Tokoni Ira na Veiliutaki

Me da dau doka ka tokona e na dina kei na nodra cakacaka na vakaitutu e na matakabete ni ra kacivi me ra veiliutaki.

Tukuni e na Bula i Joseph F. Smith

E dau tokoni ira na vakaitutu e na matabete e yalona kei na nona cakacaka o Peresitedi Joseph F. Smith. E vakawasoma na nona cakacakataka na vosa mariqeti i Nifai: “Au na lako ka kitaka na ka sa vakarota na Turaga” (1 Nifai 3:7).

E na vula o Okotova 1873, E sa kacivi Joseph F. Smith tale kina o Peresitedi Brigham Young me kaulotu. E tukuna o Joseph F. Smith me baleta na gauna oya: “Au a kacivi me’u kaulotu ni oti e va na yabaki e na noqu tiko e na dua na itikotiko ka sa vo tiko ga e dua na yabaki me’u vakadeitaka, me na qai soli vei au na itikotiko kei na qele oya me noqu; ia e sa mai vakasevai ni vinakati au o Peresitedi Young me’u laki kaulotu i Europe, ka veiliutaki talega e na tabana ni kaulotu mai keya. Au sega ni via kainaka vua, ‘I Baraca Brigham, au na sega ni rawa ni lako; E sa voleka sara ni dua na noqu itikotiko, ke’u na lako au na vakayalia.’ Au qai kaya vei Baraca Brigham, ‘Sa vinaka, Peresitedi Young; e na gauna ga o vinakata kina me’u lako au na lako; au sa vakavakarau tu me’u vakamuria na veikacivi ni o koya e veiliutaki.’ Au qai lako. Au sa vakasuka tale na itikotiko oya kei na kena qele, kau sega ni kudruvaka; au sega ni beitaki Baraca Brigham me baleta na tiki ni qele oya se na kena itikotiko. Au kila ni bibi sara na itavi au sa mai vakacolati kina oqo, e yaga vakalevu cake sara mai na 160 na eka na qele au vinakata tiko oqo. Au a talai me’u laki kaburaka na itukutuku ni veivakabulai ki na veimatanitu e vuravura. Eratou sa lesi au kina na sa tiko vei iratou na kaukauwa mai vua na Kalou e vuravura, au sa sega tale ni via kila na veika e noqu se dodonu me noqu; au sa lako ga me vaka ni’u sa kacivi, e na qaravi au na Kalou ka vakalougatataki au kina.”¹

iVakavuvuli i Joseph F. Smith

E da laveliga me ivakadei ni noda veiyalayalati me da vakamuria ka tokoni ira na noda iliuliu.

E na noqu nanuma, sa dua na cakacaka bibi e da vakayacora e na gauna ni lotuvakayabaki e na Lotu, oya na nodra laveligataki me ra tokoni e na iserau ni Turaga o ira na noda iliuliu, kei na iliuliu ni vei tabana tale e so. Oqo e dua na itavi bibi eda dau vakayacora ka so vei keda e dau taura vakamamada. E dua tale na kena ivakamacala oqo, e so na tamata ni sa oti na nodra laveligataki na noda iliuliu ni Lotu era sega ni qai kawaitaki ira tale se vakasamataka, me ra vakayacora na veika oqo ni se sega ni kasa e lomadra na kena bibi. E na noqu rai, oqo e dua na ivakavuvuli cala.… O ira era sa yalataka me ra vakamuria na ivakaro ni Turaga, ka qai vakacacana na veiyalayalati oya ni ra sega vakamuria na ivakaro oya, era na vakataki ira na sega ni laveliga se o ira na laveliga me ra tokoni ira na iliuliu ni Lotu ka qai sega ni tokoni ira. Na ivakavuvuli oqo e na tautauvata vinaka ruarua sara ga: e sa mai vakacacani kina na veiyalayalati e da sa cakava oti.²

E sa dua na cala levu e na iserau i Koya sa Cecere sara me dua e laveliga ka tokona na iliuliu ni Lotu ka qai laki coqai ira ka buturaka sobu tiko e yavana na ivakavuvuli era sa solia mai, ni da na lewai kina mai vua na Turaga.³

