Kunea na Vakacegu vei Karisito

O ira na ciqoma na ivakadiandina i Jisu Karisito e ra kunea na vakacegu kei na sautu e yalodra.

Tukuni e na Bula i Joseph F. Smith

Amate o Peresitedi Joseph F. Smith e na 19 ni Noveba 1918, ni a Peresitedi ni Lotu tiko kina ni mai na yabaki 1901. E a bulabula, gugumatua, ka yalodina e na vakayacora tiko na cakacaka ni Turaga, e sa solia na nona bula e na ivakavuvuli ni dina ni kosipeli i Jisu Karisito. E vunautaka o koya na bula kilikili, a parofiota ni Kalou, e vakauqeti ira na Yalododonu, “Vakamuri au me vaka niu sa vakamuri na iliuliu, na Dauniveisorovaki ni vuravura.”¹

O Peresitedi Heber J. Grant, o koya a mai sosomi taki Joseph F. Smith me Peresitedi ni Lotu, e tukuna e na lotu ni veibulu: “Au a tiko vata kei koua me rauta e 36 na yabaki, imataki ni se ivukevuke tiko kina, imuri e na gauna a mai Peresitedi kina ni Lotu. E na veiyabaki kece oya au sega ni kila e dua na ka baleta na nona bula, me vosataka se me nona ivalacalai e sega ni kilikili me vaka na tagane dina. Au rawa ni tukuna e na yaloqu dina, ‘O koya na mataqali tamata au vinakata me’u vakataki koya.’ Noqu sa mai tucake tu oqo e na yasa ni nona ibulubulu, na veika au vinakata e sega ni rawa ni vakamacalataki vakavosa, na kaukaua kei na noda rawata me vinaka, me dau veinanumi, me veivosoti, me qaqa ka vakaturaga, ka dina, ka vakamuria na nona ivakavuvuli. Au na sega tale ni taroga e dua tale na ka.

“… Ni a sega tale ni dua na tamata e a bula tu, me tiko vua na ivakadinadina kaukaua ni Kalou bula, na noda Dauveisorovaki me vaka e tu vei Joseph F. Smith. Mai na gauna au se gone lailai voli kina e dau vakayalokatakatataki au na nona ivakadinadina e dau solia vei ira na sota kei koya, e dau vakadinadinataka ni kila ni bula tiko na Kalou, o Jisu na Karisito, na Luve ni Kalou bula, na Dauveisorovaki ni vuravura. Na yalo ni veivakauqeti a tiko vua na tamata oqo au kunea ni sa mai tiko e lomaqu kei na lomadra e lewe vuqa tale na lewevuqa. Au lomani Joseph F. Smith kau sega tale ni lomana e dua tale na tamata au kila. Me vakalougatataka na Kalou na nona ivakanamuni.”²

Na ivakadinadina oqo a tauri mai na nona vosa e solia o Peresitedi Smith e Provo, Utah, e na ika 13 January 1907.³

iVakavuvuli i Joseph F. Smith

Eda sa curu ki na i vakavakacegu ni Turaga ka solia na yaloda Vua kei na Nona kosipeli.

Au vinakata me’u wilika na volavola nei Moronai, e wilika mai kina na ivakavuvuli nei tamana, o Momani.

“Ko i au ko Maronai; au sa vola na i vakavuvuli i Momani na tamaqu me baleta na vakabauta, na i nuinui kei na loloma. …

“… Ia au sa vosa vei kemudou na i soqosoqo lewenilotu, ko i kemudou sa daumuria na Karisito e na yalo vakacegu; raica dou sa rawata na i nuinui me yacova ni dou sa curu ki na i vakavakacegu ni Turaga ka tiko vata kaya mai lomalagi.” [Moronai 7:1, 3.]

