Vakarorogo Kina Veivakauqeti ni Yalo Tabu.

O ira kece na lewenilotu e tiko vei ira na dodonu ki na veivakauqeti ni Yalo Tabu me veidusimaki vei ira.

Tukuni e na Bula i Joseph F. Smith

Ena dua na siga ni rau sa lesu tiko mai e na tokalau ni vanua o Amerika o Peresitedi Joseph F. Smith kei Bisopi Charles W. Nibley, erau vodo sitima ni vanua tiko mai e na nodrau ilakolako tiko oqo i vale. Ni voleka yani kina Green River, na vanua o Wyoming, e tucake sara o koya ka curu sara yani kina varada e na daku ni sitima ni vanua, e rogoca sara e dua na domo me tukuna vua, “Curu yani i loma dabe.” E curu tale yani o koya e na loma ni sitima ni vanua, e via lomalomarua vakalailai ka kaya e lomana, “Oilei, rairai beka e noqu nanuma walega.” e qai rogoca tale na domo oya ka kaya tale vua, “Dabe e ra.” E vakayacora sara vakatotolo, sa dabe sara o Peresitedi Smith. Vakalailai sara ga oya e bale vakasauri na sitima ni vanua baleta e dua na bai ni kena sala e kamusu ka laki vakavuna kina me viritaki tani mai na kena gaunisala. E tukuna vakaoqo o Bisopi Nibley ke a sega ni vakamuria o Peresitedi Smith na ka e tukuni vua ke a mavoa sara kina vakaca, na motoka ga e vodo tiko kina e tiko ga e na kena sala na kena vo era sa veicoqacoqa tu vaka ca.”

E tukuna o Peresitedi Smith baleta na ka e sotava oya, “Au sa rogoca oti e na levu na gauna na domo oya ni dau vakabulai au e na veigauna au dau talairawarawa kina.”

“[O Peresitedi Smith] e dau tiko veivolekati kei na Yalo Tabu ni Turaga,” e dau raica o Bisopi Nibley, “na noda bula e ivakaraitaki ka savasava e vakavuna kina me dau vakaraitaki koya kina na Turaga vei koya kei ira na nona tamata. E na kaya dina o koya, ‘Mo ni vosa mai Jiova, ni sa vakarorogo na nomuni tamata.’ [1 Samuela 3:9.] … E sa matau e loma i Peresitedi ki na rorogo vakasilesitieli, na ivakaraitaki se mani itukutuku sara—e rawa ni rogoca o koya ka dau rogoca talega.”¹

iVakavuvuli i Joseph F. Smith

E tiko vei ira na lewenilotu na dodonu mera taura kina na ivakaraitaki ni Yalo Tabu me nodra idusidusi.

Na yalo tabu ni veivakauqeti kei na isolisoli ni veivakatakila e sega walega ni nona e dua na tamata, e sega talega ni solisoli me baleti ira ga na lewe ni Mataveiliutaki Taumada se o iratou na lewe ni iApositolo Le Tinikarua. E sega walega ni tiko vei iratou na iliuliu veiliutaki e na Lotu, e nodra kece na lewenilotu; e nodra dodonu talega na tamata kece, na marama kei ira na gone era sa kila na vinaka mai na ka ca, mera marautaka na Yalo Tabu ni vakatakila, ka tiko talega vei ira na Yalo Tabu ni veivakauqeti e na nodra vakayacora tiko na nodra itavi vakalewe ni Lotu.²

O ira kece na lewenilotu e tiko vei ira na dodonu kece mera marautaka na Yalo Tabu ni vakatakila kei na kila mai vua na Kalou, e solia vua na Yalo Tabu oya me baleta na nona vinaka, me vaka e tiko vua na bisopi merawa kina vua me veiliutaki e na nona tabana levu. E tiko kece vei ira na tamata na dodonu me ra rawa ni vakayagataka na isolisoli oqo kei na veika kece e salavata mai me vakayacora kina na veika e ganiti koya me vaka na susugi ni luvedra me ra kila na nodra sala, na kena cicivaki na nona were, na nona manumanu, kei na kena cicivaki na nona bisinisi …; e nona dodonu me marautaka talega na Yalo tabu ni ivakatakila kei na veivakauqeti me vakayacora kina na veika dodonu, me vuku, me dau lewa maqosa, lewa dodonu me vinaka talega e na veika e vakayacora. Au kila ni vakavuvuli dina oqo.³

