Na Galala Mai na Talairawarawa

E sa solia vei keda na Kalou me da digitaka vakataki keda na veika vinaka kei na ka ca, e sa noda itavi talega me da qarauna na kena vakayagataki na vuku kei na veika tale e so e solia vei keda.

Tukuni e na Bula i Joseph F. Smith

Evakabauta o Peresitedi Joseph F. Smith na galala yadua kei na noda itavi e sega ni tawasei, e tiki taumada ni lakolako era rawa ni vakataki Koya kina na Kalou. “O iko kei au me daru taura kina na veivakalougatataki ni bula tawamudu me baleti keda yadudua, e na rawa mai na talairawarawa kei na loloma cecere ni Kalou,” e kaya. “E tiko ga vei keda na kaukaua kei na galala me da digitaka kina na veika vinaka kei na ca.… Me da vulica na tucake vakataki keda se na noda lutu, tagane kei na yalewa.”¹

E tucake vakataki koya o Peresitedi Smith e na kedra maliwa na lewe ni matabose levu mai Mereke na [United States Congress] e na 1904 ka vosa ni veitokonitaka na nodra dodonu na lewenilotu me ra rawa ni vakayagataka na nodra galala e na veika yadudua era vinakata, vakalotu kei na vakamatanitu. E na 26 ni vula o Maji 1907, e ratou tabaka na Mataveiliutaki Taumada “na ivakaro: ni Lotu i Jisu Karisito ni Yalododonu Edaidai i vuravura raraba,” ka mai vakaturi me taurivaki e na lotuvakayabaki ni Epereli, 1907. E tukuni ka vakadeitaki kina na nodra vakabauta na Yalododonu Edaidai, e vakadeitaka na ivakaro raraba qo: “Eda vakabauta na nodra galala na tamata, oqo na nodra itavi yadudua.”²

E vakabauta o Peresitedi Smith ka vunautaka talega na talairawarawara ki na lawa ni kosipeli i Jisu Karisito e sala duadua ga me da rawata kina na galala e yalataka vei keda o Jisu Karisito: “Ia na ka dina e na sereki kemudou” (Joni 8:32).

iVakavuvuli i Joseph F. Smith

E sa solia vei keda na Kalou na isolisoli ni galala, sa noda itavi me da na qarauna vinaka sara na noda digidigi.

E sa solia taucoko vei ira na tamata na Kalou na galala me da qaravi koya se sega, me da vakayacora kina na veika vinaka se na veika ca, na galala ni digidigi oqo e soli kece vei ira yadudua na tamata veitalia na nona vanua, na kena roka se ituvaki ni nona bula. E soli vei ira na vutuniyau na galala ni digidigi oqo, o ira na dravudravua e soli talega vei ira, e na sega ni dua na tamata e na tarovi mai na kaukaua ni Kalou e na nona vakayagataka taucoko vakataki koya na nona galala. Na galala oqo e soli kece vei ira na tamata. Oqo e dua na veivakalougatataki e solia na Kalou vei ira kece na tamata e vuravura, vei ira kece na luvena. Io, e na beitaki keda sara ga o koya e na noda vakayagataka na noda digidigi, me vaka a tukuni vei Keni, e na tukuni talega vei keda; “Kevaka ko sa caka vinaka, ko na sega li ni vinakati? ia kevaka ko sa sega ni caka vinaka, sa koto nai valavala ca mai na katuba” (Nai Vakatekivu. 4:7).³