… Na cava na ibalebale ni dou sa curu ki na i vakavakacegu ni Turaga? Au vosa tiko me baleti au ga, na kena ibalebale oya, mai na loloma ni Kalou au sa laki tovata mai kei Koya, me’u laki vakila kina na vakavakacegu i Karisito, me’u kakua talega ni vakasausataki e na cagi kecega ni vakavuvuli, e na lawaki ca ni tamata, e na dauveivaqaseni sa nakiti kina na veivakacalai; ka’u sa mai yavutaki tu e na vuku kei na ivakadinadina i Jisu Karisito, me kua tale ni dua na kaukaua me biligi au vakatikitiki mai na sala sa dodonu ka qiqo ka lesu tale tiko kina iserau ni Kalou, me’u marautaka kina na bula vakalou e na Nona matanitu lagilagi; mai na gauna oqo ka lako yani Au na marautaka na vakacegu oya me yacova au na vakacegu kei Koya e lomalagi.

Au vinakata me’u vakadeitaka na vakasama oqo e na nomu vakasama, ni’u vinakati iko mo vakasamataka ni oqo na ibalebale vosa e vinakati me kilai e na vosa, “ni dou sa curu kina i vakavakacegu ni Kalou.” Me’u vakadeitaka vei iko ni o ira na tamata era sebera sara ni vakayavutaki vakavinaka e na ivakavuvuli i Karisito, o koya e sebera sara ni solia na yalona taucoko vua na Turaga, kei na Kosipeli e sa vakavulica o Koya ki vuravura, e sebera ni curu yani kina i vavakacegu. E se tiko mai wasawasa, eda kaya mada ga, se wavoki tu, se sega ni dei, se malumalumu, lailai tiko na vakabauta e sega ni rawa ni tosoi, sa wawa tu me tarai koya yani na itovo qaseqase kei na lawaki nei koya e sa wawa tu me lawakitaki se vakaliuci ira tani ki na veika cala kei na butobuto. Ni sa taura o koya na ivakadinadina i Jisu Karisito e yalona, e sa solia taucoko o koya ki na matanitu ni Kalou kei na yalo ni Tamada, e sa tauyavutaki. Na yalona sa deivaki; e sa kila o koya na ka me cakava; na vakatitiqa sa biutani; sa biutani talega na rere; sa kila o koya o cei e na vakabauta; e sa tauyavutaki vinaka na nona inaki kei na nona gumatua, ia koi au kei ira na noqu lewe ni vale, keitou na qaravi Jiova, ka vakamuria na Nona ivakaro ka lako, me yacova sara na vanua e rawa ni yacova na tamata, e na bula savasava, e na veidokai, yalodina kei na dodonu e na iserau ni Turaga.

Au vakavinavinaka vua na Kalou ni nona Yalo Tabu kei na veika e vakila ni lomaleqa e sa vakagalalataki mai na noqu vakasama kei na noqu mona me baleta na cakacaka e sa vakaitavi tiko kina; ka sa vakadei taka vei au na Turaga ni sa sivia kece na veika me baleta na ka oqo. Au marau taka na Kosipeli; au marautaka na ivakadinadina ni Yalo Tabu ni Kalou e yaloqu; Au marautaka na ivakadinadina ni Parofita o Josefa Simici, Au marautaka talega e na ivakavuvuli kece ni Kosipeli i Jisu Karisito, vakabibi ko ira eda sa kila vinaka tiko, me vaka na noqu kila. Au na sega ni rawa ni kerea, au sega ni vinakata e dua na ka me vinaka cake mai na ivakavuvuli ni bula kei na veivakabulai e vakaraitaki e na inaki levu ni veisorovaki, o koya a vakalesuitale mai e vuravura edaidai. …

Eda tovolea me da vakamuria na ivakatagedegede ni bula savasava e tauyavutaka na iVakabula.

… Ke sa vakadeitaki vakavinaka na lomada e na noda qarava na Kalou ka vakamauria tiko na nona ivakaro, na cava e na qai vuana? Na cava e na qai yaco? … E na sinai vua na tamata na yalo ni veivosoti, ni loloma, ni loloma veivueti, na loloma e sega ni veivakaisini. Era na sega ni vakasaqara na iulubale me ra veiba se veivala kina; se me ra laki veivala kei ira na malumalumu, o ira na sega tu ni qarauni ira, se o ira na tawa kila; io era na raica na nodra dodonu tawa kila, o ira na malumalumu, o ira na vakatau tiko e na nodra loloma veivueti, me vaka na nodra vakataki ira; era na maroroya talega na galala nodra na tamata me tabu me vaka ga na nodra galala; era na mariqeta na bula dodonu, na veidokai kei na yalodina ni kai nodra kei ira na tacidra, me vaka ga na nodra taleitaka ka mariqeta na veika tabu e nodra.