E nodra dodonu na tamata yadua me ra vakauqeti me ra taura talega na ivakaraitaki ni Yalo Tabu me nodra idusidusi me vakaukauataki kina na nodra vakabauta, ka vakayaloqaqataki e na nodra cakacaka kilikili o ya na nodra yalo vakabauta kei na nodra vakamuria ka taura matua na ivakaro e sa solia vei ira na Kalou; e dua na ka taleitaki vei ira yadua na tamata kei ira talega na marama me ra tauca na ivakatakila me baleta na veika oqo. Na gauna e vakatoroicaketaki kina e dua na tamata me veiliutaki se me veivakaroti, se me dauveilewai vei ira na tacina, vakabibi vei ira na veiliutaki tiko, e dodonu me vakadikevi vakamalua sara o koya, se veileti, na veitawasei kei na veilecayaki e na tini kina. O ira na tagane kei na yalewa e na loma ni Lotu oqo e dodonu sara me ra kila vinaka ka me ra vakarorogo kina Yalo Tabu oya.⁴

E dodonu me da bula voleka vua na Turaga, me da yalo malumalumu kina me da talairawarawa ka vakavakarau me da vakarorogo, e na veivakauqeti ni Yalo Tabu, me da rawa talega ni kila kina na vakasama kei na yalo nei Tamada me baleti keda yadua kei na noda itutu vakaveiliutaki e na Lotu i Jisu e na veika kece e na yaco.⁵

E dodonu … e na veigauna eda bula tiko kina me tiko vata kei keda na Yalo Tabu me vaka na ivurevure bula, sa namaki tu me liutaki keda ki na vinaka ni kilikili, bula dodonu kei na yalo dina ki na iserau ni Kalou, me yacova ni da sa rawata na noda itavi vakavuravura, e na noda vakayacora na itavi taucoko e nuitaki vei keda.⁶

Na ivakatakila e yaco mai vei keda e na so na gauna e na domo lailai ni Yalo Tabu.

E na sega walega ni ivakaraitaki uasivi vei keda ni da na yavutaki e na dina, ia e na yalo raramusumusu kei na vakabauta na talairawarawa ki na ivakaro kei na lawa ni Kalou. E na imatai ni gauna me tekivu kina na noqu cakacaka vakalotu ni’u se cauravou lailai kina, au dau laki masu vakawasoma ka kerea vua na Turaga me vakaraitaka vei au e levu na ka veivakurabuitaki, me’u rawata kina na noqu ivakadinadina. E sega ni vakaraitaka vei au na Turaga na veika oqo, e vakaraitaka ga mai vei au na dina, na vosa e na vosa, na vunau e na vuanu, vakalailai eke ka vakalailai mai kea [raica 2 Nifai 28:30], me yacova ni sa cakava o koya me’u kila na dina mai na buradelaqu kina qeteqete ni yavaqu, me yacova ni sa takali tani vakadua vei au na vakatitiqa kei na rere. E sega ni vinakati me talai mai e dua na agilosi mai lomalagi me mai vakayacora na ka oqo, se me da vosa vua na iliuliu ni agilosi cecere. Io e na domo lailai ni Yalo Tabu ni Kalou bula, e solia kina vei au na ivakadinadina e tiko qo vei au. E na ivakavuvuli oqo kei na kaukaua eda na solia kina vei ira na luveni tamata na kila kei na dina e na tiko vata kei ira, e na vakaraitaka vei ira me ra kila na dina, me vaka ni kila na Kalou, me vakayacori kina na yalo i Tamada me vaka e vakayacora na Karisito. E na sega tale ni dua na ivakaraitaki uasivi e na rawata na veika oqo.⁷

Mo ni kakua ni rere na taciqu kei na ganequ, ke o sega ni taura e dua vei ira na ivakaraitaki uasivi, se e dua na ivakatakila taleitaki mai lomalagi, ke o na rawa walega ni bula tiko me vakaraitaki koya vei iko na Kalou ke sa lomana. O na sega ni leqa ka sega talega ni dua na ka mo rerevaka, ka na sega ni dua na ka vei iko na leqa me vaka o sa kila, e na gauna o sa vakarau kina mo ciqoma na yalo ni Kalou, e na gauna e sa vakarau kina o koya se vinakata kina, e na vakaraitaka vei iko. E sa rauta oya. E na vakaraitaka vei iko na Kalou na veika ga e vinakati e na nomu vakarautaki iko tiko, me baleta na nomu tubu kei na toso cake tiko na nomu kila na dina.⁸

Me da vakayacora na ka e vakauqeti keda kina na Yalo Tabu.