O keda eda dui lewai keda yadudua ga, eda na digitaka me da na vinakata se sega ni vinakata na kosipeli, o na vakamuria na ivakaraitaki ni iVakabula se nei Lusefa. E sa na vakatau yadua vei keda. E da veiwekani kei na Kalou ka veitacini kei Jisu Karisito, ka da rawa talega ni taura kina na lagilagi kei na bula vakalou e na Matanitu e tiko kina o Jisu kei ira na savasava, io e na vakatau tiko vei keda na digitaka se sega ni vinakata; e sa vakaraitaka na Kalou e na sega ni vinakata o koya e dua na ka vei keda, e na vakarautaka o koya me da vakayacora. Ke vinakata o koya me da vakayacora na itavi e dredre vei keda me da vakayacora, e na solia o koya vei keda na kaukaua me da rawata kina. Kevaka ga eda bula kilikili tiko ka vakayagataka na kaukaua kei na vuku e tiko vei keda, na nona veiyalayalati kei keda e na sega ni rawa, baleta ni a vakayacori e na vakanuinui ni ke na vakayacora na noda itavi.⁴

E sa solia na Turaga vei ira na luveni tamata na nodra galala. E na vakatau sara ga vei ira na tamata kevaka era vakayacora na veika vinaka se ca, me ganiti ira.… E na vakatau sara ga vei keda, ka na saumi taro kina vua e na noda vakayagataka na isolisoli ni digidigi, na vuku kei na veika kece sa vakarautaka vei keda o koya vakayago.⁵

E na sega ni vakaosooso vei keda na Kalou e na noda galala, io e na vakadonuya me da sotava na veika e yaco mai na noda digidigi.

Na galala ni tamata e na sega ni vakaosoosotaka na Kalou. Kevaka era sega ni biu na tamata me ra digitaka na vinaka ka biuta laivi na ca, se me veisau, e na sega na kilikili se na inaki me ra mai lewai kina. Na ka e mani yaco mai na kaukaua ni digidigi era na tamata yaga, era taura talega na veika e na yaco mai na nodra digidigi. Era na saumi se na totogitaki vakatau tiko e na nodra cakacaka, e na gauna sa na tevuki kina na ivola era na lewai mai na veika sa volai tu kina.

Eda na sega ni vakatitiqataka na Kalou, e rawa ni tarova na ivalu, tarova na caka ca, vakarusai na iyaya, vakatala na butobuto, vakadodonutaka na cala, vakararamataka na ka, me vinaka ka marautaki. Io oqo e na okati kina na kena vakarusai na veika e gadrevi kei na ka vinaka vua na tamata—na dodonu ni nodra galala. Me baleta ni yaga vei ira na luvena tagane kei na yalewa me ra kila na veika ca kei na veika vinaka, na butobuto kei na rarama, ni lasu kei na dina, oqo me baleta na kena sega ni vakamuri [se vorati] na lawa tawamudu. E sa vakadonuya o koya na cala se na caka cala era vakayacora na nona tamata, ia e na lewa o koya na ivakatagedegede ni lagilagi kei na nodra toso ni bula vakalou na luvena tagane kei na yalewa, me ra kune rarawa mada me ra na qai talairawarawa kina. Na duidui sa sotavi oti e na vuravura oqo, oya na veimaliwai ni rarawa kei na marau e ka vakavuli ga, ka dua talega na inaki me ra vakacerecerei kina na tamata me ra taleitaka kina na veika vinaka taucoko, dina ka vinaka talega. Na kila taumada ni Kalou e sega ni tukuna na nona cakacaka me kau mai kina na veika e sa raica, se me lewa o koya na veika e vakayacora na tamata se cakava.⁶

E vuqa sara na ka e yaco e vuravura, e dredre kina vei keda me da kunea e dua na iulubale ni cakacaka oya mai na liga ni Turaga.… E dua ga na sala au kila ni dodonu me da kila kina na cakacaka mai na liga ni Kalou ni veika sa vakayacori rawa sa vakadonuya oti na Turaga. E na gauna e rau na solia ki na e rua na tamata na veika e rau vinakata, na nodrau kocokoco kei na cudru, me rau veibolebolei ka veiba vakataki rau, ka vakavuna me rau veivala, e na dredre sara ni da raica kina na liga ni Kalou; vakavo sara ga na tamata e sega ni veiyaloni, veiba ka veibolebolei kei na dua na tamata, sa taura mai vua na Kalou na galala ni nodra digidigi me ra vakayacora kina na nodra kila, me ra lewa vinaka kina na veika e dodonu se cala vakataki ira, ka vakayacora na veika era vinakata. E sega ni vakavuna na Turaga me rau veiba na tamata ruarua oqo, se me vakacudrui rau sara vakalevu me laki vakavuna me rau laki veivala kina, se vakadave dra. E sega ni vinakata se nakita na Kalou me yaco na veika oqo, se meda na beitaki koya kina sa Cecere Sara.…

