoso oqo, na tamata ni veiyalayalati ni Turaga me vaka na nodra dina na nodra a tamata ni veiyalayalati makawa ni Kalou na Isireli, ni o sa vosa yalayala ki na Kosipeli i Jisu Karisito, ni o na vakamuria na ivakaro ni Kalou, ka vakagalalataki iko mai na veika ca ka tawa kilikili. O sa kila vinaka sara ga na ka o sa vakayacora; o sa kila vinaka talega na mataqali veiyalayalati o vakayacora e na iserau ni Kalou kei na nona ivakadinadina, e matadra talega na agilosi mai lomalagi; ni o sa na vauci e na ivau ni veiyalayalati vou tawamudu, ni o sa mai tamata ni veiyalayalati ni Kalou e na gauna oqo.¹⁴

Ni sa vukei au oti na Turaga e na veigauna sa oti me’u dina tiko e na noqu veiyalayalati, au sa cabora vua kei iko,… io mai na Nona veivuke kei na Nona veivakalougatataki au na nuitaka me’u dina tiko e na veika au sa yalataka e na noqu bula mai muri, ke vakadonui vei au me’u bula balavu se mani lekaleka sara; e na sega ni dua na betena vei au. E na gauna au bula tiko kina, au nuitaka me’u tamata dina, ka yalododonu, me’u na raica taucoko na tamata vakatabakidua ka sega ni maduataka e dua, me qai kena iotioti me’u rawa ni tucake tale kina e na iserau ni Kalou, me lewai ira na bula kei na mate, ka sega ni rerevaka na veika au sa vakayacora oti e vuravura.

… Au masuti iko mo dina e na nomu veiyalayalati; ka dina talega e na nomu veiyalayalati o vakayacora e na gauna o papitaiso kina, kei na veiyalayalati talega o vakayacora e na vale ni Turaga, ka dina talega e na veika kilikili o vakaitavi kina. Ni o sa Yalododonu Edaidai, me ra dau vakasama o ira na tagane kei na marama, ke ra tamata cakacaka; e dodonu me ra turaga ka marama dau vakasamataka vakavinaka na veika ka qarauna vinaka na ilakolako ni nodra dui bula kei na ivakavuvuli era sa vakadonuya. O ira era se sega ni rawa ni ra Yalododonu Edaidai ka yalovakabauta talega me yacova ni ra sa vulica ka kila vakavinaka, na veika se na ibalebale ni ivakavuvuli ni kosipeli era sa ciqoma.… Ni ra kila vinaka na tamata na kosipeli i Jisu Karisito, o na raici ira ni ra bula vakadodonu, ka vakamuria na vosa ni Turaga, kei na lawa ni Kalou, ka vakamuria sara vakamatailalai na kena ivakavuvuli, e dodonu, kilikili ka vakadonuya mai na Turaga, o koya e vakadonuya ga na veika e dina ka taleitaki e na Nona iserau; na veika dodonu ga e talaleitaki vua.¹⁵

Me iUlutaga ni Vuli

Na cava eda tara valetabu kina? Na veivakalougatataki cava eda na taura e na gauna eda lako kina ki na valetabu ka vakamuria na veiyalayalati eda vakayacora kina? (Raica V&V 109:10–23.) Na cava mada o vakila ni o dau curuma na valetabu?
E na sala cava soti era dau “taura kina vakamamada na tamata na cakacaka vakalotu ni valetabu ni Kalou”?
Na cava na kena ibalebale vei iko “ mo marautaka kina na veivakalougatataki e na veiyabaki tawayalani”? E vukei keda vakacava na cakacaka vakalotu e na valetabu me da vakayacora na veika oqo? E na vukei keda vakacava na noda curuma tiko na valetabu me tiko kina e na noda vakasama “na veika lagilagi ni bula tawamudu”? (V&V 43:34).
Na cava na ibalebale me da kilikili rawa ka qai lako kina vale ni Kalou? Na cava meda vakayacora me da vakavakarau vinaka kina me da curuma yani kina na valetabu? Na cava eda sega kina ni rawa “me da butakoca na veika kei na veivakalougatataki mai na vale ni Kalou”?
Na cava o kila e dodonu mo vakayacora, mo dina tiko ga kina veiyalayalati o sa vakayacora e na valetabu?
Na cava eda rawa ni cakava me da sotava kina na ibole i Peresitedi Smith me da “daunivakasama, ka daucakacaka”?
Eda na vakaraitaka vakacava ni da doka na vale ni Kalou? E na vukei ira vakacava na luvedra na itubutubu me ra doka na valetabu?

Vernal Utah Temple — Na Valetabu e Vernal Utah. E na 1997, na Uintah Stake Tabernacle e a vakavoui me Valetabu e Vernal Utah.