Au na sega ni rawa ni vakayacora vakayago se vakavakasama na noqu itavi e nuitaki vei au ke sega na veivuke ni Yalo Tabu ni Turaga. Au sega ni kila e na rawa beka vua e dua na tamata me vakayacora na cakacaka ni Turaga ka vinakati kina na nona veivuke, ka sega ni vakayagataki kina na veivuke ni Turaga se na veivakauqeti ni Yalo Tabu e lako mai na Tama ni Rarama.⁹

E na gauna eda bula tiko kina me da rogoca ka kila na domo lailai ni Yalo Tabu ni Kalou, me da vakayacora sara na veika e vinakata vei keda na Yalo Tabu ka sega ni rerevaka na ka e na yaco. Veitalia kevaka e na sega ni lomavata kei ira na dau veivakacacani se mani veidinati sara kei ira se o ira talega na meca ni matanitu ni Kalou, se sega. E na yalo vata kei na veika e vinakata na Turaga? E na tautauvata ka rawa ni veiyaloni kei na yalo tabu ni cakacaka levu ni gauna oqo eda sa vakayacora tiko? E muri e na rawa ni namaki na kena tosoi na Lotu ka vakaukauataki e vuravura? Kevaka me sa kala tiko e na sala oya, me da vakayacora sara, veitalia na veika era na tukuna se vakasamataka na tamata.¹⁰

E na sega walega ni kena na levu vei keda me da lewa se yalovinaka e na noda kila na veika e dodonu. Ni da sa kila na veika dodonu, me da lako sara yani ka vakayacora na veika vinaka, na cava ga eda rawata, na ka e vinakata vei keda o [Jisu Karisito]. Kevaka eda kila na dodonu ka kila talega na dina meda vakamuria na veika e dodonu ka dina, meda vakayacora talega veika dodonu e na veigauna kece ka sega ni cudru se mo vakamuria na sala e sega ni dodonu, na gaunisala e na kauti keda lesu ki na iserau ni Kalou e dodonu ka rabai lailai.¹¹

Na [noda] talairawarawa me lomada dina; me kua ni vakasaurarataki, ka me kua talega ni vakaukauataki. Me ra kakua talega ni tarovi na tamata e na nodra vinakata me ra vakamuria na ivakasala ni Kalou; e dodonu me ra talairawarawa kina ni ra kila e dodonu baleta ni ra via vakayacora ka taleitaka talega me ra vakayacora. E taleitaka na Kalou na yalo rawarawa.¹²

Ni da vakarorogo ka talairawarawa ki na Yalo Tabu, e na vakalevui kina na noda kila na dina ni Kalou ka vakarabailevutaki na noda kila na veika kece.

Era sa dinau tu na tamata kina Yavu ni vuku kece kei na dina, me baleta na veika e sa kila tiko; kei ira talega na vakarorogo ka talairawarawa kina veivakauqeti ni Yalo Tabu, meda rawa ni bula dodonu kina, me da veidokai, na loloma ni Kalou kei ira na tamata, ka lomana na dina kei na veika e vakaturagataki ka vakarabailevutaka na yalo, e na makare, rabailevu, e coka sara na uto kei na kila levu ka uasivi ni dina vakalou e na rawa ni taura e dua na tamata.¹³

Na tagane kei na yalewa sa dodonu me ra dei e na dina, e yavutaki e na kilai ni kosipeli, ka sega tale ni vakanuinui vua e dua na tamata mo kere ivakasala se me vakararamataki iko, ka vakanuinui taudua e na veivakauqeti ni Yalo Tabu, e dua dua tu ga, e na rarama me tawamudu ka vakadinadinataka talega vei ira yadua na tamata kei na matabete, o koya na bula veimaliwai vinaka kei na lawa ni kosipeli e lagilagi kei na yalo ni Tamada. E na tiko vei ira na rarama tawamudu ka sega ni rawa ni vakatabogotaki.¹⁴