Na galala sa solia vei keda na [Kalou] e solia vei keda meda vakayacora na ka vakataki keda—me da vakayacora na ka e sega ni dodonu e vei calati kei na lawa ni bula kei na ituvaki ni bula, e sega ni vuku se lewa maqosa—na ka e na yaco e na rairai na rawa ni vakaleqai keda, baleta na noda lialia se na noda gu me da rawata na veika eda vinakata, ka sega ni vinakata me da vakarogoca na veika e vinakata vei keda na Kalou me da vakamuria.⁷

O na laki rarawa e na vuku ni nomu cala, na nomu caka cala, dina ke ra na kauta mai na rarawa, na tauvimate, se mani mate sara! Io, au sa kila na liga ni Turaga e na inaki ni galala e sa solia o koya vei ira na luveni tamata; au sa kila talega na ligadra na tamata e na veika e yaco mai na nona cakacaka, ni oti na nona talaidredre ki na lawa ni Kalou. Au na sega ni beitaka na malumalumu, na cala, ivalavala ca, na tawa kilikili ni tamata, kei na ca e tiko e vuravura, vua na Kalou na Tamada.⁸

Mai na noda tiko galala se na digidigi, kei na vakayagataki maqosa ni lewa ni tamata, e vuqa sara na cala sa yaco e vuravura sa yaco oti—na nodra vakamatei na Yalododonu e na vuku ni nodra vakabauta, na nona vako e na kauveilatai na Luveni Kalou, na vukitani kei na biubiu mai na cakacaka kilikili, mai na lawa ni Kalou, e yaco e na loma ni galala kei na vakayagataki ni lewa ni tamata. Na Kalou mai na nona levu ni vuku kei na loloma cecere sa vakarautaka na veika, ka sa vakaraitaka talega na sala vei ira na luveni tamata, e na loma tiko ga ni galala kei na nodra vakayagataka na nodra lewa, me ra lako yadua vua na Kalou e na vakabauta kei na masumasu me ra laki kila na cava e dodonu me dusimaki vei ira ka vakaliuci ira na nodra lewa vakatamata kei na vuku; au sega ni vinakati ira na Yalododonu Edaidai me ra guilecava ni oqo na nodra isolisoli.⁹

Na Lotu i Jisu Karisito e sega ni via vakaosooso e na nodra galala yadudua na tamata.

Na matanitu ni Kalou e matanitu ni galala; na kosipeli ni Luveni Kalou e kosipeli ni galala.¹⁰

E rawa ni o kunea e dua na isoqosoqo, vakalotu se o koya ga sa rawa eda rawa ni raica kina na vinaka ni kena matanitu se na kena isoqosoqo me vaka ni laurai ka tiko e na Lotu i Jisu Karisito ni Yalododonu Edaidai, e tauyavutaki e na veivakauqeti vua na Parofita o Josefa Simici? Na cava na inaki ni isoqosoqo oya? Me qaqai ira na tamata? Me vakamavoataki iko? Mo cuva vakaitoboicu ki na qele? Me kauta tani na nomu galala, na veika e nomu, se na veika e dodonu me nomu? Me vakabobulataki iko, vakalolovirataki iko, ka butuki iko sobu kina qele? Se e na vakacerecerei iko cake kina ivakatagedegede ni vuku vakatagane ka vakalevutaka talega na nona galala, ni sega talega e dua na galala me vaka na galala ni kosipeli i Jisu Karisito? Au via tukuna vei iko ni sega ni dua na tamata e galala ke me vauci tiko e na ivau ni valavala ca kei na caka cala, ka sega talega ni dua na tamata e na galala ke me vauci tale tikoga e na ivau ni sega ni kila na veika me baleta na inaki ni bula kei na veivakabulai.¹¹