E da na sega ni rawa ni se yacova yani vakadua taucoko na vakatagedegede ni bula savasava cecere se na vinaka e vakaraitaka raraba o Koya. Ni da sa kila tiko ni da na se sega ni se rawata na vinaka cecere, ka sega ni rawa ni taura taucoko, me vaka eda gadreva, io e se tiko ga oya na kena maka, ka sa tu e matada na kena ivakaraitaki. Era sa waraka tiko na gauna, me da na yacova yani kina na ivakatagedegede cecere ka lagilagi sa vakarautaki vei keda mai na ivakaraitaki, na nona bula kei na ilesilesi ni Turaga o Jisu Karisito. Dina ni da na sega ni rawata na ivakatagedegede cecere e a vakaraitaka na Kalou vei Jisu Karisito, io eda na veivutuni baleta na noda lutu, ka da na vakavoutaka na noda sasaga, ka vakalevutaka na noda gugumatua e na siga ka dua. Io, e na gauna oqo eda na vakaruataka kina na noda gugumatua, tovolea mo vakamalumalumutaka na nomu malumalumu, ka toso voleka mai kina ivakaraitaki e sa tuvana tu na Luve ni Kalou.

Oqo na Kosipeli i Jisu Karisito, na ivakavuvuli dina. Na tamata e na vakamuria, e na ciqoma taucoko ka bulataka na Yalo Tabu vakakosipeli, ka na maroro na kena Yalo Tabu e lomana; o koya e tiko vua na yalo oqo e yalona, e na vakasaqara taumada na yalo oya mai na yalo tale eso, e na mai e na dua na vakabauta kina dua tale na vakabauta, mai vakanuinui ki na vuku, mai na kila kina vuku kei na kaukaua, ka laki cava yani kina bula vakalou, kei na lagilagi e na matanitu ni Kalou; ka na sega tale ni dua na kaukaua e na ruku ni matanitu vakasilesitieli e na rawa ni tarova se vakaosoosotaka na cakacaka oqo, kena tovolea me vakamuria na lawa kei na ivakaro ni Kalou. …

… E na gauna eda sa vakadeitaki na yaloda, me vakataki Josua e na gauna makawa, ni da na qarava na Kalou e na siga edaidai, ka na tekivu e na diga edaidai ka loko yani e da na qaravi Koya ka talairawarawa kina na Nona ivakaro, e da na sa na rawa ni wasea na butobuto mai na rarama, na vinaka mai na ca, na dodonu mai na cala, na veika e savasava mai na veika tawa savasava; mai na gauna oya, na nomu vinakata na vinaka ena tubu me kaukaua tiko mai, o na sa matau mai na vakayacora tiko na veika vinaka, o na rawata kina na inakai ni Kalou, vakabibi e na nomu biuta laivi na nomu malumalumu tale eso, me tautauvata ni o sa gumatua e na nomu biuta laivi na veika ca ka digitaka na vinaka, e na nomu sa vinakata na vinaka ka talaucakatani na ca, ka vukitani mai na vuravura kei na itovo ca kece vakatamata, ka veivuke yani e na kena vakayacori tiko na veika e gadrevi me vakabulai ira na kina tamata, me vakabulabulataka na nodra gagadre na tamata, vakabulabulataka na nona inaki ka vakalevutaka na nona loloma cecere, na nona loloma kei na veivosoti. Ena rawa ni o na qai raica vinaka na rarama, me vaka e tukuna na parofita; o na rawa ni vakava vakamatamata, me vaka ga dou sa kila na rarama mai na butobuto. [Raica Moronai 7:14–15.] …

Eda na tubu tiko mai na loloma cecere kina loloma cecere me yacova ni da sa taura taucoko ka veitacini kei Jisu Karisito.