E dua na icolacola levu e na tiko vei ira na Yalododonu era digitaka me ra tokoni ira na iliuliu ni Lotu, e sega walega ni kena laveligataki, me laurai na kena vakayacori e salavata kei na dina. Me kakua tale na lokuyara ia me ra masulaka sara o ira na lewenilotu vua na Turaga me tokoni ira na Nona iTalai era sa vakatikori me liutaki ira.… O ira oqo, e dodonu me tiko vei ira na vakabauta me ra tokoni ira kina na tamata e na nodra cakacaka, me ra kaukauwa vua na Turaga.…

… E sa ivakaro ni Turaga me da soqoni vata ka … tokoni ira na iliuliu ni Lotu, me vakavoui talega kina na noda veiyalayalati meda dau rokova ka talairawarawa kina lewa ni Kalou e sa tauyavutaka e vuravura me baleta na cicivaki ni Nona Lotu. Au na sega tale ni vakadreta vei ira na Yalododonu Edaidai na bibi ni kena dokai kei na tokoni na dina ka vakatalega kina na kaukauwa ni Matabete Tabu e lesi me veiliutaki. E na gauna e curuma kina na lewenilotu na yalo me kua ni tokoni ira na sa wili me ra veiliutaki e na Lotu, e na gauna vata tale ga oya e na curumi koya kina na yalo me vuvu se talaidredre; ke me da na vakamalumalumu vua na yalo vakatani oqo me mai tiko dei e na noda vakasama, e vakalailai ga eda na vukitani kina ka curuma yani na butobuto.⁴

E sa kilai raraba ni da dau soqoni vata vakarua e na lotuvakayabaki ka kena inaki tiko me kaucake mai kina na yacadra na digitaki me ra veiliutaki e na Lotu, e da kila talega ni o ira na mai vakatawana na itutu oqo era na vakanuinui tiko e na domodra na tamata e na kena tokoni tiko na nodra lewa, na dodonu kei na veika me rawa kina nodra cakacaka. O ira na marama lewenilotu e tiko talega vei ira na dodonu me ra laveliga ka veitokoni vua na nodra iliuliu na lewenilotu tagane, na nodra veitokoni se veidigidigi ni ganeda kilikili e na tautauvata vinaka sara ga kei na veitokoni kei na veidigidigi ni dua na turaga.⁵

Oi keda na Yalododonu Edaidai, e da tokoni ka dokai ira na Mataveiliutaki Taumada era lesi me ra veiliutaki.

E na gauna oqo, na ivakaro ni Kalou e baleti ira kece na kai vuravura, e so na ivakaro e baleti ira ga na Yalododonu Edaidai. Na cava soti oqo? E dua vei ira na ivakaro oqo, oya mo dau dokai ira na veiliutaki vei keda; me vakamatatataki me da daudoka na Matabete. Au na sega ni kerea e dua na tamata me dokai au vakavo ga e na veika e vakarota na Yalo Tabu ki na noqu ilesilesi kei na itutu vakamatabete au taura tiko. E na sega ni dua na lewenilotu e dodonu me dokai au, niu sa vakacala na iyalayala ni matabete kei na lewa e soli vata mai na lewa ni Kalou kei na domodra na lewenilotu. Io,kevaka au sa vosa e na vuku ni Yalo Tabu ni Kalou me baleta na itavi ni noqu itutu, e sa dodonu ga vei ira kece na lewenilotu me ra rogoca mai na noqu vunau. Ni sa tukuna na Yalo Tabu ni Kalou me vaka na noqu itavi, e sa na nona vosa ka inaki i koya sa Cecere sara.

“Ia na ka kece ga era sa tukuna e na veivakauqeti ni YaloTabu, sa i vunau; io sa ivakaro ni Turaga, sa loma ni Turaga, sa vosa ni Turaga, ka domo ni Turaga; io sa kaukauwa ni Kalou ki na veivakabulai.

“Raica qo na ka sa yalataka na Turaga vei kemudou; oi kemudou na noqu tamata” [V&V68:4–5].