Au vakabauta ni sega tale ni dua na mata tamata era galala sara vakalevu, era lewai ira tiko ga vakataki ira, era tamata vuku me bau kune tale e dua na vanua e vuravura se galala vakalevu me ra digitaka vinaka na sala era na muria, na nodra cakacaka kei na veika kece era vakayacora me vakataki ira na Yalododonu Edaidai. E sega ni dua na lewenilotu i Jisu Karisito ni Yalododonu Edaidai, e muria vinaka tiko na lawa ni Lotu e na vuravura oqo, baleta na nona lewai koya vakataki koya, se baleta na nona vuku, kila, na nona lewa na veika vinaka kei na ca kei na ka dodonu se cala.¹²

Na nodra lotu na Yalododonu Edaidai e baleta tiko na itovo e na gauna oqo kei na marau e na gauna mai muri. E tarai ira kece na vakabauta na veika me baleta na itovo ni tamata. Na yagodra kei na yalodra. E vakavulici ira na tamata me ra bula ka vakaitovotaki ira e na vuravura oqo me ra vakavakarautaki ira e na veika e na yaco e vuravura. Na Lotu e dau veivakasalataki e na veika me baleta na veika vakavuravura kei na veika vakayalo, ke me baleta tiko na Lotu, na veika e nona, na isoqosoqo kei na veimaliwai ni ke na ivavakoso. Ia e na sega ni saga se vakacacana na galala ni dua na tamata se me saga yani nodra dodonu vakamatanitu. Na nodra galala na tamata e dua na ivakavuvuli taumada ni Lotu, ka ivakavuvuli talega ni Lotu, ka sega ni tarova na Kalou.¹³

Na Talairawawa, na ivakayagataki vinaka ni galala, e na kauta talega mai na veivakalougatataki levu.

E tiko … e so na veivakalougatataki e solia na Kalou vei ira na luveni tamata e na gauna era vakayagataka vinaka na nodra digidigi. Me kena ivakaraitaki, e sega ni rawa ni dua na tamata e bokoci rawa na nona ivalavala ca vakavo sara ga ke me veivutuni, ka papitaiso mai vua e dua e tiko vua na kaukaua. Kevaka me da vinakata me da galala mai na ivalavala ca, na veika e kauta mai, mai na kena kaukaua, me da vakamuria na lawa e vakaraitaka vei keda na Kalou, ke sega e na sega ni bokoci rawa na noda ivalavala ca. Ia ni sa solia vei ira kece na tamata na Kalou veitalia na ituvaki ni nodra bula, na galala me ra digitaka kina na vinaka se na ca, e na sega ni rawa me vakatikora vei ira na luveni tamata me bokoci na nodra ivalavala ca, e na rawa ga e na nodra talairawarawa kina lawa.…

