Wase 21: iSoqosoqo ni Veivukei: E Tauyavutaki Vakalou me Baleta na Nodra Vinaka na Yalododonu.

Wase 21

iSoqosoqo ni Veivukei: E Tauyavutaki Vakalou me Baleta na Nodra Vinaka na Yalododonu.

E tauyavutaki na iSoqosoqo ni Veivukei e na lewa tabu me vakayacora na veivakacegui vei ira na lewenilotu era leqa tu ka me vukea talega na nodra bula vakayalo na marama mai Saioni.

Tukuni e na Bula i Joseph F. Smith

E tukuna vakaoqo o Peresitedi Joseph F. Smith me baleta na iSoqosoqo ni Veivukei ni a “tauyavutaki vakalou, lewai vakalou, qaravi ka tabaki talega mai vua na Kalou.”¹ E dau vakaitavitaki koya e na levu sara na soqo ni ra dau kumuni vata mai na iSoqosoqo ni Veivukei, ka dau vakacaucautaka talega e na yalololoma na nodra cakacaka na marama. E na 17 ni vula o Maji 1892, era a soqoni vata kina na iSoqosoqo ni Veivukei me ra marautaka kina na 50 na yabaki ni kena a tauyavutaki na isoqosoqo oqo, ka vakayacori kina e dua na kena lotu me kena ivakananumi ka yacana tiko na lotu ni Jupili Siliva. E na Tabernacle mai Salt Lake ki na vei tabana, tabana lelevu kei na vei iteki kece ni Lotu, o ira na veiliutaki e na iSoqosoqo ni Veivukei oqo kei ira na iliuliu vakamatabete era mai vakaraitaka kina na nodra ivakacavacava ni kena a tauyavutaki na iSoqosoqo ni Veivukei kei na balavu ni gauna ni nodra veiqaravi tiko mai kina na marama ni Lotu.

O ira kece na lewenilotu era tiko e na soqoni vata oqo e na veiyasai vuravura era sa vakasalataki me ra cokovata mai e na dua na masu. E na gauna oya a se iVukevuke tiko kina nei Peresitedi Wilford Woodruff o Peresitedi Joseph F. Smith, ka cabora kina e dua na masu oqo ni veivakacaucautaki kei ni vakavinavinaka e na Valevakawawa: “Ni sa solia vei keimami e dua na ivakatagedegede ni rarama ka sa vakamarautaka kina na yaloi keimami ka sa vukei keimami talega me keimami qaravi kemuni. … Ni sa solia talega vei keimami na yalo me keimami tauyavutaka kina na nomuni Lotu e vuravura, ka vakasaqara kina na bula dodonu,” e tukuna o koya. “Vakalougataki ira … na lewe ni iSoqosoqo ni Veivukei e vuravura taucoko, mai Saioni kei ira era tu e na veivanua tani, o ira talega e na yanuyanu e na wasa bula, se e na veivanua era dui soqoni kina .… Mo ni tiko vata kei ira vakayalo me vakalougatataki ira, me vakavuna kina na yalodra me ra marau e na nomuni iserau.”²

iVakavuvuli i Joseph F. Smith

Na iSoqosoqo ni Veivukei e tauyavutaka na Kalou.

Sa dua na isoqosoqo vinaka ka kaukauwa na iSoqosoqo ni Veivukei ni Lotu i Jisu Karisito ni Yalododonu Edaidai ka levu sara na cakacaka e dau nuitaki vei ira!³

E sega tale ni dua na isoqosoqo ni marama e tiko e vuravura e tiko e na ivakatagedegede cecere ni lewa vakalou me vaka e tiko vua na isoqosoqo oqo e vuravura. Na vei soqosoqo tale e so era tauyavutaka ga na turaga se na marama. … Na isoqosoqo oqo e tauyavutaka mai na Kalou, e na lewa vakalou, veiliutaki vakalou, ka tabaki talega mai vua na Kalou me ra qaravi kina na nodra vakabulai na yalodra na marama kei na turaga. O koya gona e sega kina ni levu na isoqosoqo e rawa ni vakatautauvata kaya, se tiko e na ivakatagedegede e tiko kina, vakavo sara ga ke tauyavutaka na Turaga edua tale na isoqosoqo. Kevaka sa kina, e na vakayacora o Koya e na sala vakamatabete, me vaka ga na sala dodonu ni kena a tauyavutaki kina na itutu vakamatabete, e na sega tale ni dua na sala.⁴