E sa nomuni dodonu kece mo ni kila ke’u vunautaka na dina mai na Yalo Tabu ni Kalou se sega. Vei ira kece na Lotu i Jisu Karisito ni Yalododonu Edaidai sa soli vei ira na ivakaro me ra vakarorogo kina domo ni Yalo Tabu e na sala sa vakaraitaka na Kalou ka vakadonui e na nodra tuberi kina na Nona tamata.… Kevaka au na vakasala e na yalo tawa kilikili, au na mai lewai kina. E na sega ni rawa vua e dua na tamata me solia tiko na ivakavuvuli tawa kilikili vei ira na nona tamata me dede; e na kila na Kalou ka vakaraitaka na veika vuni ni lomana; oqo na inaki kei na ka e vinakati me vakaraitaki vei ira na Yalododonu, e da na lewai kina mai vua na Yalo Tabu ni Kalou e matadra na Yalododonu. Ni ko rokova . . na Peresitedi ni Lotu kei irau na nona ivukevuke me iliuliu ni Lotu, e na gauna era sega ni rogoca kina na nodratou ivakasala era vakaloloma ni sa cala tiko oya. O ira oqo [na veiliutaki] era na sega ni vakasalataki iko vakatani.…

… Au na sega ni via raica na siga era na sogota kina na gusudra o ira na sa vakadonui ka soli vei ira na kaukauwa ni veiliutaki me ra coqata kina na ivalavala ca se na vunautaki ni veika ca..… E noda itavi me da vakayacora. Sa ikoya oqo na inaki ni noda mai tiko e ke. O keda na ivakatawa ni valececere i Saioni [raica Isikeli 3:17–19]. E noda itavi me da dusimaka na cala kei na veika e sa leqa tiko vei ira na tamata; kevaka era na sega ni ciqoma na tamata era na totogitaki kina. O ira na sega ni vakamuria na ivakasala kilikili era na leqa ga kina, ka ra na bula ga o ira na coqata na veika ca.⁶

E da sa vakatura me da vakayacora na noda itavi e na kila e tiko vei keda, mai na veitokoni talega ni Tamada dauloloma. Au na vakatura talega me’u kua ni vakayacora na ka e sega ni vakadeitaki vei au ni dodonu, mai na veivakadonui ni noqu ivukevuke, me taucoko na veivakadonui, ka tautauvinaka na vakasama.… Au sega ni vinakata me vakayacori tale e dua na ka, se vakasala e na kena vakayacori e dua na ka me laki tara na veika ni matanitu ni Kalou e vuravura, vakavo saraga ke da na duavata kina, ni sa na tiko talega kina na kaukauwa e tokona tiko mai, e na tiko vata kei keda na kaukauwa ni Kalou, era na laveligataka kina na Yalododonu ka tokona.⁷

Era na sega ni veiyaloni na tamata, era na sega beka ni duavata kei iratou na Mataveiliutaki Taumada, na lewe ni Kuoramu ni iApositolo Le Tinikarua se na so tale, ka ra na kaya e lomadra, “au sega ni taleitaki koya; au sega ni vakabauta ni sa vinaka o koya me vaka e namaki vua, sa rui levu na nona leqa kei na nona cala, o koya gona, au sega kina ni rawa me’u tokona na nona lewa, au sega talega ni vakabauta na tamata oqo.” E tiko o ira na dau vakatitiqa era lewe vuqa beka e vaka oya na yalodra, io na leqa,… baleta beka ga ni ra se ga ni taleitaka na tamata oqo ka tiko na yalo ca se yalo rarawa ka sa mai buwawa na matadra kina inaki i koya sa Cecere Sara; era sa mai coqata kina na lewa tabu vakabete; me baleta na butobuto ni nodra rai era sa mai vakaliuci vakatani, ka qai vukitani mai na Lotu.

Io, na cava ga me caka? Me’u vakamacala mada vei kemuni. Me taumada na nodra kila na dina ni Kosipeli, oqo na isolisoli vei ira na sa papitaiso ka ciqoma na Yalo Tabu. E na rairai rarawa na yalo ni tamata me baleta na nodra veimaliwai kei na Peresitedi ni Lotu kei iratou na nona ivukevuke, e rairai tiko beka vua na mataqali yalo oqo ka sega ni rawa kina ni tokoni keda e na nona vakabauta kei na masumasu; ke sa vakakina na sala cava e dodonu me muria? E dodonu me vakadeitaka na lomana ka kaya, “E sa tauyavutaka na Kalou na Nona Matanitu kei na Nona Matabete e na vuravura oqo; veitalia ga na noqu sega ni taleitaka e so na tamata. Au kila ni dina na Kosipeli ka tiko vata kei ira na nona tamata na Kalou; ia kevaka au na vakayacora na noqu itavi ka vakamuria na Nona ivakaro, e na seyavu yani vakamalua na noqu rarawa me vaka na seyavu ni o ka yali na tegu ni sa yali vata kaya na noqu vakatitiqa, e na mai veivakacegui vei au na taucoko ni Yalo Tabu ni Turaga ka na tadola tale kina na mataqu,—kevaka au a cala, au sa cala ga ka’u na veivutunitaka ni’u kila na veika kece e cala e na vakadodonutaki.” Au vakabauta me vakakina na nodra vakasama kece na tamata.⁸

Me da tokoni ira kece na veiliutaki e na noda dui tabacakacaka ka vakarorogo kina nodra dui vakasala.