Au na wilika oqo vei iko:

“Raica sa kaya vakaoqo na Turaga; Ko koya yadua sa veivutunitaka na nona i valavala ca ka lako mai vei au, ka masuta na yacaqu, ka rogoca na noqu vosa ka muria na noqu vunau, e na raica vakaidina na mataqu ka kila ni sa i au” [V&V 93:1.]

Oqo na vosa ni Turaga. E sega ni ka rawarawa na raica na mata ni Kalou ka kila ni o Koya oya, o koya e sega ni rawa ni biuta laivi na ivalavala ca, ka sega ni lako mai vua na Kalou, o koya e sega ni kaciva na yacana, o koya e sega ni vakamuria na domo ni Kalou, o koya e sega ni talai rawarawa kina nona ivakaro. E na raica rawa na mata ni Kalou, ka rawa ni kila ni o Koya oya? Sega, e a sega ni yalataki; io e na kena veibasai. O koya e “lako mai vei au;” o koya e “biuta laivi na nona ivalavala ca;” o koya e “kaciva yani na yacana;” o koya “vakamuria na noqu vosa;” o koya e “talairawarawa kina noqu ivakaro.” o koya e “e na raica na mataqu,” e tukuna na Kalou, ni o koya e na “kila o cei o au,” kau na sega wale ga”ni kila se ocei o au,” io ka kila talega ni o au “na rarama dina; io sa vakararamataka na tamata kece ga sa lako mai ki vuravura.” [V&V 93:2.]

E dua na veiyalayalati lagilagi e soli vei ira na luveni Kalou. … Ke o Jisu Karisito, na luvena e dua bau ga na Tamada vakayago, ni sa tubucake tiko ko Koya e na nona i ukuukutiko ka mani kacivi kina me Luvena, ka tomani tiko na nona taura na loloma e vakarautaki; io me yacova ni sa rawata na nona i ukuuku taucoko, ka sa mai matata ni koya e vakamuria na maue ni yavana, o koya e na vakamuria na Nona vunau, susuga na nona inaki ni bula kei na vakabulai, e na rawata na loloma cecere e vakaikuritaki, ka tomana tiko na loloma cecere vakaikuritaki; e na biuta tani na veika ca ka bula vinaka, ka na taura vakalailai eke, vakalailai mai kea me yacova ni sa rawata na i ukuuku taucoko me vaka ni sa rawata kece na Luve ni Kalou na nona i ukuuku taucoko; ka qai mai vaka na Karisito na Luve ni Kalou, ka veiwekani kei na Kalou ka veitacini kei Jisu Karisito. [Raica V&V 93:11–14.] au sega ni rawa ni veisautaka na noqu vakasama kei veika au vakila e buebue tiko e yaloqu, ka yadra mai e na vosa oqo i Karisito, na ka talei ka lagilagi e sa soli vei au baleta na noqu talairawarawara kina ivakaro ni Kalou, ka vakamuria tiko na vosa ni Turaga, na lagilagi ni sa na mai noda, e na dua na gauna mai muri, na taucoko ni lagilagi ni Kalou, na taucoko ni kila kei na dina, na taucoko ni kaukaua, na taucoko ni vuku, ni tiko na noda kaukaua, na vanua kei na lagilagi me vaka na Tamada.

E soli beka vei iko e dua na ka mo bulataka, e dua na ka mo vakanuinui kina? E tiko beka e dua na icocovi saulevu e soli vei iko; e soli vei iko me baleta na nomu talairawarawa, e na nomu yalo vakabauta, e na nomu sa ciqoma na rarama, ia kevaka eda sa ia nai valavala ni rarama, me vaka sa tu e na rarama ko koya; mo rawa ni veimaliwai kei Koya, ka me vakasavasavataki iko na dra i Jisu Karisito mai na nomu ivalavala ca taucoko? Au vakavinavinaka vua na nolqu Kalou me baleta na nona Kosipeli tabu; au vakavinavinaka talega vua me baleta na nona gugumatua, na nona vakanuinui ni vakauqeta na lomaqu me’u na mai kilikili vei Tamaqu kei na noqu Kalou; au na kilikili me’u vakata kei Koya, ka kilikili talega na bula vakaou e na Nona matanitu, ka marau tiko e na nona iserau ka nona gone ni toko e na veigauna kece me tawamudu.