Era rawa ni tauyavutaka na marama na isoqosoqo ni veitokani, na isoqosoqo ni veimata tamata, ka tauyavutaka na kena lawa, vola na kena ituvatuva ni veidinadinati, vakadeitaki ni lawa ni nodra dui matanitu ka vuqa tale na veika era vakayacora. Mo kua ga ni guilecava, ni na sega ga ni rawa ni tautauvata kei na kena dau tauyavutaki na iSoqosoqo ni Veivukei e na veitabana ni Lotu i Jisu Karisito ni Yalododonu Edaidai. … Me ra kua ni liutaki iko na marama e vuravura; mo liutaka na vuravura o iko ka liutaki ira talega na marama e vuravura, e na veika kece e dau vakacaucautaki, na veika kece e vaka na Kalou kei na veika kece e bulabula ka savasava kivei ira na luve ni tamata. …Vakaliuca na [iSoqosoqo ni Veivukei], vakayacora me veiliutaki, me cecere, me vinaka sara ka me yaga mai na vei mataisoqosoqo era tiko oqo e vuravura. Sa rogo mai na domo ni Parofita ni Kalou mo vakayacora me cecere sara, me vinaka ka taleitaki, me savasava ka me qaravi matua na dina, me nomu itavi talega mo marautaka na isolisoli ka taura na veika e lako vata mai na nomu ilesilesi kei na veika talega e solia mai vei iko na Turaga ka taura kina na Nona isolisoli.⁵

Na iSoqosoqo ni Veivukei me qaravi ira na dravudravua, vakacegui ira ka soli vakasala vei ira.

Au vakabauta na nodatou iSoqosoqo ni Veivukei e sa vakayacora tiko e dua na cakacaka vinaka ka bibi vei ira na tamata. … Sa isoqosoqo yaga me vinaka kina o Isireli, e na vukudra talega na ganeda, na tina kei na luvedra yalewa mai Saioni.⁶

E so na mala ni vosa oqo me baleta tiko na iSoqosoqo ni Veivukei. Oqo e dua na isoqosoqo e tauyavutaka na Parofita o Josefa Simici. E dua talega na isoqosoqo makawa ni Lotu, e kena imatai ka yaga sara. E sega walega ni veiqaravi vei ira na dravudravua, na tauvi mate se vei ira na vakaleqai tu ka tiko tale e so na itavi e dau vakayacora—me qarava na veika vakayalo kei na nodra vakabulai na tina kei ira na luvedra yalewa mai Saioni; me ra raica me kua ni dua e sega ni qaravi, ka me ra qarauni ni ra leqa, mai na veika rerevaki, na kaukauwa ni butobuto, kei na veika ca era dau sotava e vuravura. Sa nodra itavi na iSoqosoqo ni Veivukei me ra dau qarauna na veika vakayalo me baleti ira kei ira na marama lewenilotu.⁷

E vei e vuravura me da vakasaqara kina na vinaka, na yalo ni dina, na yalo savasava, na loloma vakalou, na vosota, vakadede kei na ka rarawa, na loloma kei na veika e dau veivakalougatataki, ke da sega ni vasaqara e na isoqosoqo e vakavulici ira na tina kei na luvedra yalewa mai Saioni. Na kaukauwa cava e tiko vei kemuni na ganequ lomani, e na nomu vakayacora tiko na nomuni ilesilesi, mo agilosi ni veivakabulai vei ira na rarawa tu kei ira na sa lutu tu, kivei ira na sese tu, na malumalumu kei ira na vakasaqara na loloma, e tiko vei iko na kaukauwa mo vakayagataka vei ira na tamata ni Kalou kei ira na tamata e vakadonui vei iko mo tokoni ira!

Ke vinakati na veivakacegui, e sa tauyavutaki kina na isoqosoqo oqo me voleka yani ka vakavakarau talega me qarava na veivakacegui e vinakati. Vei ira na tauvimate e tiko na tabana ni veiqaravi mai na levu na tabana ni soqosoqo oqo e rawa ni ra qaravi kina. Ke lailai na kila ka me baleta na ivakavuvuli ni bula, na ivakavuvuli ni bula dodonu se na ivakavuvuli tale e so e gadrevi, na isoqosoqo oqo e na tiko voleka me soli vakasala, me vakaraitaka ka vakavulica mai na nodra ivakaraitaki kei na vunau vei ira na vinakata na veivuke kei na qaravi ni nodra bula.