Era sa vakalougatata ki na tamata kece e na kaukaua ni yagodra, na vakayagataki ni nodra vakasama, kei na galala e soli vei ira me ra vakayagataka na veika sa soli vei ira, me vaka e talei na veika era raica, ka sega ni kauwaitaka na lotu. Ia na Kalou e na sega ni solia na isolisoli vaka Yalo Tabu me soli vua e dua na tagane se yalewa, vakavo sara ga e vakamuira tiko na lawa ni Kalou. O koya gona e na sega ni rawa vua e dua na tamata me bokoci na nona ivalavala ca; taura na isolisoli ni Yalo Tabu; me taura na ivakatakila mai vua na Kalou; taura na itutu vakabete, na kena dodonu, kaukaua kei na veika kece; e na sega ni dua na tamata e na rawa ni veiwekani kei na Kalou ka veitacini kei Jisu Karisito, vakavo sara ga ke vakamuria na veika e gadrevi mai lomalagi. Oqo na veivakalougatataki raraba, oqo na veika vinaka ka yaga sara vakalevu me baleta na kosipeli, na inaki ni bula kei na vakabulai ni tamata, e soli wale ka vakarawarawataki vei ira kece na tamata vakavo sara ga ke vakamuri e so na ke na lawa, ka sega ni rawa ni dua na tamata e na ruku ni lomalagi e na marautaka rawa, vakavo sara ga ke me lakova na sala e sa vakarautaka tu na Kalou me ra rawata mai kina. Na veika e soli vei keda oqo kei na veivakalougataki e na rawa talega ni kau lesu tale, se na yali me tawamudu, vakavo sara ga ke da sa vakamuria vinaka tiko na sala e sa makataki vei keda me da muria.…

E cilava na siga na veika vinaka kei na veika ca; io na Yalo Tabu e na tarai ira ga yani na bula kilikili kei ira na sa vosoti oti na nodrai valavala ca. Na uca talega e tauvi ira na ivalavala ca kei ira na vinaka; io na dodonu vakamatabete e isolisoli, e na veivakalougatataki na ilesilesi vakabete me vaka na tegu sa lutu mai lagi e yalodra na sa ciqoma e na gauna e vinakata kina na Kalou. Na veivakalougatataki vakalomalagi, na nona yalovinaka kei na veikauwaitaki o koya sa Cecere Sara me baleti ira na luvena kei ira na luvena tagane kei na yalewa, e na rawa walega mai na talairawarawa ki na lawa e sa vakaraitaka oti.¹⁴

Na kilai levu ni galala e yavu mai na talairarawa kina kosipeli i Jisu Karisito.

Na kosipeli i Jisu Karisito e lawa uasivi ni galala. E sa namaki me vakaliuci ira na tamata kina ivakatagedegede cecere ni lagilagi, ka me vakabulai koya e na iserau ni Tamada Vakalomalagi, “sa sega vua na veivukiyaki, se na yaloyalo ni veigoleyaki.” [Jemesa 1:17.]¹⁵

Eda vakabauta ni sa inaki ni Kalou me ra vakacerecerei na tamata; kei na galala e lako mai na noda talairawarawa ki na kosipeli i Jisu Karisito e dua na ivakaraitaki ni galala e lako mai vei ira na tamata. E na sega ni dua na galala e na marautaka na tamata se me vakaraitaka ni na marautaka e vuravura oqo a sega ni kune e na yalo se na lawa ni Kalou, e sega talega kina na dina e na ke na ivakavuvuli se kena yavu. Na cala e vakavuna na bobula. Na veika e sega ni dina e vakalolovirataka na tamata. Na cala kei na lalai ni noda kila na lawa ni Kalou kei na yalona e na biuti ira kina na tamata e vuravura me ra tautauvata kei na manumanu; ni sa sega vei ira na kila cecere, e sega na ivakavuvuli levu, sega na gugumatua, e sega na veivakauqeti cecere mai na vuravura ni manumanu, e sega tale ni dua na veivakauqeti e lako mai na dua tale na vanua o koya ga e lako mai vua na tamata.¹⁶

Mai na talairawarawa ga ki na lawa ni Kalou, e na rawa ni sivita yani kina na tamata na malumalumu cala lalai vakavuravura ka vakayagataka na nona loloma kei na loloma cecere, me rawa ni vakauqeta na yalo kei na inaki ni luveni tamata.¹⁷

