iVakamacala Taumada

E 52 na yabaki ni nona Vakaitutu Raraba ni Lotu o Peresitedi Joseph F. Smith —a lewe ni Kuoramu ni Le Tinikarua, e ivukevuke vei iratou e va na Peresitedi ni Lotu, ka 17 na yabaki na nona Peresitedi ni Lotu. E vakavulica na kosipeli e vakalesuya mai o Jisu Karisito e na nona maqosa kece, na yalomalumalumu kei na gumatua, ka sureti ira na tamata me ra “bulavata na inaki ni Tamada Vakalomalagi.”¹ E vakaraitaka na kaukauwa ni nona vakadinadinataki Jisu Karisito e na nona ivakavuvuli: “Au sa rawata na ivakadinadina ni Yalo Tabu e lomaqu, kau vakadinadina kina e na iserau ni Kalou, agilosi kei ira talega na tamata … ni’u kila ni Bula tiko na noqu iVakabula.”²

Na nona itukutuku kei na ivunau edaidai e vakaraitaka tikoga vei keda na veidusimaki tabu kina sala torocake tawamudu. Na cakacaka e na vuravura oqo, e vakaraitaka o Peresitedi Smith, “me da vakayacora na veika vinaka, mo butuka sobu sara e yavamu na ivalavala tawakilikili, bulataka na vinaka, na savasava, me savasava na yaloda na tamata ka me tauyavutaki e na nodra vakasama na luveda, mai na veika e so me vaka na lomana na Kalou kei na nona ivakavuvuli.”³ E vakarota talega “ni da sa Yalododonu Edaidai e vinakati taumada me da solibula ki na veika eda taleitaka se vinakata vakavuravura; e vinakati na yalodina, na tudei vakayalo, e vinakati na dina, muria ni ivakavuvuli, kei na yalo gugumatua me da raica kina na marau ni qaqa, kei na kena toso tiko iliu na dina.”⁴

Eratou sa vakadeitaka na lewe ni Mataveiliutaki Taumada kei na Kuoramu ni iApositolo Le Tinikarua na kena tauyavutaki na veitarataravi ni ivola na Nodra iVakavuvuli na Peresitedi ni Lotu me vakatitobutaka na nodra yalomatua vakalotu na lewe na me ra raica talega kina vakayalomatua na ivakavuvuvli ni kosipeli ka toso voleka yani vei Jisu Karisito e na vuku ni nodra ivakavuvuli na parofita e na itabagauna oqo. Na ivola oqo e lewena tiko na ivakavuvuli nei Peresitedi Joseph F. Smith, e kaya kina: “Ni da sa Yalododonu Edaidai, na tagane kei na yalewa me ra dau vakasama, cakacaka, me ra turaga kei na marama dau vakasama vakavinaka e na veika, ka dau qarauna sara vakavinaka na sala ni bula era na bulataka kei na ivakavuvuli me ra muria . … Ni ra sa kila vakamatata na kosipeli i Jisu Karisito o ira na tamata, o na raica ni sa dodonu na nodra ilakolako, me vaka na vosa ni Turaga kei na lawa ni Kalou, vakabibi na veika sa dodonu, vinaka ka kilikili ka taleitaki vua na Turaga.”⁵

E wasei vakava na iwase ni ivola yadua: (1) E lewe ni matai ni wasewase na itukutuku e vakamacalataka tiko vakalekaleka na uto ni itukutuku; (2) Na ikarua ni wasewase e “Tukuni ni Bula i Joseph F. Smith,” e vakaraitaki tiko kina na ivakavuvuli kei na ivakaraitaki ni bula i Peresitedi Smith kei na nona vuku; (3) Na ikatolu na “iVakavuvuli nei Joseph F. Smith,” e vakabibitaki tiko kina na ivakavuvuli mai na nona itukutuku kei na nona vunau; (4) Na ikava ka kena iotioti e wasei “Me iUlutaga ni Vuli,” me vakauqeta na noda rai yadudua, kei na vakatataro me veivosakitaki kina na kena bulataki vinaka na ivakavuvuli ni ivola oqo.