Ni sa tiko na lecai ka se na tawa kilai ni veika me baleta na vuvale, na nodra itavi kei na itavi ni veiwatini, na tama kei na tina, na itubutubu kei ira na luvedra, e tiko e na isoqosoqo mai na edaumeni kei na kena veivakauqeti ka sa tu vakarau me ra soli vakasala kina itavi bibi e vakamacalataki tiko. Vua beka e dua na tina sa vakaluveni gone ka se qai imatai ni gauna me vakasucuma kina na luvena se me qarava kina, se me vakarautaka na nodrau vale me vinaka, matau ka rairai vinaka me taleitaki ruarua vei koya kei watina, e tiko e dua na tabana ni soqosoqo oqo me vakasalataki ira na vakaluveni ni ra se gone kina ka me vukei ira me ra kila na nodra itavi vakatina ka vakayacora vakavinaka. Ke se sega ni matata vinaka na ituvatuva ni kena vakani na gone se me vakarautaki na veika e dodonu me ra taura, na kena vakarautaki na veika vakayalo me baleta na gone se na kena kakana vakayalo, e umani tiko na isoqosoqo ni marama ni veivukei e na Lotu i Jisu Karisito ni Yalododonu Edaidai kei na isoqosoqo ni nodra na tina kei na luvedra yalewa i Saioni era sa vakayaragi tu me ra veivuke ka soli vakasala talega me baleta na veivuke e gadrevi.⁸

Dau qarauni ira vinaka sara na dravudravua e na gauna oqo. … E tiko e so e vinakata na veivuke ka ra sega ni vinakata m vakaraitaka. Sa nomu itavi mo raici ira na vakaitikotiko voleka vei iko se na vanua voleka vei iko. Nanumi ira na sa qase, o ira na luve ni yali kei ira talega na dawai.⁹

E dua na ka taleitaki vei au na noqu rawa ni sikova yani e dua na itikotiko e na taudaku ni iTeki e Saioni ka veitauvi tiko kina vakalevu na mate e na gauna oya, e vica na siga na neitou lako tiko yani kina vanua oya ka qai yaco yani ni sa yakavi na vanua, keitou sa kerei sara me keitou veisiko wavoki kei na peresitedi vei ira e so na tauvi mate. Keitou laki raica sara e dua na ganeda e davo vakaitobuicu tu e na nona idavodavo ka tauvi mate bibi sara tu. Na watina tagane e dabe toka e na idavodavo e tikina ka mai veilecayaki tu baleta na bibi ni mate sa tauvi watina tiko ka ratou tucake wavokita tiko na gone na idavodavo nei tinadratou. E vaka ni leqa sara tu ga na vuvale oya e na veika kece.

Ni keitou se tiko ga e na vale oya sa curu sara mai e dua na marama e vaka ni cakacaka tiko e na dua vanua ni veiqaravi na kena irairai ka tubera tiko mai e dua na basikete e tawa tiko e loma e so na kakana bulabula kei na veika e so ni vakalomavinakataki me kedratou na vuvale e sa mai vauci bibi tu oqo e na mate. Ni oti na neitou vakatataro e sa qai matata vei keitou ni a lesi na marama oqo mai na nodratou tabana levu ni iSoqosoqo ni Veivukei me mai veiqaravi tiko vua na tauvimate oqo e na bogi taucoko. E sa vakavakarau tu mai na dauveqaravi oqo me mai raici iratou talega na gone, me vakasilimi iratou, vakani ka vakamoceri; me samaka vinaka talega na vale me ratou vakacegu vinaka kina na tauvimate kei iratou na luvena kei na matavuvale. Keitou qai kila talega e muri ni na mai veisosomitaki e na veiqaravi oqo e dua tale na marama e na mataka ni siga ka dua; e na vakatiko oya na itovo ni veiqaravi e na veisiga kei na kena e rawa ni vakarautaka mai na ganeda mai na iSoqosoqo ni Veivukei me yacova ni sa yaco mai na bula vinaka me mai vakamamadataka na mate e sa mai veitauvi tiko oqo se me ratou sa na bula vinaka kina.