Kemuni na taciqu kei na ganequ, me da galala tiko. Au via vakaraitaka—au nanuma ni tiko vei au na dodonu meu vakayacora kina—niu tamata galala, me tautauvata na noqu vakamuria na ivakaro ni Kalou. Ke’u caka cala, au na bobula kina cala oya. Ke’u na ivalavala ca, au na bobula kina ivalavala ca oya. Ke’u sa na vakacala na lawa ni Kalou, au na sausaumi vua na Turaga. Io au kila tiko ga me vaka na galala, na galala ni vosa, na galala ni yalo, na galala ni caka ka—kei na veika kece e rawa me tiko kina na kedra maliwa na tamata, au sega talega ni vakabauta ke tiko tale e dua na tamata e vuravura e galala cake mai vei au. Raica mada oqo, au rawa ni ivalavala ca kevaka au vinakata. E tiko vei au na galala meu valavala ca me vakai ira na tamata. E sega ni dua na tamata e tiko vua na dodonu me vakayacora na ivalavala ca; io e tiko vei keda yadua na galala kei na digidigi kevaka era vinakata. E sa solia vei ira na Kalou na nodra galala. E vakaraitaki ni tagane e vakaraitaki mai na noda caka cala baleta ni tiko vei au na galala meu vakayacora kina? E tiko talega vei au na galala meu curuma yani na vale ni gunu yaqona vakavavalagi ka gunu, ke sa noqu digidigi oya se meu lakova yani na valeniveimauilavo ka veimauilavo. E tiko vei au na galala kei na digisigi me baleta na veika oqo me vaka ga e dua na tamata e bula tiko e vuravura. Io e na gauna ga au vakayacora kina na veika oqo au na bobula kina ivalavala ca. Io e dua tale na rai oqo, keu na sega ni yalo ca e na noqu curuma yani na vale ni gunu, veimau, veimau ilavo, se vaka yacora tale e so na ivalavala ca, au na sega ni kila na veika oqo baleta niu galala tiko. E na vakagalalataki au na dina mai na veika oqo.¹⁸

Eda sega ni vunautaka na kosipeli ni rere. Eda sega talega ni vakasaqara me da vakarerea na yalodra na tamata. Eda sega talega ni kerei ira na tamata me ra yalo kilikili baleta na nodra rerevaki na sa vakarusai. Eda sega talega ni vinakata mo vinaka baleta o rerevaka na totogi nodra na caka cala. Keimami sega ni vinakati iko mo vakayacora na veika dodonu baleta na itotogi e lako vata mai na vakayacori ni veika e cala. Keimami vinakata mo digitaka na dodonu baleta ga ni dodonu, e yalomu talega o vinakata na dodonu, baleta ga ni digidigi vinaka sara. Keimami vinakati iko mo yalo dina, sega walega ni ivakasala vinaka, e baleta talega ni da sa vakayacora na veika oya eda vakaraitaka talega kina na noda doka na Kalou ka vakayacora na Nona inaki e na noda bula; ni “tamata dina,” sa makawa se vosa e dau tukuni wale—”na cakacaka vakaturaga ni Kalou.” eda vinakata me da yalodina baleta na noda lomana na Kalou, ka da sega ni rawa ni Yalododonu ni Kalou vakavo sara ga ni da dina. E dodonu me da vinaka ni da vinakata me da vinaka, e sega ni baleta eda rerevaka na ka e na yaco ni da sa ivalavala ca.¹⁹

Na Turaga e na sega ni vakadonuya na talairawarawa mai vei ira na tamata vakavo ga ni sa solia mai e na yalovinaka kei na yalodina ka sa yalona talega na Nona tamata cakacaka. Na talairawarawa vakaoqo e vinakati me da solia, ke sega ni soli rawa oqo e da na totogitaki.²⁰