E dodonu ga vei keda ka vinaka talega me da vakayacora, oi keda yadua na tamata, me da bulataka na bula ni yalo raramusumusu, na kilikili ka vakabauta na Kalou me rawa kina vei keda me tiko kei keda na nona Yalo Tabu me da rawa kina ni vakatulewa e na yalo kilikili ka kila vinaka sara na duidui ni dina kei na cala na veika dodonu kei na veika e cala.¹⁵

Eda na kila vakacava na dodonu ni veivakasalataki mai vei ira na noda iliuliu e na Lotu? E na noda ciqoma na Yalo Tabu ni Kalou e yaloda, me rawa ni tadola kina na noda vakasama ka vakararamataki, me da kila vakataki keda na ivakavuvuli, me da rawa kina ni wasea na dina mai na cala, na rarama mai na butobuto na vinaka kei na ca.¹⁶

E sa soli vei ira na Yalododonu Edaidai, o ira na yalo vakabauta na dodonu me ra kila na dina, me vaka sa kila na Kalou; e na sega ni rawa ni dua na kauakaua e na ruku ni matanitu vakasilesitieli e na vakasesei koya, se me vakabutobutotaka na nona vakasama, vakasesea na nona vakasama se me vakabuawataka na nona vakabauta se na nona kila na ivakavuvuli ni kosipeli i Jisu Karisito. E na sega ni rawa ni caka, baleta ni ramase sara na rarama ni Kalou mai na rarama ni veika e lasu se cala; io, o ira na sa tiko vei ira na rarama i Karisito, na yalo tabu ni vakatakila kei na kila na Kalou, e vueti sara icake mai na veilecayaki kei na nuiqawaqawa e vuravura; era sa kila tiko na ivakavuvuli oqo ni vu mai vua na Kalou ka sega ni mai vei ira na tamata.¹⁷

Ni da sa bulataka tiko na veika sa vakaraitaki, e na kuria mai na Turaga na rarama kei na vuku.

E se vo tu e levu na ka me vakaraitaki. E tiko talega na veika me vakaraitaka mai na Kalou, e na vakatakila mai e na gauna sa lewa o koya, eda se sega ni se kila vinaka e na gauna oqo. Vei au mada ga, au kila ni sa levu sara na ka sa vakaraitaki ka dredre sara vei au me’u kila. Ke’u bau kila mada ga na veika sa vakaraitaka oti na Kalou, ka vulica vinaka ka vakayagataka na kena kilikili e na noqu bula, au na kila e na gauna oya au na rawa tale ni ciqoma e so tale, ke’u se kilikili tiko ga. Io e baleta na cava, e so na tamata e tiko e na keda maliwa era se leqataka tiko se nuiqawaqawataka tiko na veika e se bera ni vakatakilai vei ira na luve ni tamata.… ke ra sauma tiko na tamata na nodra ikatini, ka vakamuria tiko na lawa ni vuku, ke me ra tukuna tiko na nodra masu, ke ra bulataka tiko e na nodra bula na cakacaka kilikili e vuravura, vulica tiko na kosipeli ka vakamuria tiko, e na sega sara ni dua na betena vei ira me ra loma tarotaro tiko, me ra kua talega ni guilecava ni ra na kila vakavinaka sara na veika era vakayacora.¹⁸

E sega ni dua na ka eda wilika, na ka ga eda na vunauca vei ira na tamata na veika ga sa vakaraitaka na Turaga na noda Kalou, eda na vakamacalataka ka vakasalataka vei ira na tiko vei ira na vakatulewa, e nodra itavi ka bisinisi talega me ra vunautaka na ivakavuvuli ni kosipeli i vuravura kivei ira talega na Yalododonu Edaidai, me ilutua tiko ga ni nodra veivakavulici kei na nodra veidusimaki e na vosa ni Kalou e sa vakatakilai. E vuqa sara na ka e sa vakatakilai ka se sega ni bulataki, au vakadeitaka oqo vei iko. E levu sara na ka e se vo tiko me da vulica. E vuqa talega na veika me vakavulici e na yalo ni veituberi, e vuqa talega na veika sa vakaraitaki vua na Parofita o Josefa kei ira na nona ilawalawa era se bera ni ciqoma na tamata e yalodra, ka se bera sara ni mai lewena me kena dodonu.