Keitou kila e muri ni sa veiqaravi tiko na tabana ni iSoqosoqo ni Veivukei ka veivakavulici tiko e na kena qaravi o ira na tauvi mate e na vuvale yadudua era vakaitikotiko e na vanua oya. Au se sega ni bau raica vakadua na kena matata na vakaraitaki kei na vakayagataki ni isoqosoqo oqo me vaka keitou sa raica ni sa vakayacori tiko e ke, na totoka kei na maqosa ni veiqaravi sa uasivi sara, au qai nanuma e muri ni dua na ka talei e na nona vakauqeta na Parofita o Josefa Simici na Turaga me tauyavutaka e dua na isoqosoqo vaka oqo e na Lotu.¹⁰

O ira na marama e na iSoqosoqo ni Veivukei me ra vakaukauwataka na nodra vakabauta kei na nodra kaukauwa vakayalo kei ira talega era veiqaravi kina.

O cei e rawa ni tukuna na levu ni veika vinaka e rawa mai vei ira na Yalododonu ni dau tauyavutaki vakavinaka ka vakavulici talega vakavinaka o ira na lewe ni iSoqosoqo ni Veivukei, e sega walega ni veika e baleta na veika vakayago me baleta talega na veika vakayalo. Na cakacaka e vakayacori e na loloma e na yaga sara se na vakavotukana ke me vakaliuci se me cicivaki vinaka ka me dei kina na yalodra ka lomani kina na tamata e qaravi Ni da sa vakadeitaka na yalodra e na cakacaka rawarawa ni veiqaravi e na tadola talega kina na yalodra me ra vakaliuci yani kina vakatagedegede sara icake ni vakabauta kei na bula vakayalo baleta ni da kila na bibi ni veika vakayalo e bibi sara mai na veika vakayago . …

Ni da vakadikeva vakamalua e vinaka cake meda kua ni kana se mate e na noda vinakata na kakana vakayago se mo sosomitaka ka mate baleta na leqa ni vakasama se na vakasama vakayalo e vinakati me rawa kina na isolisoli ni bula tawamudu na isolisooli cecere taudua ni Kalou. Me da rawata na kila ni vakavuvuli ni dina tawamudu e bibi vei au mai na kakana se na isulu. Io e da vinakata ruarua na ivaqa vakayago kei na vakayalo ka sa tabaka na Kalou me vakarawarawataki na veika oqo vei ira kece na tamata vakavo sara ga kevaka era vakamuria na nona lawa ka gumatua na kena bulataki.

E dua na ka taleitaki vua e dua e cakacaka tiko e na tabana ni iSoqosqo ni Veivukei me tauri ira na gone ni ra se lalai sara ka tuberi ira e na nodra vakavulici me ra dau yalo dina, tovo savasava, vakabauta na Kalou na Tamada Tawamudu kei na nona ilesilesi vakalou i Luvena, ka me vakasalataka na tinadra me tuberi ira mai na luvedra e na sala vata ga oya. Oqo e dua na itavi bibi ni qaravi wale tiko ga na veika vakayago e tukuni se vakaraitaki vei iko mo vakayacora, kemuni na ganequ. E dina ni sega na iyalayala ni veika o vinakata se na rawata e na nomu vinakata mo vakayacora na veika vinaka e na kena sala kei na kena vanua ke tiko kina na nomu kaukauwa.¹¹

Na nodra cakacaka na lewe ni iSoqosoqo ni Veivukei e baleta tiko na veika vakavuravura e na bula oqo, ki na veika vakayago e baleti ira na tamata e na Lotu, io na kena kaukauwa e na rairai na yacova yani na bula tawamudu baleta e laki tara talega na bula vakayalo kei na veika e da gadreva vakayago. … E noda itavi talega na qarauni ira na luveniyali kei ira na vakaloloma, e sega walega ni baleta na veika era vinakata me ra bula kina e baleta tale tiko ga nodra vakatoroicaketaki vakavakasama kei na vakayalo. E dodonu me da tina kivei ira na luveniyali ka vukei ira na vakasaqara na veivuke. Sa dau veitokoni na Lotu e na veiqaravi vinaka vakaoqo.¹²