Me vaka ni ra sa veiliutaki tiko na Peresitedi ni Lotu e na loma ni Lotu raraba—e na vei iteki kece, na veitabana lelevu kece, na veivanua ni kaulotu kece e vuravura—era sa veiliutaki talega vakakina o ira kece na iliuliu oqo [na peresitedi ni iteki] e na iTeki i Saioni, na vei tabana lelevu kei na tabana; ka yaco na gauna me ra solia na nodra veitokoni vei ira, ni sa dodonu me vakakina, ke ra qai sega ni solia na tamata se na lewenivavakoso na veitokoni e na saumi ga vei ira na tamata oqo ka ra na galala kina o iratou na veiliutaki. Na nodra itavi na veiliutaki me ratou vunauca na veika ca ka vosataka na veika tawa kilikili. Sa nodratou itavi me ratou veivakasalataki ka vakauqeti ira na tamata me ra yalodina ka gugumatua e na nodra loma ni iTeki.… Au vinakata me matata vinaka na veika oqo vei kemuni.… [E tiko vua na peresitedi ni iteki] na kaukauwa me veiliutaki, me veivakasalataki, me veidusimaki, ka qarauna talega na veika me baleti ira na tamata e ke.…

… E sa tiko vei keda na vosa volai me idusidisi, me ivunau, me ivakamacala, me veivakasalataki e na yalo dina. Me ra wilika na tamata kece ka kila talega ni sa maliwai keda tiko na vosa ni Kalou. Io, ke ra sega ni wilika na vosa ni Kalou se kila, ni vosa na Kalou era na sega ni vakarorogo. Sa iliuliu veidusimaki e ke na Peresitedi ni iTeki na vosa e ke. Era sa digitaki mai vua na Turaga.… E dodonu mo veitokoni ka vakamuri ira ka vakarogoca talega na nodra ivakasala. E na sega ni cala na nodra veidusimaki vei iko; era na sega ni kauti iko kina veika ca; e na sega ni cala na nodra ivakasala vei iko; ka sega ni vakaliuci iko kina veika tawa kilikili ni ra na tucake me ra bikeni ni cina vei ira na tamata—e na sega walega ni bikeni ni cina, era tucake e na itutu vakaveiliutaki ni peresitedi ni Lotu e na loma ni iTeki e Saioni, e na vakaraitaki koya na Kalou vei ira e na vukudra na tamata. Sa nodra dodonu talega na turaga kei na marama yadua me ra ciqoma na ivakatakila kei na vuku mai vua sa Cecere sara, me ra kila ni o ira na tamata oqo era tamata vinaka ka vakayacora tiko na nodra cakacaka.⁹

Na bisopi e veiliutaki e na nona tabana levu, ni sa tiko na bisopi e na nona tabana levu, o rau na nona ivukevuke kei ira na nona lewe ni tabana levu era vakarorogo kina nona veiliutaki. E na sega ni rawa vua me vakamalumalumu kina. E na sega ni rawa vua me solia tale vua e dua; ke e na vakayacora, e na vakacacana kina na ivakavuvuli tabu ni matanitu vakamatabete.¹⁰

E dua e kaya: “Sa sega na noqu vakabauta me baleta na bisopi. Au sega ni taleitaka na bisopi. Au sa sega ni vakabauti koya, sa sega ni rawata o koya na nona itavi; e dau veitovaki o koya; ka sega talega ni dina; kau na sega ni tokoni koya e na nona itutu vakalotu.”… Mo kua sara ni guilecava; [na bisopi kei rau na nona ivukevuke] e ratou tiko oqo e sega ni baleta ni da a biuti iratou kina. E ratou tiko oqo baleta e sa yavutaka na Turaga na ituvatuva ni veiliutaki e na tabana levu, e na lewa vakalou, sa mai taura tiko e kena lewa, na bisopi mai vua na Kalou, ka sega ni vakatamata.…