Au kila ni Kosipeli i Jisu Karisito e na rawa kina vei au me’u rawata na nona bula vakalou, ka sa sega tale na sala e soli me vakabulai kina na tamata; ka sega talega na inaki e vakaraitaki e vuravura e na rawa ni bula kina vakalou na tamata ka me qai lesutale ki na iserau ni Kalou. E na sega tale ni dua na sala. …

E sa vakaraitaki oti taucoko na veika oqo? Sega. E se vo tiko eso tale na ka me vakaraitaka na Kalou vei ira na Luvena? Io, e levu; io e da se bera ni vakavakarau kina dua na rarama levu ni koya sa lako mai; ko koya sa soli vakalevu vua, e na tarogi vakalevu vua; e levu sa soli oti vei keda, e vinakata sara na Kalou e levu mai vei keda edaidai mai na kena eda solia vua. Eda na sega ni lako e na rarama baleta ni sa tiko o Koya e na rarama; eda na sega talega ni vakamuria na dina me vaka e vinakata o Koya meda vakamuria. E da na vakarorogo kina noda dui malumalumu; ka soli keda kina ivalavala ca e tarai keda tiko, kina veika eda vinakata, kina noda dui kocokoco, kina veika e da vinakata vakatamata ka da sega ni rawa ni qarauna na malumalumu vakavuravura ka kaya e yalomu, “Io o au, au na qarava na Kalou, vakamuria na Nona ivakaro, mo dou savasava kina e matana.” E da sega ni vakayacora; io o ira na Yalododonu Edaidai era tamata uasivi e vuravura. Eda sa bula vakavoleka sara tiko kina ivakatagedegede oqo mai na veitamata tale eso edaidai e vuravura, e na noda malumalumu kei na cala.

Na sautu kece kei na marau e rawa e na kosipeli i Jisu Karisito.

E na gauna oqo esa vakalougatataki iko na Turaga. Me tiko ga kei iko na sautu, na taciqu kei ganequ. Kauta mai na vakabauta na Kosipeli e lomamu. Vulica ni lotu oqo e sa soli vei iko mai vei Josefa Simici na parofita ni lotu ni Kalou, e lawa ni Kalou kei na veika e vinakata na Kalou me baleti ira na luvena e vuravura, ni qo e taumada mai na veika kece. E cecere cake mai vei au; e cecere mai na vuravura; na koula kei na siliva, na vale, kei na qele; e cecere talega mai na bula vakavuravura, baleta mai kina e sega walega ni na dei yadudua, na noda dodonu, ia e da da vakadeitaki e na isolisoli vakabula tawamudu, na isolisoli cecere ni Kalou.

E sega tale ni dua na ka e rawa ni vakatautauvata taki e na lotu oqo. E dua na ka levu e vakavuravura—e dua na ka levu vei keda e vuravura—[e] dina ni Kalou, na lotu i Jisu Karisito, na ivakavuvuli ni veisorovakai kei na vakabulai mai na ivalavala ca, mai noda dui malumalumu, mai na cakacaka maqosa ni yalo tabu, kei na cakacaka, na kila, na kaukaua kei na vuku ni Kalou, o koya e soli kece mai na veika vinaka. Me tiko vei iko na sautu, ka levu talega vei iko na veivakalougatataki ni bula vinaka kei na loloma, e na veicacaka kece, kei na cakacaka o vakaitavi kina, mo rerevaka na Kalou e matamu e na veigauna kece.