E dua na ka bibi oqo na veika vakayalo, na veika e dau tara cake kina na nodra vakabauta na turaga kei na marama, na veika e dau solia na rarama, na vuku kei na kaukauwa me da vorata kina na ca kei na veitemaki ki na valavala ca, na kaukauwa me da kila kina na lawaki ca ni tamata, ni sa ilawaki ca ni tamata e na dauveivaqaseni sa nakiti kina na veivakacalai. Na vuku, na kila vakayalo, kei na vuku vakayalo e na rawa kina vei iko mo kila na duidui ni veika dina kei na cala, na rarama mai na butobuto, na vinaka mai na veika ca, oqo na veika bibi e dodonu me da vakasaqara ka taukena.¹³

Vakasamataki Nei Em [Emmeline B. Wells, peresitedi raraba ni iSoqosoqo ni Veivukei] … ni dau lako tiko mai i Lotu ni se gone yalewa lailai, na nona bulataka tiko mai na veika dauveivakatovolei, na dredre kei na rarawa e dau vakavuna kina na nuiqawaqawa kei na veikauwaitaki e na nodra bula tiko mai iliu na Yalododonu Edaidai, na nodra biubiu mai Missouri kei Nauvoo kina Buca ni veiulunivanua, e na vanua veidravuisiga ka sega kina na vanua me butu dei kina na yavadra kei na vanua me ra vakadavora kina na uludra. E vakayalomalumalumutaki koya beka? E vakamalumalumutaki tinaqu? E vakamalumalumutaki Nei Vilate Kimball? Sega; era wilika taucoko na veika oqo ka sega ni vinakata ka bese ni waqaca na veika e tiko e yalodra vua na nodra Kalou kei na Nona dina. O na vakasukai ira lesu mai na marama mai na itavi era sa vakaitavi tiko kina e na Lotu i Jisu Karisito ni Yalododonu Edaidai? O na vakabutobutotaka na nodra vakasama e na ilesilesi ni Parofita o Josefa Simici? O na vakabutobutotaka vei ira na veika me baleta na ilesilesi tabu i Jisu Karisito, na Luve ni Kalou.? Sega, au na sega ni vakayacora. Baleta na cava? Baleta ni ra sa kila. E sa vakaraitaka na Kalou vei ira, ka ra sa kila vinaka tiko, e na sega ni dua na kaukauwa e tiko e vuravura e rawa ni vukici ira tani mai na dina. Na mate e sega ni dua na ka vei ira. Na veika dredre e na sega ni dua na ka., na liliwa se na uca, se na katakata. Na ka era kila, vakila ka vinakata na qaqa ni matanitu ni Kalou kei na dina e solia vei ira na Turaga.

Na yaloqu, sa ivei o ira na marama oqo e na gauna oqo? E tiko oqo e so vei ira, au vakavinavinaka vua na Kalou, ni ra se tiko ga oqo e lewe levu. E so e tiko oqo era sega so ni dina. … Ke o vakadikeva sara vakamalua na nodra bula, na yalodra kei na nodra itovo, na veika era dau vakayacora e vale, e sega ni ka eda vakasaqara tiko, era sega talega ni koya na kosipeli era ciqoma na marama kei na turaga era vakadonuya ka bulataka tiko, baleta ni ra sega ni kila o ira na kosipeli se bulataka tiko. Ia, ni da raici ira yani o na rairai nanuma beka ni vinaka sara tu ga na veika e baleti ira, ka tiko vei ira na rarama, na vakabauta, na vuku kei na kila, io e sega ni tiko,—e sega ni tiko vei ira. E na gauna e rau na sega kina ni masu vua na Kalou na yalewa kei na tagane, e na leqa tiko e dua na ka. … Era na sega tiko ni dei, e sega vei ira na vakabauta, ka sega talega na loloma e lomadra ka dodonu me tiko vei ira.¹⁴

Na vosa ni Kalou e bibi sara vei ira na marama me rawa ki na me ra vakatulewa vinaka me vakataki ira na tagane; me ra vulica ka raica na leqa ni Nona cakacaka e na gauna edaidai mai na rai ni nona ivakatakila na Kalou, e na gauna e na vakauqeti kina mai na nona Yalo Tabu, ni oya e nodra dodonu me ra ciqoma e na nodra masu mai yalodra dina.¹⁵

Me da veitauriliga ka cakacaka vata me baleta na veika vakayago kei na veika vakayalo ni Lotu, ka me da tomana tiko na noda cakacaka kaukauwa me baleta na veika e dau veivakabulabulataki vakayalo ka yaga talega vakayalo kei na veika ni bula vakayalo kei na vakabulai talega ni Lotu.¹⁶

E na sega ni tu vakaikoya ga na iSoqosoqo ni Veivukei mai vua na matabete ni Luve ni Kalou.