… Na gauna e na kaya kina na tamata: “Oi au e dua na Yalododonu Edaidai; au lewenilotu ka vakamuria vinaka na ivakavuvuli ni Lotu ni’u kila vinaka na ivakavuvuli ni kosipeli, ka kila talega na ivakavuvuli ni matanitu ni Lotu,” me qai tukuna na tamata oya, “Au vorata na bisopi baleta ni’u sega ni taleitaki koya” se “baleta au sa sega ni vakabauti koya,” e sa kena ivakaraitaki oqo ni sega ni matata se kila vinaka na ivakavuvuli ni matanitu se vakarorogo ki na lewa vakalou. E sa mai vakavuna me levu na nona vosa, yalo kaukauwa, sega ni lewai rawa, sega ni taleitaki, ka rawa ga ni vakamanoataki ke me vakayacori vua na ivalavala e vakayacora tiko, e vinaka se ca.¹¹

E rawa vua e dua na tamata me sega ni dei na lomana me baleta na nona bisopi se dua vei rau na nona iVukevuke; … baleta beka ni vakaoya na nona vakasama, e na dodonu beka vua ni o koya e dua vei ira na Qase mai Isireli me rawa ni lewa na Bisopi kei irau na nona iVukevuke kei na Lotu kece? Ke dua e tu vua na vakasama vakaoqo, o koya e na tautauvata e so na tamata [e sa vukitani mai na Lotu].… O na rawa beka ni kila na lomadra o ira na sa vuki tani mai na Lotu? Sega; o ira oqo era sa vakadeitaka e na nodra vakasama ni ra na vukitani mai na lotu. Era na sega ni vakadinata e na yalodra kaukauwa ni ra na sega ni vukitani mai e na Lotu.… Kevaka au na laveligataka me’u vorata na noqu Bisopi, o iratou na lewe ni Kuoramu ni le Tinikarua se o iratou na Mataveiliutaki Taumada, baleta ni’u sega ni talei taki ira, e na gauna vatatalega oya me’u biuti au mada e na itutu era vakaitavi tiko kina o ira oqo, kei ira na lewe levu era sa dabeca oti na itutu oya ka kaya: “E sa vukitani na Lotu, o Josefa Simici, o Brigham Young, kei John Taylor, era sa vuki tani talega, io o au se dei tiko ga e na noqu vakabauta; era sa dui lako vakatani na tamata baleta era sega ni via kilai au mai.” Na vanua o ya e na tiko kina na tamata e coqata tiko na lewa vakabete, ka tovolea tale ga me taura matua tiko na nona vakabauta. E sega tale ni dua ka dua walega e digitaki me taura tiko na ki ni matanitu ni Kalou me baleta na veika vakavuravura.¹²

O koya gona au tukuna kina vei kemuni mo ni dokai iratou na Mataveiliutaki e na iTeki kei na nomuni Bisopi, kei ira na sa digitaki me ra veiliutaki. Tokoni ira e na nodra itutu vakaveiliutaki e na nomu vakabauta kei na masu, vakaraitaka talega vei ira ni o na vukei e na vosa vinaka kei na cakacaka, e na vakalougatataki iko kina na Kalou.¹³

Na tokoni ira na noda iliuliu e ivakaraitaki ni noda yalo vinaka, na vakabauta, kei na noda veimaliwai.

Au vakabauta ni nona itavi na Lotu me raica ka vakadonui ira na tamata kece era vakaitutu ka vakaitavi tiko kina e na vei vanua ni veiliutaki kei na kena ilesilesi. Au vakabauta talega na ivakavuvuli ni nodra itavi na dauveituberi e cecere me vaka ga na nodra itavi na iapositolo, e na ilesielsi e sa digitaki me vakatulewa kina, e nodra itavi talega na lewenilotu me ra dokai ira talega na dauveituberi ni ra dau veisiko yani e na nodra vuvale me vakaga na nona dokai ira na vakaitutu kei na veivakasalataki ni kuoramu ni veiliutaki e na Lotu. E tiko kece vei ira na Matabete; ka ra vakayacora taucoko tiko na nodra dui ilesilesi, era yaga e na nodra dui tabana, baleta ni sa lesi ira na Turaga ka vakatikori ira e na nona Lotu. E da na sega ni rawa ni guilecavi ira, ke da na vakayacora e da na cudruvi kina¹⁴