Na iNaki ni iVola Oqo

E baleta na noda vuli yadudua. E inaki ni ivola oqo me vakarabailevutaka na noda kila na ivakavuvuli ni kosipeli e vakavulica o Peresitedi Joseph F. Smith. Me da wilika e na masumasu ka vakasamataka vakayalomatua, me da na taura kina na noda ivakadinadina e na dina. Na ivola talega oqo e rawa ni laki tomana na veika vinaka sa tu vei iko ka na yaga talega me idusidusi ni ivakavuvuli vakavuvale.

E baleta na veivosaki vakalotu e na soqoni ni veisigatabu. Na ivola oqo e na vakayagataki e na soqoni ni kuoramu ni Matabete i Melikiseteki kei na iSoqosoqo ni Veivukei. Me ra veituberi na qasenivuli mai na uto ni ivola ka vakanuinui ga ki na veitiki ni ivolanikalou e tarogi tiko e na iotioti ni wasewase yadudua me vakauqeti kina na veivosaki vakalasi. Ni da raica taumada na veitaro ni bera ni da vulica na vosa nei Peresitedi Smith e na laurai kina e so na veika yaga me baleta na nona ivakavuvuli.

Na soqoni e na veisigatabu me vakabibitaki kina na ivakavuvuli ni kosipeli,na ivakaraitaki ni bula ka vakavuvulitaki kina na veivakavuvuli oqo, kei na ivakadinadina ni ivakavuvuli oqo. Kevaka era dau sasagataka na Yalo Tabu e na yalo raramusumusu o ira na qasenivuli e na nodra vakarautaka na lesoni, era na vakadeitaki kina e na nodra kila na dina o ira era vakarorogo. Me ra dau vakadreta na qasenivuli vei ira na gonevuli na kena dau kau mai kina kalasi na nodra ivola me ra dau rokova na nodra vakavakarau na lewenikalasi e na nodra veivakavulici mai na ivunau i Peresitedi Joseph F. Smith. Kevaka era sa wilika rawa mai na lewenikalasi na nodra ivola sa na rawa kina me ra veivakavulici ka veivakavukui.

E sega ni gadrevi se vakaturi me ra volia na lewenilotu e so tale na ivoladusidusi me tokona na iyaragi ni vuli e na ivola oqo. Era sa vakayaloqaqataki na lewenilotu me ra dau raica na ivolanikalou e vakaturi yani me titobu kina na nodra vulica na ivunau.

Me vaka ni vakarautaki na ivola oqo me baleta na vuli yadudua kei na dusimaki ni kosipeli, esa na rui balavu beka kina na veiwase e so me talaucaki kece kina e na gauna ni kalasi. O koya gona e rui bibi kina na kena vulici vakavinaka e vale me ciqomi kina vakavinaka na ivakavuvuli nei Peresitedi Smith.

Me rawa mada ga ni o ni kila vakavinaka na Parofita ni Kalou yalomalua, tudei e na vakabauta ka sega ni dau rere oqo o Peresitedi Joseph F. Smith e na nomuni vuli. Mo ni ciqoma na nona ivakasala “mo ni digia na dodonu baleta ni dodonu” baleta ni o dau taleitaka na veika dodonu, ni o dau gadreva vakalevu mai na veika kece ga.”⁶ Mo ni duavata kina kei Peresitedi Smith e na nona vakadinadinataka na kaukauwa ni kosipeli i Jisu Karisito: “Na noda vakabauta na ivakavuvuli e vakalesui mai … e vakadeitaka ka vakaukauwataki keda ka laki tauyavutaki me kua tale na vakatataro se na vakatitiqa, na noda yalodina kei na vakabauta me baleta na cakacaka tabu vakalotu ni Luveni Kalou.”⁷