O ira kece na ganeda era vakaitavi tiko e na cakacaka ni iSoqosoqo ni Veivukei … e da vakarokorokotaki ira, e na noda nuidei ni na tiko kei ira na veivakalougatataki ni Turaga. E sa dau vakayacora oti o koya ka na vakalougatataki ira tiko ni ra tokona tiko na Matabete ni Kalou e sa mai tiko oqo e vuravura me tubera na Lotu ka veidusimaki e na veika me baleta na matanitu ni Kalou.¹⁷

Au via tukuna … vei ira na iSoqosoqo ni Veivukei … kei ira kece na veitabana ni soqosoqo e na Lotu, ni sega ni dua vei ira e na tiko tani mai na Matabete ni Luve ni Kalou, e na sega ni rawa ni dua vei ira e na bula tiko kena sega ni vakadonuya na Turaga, e na gauna talega era na sega ni vakamuria kina na domo kei na veivakasalataki mai vei ira e tiko vei ira na itutu vakaMatabete ka liutaki ira tiko. Era na vauci e na kaukauwa kei na lewa vakaLotu, me ra wasei tani mai vei ira; se me ra na vakayagataka na dodonu se kaukauwa e na nodra dui isoqosoqo e duatani mai na Matabete se na Lotu.¹⁸

Mai na yaloqu taucoko,e dua ga na ka au vinakata mai vei ira na marama vinaka, o ira na vakaitavi tiko e na cakacaka kei na veika vakaturaga, oya me vakalougataki ira na Kalou, taqomaka na nodra bula, vukei ira me ra dei ka dina e na nodra itovo me baleta na cakacaka i Saioni; ka me vukei talega o ira me ra vakila e yalodra me kua ni dua na ka e vakaliuci mai na Lotu i Jisu Karisito ni Yalododonu Edaidai, ka sega talega ni dua na ka e vinaka cake mai na Lotu e na ruku ni matanitu vakasilesitieli. E tiko vua na Lotu na kaukauwa ni Kalou, na kilikili, dina kei na lewa vakalou me vakayacora kina na nona inaki e vuravura.¹⁹

Me iUlutaga ni Vuli

E na lewa cava e tauyavutaki kina na iSoqosoqo ni Veivukei? E vukei ira vakacava na marama me ra vakayacora na nodra itavi ni ra kila ni a tauyavutaki vakalou na iSoqosoqo ni Veivukei? E vukei ira vakacava na kila oqo o ira na vakaitutu vakamatabete me ra vukei ira kina na lewe ni iSoqosoqo ni Veivukei?
E rawa vakacava vei ira na ganeda e na iSoqosoqo ni Veivukei “me ra liutaki … ira na marama ni vuravura” e na vakacaucautaki, veivakabulabulataki, ka veivakasavasavataki? (Raica Na Yavu ni Vakabauta 1:13.)
Era na rawata vakacava na nodra itavi na ganeda e na iSoqosoqo ni Veivukei “e ra lesi me ra agilosi ni loloma vei ira na rarawa kei na vakaloloma ?” E na rawa vakacava “me da sikovi ira era rarawa ka sega ni kilai ?”
E na veivakacegui vakacava na iSoqosoqo ni Veivukei? E na vakavulica vakacava na ivakavuvuli ni bula dodonu? E na vakalevutaka vakacava na nodra kila na itavi vakavuvale o ira na marama?
Na cava e cecere kina na veika vakayalo? E na rawa vakacava ni vukei ka liutaki na yalo kina veika cecere ni vakabauta kei na vinaka vakayalo na “loloma e dusimaki vinaka” kei na “veika vinaka e dau vakayacori”?
Na veivakurabuitaki cava e tiko e na iwasewase oqo me baleti ira na ganeda e na iSoqosoqo ni Veivukei?
E vakalougatataki vakacava na iSoqosoqo ni Veivukei e na veidusimaki ni matabete?
E sa vakalougatataka vakacava na nomu bula na “itavi vakaturaga” ni iSoqosoqo ni Veivukei?