[O Jisu Karisito] e sega walega ni tiko vua na kila ka, e vakayagataka talega na kila ka oya me vakayacora kina na veika vinaka, me ra galala talega kina na mai na cala e vuravura kei na itovo ca ni tamadra. E vakaraitaka e na vosa ni dina kei na kilai yalona, “Kevaka dou sa muria tikoga na noqu vosa, dou sa qai noqu tisaipeli dina; ia dou na kila na ka dina, ia na ka dina e na sereki kemudou.” [Joni 8:31–32.] e na sega ni dua na tamata e na vakataka na Kalou vakavo sara ga ni sa galala. E galala na Kalou. Baleta na cava? Baleta ni nona veika e kilikili, na kaukaua taucoko, kei na vuku taucoko. E tiko talega vua na Nona galala, e vakayagataka me vakayacori kina na veika vinaka ka sega ni veika ca. Ia e na sega ni dua na tamata e na vakataki Koya me yacova ni sa rawata na veika kilikili, na savasava, na vinaka ka biuta tani na cala, na ivalavala ca ka vakamalumalumutaki koya.…

O koya sa yalomalumalumu ka loma soli kina yalo ni Kalou e vakaraitaka na vuku levu mai vei ira na tamata. O koya sa veicoqacoqa na nona vakasama e na yalo kei na inaki ni Turaga e yawa sara mai vua na Kalou. Dina ke mani buli se ucuya na Tamada, ka na sega ni na Luvena, vakavo ke rawa ni tukuna e lomana, “Tamaqu, me kakua ni yaco na noqu lewa, me yaco ga na nomuni lewa.” [Luke 22:42.] E na yalo ni Turaga e dodonu meda taura kina na nona yalo tabu, ka kila talega na dina oqo. E dina, vei keda ni dua ga na Kalou, na Tamada kei ira na tamata kece me ra vakarorogo vua, ka vinakati me ra vakamuria na Nona ivakaro, me rawa kina ni ra galala ka tisaipeli dina talega i Karisito.²¹

Me iUlutaga ni Vuli

Na cava na galala? O cei e tiko vua na galala? Na cava e veivakalougatataki kina na galala?
Na cava e namaka na Kalou e na noda vakayagataka na noda galala? Na cava e yalataka vei keda kevaka eda digitaka me da vakarorogo vua? (Raica V&V 58:28.)
Na cava eda totogi kina baleta na ka e yaco ni da vakayacora e dua na ka? E na vakalailaitaki vakacava na noda bula tiko e vuravura ke me tarova na Kalou na ivalu, tarova na ca, kei na vakacacani ni iyaya? Na cava o na kaya vua na tamata e beitaka vakailasu na Kalou “na ca e sa tiko oqo e vuravura”?
Ni sa vakadonuya na Kalou na cala e sa yaco tiko baleta na ivalavala ca e ra vakayacora tiko na nona tamata, na veivakadeitaki cava e tiko vei keda ni na vakatau taucoko vua na veika e na yaco”? (Raica Roma 8:28; V&V 98:3.)
Na cava na kena ibalebale “ meda siosiotaka na galala ni so tale na tamata”? E rawa vakacava vei ira na itubutubu kei ira na iliuliu ni Lotu me ra vukei ira na tamata me ra talairawarawa ka sega ni siosiotaka yani na nodra galala yadudua? (Raica V&V 121:34–46.)
E na vukei keda vakacava na Lotu me da galala dina? E na tarovi keda vakacava na noda ivalavala ca kei na noda dui cala?
Na “Veivakalougatataki levu” cava o sa taura e na nomu sa digitaka mo vakamuria na lawa ni Kalou? (Raica V&V 130:20–21.)
Na cava e duidui kina na vakamuria na lawa ni Kalou baleta na loloma mai na noda rerevaka me da totogitaki?
Eda na vakamuria vakacava na ivakaraitaki ni iVakabula e na noda sa talairawarawa vakalevu ki na lomai Tamada?

Captain Moroni Raises the Title of Liberty — *Vakarewataka o Kavetani Moronai na Drotini ni Tugalala,* mai vei Arnold Friberg. O ira na lewenilotu e na gauna ni iVola i Momani era soqoni yani ka veiyalayalati e na kena taqomaki na yavu ni bula galala ka “me taqomaki kina na nodra dodonu kei na nodra Lotu me vakalougatataki kemudou na Turaga na noda Kalou” (Alama 46:20).