Ni da bula tiko e na veisiga me kakua tiko vei keda na yalo ca se yalo ni kakase ka vakasaqara tiko na cala me baleti ira na sa kacivi me da na tokoni ira e na itavi bibi vakalotu. Ke tiko e dua na ka e lomamu me baleta na tacida e sa nomu itavi ni o sa lewenilotu, me imatai me vaka na veidusimaki ni ivolanikalou, me da sikovi ira yadua ka laki vakaraitaka vua na ka e tiko e lomamu ka vakaraitaka talega vua na vuna; e sega ni baleta ni o via vakatubu veiba, mo lako vua e na yalo ni veibulubuluti kei na veilomani, e na yalo talega vaKarisito, ke tiko e dua na yalo ca e na kemudrau maliwa me vakagalalataki; ke dua na ka e leqa tiko vua na tacimu e na rairai vinaka me vakameautaka se vakadodonutaka na cala. Me da dau vakaqara tiko e na veigauna me da dau veilomani ka veitokoni ni da luveni Kalou kece ka veitacini e na veika me baleti Saioni.¹⁵

Oi kemuni na taciqu kei na wekaqu, au vinakata me’u vakavinavinaka vei kemuni … na veitokoni e sa mai vakaraitaki eke e na nomuni sa laveliga na lewenilotu levu oqo. Au kila oqo na ivakaraitaki ni yalo vinaka, na vakabauta kei na veimaliwai mai vei kemuni me baleti ira na tiko vei ra na kaukauwa kei na lewa, vakaivavakoso raraba se vakaveitabana me vaka sa vakaraitaki vei kemuni. Ni o ni na vakamuria na veiyalayalati o ni sa solia vua na Turaga, vakakina vei ira na lewenilotu ni o sa laveligataka, ni o na tokoni ira na veiliutaki e na nodra dui tabana, mai na imatai ki na iotioti, ka sega ni vuvutaki ira, sega ni raica edua na cala vei ira ka mo kua ni vakamavoataka na nodra inaki se tarova na kena vakayacori se laki siosiotaka ka vakaleqa na nodra cakacala. E dodonu ga mo vakayacora na veika me ra vukei kina, na veika me yaga vei ira, me vakalougatataki ira, ka vakaukauwataki ira me ra vakayacora na cakacaka vinaka era vakaitavi tiko kina.¹⁶

Me iUlutaga ni Vuli

Na cava e bibi kina na noda tokoni ira na noda iliuliu”e na lotuvakayabaki ni noda Lotu”? Na cava e na veivuke kina na noda kila, ni noda tokoni ira na noda iliuliu sa ikoya “e dua na veiyalayalati e da vakayacora”?
Eda na tokoni ira vakacava na noda iliuliu, me kua “e na vakarairai ga, ia e na cakacaka kei na dina”? O sa raica vakacava na nomu vakabauta kei na nomu masu e na nodra vukei na noda iliuliu?
Na cava e rawa ni yaco vei ira na “sega ni tokoni ira sa vakadonui me ra veiliutaki e na Lotu”?
Era na laki vakatawa se yadrava vakacava na valececere i Saioni, na Mataveiliutaki Taumada kei ira na lewe ni Kuoramu ni le Tinikarua? Na cava na nodra itavi? Eda na rawa vakacava ni tokoni ira ka dokai ira talega e na nodra itavi? (Raica V&V 107:22.)
Na cava e so na nona itavi na peresitedi ni iteki? E na sala cava eda rawa ni tokoni ka vukei ira kina?
Na cava e bibi kina meda kila ni o Bisopi e tiko vua na kaukauwa kei na lewa e na tabana levu”mai vua na Kalou ka sega ni mai vua na tamata”? Me da veitokoni vakavinaka vakacava vei ira na bisopi kei na nodra cakacaka?
E bibi vakacava na nona itavi na dauveituberi vakavuvale” ka bibi me vaka na itavi ni iapositolo, e na tabana e sa kacivi kina me cakacaka kina”? E da na tokoni ka dokai ira vakacava na dauveituberi vakavuvale kei ira na dauveisiko vakavuvale?
E ivakaraitaki cava ni noda vakabauta na Turaga na noda tokoni ka dokai ira na noda iliuliu?

Joseph F. Smith and Joseph Fielding Smith — O Peresitedi Joseph F. Smith kei na luvena tagane o Joseph Fielding Smith, e lewe talega ni Kuoramu ni iApositolo Le Tinikarua e na gauna e tauri kina na itaba oqo e na 1914 ka qai mai ikatini ni Peresitedi ni Lotu.