Io au sega ni vinakata me curu mai e na nomu vakasama e na dua na gauna, ni lotu i Jisu Karisito o vakaicolacola kina se o sa rui vakavu sosa vei iko. E sega sara. E tukuna na Kalou, “Ni sa rawarawa na noqui vua, ka mamada na noqui colacola” [Maciu 11:30.] E veivueti mai na ivalavala ca. Na bobula e sega ni o koya e sa vueti cake mai na ivau ni veivakabobulataki ni ivalavala ca, o koya ga e se dinau tiko ga ka vesuki koya tiko na nona ivalavala ca. O koya e bobula; o koya tale e vesu tiko; o ira oqo era gadreva na noda loloma, na noda veikawaitaki, kei na noda yalololoma. O koya me tovolea me biuta laivi na ivau ni veivakabobulataki kei na ivalavala ca, me marautaka na galala mai na ivalavala ca kei na caka ca.

O Jisu Karisito na Luveni Kalou, e rawa, ka rawata e na gauna e bula tiko kina vakayago, ka rawata talega edaidai, me marautaka na veika kece e rawa vua na tamata kilikili me marautaka; ka sega tale ni dua na ka e na sega ni soli vua e vinaka. Oqo e tautauvata sara ga kei ira na Yalododonu Edaidai. “Oilei, “ e dua e tukuna, “Ke o rawa ni bulataka na nomu lotu me vaka osa dusimaka vei au, ka’u na sega ni marau tale, e na cegu na noqu vinakata na veika eso.” Oilei, kemuni na lialia. Au rawa ni marautaka na veika dodonu, na veika kilikili e rawa ni marautaka talega o ira na tamata kilikili e na vuravura ni Kalou; io ke na levu cake mai na noqu vakabauta mai vei taciqu e na kena vakamuri tikol na ivakaro ni Kalou, e na levu cake na ka au na marautaka mai na koya e na marautaka o koya. Me tautauvata kei na nomu vakabauta, na nomu yalo dina, e na torocake e na nomu kila na Kalou, e na rawa mo marautaka kina na veika vinaka, e makare ka savasava, ni Kosipeli e kauta mai na marau dina, na galala dina kei na ivau ni ivalavala ca, kei na veika gaga.

E vukei keda na Kalou me da raica na dina, kei na rarama me vakasiga ka me da rawa ni kila vinaka me vaka e da rawa ni kila na rarama ni siga mai na butobuto ni bogi, na noqu masu, e na yaca i Jisu. Emeni.

Me iUlutaga ni Vuli

Na cava na ibalebale “Me da curu ki na i vakavakacegu ni Turaga”? E da na rawata vakacava na i vakavakacegu oqo?
E da na soli vakacava na yaloda taucoko vua na Turaga kei na Nona kosipeli?
Na cava eda rawa ni cakava me da yacova yani na “ ivakatagedegede ni bula vakalou” e vakarautaka vei keda na iVakabula?
Na cava na ibalebale me da torocake “mai na loloma cecere kei na loloma cecere”? Na cava e da rawa ni cakava me da vakadeitaka kina ni da na tomana tiko na noda tubu e na sala oqo me yacova ni da sa taura na ke na taucoko?
Na veiyalayalati lagilagi cava e yaco vei ira na tovolea me ra vakataka na iVakabula?
Ni sa tubu tiko na noda vakabauta vei Jisu Karisisto, e na vakamamada taka vakacava o koya na nomu icolacola ka soli vei iko na vakacegu? (Raica Maciu 11:28–30.)
Na veika cava o sa sotava e vukei iko mo kila ni sautu kei na marau taucoko e kune kece e na kosipeli i Jisu Karisito?
E sa vukei iko vakacava na nomu vulica na veika baleta na Kalou, kei na kosipeli i Jisu Karisito e vakavulica qo o Peresitedi Joseph F. Smith? O sa vakila tiko kina na marau kei na sautu? O sa vaka tiko mai na iVakabula?

O President Joseph F. Smith, 1838–1918. E vakavulica o koya, “Me tautauvata kei na noda vakabauta, na noda yalodina, na levu ni noda kila na Kalou, e da na rawa ni matautaka kina marau, na makare kei na savasava, ni Kosipeli ga e kauta mai na marau dina.”