E na gauna eda talairawarawa kina ka rawa talega ni vakamuria na vunau ni kosipeli kei na lawa ni Kalou kei na veika e vinakati mai lomalagi, e sa vakaraitaki oti, e na vinaka cake sara vei keda ka volekata na noda inaki ni vakavinakataki ni vuku, na kila kei na kaukaua mai vei keda edaidai. Ni sa yaco mai na gauna oya e na vakatakilai kina eso na veika lelevu sara vei ira na tamata ni Kalou. Me yacova ni da sa vakayacora na noda itavi, e na veika eda sa taura oti, me yacova talega ni da sa yalo vakabauta e na veika sa tiko oqo e ligada, me yacova ni da sa bulataka tiko na noda lotu me vaka oqo, me vaka sa solia vei keda na Turaga, me tomani kina na ivakaro, na rarama kei na kila ka vei keda me baleta na veika sa tauri oti, ka se bera ni da vakamuria taucoko, e na vakavuna na veivakarusai vei keda yadua. Sa rauti keda me da bulataka tiko e na rarama ni veivakauqeti kei na ivakatakila edaidai, me ra vakamuria tiko na lewenilotu na ivakaro ni Turaga ka cakacaka e na Lotu me vaka sa vakaitavitaki ira kina na Yalo Tabu me idusidusi ni nona itavi vakacakacaka. O keda yadua e rawa ni soli vei keda na veivakauqeti ni Kalou, me vakaraitaka vei keda na noda itavi kei na kena qaravi.¹⁹

Na ka ga me da cakava me da bulataka na bula e vakamuria na rarama kei na kila e sa vakaraitaka vei keda na Kalou e na itabagauna oqo, me da veimaliwai vinaka kei na kaukaua vakalomalagi kei na tamata vakalomalagi, e vakabibi sara ga na noda Turaga o Jisu Karisito o koya e noda iliuliu ka tiko sara e cake, o koya e solia na lawa, na noda ivakaraitaki, na sala kei na bula kei na noda vakabulai e vuravura; e na vukuna ga eda na rawa ni curuma kina na Matanitu ni Kalou vakasilesitieli, ke sega o koya eda na sega ni curuma rawa na ituvatuva ni lagilagi e na nona itikotiko me tawamudu. Ia ko i au na rarama kei na vu-ni-bula kei vuravura; o ira kece na vakamuria na noqu ivakaro, e sa solia o koya ka vakayacora na cakacaka e sa vakayacora ka vakarota vei keda meda vakayacora e na sega ni lako e na butobuto, e na tiko ga vei ira na rarama ni bula.²⁰

Me iUlutaga ni Vuli

O cei e na tiko vua se na rawata”na Yalo Tabu ni ivakatakila”?
Na ituvaki ni bula cava soti e tiko me da marautaka kina na veivakasalataki se na veidusimaki ni Yalo Tabu?
Na cava na nomu nanuma me baleta na veidusimaki ni Kalou e na domo rogo lailai ni Yalo Tabu, mai na dua na ivakatakila e uasivi sara”? (raica 1 Tui 19:11–12.) E na sala cava e veidusimaki kina na Kalou e na domo sa rogo lailai?
Eda kila vakacava ni da sa vakaukauataki e na Yalo Tabu ni Turaga? (Raica V&V 6:15, 22–23; 9:8–9; 11:12–14.)
Na cava eda sega ni vakaukauataki kina me da vakamuria na vei vakauqeti ni Yalo Tabu? Na cava o nanuma kina ni Kalou e “taleitaka na loma soli”?
Me da bula vakacava me da rawata kina na veidusimaki ni Yalo Tabu? Na cava e na vakataotaka na noda taura na veivakauqeti ni Yalo Tabu?
E na gauna cava e vukei iko kina na Yalo Tabu me vakarabailevutaki kina na nomu kila na dina ni Kalou?
Na veivakalougataki cava e na soli vei ira na vakabauta na veivakauqeti ni Yalo Tabu mai vei ira na vakanuinui tiko ga e na “cina kerei se na kena iyaloyalo”?
Eda na vakarautaki keda vakacava me da taura kina e levu na rarama kei na kila ka? (Raica Alama 12:10.)

Joseph F. Smith and Charles W. Nibley — O Peresitedi Joseph F. Smith, e na yasana imawi, kei na Bisopi iLiuliu o Charles W. Nibley e na dua na ikelekele ni sitima ni vanua. E na dua na vodo sitima ni vanua vakaoqo kei Bisopi Nibley, e taqomaki kina o Peresitedi Smith baleta ni a vakarorogo e na domo sa rogo lailai ni Yalo Tabu.